དབུས་ལམ།
ཉི་འོད་མག་མོག་གི་རྡོག་སྣེར།
དུག་སྦྲུལ་བཞིན་འཁྱིལ་ཡང་།
མེས་པོ་ཚོས་རྐྱང་ཕྱག་ས་རྡོ་ལ་ཕབ་སྟེ།
དད་པའི་བསླུ་བྲིད་འཚོལ།
དབུས་ལམ།
རྔམ་མཐུག་པའི་ཁ་བའི་ནང་།
ཀྱག་ཀྱོག་ཏུ་ཟུག་ཀྱང་།
སྙིང་ཉེ་ཚོས་རྡོག་ཁྲེས་ལྗིད་མོ་རེ་ཁུར་སྟེ།
གནས་མཆོག་གི་པང་དུ་བསྙེགས།
དབུས་ལམ།
ཕྱི་ནང་གི་རྒྱུ་རྐྱེན་དུ་མས།
བདག་གིས་རྨི་ལམ་ཁོ་ནའི་ནང་རྨིས།
རྨི་ལམ་ཁོ་ན་རྨི་ཆོག་པའི་ལམ་བུ་གྱུར།
དེ་རིང་མཁའ་ལམ་ནས།
སྤྲིན་གྱི་བང་རིམ་གཏོར་ཏེ།
གློ་བུར་ལྷ་ས་མཇལ་དགོས་སམ།
ཡང་ན་ལྕགས་ལམ་ནང་།
ས་ཆེན་པོའི་བྲང་ཁོག་གཤགས་ཏེ།
པོ་ཏ་ལའི་མཚན་མོ་ལ་དམ་དུ་འཁྱུད།
2020/12/17
ཁེར་རྐྱང་གི་ཕ་བོང་ཁ་དང་ཡིག་དྲུག
——སྐུ་མཁར་མ་རུ་མཇལ་བའི་དད་ཚོར་ཙམ།
འདི་ན། རྡོ་ཡི་ཕ་བོང་སྟེང་།
ཡ་ཐོག་ཤེས་རིག་གི་ས་བོན་སྐྱ་བོ་བཏབ་མྱོང་བས།
སྨུག་པོ་གདོང་གི་མི་རྒྱུད་ངའང་།
དད་གུས་དང་ཡིད་ཆེས་དབུགས་ཀྱིས་
མི་ཐེག་པ་འཚངས།
སྐུ་མཁར་མ་རུ།
རྒྱལ་རབས་ནང་གི་ཁྲོ་ཆུ་ཁོལ་མ་འཇགས་རྗེས།
བསྐལ་པའི་གནམ་ལ་སྙེག་པའི་ཕོ་བྲང་དགུ་བརྩེགས།
ཆེས་སྙིང་དུ་སྡུག་པའི་གྲོང་ལྟག་གི་
མཁར་ཆུང་ཕྲ་མོ་ཞིག་ཏུ་གྱུར།
སྐུ་མཁར་མ་རུ།
ལོ་རྒྱུས་ཡང་ཡང་བརྡབ་གསིག་སོང་སྟེ།
རྡོ་ཡི་ཕ་བོང་། བརྩེགས་པའི་མཁར།
མ་ཎི་འབྲི་དྲུག་གི་སྙིང་ཁམས་སོགས་སུ།
བཙན་པོའི་ལོ་གསུམ་གྱི་ཏིང་འཛིན་གང་དུ་སྦས་ཡོད།
སྐུ་མཁར་མ་རུ།
བློན་ཆེན་ཞིག་གི་ང་རྒྱལ་གྱིས་འགྱིང་གླུ་ལེན་ས།
ད་ལྟ་ཞུམ་ཞིང་བག་འཁུམས་ཀྱི་ངང་།
འདི་འདྲའི་འཁོས་ཀ་ཞན་པ་ཡིན་དགོས་སམ།
འདི་འདྲའི་ཉམ་ཆུང་ཡིན་དགོས་སམ།
2020/12/20
མེ་ཏོག་ལྡུམ་རའི་ཀླན་ཀ
མེ་ཏོག་ལྡུམ་ར་ནང་།
ངེས་མེད་ཀྱི་མགྲོན་པོ་བསླུ་བའི་
ཟོལ་ཚོང་མཁན་ལས།
དུག་སྦྲང་ཡོད་ཚོད་མི་འདུག།
མེ་ཏོག་ལྡུམ་ར་ནང་།
རིན་གོང་ལྡབ་འགྱུར་འཕར་བའི་
ཤིང་མར་གྱི་འབག་བཙོག་ལས།
བསིལ་རླུང་ཡོད་ཚོད་མི་འདུག།
མེ་ཏོག་ལྡུམ་ར་ནང་།
དུས་ཚོད་མི་འགྲོ་བའི་
ཨ་ཅག་ཚོའི་ངག་འཆལ་ལས།
ཚངས་མགུར་ཡོད་ཚོད་མི་འདུག།
མེ་ཏོག་ལྡུམ་རའི་ནང་།
ཁྲག་རྒྱུན་མི་ཤེས་པའི་
ལྡོམ་པོ་ལས།
གནམ་གྱི་སྐུ་སྲས་ཡོད་ཚོད་མི་འདུག།
མེ་ཏོག་ལྡུམ་རའི་ནང་།
འཁོར་འདས་བར་གྱི་ཀླན་ཀ་ལས།
ལྷིང་འཇགས་ཀྱི་
སྐྱེད་མོས་ཚལ་ཡོད་ཚོད་མི་འདུག །
(མཆན།)གླང་མདུན་དཔལ་འབྱོར་གྱི་སྒྲུང་རྩོམ་ཞིག་གི་མིང་འདིར་བཏབ་པ་ཡིན།
2020/12/26
མུན་གྲོལ། ལོ་རབས་དགུ་བཅུ་པའི་ནང་ཟུར་མང་དུ་སྐྱེས། ནང་བསྟན་མཚན་ཉིད་རིག་པ་དང་སྙན་གཞུང་མེ་ལོང་མ་སོགས་ལ་སྦྱངས་པ་ཅུང་ཟད་བྱས་ཤིང་། བར་སྐབས་སུ་རིག་གཞུང་དཔྱད་རྩོམ་དང་མི་གཤིས་མངའ་བའི་སྙན་ངག་ཁ་ཤས་བྲིས་ཏེ《གཏན་ཚིགས》དང《གངས་རྒྱན་མེ་ཏོག》《མི་རིགས་ཀྱི་རྩོམ་རིག》སོགས་སུ་སྤེལ། ད་ལྟ་མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱི་ཚོགས་མི་དང་ནང་ཆེན་རྩོན་རིག་འཕྲིན་སྟེགས་ཀྱི་རྩོམ་སྒྲིག་འགན་ཁུར་མི་སྣ་བཅས་ཡིན། །