དར་རྩེ་མདོ།
(ཆབ་འགག་རྡོ་རྗེ་ཚེ་རིང་།)
སྤྲིན་དཀར་པད་མའི་འདབ་མ། །
སྦྲང་ཆར་བདུད་རྩི་ཟིལ་མ། །
དེ་རིང་རྟེན་འབྲེལ་འགྲིག་ནས། །
དར་རྩེ་མདོ་ལ་བབས་ཡོད། །
དར་རྩེ་མདོ་གི་བུ་མོ། །
མཛེས་སྡུག་གསེར་གྱི་མེ་ཏོག །
བརྩེ་དུང་འོ་ཇ་ཞིམ་པོ། །
ཡ་ཆུང་ཁོག་ལ་འཁྱིལ་ཡོད། །
རྣམ་ཤེས་ཇ་རྩི་སེར་པོ། །
ཇ་ཕོར་ཞབས་ལ་ཆགས་ཡོད། །
སྐྱེ་བ་གཞུག་མའི་སྨོན་ལམ། །
དར་རྩེ་མདོ་ལ་བཏབ་ཡོད། །
ཨ་སྔོན་འཁོར་ལོ་རྩིབས་བརྒྱད། །
འཇའ་ཚོན་བཀྲ་ཤིས་རྟགས་བརྒྱད། །
དེ་རིང་རྟེན་འབྲེལ་འགྲིག་ནས། །
དར་རྩེ་མདོ་ནས་ཤར་ཡོད། །
དར་རྩེ་མདོ་གི་བུ་མོ། །
མཛེས་སྡུག་གཡུ་ཡི་མེ་ཏོག །
ཞེ་འདང་ནས་ཆང་སྔོན་མོ། །
རྩ་ལམ་ནང་ལ་འཐིམ་ཡོད། །
རྣམ་ཤེས་ཆང་རྩི་དཀར་པོ། །
ཆང་ཕོར་ཞབས་ལ་ཆགས་ཡོད། །
སྐྱེ་བ་གཞུག་མའི་སྨོན་ལམ། །
དར་རྩེ་མདོ་ལ་བཏབ་ཡོད། །
གསེར་གྱི་ཉི་ཟླ།
(ཆབ་འགག་རྡོ་རྗེ་ཚེ་རིང་།)
སྤྱན་མིག་གསེར་གྱི་ཉི་མའི་འོད་ཞག
ལྷ་གླིང་དཀར་པོའི་མཁའ་ལ་འཁྱིལ་ཡོད།
ཨ་ལ།
ཨ་ཇོ་གེ་སར།
ཨ་ཇོ།
གེ་སར་རྒྱལ་པོ།
རྫོང་ཆེན་བཅོ་བརྒྱད་འཕྲུལ་གྱིས་འབེབ་དུས།
མཛད་འཕྲིན་ལས་ཀྱི་རི་མོ་རེ་རེ་ནི།
ལོ་ངོ་སྟོང་གི་ལོ་ཟླའི་དར་རྒུད་ཁྲོད།
བརྗོད་མི་ཚར་པའི་ལོ་རྒྱུས་ཀྱི་སྒྲུང་གཏམ་རེ་རེ་ཡིན།
ཨ་ལ།
ཨ་ཇོ་གེ་སར།
ཨ་ཇོ།
གེ་སར་རྒྱལ་པོ།
ཁྱོད་ནི་ང་ཚོའི་སེམས་གཏིང་ན།
ནམ་ཡང་བརྗེད་ཐབས་མེད་པའི།
སྙན་གྲགས་ཀྱི་རྨི་ལམ་རུམ་མཁན།
གསེར་གྱི་ཉི་མ་གསོན་པོ་དེ་ཡིན་ལོ།
ཞལ་རས་གསེར་གྱི་ཟླ་བའི་འོད་ཞག
དུང་མཚོ་དཀར་མོའི་རླབས་ལ་འཁྱིལ་ཡོད།
ཨ་ལ།
ཨ་ཅེ་འབྲུག་མོ།
