ལྷོ་བཞུད་ཁུ་བྱུག་སྔོན་མོ།།
ལྷོ་མོན་ཕྱོགས་ལ་འཕུར་ན།།
ཡུལ་འདིའི་གནས་ཀྱི་བཀོད་པ།།
མ་བརྗེད་ཐུགས་སུ་ཟུངས་ཤིག།
ཚང་ཚིང་འཁྲིགས་པའི་ནགས་ཀླུང་།།
ཤུགས་དྲི་འཐུལ་བའི་བསྟི་གནས།།
སྐྱིད་ལ་སྟག་ལུང་གཡང་སྡེ།།
གནམ་སྔོན་ཐང་ལ་བཏིང་འདྲ།།
དལ་འབབ་རྨ་ཆུ་ལུ་མ།།
གཡུ་འབྲུག་དགུང་ནས་འཁྱུག་འདྲ།།
བྲེལ་འབབ་ཆུ་ལེན་ཆུ་ཆུང་།།
དར་གྱི་སྐ་རགས་དཔྱངས་འདྲ།།
གནག་ཕྱུགས་ངུར་སྒྲ་ལྷང་ལྷང་།།
ཐང་ཆེན་གཡུ་ཡི་མེ་ལོང་།།
གཡང་དཀར་འབའ་སྒྲ་སིམ་སིམ།།
སྤྲིན་གྱི་རི་བོ་བཏུམས་འདྲ།།
གྱི་ལིང་རྨིག་སྒྲ་ཐག་ཐག།
སྟག་ཤར་གནམ་གྱི་སྲས་པོ།།
དགོ་དགོ་བཞོ་དབྱངས་སྙན་སྙན།།
འབྲོག་མོ་ཀླུ་ཡི་སྲས་མོ།།
ཨ་འགྲིག་རྣ་ལོང་ཆ་མ།།
བྱུ་རུའི་ཕྲ་རྒྱན་འཇོག་ས།།
ཡང་འགྲིག་དངུལ་གྱི་མེ་ཆར།།
རྟགས་བརྒྱད་རི་མོ་ཕབ་ས།།
ལུགས་དེ་གནའ་ཡི་ལུགས་ཡིན།།
དྭངས་གཙང་སྲོལ་རྒྱུན་རིང་མོ།།
གཤིས་ཡང་གནའ་ཡི་གཤིས་ཡིན།།
སླུ་མེད་བྱང་ཆུབ་སེམས་ཡིན།།
མཐོན་པོ་མཐོ་སར་བཞག་ན།།
གཉོམ་པོ་བྱམས་ཀྱིས་སྐྱོང་ས།།
དམའ་མོ་དམའ་སར་ལྷུང་ན།།
བྱམས་པ་འབངས་ཀྱིས་སྐྱོང་ས།།
ལས་ངན་བར་ཆད་ཐོན་ན།།
ལྷ་ཆོས་ཞི་བའི་སྒྲུབ་ས།།
ལྟས་བཟང་དགའ་སྟོན་སླེབས་ན།།
སོ་དཀར་མགོ་དཀར་འཛོམས་ས།།
ཁ་ཞག་ཀྱུག་གེར་ཡོད་དུས།།
ལྷ་ཆོས་སྙིང་བོ་སྒོམ་ས།།
ཁུ་ཞག་ལྡེམ་མེར་ཡོད་དུས།།
མི་ཆོས་རིན་ཐང་གླེང་ས།།
རྨ་ཆེན་ཐོང་ཀར་བླངས་ནས།།
གཏམ་གྱི་རྒྱ་མཚོ་བསྐྱིལ་ས།།
དམར་ཡག་གོང་བར་བཟུང་ནས།།
དགྲ་ལྷ་ཞི་བའི་བསྟོད་ས།།
འཛོམས་པོ་སྟ་ལུང་གཡང་སྡེ།།
བརྩེ་སེམས་ཆུ་མིག་དགུ་སྒྲིལ།།
མཛའ་བ་རྒན་དར་གཞོན་གསུམ།།
མཐུན་པ་སྤུན་བཞིའི་རང་རྣམ།།
དགོང་གའི་མཚམས་སྤྲིན་ཀྱིག་ཀྱིག།
འབྲོག་མོའི་མཁུར་ཚོས་འདྲ་ལེ།།
ལྕང་ནག་ལོ་འདབ་ལྕུག་ལྕུག།
ལན་ཆེན་ལན་ཆུང་བསྟར་འདྲ།།
སྒོ་གཉིས་སྒོ་དར་དཔྱངས་འདྲ།།
ཕུ་ནུ་འཛུམ་མདངས་རང་འཁྱིལ།།
