ཐོན་མི་ཨ་ནུ།
ལྷགས་རླུང་འཇམ་པའི་ཞོགས་པ་དེར།
འོ་ཇ་དང་སློག་པའི་བདེ་དྲོད་བོར་ཞིང་།
ཆགས་ས་དང་ཞེན་ཡུལ་རྒྱབ་ཏུ་བསྐྱུར་ནས།
བཀའ་ལུང་རྣལ་མ་ཞིག་ཐུགས་ལ་བརྐོས།
གཟི་བརྗིད་ཀྱི་ལས་འགན་ཞིག་གི་སླད་དུ།
བློ་སྤོབས་ཀྱི་དཔའ་གདེང་ཁྱེར་ཏེ།
གངས་དཀར་ཏི་སེ་ཐོད་ཀྱིས་བརྒལ་ཞིང་།
མ་ཕམ་གཡུ་མཚོ་འཕྲེད་ཀྱིས་གཤགས།
ཚ་གྲང་གི་གདུང་བས་མནན་ཀྱང་དཔའ་མ་ཞུམ།
གཅན་གཟན་གྱི་ངར་སྐད་རྒོད་ཀྱང་བློ་མ་ཕམ།
གཞན་ཡུལ་གྱི་འགག་འཕྲང་དོག་ཀྱང་ཉྭ་མ་འདར།
ཤེས་རབ་ཀྱི་སྤྱན་ཟུང་ལྷོད་ཀྱིས་ཕྱེས་ཏེ།
འདོད་འདུན་ཟབ་མོ་དེ་ཁོ་ན་སྙིང་ཁ་རུ་སྒོམ་གྱིན།
ཐོབ་ཤོར་ཡོད་ཚད་རང་ཉིད་ལ་བཞག་ཅིང་།
རྒྱལ་ཕམ་ཅི་བྱུང་སྙིང་སྟོབས་ལ་བསྟིམས།
ལོ་ངོ་བདུན་དེ།
བླ་མ་བླ་མ་རུ་བཀུར་བའི་མི་ལོ་བདུན་དང་།
རིག་པ་རིག་པས་གྲོལ་བའི་ལོ་ངོ་བདུན་དུ་གྲུབ་འདུག་པས།
བརྩོན་འགྲུས་ཀྱིས་བསྐྱལ་བའི་མི་ལོ་བདུན་དེ།
དབྱངས་གསལ་གྱི་གཅེས་ཕྲུག་ཟུང་གཅིག་དང་།
མི་ཡུལ་ན་འཚེར་བའི་འཕགས་ནོར་བདུན་དང་ཤིན་ཏུ་འདྲ་བས།
སློབ་དཔོན་གྱི་མཚན་བྱང་ཐོག་མ་བཞེས་ཤིང་།
བློན་ཚོགས་ཀྱི་ཕྲག་དོག་ཅིག་ཅར་དུ་བཅོམ།
ཐོན་མི་ཨ་ནུའི་བུ།
ཨ་མའི་བུ་རྒོད་པོ།
ཁྱེད་ཉིད་བཞུགས་པ་ནས།
ཆོས་སྲིད་ཀྱི་ཉི་ཟླ་དགུང་ནས་འཆར་ཞིང་།
བོད་ཡུལ་གྱི་མངའ་ཐང་གླིང་བཞིར་སྤེལ།
བདེ་སྐྱིད་ཀྱི་དགོད་སྒྲ་ས་སྟེང་དུ་ཁྱབ།
རྟ་ནོར་ལུག་གསུམ་གྱི་རང་ཁྱིམ་འདི།
ཉི་མ་བཞིན་དྲོ་ཞིང་འབར་ལ།
གངས་རི་ར་བ་ཡིས་བསྐོར་བའི་རང་ཡུལ་འདི།
བརྟན་བརླིང་གི་མ་ཎི་ཡི་གེ་དྲུག་མ་ལྟར།
ས་སྒང་འདིའི་བདག་པོར་གྱུར་ཡོད།