ཨ་ཅེ།
སེང་ལྕམ་འབྲུག་མོ།
དགུ་སིང་དྲུག་འགྱུར་གདངས་ལ་འདྲེན་དུས།
ཡིད་འཕྲོག་དབྱངས་རྟ་སྙན་མོ་རེ་རེ་ནི།
ལོ་ངོ་སྟོང་གི་ལོ་ཟླའི་དར་རྒུད་ཁྲོད།
གླེང་མི་ཚར་བའི་བརྩེ་དུང་གི་གཏམ་རྒྱུད་རེ་རེ་ཡིན།
ཨ་ལ།
ཨ་ཅེ་འབྲུག་མོ།
ཨ་ཅེ།
སེང་ལྕམ་འབྲུག་མོ།
ཁྱོད་ནི་ང་ཚོའི་སེམས་གཏིང་ན།
ནམ་ཡང་བརྗེད་ཐབས་མེད་པའི།
མཛེས་སྡུག་གི་རྨི་ལམ་རུམ་མཁན།
གསེར་གྱི་ཟླ་བ་གསོན་པོ་དེ་ཡིན་ལོ།
འབྲོག་པའི་དབྱར་ས།
(ཆབ་འགག་རྡོ་རྗེ་ཚེ་རིང་།)
ཞོགས་པའི་ཉི་ཟེར། །
མཐོན་པོ་རི་ལ་ཁྲེམས། །
བསང་དུད་སྔོན་མོ། །
ཨ་སྔོན་དགུང་ལ་ཁྱབ། །
དུང་མདོག་སྤྲིན་དཀར། །
འདབ་མ་ཐང་ལ་ལྷུང་། །
རྫ་ཆུ་བསིལ་མས། །
ཝུ་དཀར་ལང་ཚོ་ངོམ། །
འབྲོག་པའི་དབྱར་ས། །
ལྷ་ཡུལ་ལང་ཀྱང་མཛེས། །
གཡུ་ཡི་སྤང་ལྗོངས། །
མཛེས་སྡུག་ཚོན་གྱི་མདངས། །
རྟ་ནོར་ལུག་གསུམ། །
རི་སྐྱེས་མེ་ཏོག་བཞད། །
སྦྲ་དང་རས་གུར། །
སྐར་ཚོགས་ས་ལ་འཕོས། །
དགོ་དགོ་བཞོ་དབྱངས། །
འོ་མའི་དྲི་ལ་ཐིམས། །
འབྲོག་པའི་དབྱར་ས། །
ལྷ་ཡུལ་ལས་ཀྱང་སྐྱིད། །
སྙིང་གི་གྲོགས་གསུམ།
(ཆབ་འགག་རྡོ་རྗེ་ཚེ་རིང་།)
༼ཁེར་ལེན༽
ཚེ་གཅིག་ལུས་གཅིག་འདི་ལ། །
སྐྱིད་ན་ཇ་ཆང་འཐུང་རོགས། །
སྡུག་ན་སེམས་གཏམ་བཤད་རོགས། །
སྐྱིད་སྡུག་གཉིས་ཀྱི་གྲོགས་པོ། །
འཇིག་རྟེན་ཁྲ་ཁྲ་ཡིན་རུང་། །
སེམས་ཀྱི་ཁྲ་ཁྲ་བསྣོགས་མེད། །
མ་རྙིངས་བརྩེ་འདང་དྭངས་མོ། །
རྨ་ཀླུང་རིང་མོའི་བཞུར་རྒྱུན། །
རྨ་ཆུ་མ་སྐམ་བར་དུ། །
འདང་ལ་འགྱུར་བ་མི་འདུག །
༼མཉམ་ལེན༽
ཨ——།
གྲོགས་པོ།
སྙིང་གི་གྲོགས་པོ།
གྲོགས་པོ་བཀྲ་ཤིས་བདེ་ལེགས། །