སྡོང་ངེ་སྡོང་རྐང་སྒྲིག་འདྲ།།
མཛའ་མཐུན་རུས་ཀྱི་སྒྲོག་གུ།
རྨ་འགྲམ་རྨ་དར་ཆགས་འདྲ།།
ལྷིང་འཇགས་བདེ་ལྡན་ཞིང་ཁམས།།
ཚང་ཚིང་སྣ་བརྒྱ་འཁྲིགས་པ།།
ཁུ་ལོའི་གསུང་དབྱངས་སྙན་ས།།
གོང་ཁ་སྟག་མོ་འགྱིངས་འདྲ།།
སྟག་ཤར་རང་སྣང་མཐོ་ས།།
དཔའ་བཙན་སེང་གདོང་འདྲ་ལེ།།
རྨི་ལམ་མངོན་དུ་འགྱུར་ས།།
བདེ་མོ་ཐང་ལ་འཛོམས་ན།།
ཕོ་མགོ་མོ་མགོ་མཉམ་ས།།
ཟང་ཟིང་གྲོང་ལ་སླེབས་ན།།
ཨ་གསར་དྲུངས་ནས་འབྱིན་ས།།
རྩྭ་མགོའི་ཟིལ་བ་ཁྲོམ་ཁྲོམ།།
དངུལ་གྱི་ཆར་བ་བབས་འདྲ།།
སྤང་ལྗོངས་མཐོན་མཐིང་འདྲ་ལེ།།
མདངས་ལྡན་གཡུ་ཡི་མཎྜལ།།
སྟག་ལུང་སྐྱིད་ཀྱི་རི་སྡེ།།
མི་ནུབ་རྒྱལ་མཚན་གནས་གྱུར།།
མཐུན་པོ་ཕུ་ནུ་མིང་སྲིང་།།
ཚེ་རིང་རྣམ་དྲུག་འདྲ་ལེ།།
བཀྲ་ཤིས་གནམ་ལ་བཅོལ་ཡོད།།
སྟག་ལུང་གཡང་ཁྱིམ་གྲུ་བཞི།།
ཚེ་རིང་ཀུན་འདུས་ངོ་བོ།།
ལྷན་རྒྱས་མི་འབྲལ་སྨོན་ལམ།།
རྩོམ་པ་པོ་ངོ་སྤྲོད། མགར་ཐང་དཀར་རམ་གཅོད་པ་ཐར་ནི་དགུ་བཅུའི་སྨད་ལ་མཚོ་ལྷོ་ཁུལ་ཐུན་ཏེ་རྫོང་དུ་སྐྱེས་ཤིང་། 2018ལོའི་ཟླ་དྲུག་པར་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་གསུམ་པར་མཐོ་འབྲིང་སློབ་མཐར་ཕྱིན།རྩོམ་འབྲི་དང་ཕ་སྐད་མ་ཡིག་ལ་དུང་བ་ཆེ་རྐྱེན་སྔ་ཕྱིར«སྦྲང་ཆར»དང«ལྷོ་ཁའི་རྩོམ་རིག་སྒྱུ་རྩལ»«གངས་དཀར་རི་བོ»«ཁ་བཏགས་དཀར་པོ»«དགེ་ལུགས་ཞིབ་འཇུག»«ལོ་བརྒྱའི་ལེགས་མཛད»«སྤང་ལྗོངས»«ཁྲི་ཤོར་རྒྱལ་མོ»«བོད་ལྗོངས་ཉིན་རེའི་ཚགས་པར»«མཚོ་སྔོན་བོད་ཡིག་གསར་འགྱུར»«མཚོ་སྔོན་ཁྲིམས་ལུགས་ཚགས་པར»«ཁམས་པའི་ཚགས་པར»«མཚོ་ལྷོ་བོད་ཡིག་ཚགས་པར»«རྔ་བའི་གསར་འགྱུར»མ་ཟད«མཆོད་མེ་བོད་ཀྱི་རྩོམ་རིག་དྲ་བ»«ཀྲུང་གོ་བོད་ཀྱི་དྲ་བ»«བཙན་པོ་མགར་གྱི་དྲ་བ»སོགས་ཞིང་ཆེན་ཕྱི་ནང་གི་དྲ་རྒྱ་དང་ཚགས་དེབ་འགའ་རེའི་སྟེང་སྙན་ངག་གཙོས་བརྩམས་ཆོས་མང་ཙམ་སྤེལ་མྱོང་།ད་ལྟ་སྡེ་ཁུལ་དུ་རང་ནུས་ཀྱིས་ལས་ཀ་སྒྲུབ་བཞིན་མཆིས།