ས་པཎ།
ཉི་མ་དང་ཐག་ཉེ་ས་ནས།
ཨ་ཁུ་ཚོར་བློ་མ་དྲིས།
ཨ་ནེ་ཚོར་བྲོ་མ་བསླངས།
ཁ་ཟས་སུ་ལྟོ་གོས་ཧྲལ་ཧྲུལ་བསྟེན་ཞིང་།
རྒྱབ་རྟེན་དུ་བརྩོན་འགྲུས་ཀྱི་གྲོགས་པོ་ཉར་ཏེ།
མི་ཡུལ་འདིར།
བསླངས་མ་མྱོང་བའི་ལོ་རྒྱུས་ཀྱི་རྡོ་རིང་ཞིག་བཞེངས་གྲུབ་མཛད།
ལམ་ཁ་འདི་ཇི་འདྲའི་ཛ་དྲག་ཆེ་ན་ཡང་།
ཁེར་རྐྱང་གི་མི་བུ་འདིས།
བློ་སྤོབས་ཀྱི་གོམ་ཁ་ལྷོད་མ་མྱོང་ལ།
ངོ་གདོང་མི་གཅིག་པའི་འཕྲོག་བྱེད་དགའ་བོ་དང་།
གོ་དན་གཉིས་མཛའ་བོའི་དྭངས་མར་བཀུག
ཤིང་རྟའི་སྲོལ་འབྱེད་འདིས།
བཅུ་ཕྲག་རིག་གཞུང་གི་གསེར་གྱི་ཐིགས་པ་གངས་ཅན་ལྗོངས་ལ་སྟོར།
རི་བོའི་གཏོས་དང་མཉམ་པའི་གླེགས་བམ་གྱི་གྲངས་ཚད་འདི།
ང་ཚོའི་ཡིད་དབང་གསོ་བའི་སྙན་དབྱངས་ཤིག་དང་།
ང་རྒྱལ་ཞིག་གི་བགོ་སྐལ་ལགས།
སྒོས་སུ།
ནམ་མཁའི་མཐའ་དང་མཉམ་པའི་སྐལ་ལྡན་བུ་སློབ་ཁྲོད།
སྟག་སེང་མཇིང་བསྣོལ་ལྟ་བུའི་རིག་པའི་བུ་ལོ་ཟུང་།
ཁམས་གསུམ་ཟས་སུ་ཟ་བའི་བྱེད་པོར་བསྐྱངས།
ད་ལྟའི་བར་དུ།
ཚིག་རེ་དང་དོན་རེ་འདུས་པའི།
གསེར་ཞྭ་མེད་པའི་མཁན་པོ་བཞིན།
པཎ་ཊི་ཏ་ཡི་མཚན་བཟང་བཞེས།
ཁྱེད་ནི།
བསྐལ་བ་སྟོང་གི་ཟིན་ཐོའི་མཚོན་དོན་དང་
མི་ཚེ་འདི་ཡི་དྲན་ཤིང་གཅིག་པུ་ཡིན་ཨང་།
རྗེ་རིན་པོ་ཆེ།
ད་ཐེངས་ཀྱི་སྐྱེ་བ་འདི་ལ།
ཙོང་ཁ་ཞེས་པའི་ཡུལ་ཁམས་ཤིག་ཏུ།
དགའ་ཞིང་དགའ་ལ་སྤྲོ་ཞིང་སྤྲོ་བའི།
སྙིང་ཉེ་བའི་གཅེས་ཕྲུག་ཅིག་བལྟམས།
མཚན་ལ་དགེ་མིང་བརྒྱུད་པའི་བློ་བཟང་གྲགས་པར་གསོལ།
ཁྱུང་ཆེན་གྱི་གཤོག་པ་ལྟར་བབས་པའི།
བྲག་བྱ་ཁྱུང་ནས་གཉོམ་ལག་གི་མྱུ་གུ་འབུས་ཤིང་།