ཨ——།
གྲོགས་པོ།
སེམས་ཀྱི་གྲོགས་པོ།
གྲོགས་པོ་ཚེ་རིང་ལོ་བརྒྱ།
༼ཁེར་ལེན༽
ཚེ་གཅིག་ལུས་གཅིག་འདི་ལ། །
སྐྱིད་ན་སྐྱིད་གླུ་ལེན་རོགས། །
སྡུག་ན་མཆི་མ་གཏོང་རོགས། །
སྐྱིད་སྡུག་གཉིས་ཀྱི་གྲོགས་པོ། །
འཇིག་རྟེན་མོག་མོག་ཡིན་རུང་། །
སེམས་ལ་ནག་ཐིག་ལྷུང་མེད། །
མ་བསྙོགས་བརྩེ་འདང་དྭངས་མོ། །
རྫ་ཆུ་བསིལ་མའི་བཞུར་རྒྱུན། །
རྫ་ཆུ་མ་སྐམ་བར་དུ། །
འདང་ལ་འགྱུར་བ་མི་འདུག །
༼མཉམ་ལེན༽
ཨ——།
གྲོགས་པོ།
སྙིང་གི་གྲོགས་པོ།
གྲོགས་པོ་བཀྲ་ཤིས་བདེ་ལེགས། །
ཨ——།
གྲོགས་པོ།
སེམས་ཀྱི་གྲོགས་པོ།
གྲོགས་པོ་ཚེ་རིང་ལོ་བརྒྱ།
༼ཁེར་ལེན༽
ཚེ་གཅིག་ལུས་གཅིག་འདི་ལ། །
སྐྱིད་ན་རྩེད་རོགས་དགོད་རོགས། །
སྡུག་ན་འགྲོ་རོགས་འདུག་རོགས། །
སྐྱིད་སྡུག་གཉིས་ཀྱི་གྲོགས་པོ། །
འཇིག་རྟེན་ཟང་ཟིང་ཡིན་རུང་། །
སེམས་ལ་སེར་ག་ཤོར་མེད། །
དཀྲུགས་མེད་བརྩེ་འདང་དྭངས་མོ། །
འབྲི་ཆུ་སྔོན་མོའི་བཞུར་རྒྱུན།།
འབྲི་ཆུ་མ་སྐམ་བར་དུ། །
འདང་ལ་འགྱུར་བ་མི་འདུག །
༼མཉམ་ལེན༽
ཨ——།
གྲོགས་པོ།
སྙི་གི་གྲོགས་པོ།
གྲོགས་པོ་བཀྲ་ཤིས་བདེ་ལེགས། །
ཨ——།
གྲོགས་པོ།
སེམས་ཀྱི་གྲོགས་པོ།
གྲོགས་པོ་ཚེ་རིང་ལོ་བརྒྱ།
ཆེད་དུ་བྲིས་པའི་གླུ་ཚིག
མནའ་རུས་པ་ཅན་པོ།
(ཆབ་འགག་རྡོ་རྗེ་ཚེ་རིང་།)
མནའ་རུས་པ་ཅན་ཞིག་སྐྱེལ་ཡོད། །
རྟགས་རི་མོ་ཅན་ཞིག་བརྗེས་ཡོད། །
ཚེ་སྔོན་མའི་ལས་འཕྲོ་ཆ་ཡིན། །
མཛོ་ཁྱུང་དཀར་མགོ་གི་རྭ་ཡིན། །
རྭ་གོར་མོ་ཆ་འགྲིག་ཡང་འགྲིག །
འུ་གཉི་གའི་སེམས་པ་ཆ་འགྲིག །
སྐྱིད་མི་རྟག་འཁོར་བའི་ནང་ནས། །
