མི་འཐོར་བའི་མེ་ཏོག

གཅིག

ལོ་ཟླའི་གས་སྲུབས་ཀྱི་རླུང་བུ།

གཟུགས་མེད་ཀྱི་ལག་པ་རྩུབ་པོ།

དལ་བུར་ཁྱེད་ཀྱི་དབུ་སྐྲར་འཐམས།

ག་ལེར་ཁྱེད་ཀྱི་ངོ་གདོང་ལ་འཁྱིལ།


ལང་ཚོའི་དར་ཆ་ནི།

རྨི་ལམ་གྱི་ཕང་བ་ནས་འགྱེལ།

ཁྱེད་ཀྱིས་རང་ཉིད་རྒས་འདུག་ཅེས་གླེང་གྱིན་འདུག


སྐྱི་པགས་སྲབ་མོ་ཞིག་གིས་གཡོགས་པའི་རུས་པ་དེས།

དམ་ཆོས་རྒུམ་པའི་ཕྲེང་བ་འདེགས་ཀྱིན།

འཇིག་རྟེན་གྱི་འགྲུལ་བཞུད་རྫོགས་ལ་ཉེ་ཞེས་ཁེར་ལབ་བྱེད།

གཉིས།

ང་ཡི་ཨ་ཕྱི།

འཁོར་བའི་རྒྱ་མཚོ་ནས།

ཆགས་སྡང་གི་བྱ་སྤྱོད་དང་བསམ་བློ་གང་མང་གིས་གཙེས་པ་བདེན།

མི་ཚེའི་ལམ་ཁ་ནས།

དགའ་སྐྱོ་ནི་དབྱར་དགུན་ལྟར།

ཁྱེད་ཀྱི་རྨ་ཁས་གང་བའི་ལུས་སེམས་སུ་ཚེས་པ་རྟོགས་མོད།


འོན་ཀྱང་།

ཁྱེད་རང་ནམ་ཡང་རྒུད་མེད།

ཁྱེད་ཀྱིས་ཕུབས་པའི་བརྩེ་བའི་འཇའ་གུར་དེས་ཁྱེད་རང་རྒུད་མེད་ཟེར།

ཁྱེད་རང་བརྒྱུད་མྱོང་བའི་ལམ་ཁ་ཀྱག་ཀྱོག་དེས་ཁྱེད་རང་ཕམ་མེད་ཟེར།

གསུམ།

མི་ལོ་དྲུག་ཅུའི་སྒོ་ཐེམ་བརྒལ་ཟིན་པའི་ཁྱེད་ལ།

ཚོར་སྣང་གི་ཟིལ་བས་བརླན་པའི་ཁྱེད་ལ།

ནང་སེམས་ཀྱི་སྒོོ་མོ་གཞན་ཞིག་ལ་ཕྱོགས་པའི་ཁྱེད་ལ།

ལོ་ཟླས་གུ་ཡངས་མི་གཏོང་བའི་ཕར་ནང་ན།

བརྩེ་བ་ཞིག་གི་བཟོད་སྒོམ་དང་སྲུབ་སྐྱོབ་ཡོད།

རྨི་ལམ་གྱིས་ཕྱིར་ལྟ་མི་བྱེད་པའི་སྔ་རོལ་དུ།

རྒྱལ་ཁ་ཞིག་གི་དཔའ་གདེང་དང་ཡིད་ཆེས་ཡོད།

བཞི།

ངས་ཁྱེད་ཉིད་ནམ་ཡང་རྙིད་པ་མེད་པའི་མེ་ཏོག་ཅིག་གི་དཔེར་བྱས།

འཛུམ་གྱིས་ཉི་འོད་འཇོམས་པའི་པདྨ་ཞིག་གི་དཔེར་བྱས།

བརྩེ་བའི་སྦྲང་རྩིས་གང་བའི་མེ་ཏོག་ཅིག་གི་དཔེར་བྱས།

ད་དུང་ཁྱེད་ཉིད་མེ་ཏོག་མང་པོ་ཞིག་ལ་དཔེ་བཞག


ངའི་སེམས་པའི་སྤང་ཐང་དུ།

ནམ་ཡང་འཐོར་མ་མྱོང་ལ་འཐོར་ཡང་མི་སྲིད་པའི་མེ་ཏོག་དེ།

ཁྱེད་དང་ཁྱེད་ཀྱི་བརྩེ་བ་ཁོ་ན་ཡིན།

ལྔ།

དྲོད་ལམ་ལམ་དུ་འཛུམ་པའི་མེ་ཏོག

གྲང་ཤུར་ཤུར་དུ་འཛུམ་པའི་མེ་ཏོག

མགོ་ལྡེམ་ལྡེམ་དུ་འཛུམ་པའི་མེ་ཏོག

དུས་ཚིགས་བཞི་རུ་འཛུམ་ཡོད།

ཉིན་མཚན་དུས་དྲུག་དུ་འཛུམ་ཡོད།


ངའི་མིག་མ་བཙུམ་བར་དུ་འཛུམ་ཡོད།

ངའི་རྣམ་ཤེས་མ་བོར་བར་དུ་འཛུམ་ཡོད།

ངའི་སྲིད་པ་མ་འཇིགས་བར་དུ་འཛུམ་ཡོད།


ངའི་དོན་ལྔ་སྣོད་དྲུག་དུ་འཛུམ་ཞིང་།

ངའི་ཚེ་རབས་ཀུན་ཏུ་བཞད་པའི།

མི་འཐོར་བའི་མེ་ཏོག་ལགས།

ང་ཡི་ཨ་ཕྱི་དམ་པ། ཤེས་རབ་འཚོ།

རྩོམ་སྒྲིག་པ། ཚེ་རིང་རྒྱ་མཚོ།

དཔྱད་མཆན 0 ཡོད།