མི་ལོ་བཅུ་དྲུག་གི་འདབ་ལོ་རྒྱས།
སྐབས་དེར།
འཇམ་དུང་དུང་གི་ཞབས་ཟུང་ལ་བརྟེན་ནས།
དག་ཞིང་གི་གནས་མཆོག་ལྷ་སར་བསྙེགས།
དེ་ནས་བཟུང་།
མཁས་པ་ཅི་ཙམ་གྱི་ཞབས་ལ་གཏུགས་ཤིང་།
བརྩོན་པ་ཡིས་བྲག་རི་ག་ཚོད་བརྟོལ་ཡོད་ཨང་།
གློ་བུར་དུ་ཤར་ཕྱོགས་པ་རིག་པའི་དཔའ་བོ་དང་།
མཉམ་མེད་ཙོང་ཁ་བ་ཞེས་པའི་མཚན་སྙན་ཞིག
འཇིག་རྟེན་འདིའི་གྲ་གྲུ་ཀུན་ལ་ཁྱབ།
ཡིད་འོང་གི་མི་བུ།
བསྟོད་ཆེན་རྣམ་བཞི།
ཁྱེད་ཀྱི་ཐུགས་རྒྱུད་ཀྱི་ཟུངས་ཁྲག་མངར་མོ་ཡིན་ལ།
མཛད་ཆེན་རྣམ་བཞི།
ཁྱེད་ཀྱི་བྱས་འབྲས་ཀྱི་རྟགས་མ་ཉིད་དུ་འཁུམས་པས།
མཉམ་མེད་པ་བཅོ་ལྔ་བོ་ཡང་།
ཁྱེད་ཀྱིས་མིའི་རིགས་ལ་ཕུལ་བའི་རླབས་ཆེ་བའི་གཟི་བྱིན་ཡིན།
དམིགས་བརྩེ་མའི་གསོལ་བསྟོད་ཀྱི་སྙན་པ་དེ་དག
ཁྱེད་ཀྱི་ཧ་ལས་ཤིང་ཧང་སངས་པའི་རང་གཤིས་ཅི་ལ་མིན།
རྗེ་རིན་པོ་ཆེ།
ཚོར་ཨེ་བྱུང་།
བསྐལ་བ་ནས་བསྐལ་བའི་བར།
ཁྱེད་དང་ཁྱེད་ལྟ་བུའི་སྐྱེས་ཆེན་དུ་ཡོད།
སྐྱེ་བ་ནས་སྐྱེ་བའི་བར།
ཁྱེད་དང་ཁྱེད་འདྲ་བའི་གངས་ཅན་པ་སུ་ཞིག་ཡོད།
ཁྱེད་ནི་ད་གཟོད།
ངེས་པ་དོན་གྱི་ས་སྟེང་གི་ཤིང་རྟའི་སྲོལ་འབྱེད་གཅིག་པུ་དེའོ།།
སློབ་དཔོན་རིན་པོ་ཆེ།
ཉམས་སྣང་ཡག་པོ་ཞིག་ལ།
ངའི་ཡ་ཆུང་སྙིང་གི་དཀྱིལ་དབུས་ཀྱི་གཏིང་རུམ་ན།
མེ་ཏོག་པདྨ་གསར་དུ་ཁ་ཕྱེ་བ་ལྟ་བུའི།
གཟི་བྱིན་འབར་བའི་མིང་ཚིག་ཅིག་འཁྲུངས་ཡོད།
རལ་བ་ཕྲག་ཏུ་ཁུར་བའི་མིང་ཚིག་འདི།
དག་ཞིང་གི་ལྷ་ཡུལ་ལྟ་བུའི།
རྒྱ་མཚོའི་ཕ་རོལ་ཞིག་ནས་བདེ་བླག་གིས་ཚུར་རོལ་ཏུ་སླེབས་པར།
གཅེས་ཕྲུག་བཞིན་དུ།
ལྷང་ལྷང་ངག་གིས་ཁྱེད་ལ་ལན་གསུམ་བོས་ཆོག་གམ།