གཏམ་མྱི་ཁ་མྱེ་ལྕེ་དམར་པོས། །
སྲོག་གསོན་པོ་མ་ཚིག་བར་དུ། །
སེམས་གསོན་པོ་ཁྱོད་ལ་འཁྲེང་ཡོད། །
མནའ་རུས་པ་ཅན་པོ་འགྱུར་མེད། །
རྟགས་རི་མོ་ཅན་པོ་བསྣོགས་མེད། །
མནའ་རུས་པ་ཅན་ཞིག་སྐྱེལ་ཡོད། །
རྟགས་རི་མོ་ཅན་ཞིག་བརྗེས་ཡོད། །
ཚེ་སྔོན་མའི་ལས་འཕྲོ་ཆ་ཡིན། །
ལྷ་སྒྲོལ་མའི་གདོང་གི་མྱིག་ཡིན། །
མྱིག་ཁྱ་རིལ་ཆ་འགྲིག་ཡང་འགྲིག །
འུ་གཉི་གའི་སེམས་པ་ཆ་འགྲིག །
སྐྱིད་མི་རྟག་འཁོར་བའི་ནང་ནས། །
གཏམ་མྱི་ཁ་མྱེ་ལྕེ་དམར་པོས། །
སྲོག་གསོན་པོ་མ་ཚིག་བར་དུ། །
སེམས་གསོན་པོ་ཁྱོད་ལ་འཁྲེང་ཡོད། །
མནའ་རུས་པ་ཅན་པོ་འགྱུར་མེད། །
རྟགས་རི་མོ་ཅན་པོ་བསྣོགས་མེད། །
བསྐལ་པ་བཟང་པོ།
(ཆབ་འགག་རྡོ་རྗེ་ཚེ་རིང་།)
བཀྲ་ལ་ཤིས་པའི་སྤྲིན་དཀར་གྱི་འདབ་མའི་གསེང་ན།
དཔྱིད་གསུམ་གཡུ་འབྲུག་གི་དགོད་སྒྲ་སྙན་པ་ལ།
གངས་རི་དང་ལྷ་མཚོ་སྔོན་མོའི་ཞིང་ཁམས་ན།
ཕྱི་སྣོད་ཀྱི་འཇིག་རྟེན་ཁམས་འདི།
ཇེ་མཛེས་ལ་ཇེ་མཛེས་ཡིན་ལོ།
ནང་བཅུད་ཀྱི་སེམས་ཅན་ཐམས་ཅད།
ཇེ་སྐྱིད་ལ་ཇེ་སྐྱིད་ཡིན་ལོ།
རྟ་ནོར་ལུག་གསུམ་ལ་ཤ་ཤེད་རྒྱས་པའི་ཁྲོད་དུ།
དགོ་དགོ་བཞོ་དབྱངས་སྙན་མོ་དང་འགྲོག་ནས།
འོ་མའི་དྲི་ཞིམ་ཕྱོགས་བཞི་ལ་ཁྱབ་ཡོད་ལོ།
ཨ་ལ་ཡ་རེ་ལོ།
བསྐལ་པ་བཟང་པོ་རེད་ལོ།
མཛེས་སྡུག་གི་ཁྱིམ་གཞིས་ནང་ནས།
ནམ་ཡང་བདེ་སྐྱིད་འཚོ་བ་ལ་རོལ་ཡོད་ལོ།
ཨ་ལ་ཡ་རེ་ལོ།
བསྐལ་པ་བཟང་པོ་རེད་ལོ།
བཀྲ་ལ་ཤིས་པའི་གསེར་མདོག་གི་ས་གཞིའི་སྟེང་ན།
དབྱར་གསུམ་འཇའ་ཚོན་གྱི་མེ་ཏོག་མཛེས་པ་ལ།
རྨ་ཆུ་དང་འབྲི་ཆུ་སྔོན་མོའི་འགྲམ་བརྒྱུད་ན།
རྒན་མགོ་དཀར་རྣམས་ཀྱི་ཚེ་ཐག
