འཚོ་བ་ཟེར་བ་འདི་ཆུ་ཚོད་འཁོར་ལོ་དང་འདྲ་ཞིང་།
ཚག་ཚག་གི་སྒྲ་ཆུང་རེ་རེ་སྙིང་གི་འཕར་ལྡིང་གི་མཚོན་བྱེད་ཡིན་ལ།
དལ་མེད་བགྲོད་པའི་སྐར་མདའི་འཁོར་སྟངས་དེ་ནི་ཚེ་སྲོག་གི་བསྡུས་གཟུགས་སིལ་བུར་གཏོང་བའི་གོ་རིམ་ཞིག་ཡིན།
མི་རེ་རེར་རང་ཉིད་ལ་དབང་བའི་འཚོ་བ་རེ་ཡོད།
མི་ལ་ལའི་འཚོ་བར་བཀྲ་ཤིས་རྟགས་བརྒྱད་ཀྱི་རི་མོ་ཚང་ཡོད།
རེ་འགར་འཇའ་ཚོན་སྣ་ལྔའི་ཁ་དོག་གིས་བརྒྱན་ཡོད།
ཁ་ཅིག་ངན་པ་དགུ་འཛོམས་ཀྱི་གནས་ཚང་ཡིན།
ཁ་ཤས་ཡི་དྭགས་ཁྱུ་ཡི་འཇིག་རྟེན་དུ་ངེས།
ནམ་ཞིག་ཚག་སྒྲ་ཐོས་རྒྱུ་མེད་ཚེ་སྐྱིད་ལ་སྡུག་པའི་མི་ཚེར་ཞལ་གྱེས་ཞུ་བའི་སྟ་གོན་བྱེད་རན་ཨང་།
སྐར་ཆ་རེ་རེས་འགྲུལ་མཚམས་མ་བཞག་པར་ཐྲིག་ཐྲིག་གི་གོམ་སྒྲ་དང་བཅས་ཏེ།
སྐར་མདར་ཚ་འདེད་གཏོང་ཞིང་ཆུ་ཚོད་མདུན་ནས་མདུན་ལ་འདེད། ཉིན་སྲིབ་རེས་མོས་ཀྱིས་གཟའ་འཁོར་ལ་དཔུང་འཇུག་བྱས།
ཟླ་བ་ཞེས་པའི་རྒྱལ་ཕྲན་སིལ་མ་དབང་དུ་བསྡུས་ཏེ། ལོ་ཡི་རྒྱལ་ཁམས་ཆེན་པོའི་སྲིད་ཁྲིར་ཞབས་སོར་འཁོད།
བྱ་བ་ཡོད་མཁན་དག་ཆུ་ཚོད་ཀྱིས་ལུག་ཁྱུ་བཞིན་སྒང་གཤོང་འབར་འབུར་ལ་དེད་དེ་ལྷོད་པོར་བཞུགས་ལོང་མི་སྟེར་ཞིང་།
བྱ་བ་མེད་མཁན་དག་ནི་ཉི་ཟླ་རེས་འཁོར་གྱིས་ན་ཚོད་ཀྱི་ཁུར་པོ་བཀལ་ཏེ་སྐྱིད་པོའི་མལ་ནས་ཉལ་བཟོད་མི་བདེ་བར་གཏོང་།
མི་རེ་རེས་རང་རང་ས་ན་ཁ་སང་གི་བྱ་བར་ཉོབ་སྣང་ཅི་ཡང་མེད་པར་ལས་སྐྱོར་བྱེད་ཅིང་།
ཁ་སང་གི་མི་ལ་སུན་སྣང་ཁྱོན་ནས་མེད་པར་ཐུག་སྙིང་འདོད།
ཁ་སང་ལ་ལད་མོ་བྱས་ནས་དེ་རིང་གི་བྱ་བ་བསྒྲུབས་ཤིང་།
ལད་མོ་སུ་མཁས་ཀྱི་འགྲན་སྡུར་ཁྲོད་སང་ཉིན་གྱི་བྱ་བའི་ཡང་ལྕིའི་ཁྱད་པར་བྱུང་།
དེ་རིང་གི་བྱ་བ་ནི་ཁ་སང་གི་ལས་འཕྲོ་ཡིན་པས།
དེ་རིང་གི་ལས་གཞུག་ཀྱང་སང་ཉིན་ལ་གཞག་དགོས། སང་ཉིན་གྱིས་སླར་ཡང་སང་ཉིན་ལ་བཅོལ་འགྲོ།
སང་ཉིན་ནི་གམ་དུ་ཡོང་གིན་པའི་སང་ཉིན་འབུམ་ཕྲག་གི་མིག་དཔེར་ངེས་ལ།
རྒྱང་དུ་བཞུད་ཟིན་པའི་དེ་རིང་ཁྲི་སྟོང་གི་ལས་གཞུག་གུ་སྐྱོང་མཁན་ཡང་ཡིན། །
ཆོག་ཤེས་ནི་བདེ་སྐྱིད་ཡིན་ན། བདེ་སྐྱིད་ལ་སྣང་བ་མི་འཇོག་དོན་ག་རེ་ཡིན་ནམ།
ཟས་ཞིམ་པོ་ཁམ་གང་དང་གཉིད་སྐྱིད་པོ་མཚན་གང་ཁུག་ན་དེ་ཡིས་འདོད་བློ་ཅིས་མི་ཚིམ།
ཡོད་ན་སྲུང་བའི་སེམས་ཁྲལ་ཕྱུག་པོའི་སེམས་ལ་ལྕི་ཞིང་།
མེད་ན་གསོག་པའི་འོ་བརྒྱལ་དབུལ་པོའི་ལག་ན་གསལ།
འཚོ་བ་ཟེར་བ་ནི་ཆུ་ཚོད་འཁོར་ལོ་དང་འདྲ་བས། དབུལ་ཕྱུག་སུ་ཡིན་ཡང་མི་ཚེ་འཁྱོལ་འགྲོ།
ཕྱུག་པོས་བསགས་ཚད་མཛོད་ཁང་དུ་བསྡུས་ཏེ་ལག་སྟོང་མཆན་ལ་བཅུག་ནས་འགྲོ་མཁན་མོད་ལ།
དབུལ་པོས་བྱུང་ཚད་ཕངས་མེད་དུ་བཀོལ་ཞིང་འགྲོ་ཆས་བསྒྲིགས་ཏེ་སྙེག་མཁན་དེ་བས་མང་།
མདོར་ན་ཆེས་མཐའ་མའི་འགྲོ་ལམ་གཅིག་པུ་ཡིན་ཞིང་།
དེ་ཡང་མྱུར་ལམ་ན་རླུང་ལྟར་བགྲོད་པའི་རླངས་འཁོར་ནང་བཞིན་ད་དུང་མི་འགྲོ་ཞེས་ཁ་ཕྱིར་འཁོར་ནས་ལྟག་ལོག་རྒྱག་ས་ཞིག་ཁྱོན་ནས་མེད་དོ། །