རླབས་ཆེ་བའི་སེམས་བསྐྱེད་དེའི་སླད་དུ།
བླ་མ་བླ་མ་རུ་བར་མ་ཆད་པར་བཀུར་ཞིང་།
འགྲོ་དོན་འགྲོ་དོན་དུ་ཁོལ་ཕྱུང་གིས་བསམ་བཞིན།
འདྲེ་སྲིན་གྱི་ཁྲག་ཞགས་འཁོར་བའི་ཁོང་སོ་གློད་པའི་ལྕེ་སྣེ་ནས།
ང་ཚོ་ཅིག་ཅར་དུ་ལྡོད་པར།
མ་སྐྱེས་ཨ་མ་འདྲ་བའི་དཀའ་ཁག་གི་སེམས་ངལ་གྱིས།
ཏག་ཏག་གི་རྗེ་འབངས་ཉེར་ལྔ་ལ།
ལྷ་ཧ་ལས་ཤིང་།
མི་ཡིད་ཆེས་པ།
འདྲེ་ཁོ་ཐག་ཆོད་པ་ལྟ་བུའི་ཕམ་ཁ་གཞི་ནས་བསྐྲུན་ལགས་པས།
སྐྱིད་སྡུག་གི་ལོ་ཟླ་ག་འདྲ་འདས་ཀྱང་།
ངས་སྔར་བཞིན།
ཐལ་མོ་སྦྱོར་བའི་ངལ་བ་དང་།
པུས་མོ་འཛུགས་པའི་བཟོ་ལྟ་དང་དུ་བླངས་ཏེ།
རྒད་པོ་མཁར་ཚུགས་དང་།
རྒན་མོ་མཛུབ་ཚུགས་དང་ཀུན་ནས་མཚུངས་པའི།
གསང་སྔགས་ལམ་རིམ་གྱི་གདམས་པ་གདམས་པའི་
དུས་དེ་ལ།
ཁྱེད་ནི་ད་གཟོད།
ངའི་སེམས་གཏིང་གི་རྫོགས་པའི་སངས་རྒྱས་དངོས་ཡིན་པ་དང་།
མཚན་བརྗོད་འགྲེལ་བ་ལྟ་བུའི།
རི་བོའི་གཏོས་དང་མཉམ་པའི་པོ་ཏི་འདི་དག་མཐོང་ཐེངས་རེར།
ཁྱེད་ནི་ད་གཟོད།
རྡོ་བརྐོས་རི་མོ་ཇི་བཞིན་རྔམ་བརྗིད་ཀྱིས་འགྲེངས་ཤིང་།
བསྐལ་བ་རྫོགས་མེད་ཀྱི་འོ་བརྒྱལ་ཁྲོད་ནས།
ནམ་མཁའི་སྤྲིན་པ་དཀར་བོ་དང་འདྲ་བར།
རང་གི་རྒྱབ་རྟེན་གྱི་གཉེན་ཉེ་རུ་རློམ་ཆོག་པས།
རང་ལའང་མི་ཡུལ་འདི་ན།
ཉི་མ་ལྟ་བུའི་ཁྱིམ་གཞི་དྲོན་མོ་ཞིག་དང་།
མཐོ་རིས་བསྙེག་པའི་ལམ་གྲོགས་བཀན་མོ་ཞིག་ཡོད་པ་ཐོལ་གྱིས་དྲན།
ཞིབ་ཏུ་བསམ་ཐེངས་རེ་རེར།
གཞོམ་གཞིག་རྟག་བརྟན་གྱི།
གོ་ལའི་རྩེ་མོར་འཚོ་བའི་སྟོབས་ལྡན་གྱི་མི་རིགས་དང་མཉམ་དུ།
སེམས་དང་སེམས་པ་ཡོངས་སུ་འདྲེས་ཤིང་།