ཇེ་རིང་ལ་ཇེ་རིང་ཡིན་ལོ།
ཆུང་སོ་དཀར་ཚང་མའི་འདབ་ལག
ཇེ་རྒྱས་ལ་ཇེ་རྒྱས་ཡིན་ལོ།
གྲོ་ནས་སྲན་གསུམ་གྱི་སྙེ་མའི་རླབས་ཕྲེང་ཁྲོད་དུ།
ཨ་ལོང་ལ་མོའི་དབྱངས་རྟ་དང་འགྲོགས་ནས།
ལོ་ལེགས་གླུ་སྒྲ་ཕྱོགས་བཞི་ལ་ཁྱབ་ཡོད་ལོ།
ཨ་ལ་ཡ་རེ་ལོ།
བསྐལ་པ་བཟང་པོ་རེད་ལོ།
མཛེས་སྡུག་གི་ཁྱིམ་གཞིས་ནང་ནས།
ནམ་ཡང་བདེ་སྐྱིད་འཚོ་བ་ལ་རོལ་ཡོད་ལོ།
ཨ་ལ་ཡ་རེ་ལོ།
བསྐལ་པ་བཟང་པོ་རེད་ལོ།
སྙིང་གི་དྲན་གདུང་།
(ཆབ་འགག་རྡོ་རྗེ་ཚེ་རིང་།)
ཁྱོད་ནི་དུང་མདོག་ཟླ་བ།
སྙིང་གི་མཛའ་མོ།
ང་ནི་གསེར་མདོག་ཉི་མ།
འདང་གི་ཐིག་ལེ།
དགུང་སྔོན་གཅིག་ན་ཡོད་ཀྱང་།
དགུང་གི་ཕ་རོལ་ཚུར་རོལ།
ཐུག་འཕྲད་མེད་པ།
ཆོས་ཉིད་ཡིན་རུང་།
སེམས་ནས་ཁྱོད་ལ་དུངས་ཡོད།
ཨེ་ཐུག་རེ་བ་བཅངས་ཡོད།
སྙིང་གི་མཛའ་མོ།
འདང་གི་ཐིག་ལེ།
ཁྱོད་ནི་གསེར་མདོག་ཉི་མ།
སྙིང་གི་མཛའ་བོ།
ང་ནི་དུང་མདོག་ཟླ་བ།
འདང་གི་ཐིག་ལེ།
དགུང་སྔོན་གཅིག་ན་ཡོད་ཀྱང་།
དགུང་གི་ཕ་རོལ་ཚུར་རོལ།
ཐུག་འཕྲད་མེད་པ།
ཆོས་ཉིད་ཡིན་རུང་།
སེམས་ནས་ཁྱོད་ལ་དུངས་ཡོད།
ཨེ་ཐུག་རེ་བ་བཅངས་ཡོད།
སྙིང་གི་མཛའ་བོ།
འདང་གི་ཐིག་ལེ།
གཙང་གསུམ་ལྷ་ཆབ་སྔོོན་མོ།
(ཆབ་འགག་རྡོ་རྗེ་ཚེ་རིང་།)
རྨ་ཆུ་འབྲི་ཆུ་རྫ་ཆུ། །
གཙང་གསུམ་ལྷ་ཆབ་སྔོན་མོ་ཡིན། །
རྨ་སྟོད་གཡག་རྭ་སྟག་རྩེ། །
རྨ་ཀླུང་རིང་མོའི་འབྱུང་ཁུངས་ཡིན། །
རྟ་རྒྱུག་རྒྱལ་འཇོག་ཐང་ནས། །
དགའ་སྟོན་ཡོ་ལང་ངོམ་ཡོད། །
ཕྱི་ཡི་སྣོད་བཅུད། །
མཛེས་སྡུག་ཚོན་གྱི་རི་མོ་ཡིན། །
ནང་གི་སེམས་ཅན། །
བདེ་སྐྱིད་ལྷ་ཡི་ཞིང་ཁམས་ཡིན། །
ཨ—ཁོ་རེ་ཁམས་པ། །
ཡུལ་འདི་ནི་ང་དང་ཁྱོད་ཀྱི་ཕ་ས་ཡིན། །
ཨ—ཁོ་རེ་ཁམས་པ། །
གནས་འདི་ནི་ཁྱོད་དང་ང་ཡི་ཕ་ཡུལ་ཡིན། །
རྨ་ཆུ་འབྲི་ཆུ་རྫ་ཆུ། །
གཙང་གསུམ་ལྷ་ཆབ་སྔོན་མོ་ཡིན། །
འབྲི་སྟོད་དགེ་ལ་བསྟན་སྟོང་། །
འབྲི་ཆུ་སྔོན་མོའི་འབྱུང་ཁུངས་ཡིན། །
སྐྱ་ལོ་འབྲུག་མོ་ཚང་གི། །
དུང་མཚོ་དཀར་མོ་རྒྱས་ཡོད། །
ཕྱི་ཡི་སྣོད་བཅུད། །
མཛེས་སྡུག་ཚོན་གྱི་རི་མོ་ཡིན། །
ནང་གི་སེམས་ཅན། །
བདེ་སྐྱིད་ལྷ་ཡི་ཞིང་ཁམས་ཡིན། །
ཨ—ཁོ་རེ་ཁམས་པ། །
ཡུལ་འདི་ནི་ང་དང་ཁྱོད་ཀྱི་ཕ་ས་ཡིན། །
ཨ—ཁོ་རེ་ཁམས་པ། །
གནས་འདི་ནི་ཁྱོད་དང་ང་ཡི་ཕ་ཡུལ་ཡིན། །
རྨ་ཆུ་འབྲི་ཆུ་རྫ་ཆུ། །
གཙང་གསུམ་ལྷ་ཆབ་སྔོན་མོ་ཡིན། །
རྫ་སྟོད་གདང་ལ་རི་བརྒྱུད། །
རྫ་ཆུ་བསིལ་མའི་འབྱུང་ཁུངས་ཡིན། །
སྟག་གཟིག་ནོར་རྫོང་ལྷས་ནས། །
ནོར་ཁྱུ་འབྲོང་ལ་འདྲེས་ཡོད། །
ཕྱི་ཡི་སྣོད་བཅུད། །
མཛེས་སྡུག་ཚོན་གྱི་རི་མོ་ཡིན། །
ནང་གི་སེམས་ཅན། །
བདེ་སྐྱིད་ལྷ་ཡི་ཞིང་ཁམས་ཡིན། །
ཨ—ཁོ་རེ་ཁམས་པ། །
ཡུལ་འདི་ནི་ང་དང་ཁྱོད་ཀྱི་ཕ་ས་ཡིན། །
ཨ—ཁོ་རེ་ཁམས་པ། །
གནས་འདི་ནི་ཁྱོད་དང་ང་ཡི་ཕ་ཡུལ་ཡིན། །
ཡུལ་ཤུལ་གྱི་ལོ་གསར་དགོང་ཚོགས་ལ་ཆེད་དུ་བྲིས་པའི་གླུ་ཚིག
གེ་སར་རྒྱལ་པོ།
(ཆབ་འགག་རྡོ་རྗེ་ཚེ་རིང་།)
རྒྱ་མཚོ་ཁྲོས་པའི་རླབས་ཀྱིས་ས་གཞི་འདར། །
འབྱུང་བཞི་འཁྲུག་པའི་སྤྲིན་གྱིས་ཉི་ཟླ་གཡོགས། །
ཁྱོད་ཀྱི་ཁྲག་རྒྱུན་ལས་ཐོས་པ་ནི། །
དགྲ་འདུལ་གྱི་གད་རྒྱངས་ང་རོ་ཡིན། །
ཁྱོད་ཀྱི་ཞལ་རས་ལས་མཐོང་བ་ནི། །
གཉེན་སྐྱོང་གི་འཛུམ་དཀར་མེ་ཏོག་ཡིན། །
གེ་སར་རྒྱལ་པོ་ལགས། །
རྒྱལ་པོ་གེ་སར་མཆོག །
གླུ་ཨ་ལ་ལ་མོ་ཨ་ལ་ལས། །
ཟུངས་ཁྲག་གིས་བྲིས་པའི་གཏམ་རྒྱུད་གསོན་པོ་ཡོད། །
གླུ་ཐ་ལ་ལ་མོ་ཐ་ལ་ལས། །
བརྩེ་དུང་ལས་འཁྲུངས་པའི་འཇིག་རྟེན་འཚོ་བ་ཡོད། །
རླབས་ཆེན་གྱི་མཛད་རྗེས། །
ཉི་ཟླ་ལ་བཞེངས་ཡོད། །
གེ་སར་རྒྱལ་པོ་ལགས། །
རྒྱལ་པོ་གེ་སར་མཆོག །
གླུ་ཨ་ལ་ལ་མོ་ཨ་ལ་ལས། །
ཟུངས་ཁྲག་གིས་བྲིས་པའི་གཏམ་རྒྱུད་གསོན་པོ་ཡོད། །
གླུ་ཐ་ལ་ལ་མོ་ཐ་ལ་ལས། །
བརྩེ་དུང་ལས་འཁྲུངས་པའི་འཇིག་རྟེན་འཚོ་བ་ཡོད། །
སྙན་གྲགས་ཀྱི་རྒྱལ་མཚན། །
ཉི་ཟླའི་སྟེང་བཙུགས་ཡོད། །
ཉི་ཟླའི་བརྩེ་དུང་།
(ཆབ་འགག་རྡོ་རྗེ་ཚེ་རིང་།)
གནའ་དང་མའི་དང་མ་ཞིག་ལ། །
ཡུལ་ཨ་མདོ་ཧོར་གཙང་ཁོག་གི །
སྡེ་ཕྱུག་མོ་ཏཱ་ནི་སྟོད་ཀྱི། །
ཕོ་བཟང་བོ་ཉི་མ་ཚེ་རིང་། །
གཞུང་རྒྱུད་པ་མདའ་ཤིང་དྲང་མོ། །
ངང་གཤིས་ཀ་ལྷ་དར་འཇམ་པོ། །
བརྩེ་དུང་གི་ཞག་ཁུ་སྣུམ་པོ། །
རུས་རྐང་གི་གསེང་ལ་སིམས་ཡོད། །
ཆུང་འདྲིས་ཨ་ཇོ། །
ཉི་མ་ཚེ་རིང་། །
ཚེ་ལ་རིང་ཐུང་ཤོར་ན། །
སྔོན་གྱི་ལས་དབང་ཡིན་སོང་། །
ལམ་ལ་རིང་ཐུང་ཤོར་ན། །
གཅིག་གིས་གཅིག་ལ་བསྒུག་ཆོག །
གནའ་དང་མའི་དང་མ་ཞིག་ལ། །
ཡུལ་ཨ་མདོ་ཧོར་གཙང་ཁོག་གི། །
སྡེ་ཕྱུག་མོ་ཏཱ་ནི་སྟོད་ཀྱི། །
སྨན་བཟང་མོ་ཟླ་བཟང་སྒྲོལ་མ། །
ཡག་མཛེས་སྡུག་ཡིད་འཕྲོག་ལྷ་མོ། །
སེམས་བསམ་པ་སྒྲོལ་མ་དཀར་མོ། །
ཞེ་འདང་གི་གཏམ་རྒྱུད་སྙན་མོ། །
ཤ་ཁྲག་གི་སེམས་ལ་རུམ་ཡོད། །
ཆུང་འདྲིས་ཨ་ཅེ། །
ཟླ་བཟང་སྒྲོལ་མ། །
ཚེ་ལ་རིང་ཐུང་ཤོར་ན། །
སྔོན་གྱི་ལས་དབང་ཡིན་སོང་། །
ལམ་ལ་རིང་ཐུང་ཤོར་ན། །
གཅིག་གིས་གཅིག་ལ་བསྒུག་ཆོག །