དཔུང་བ་དང་དཔུང་བ་མཉམ་དུ་གཤིབ་ཐུབ་ན།
འཁོར་བ་གྲང་མོའི་ཁྲོད་ཀྱི།
ཆལ་ཆིལ་འབར་བའི་མེ་དཔུང་དྲོན་མོ་དེ།
རང་ཉིད་ཁོ་ནས་འཛམ་གླིང་ཞི་བདེར་ཕུལ་བའི།
འགྲན་བྲལ་དཔའ་རྒོད་ཀུན་གྱི་ཏོག་ལྟ་བུའི།
མར་མེ་ཚེ་འབར་ཡིན་པ་དང་།
ད་དུང་།
ནམ་མཁའི་མཐའ་དང་མཉམ་པའི་སེམས་ཅན་ཚོའི།
བསམ་པ་ལྷུན་གྱིས་འགྲུབ་པར།
ཉིན་མཚན་གྱི་དབྱེ་བ་གང་ཡང་མེད་ཀྱང་།
དཔའ་བོའི་གད་རྒྱངས་སྒྲོག་པ་ལྟ་བུའི།
ལམ་སྟོན་ཁྲོད་ཀྱི་ལམ་སྟོན་ཚད་མ་དང་།
ཚེ་གཅིག་ལུས་གཅིག་གི་ལ་རྒྱ་ཅན་གྱི་བྱང་ཆུབ་སེམས་དཔའ་སྟེ།
རིགས་ཞེན་གྱི་སློབ་དཔོན་ཁྱེད་ཉིད་ཡིན་ཨང་།
དྲི་མེད་ཀུན་ལྡན།
མི་ལུས་ཤིག་བཞེས་ཉིན་ནས།
འཁོར་བ་ན་འཁོར་བའི་ཐ་སྙད་ཡོད་དོ་ཅོག
གཟི་བརྗིད་དང་ང་རྒྱལ་གྱིས་རྡོག་པས་མནན་ཏེ།
མི་ཡུལ་འདི།
འཇའ་ཚོན་ལྟ་བུའི་མཛེས་སྡུག་གིས་ཁེངས་པའི་རྩེད་ར་རུ་བཞེངས།
དུས་དེ་ནས་བཟུང་།
ཐར་དགོས་ན།
ཐོག་མར་རང་ལུས་ནས་ཐར་བ་དང་།
བསྐྱབ་དགོས་ན།
ཐོག་མར་མཐོ་བ་ནམ་མཁའ་ལྟ་བུ་དང་།
དམའ་བ་དོག་མོ་ས་ཡིན་ཀྱང་།
གཉའ་ཤིང་ལྟར་ལྕི་བའི་ཉམ་ཐག་པའི་འགྲོ་བ་རྣམས་ལགས་ན།
གཞན་དོན་གྱི་འགན་འཁྲི་འདི་ཉིད།
མིག་གིས་མཐོང་མ་ཐག་ཏུ།
ཁམས་གསུམ་པ་གང་ཞིག་མ་བཟི་བ་མེད་ལ།
ངོ་མཚར་བའི་མཛད་པ་འདི་དག
རྣ་བས་ཉན་མ་ཐག
དྲི་ཟ་བ་ཡང་འགྱུར་ཁུགས་མ་འབྱོངས་པ་མེད་པ་དང་།
ལྷ་ཀླུ་རྣམས་ཀྱང་ཞེ་འཁྲེང་བའི་སྨོན་པ་མི་འཆོར་བ་སུ་ཞིག་ཡོད།
རྒྱལ་སྲས་ལགས
སྐབས་འདི་རུ།
ཁྱེད་ཉིད་ཁོ་ནས།
ད་གཟོད་སྦྱིན་པའི་ཉམས་ལེན་འདི།
མ་གཞི་ནས་བྱང་སེམས་ཀྱི་སྦྱོར་བ་ཞིག་དང་བསྟིམས་པ་འདི་ཡང་།
མ་གཞི་ནས་ཐར་ལམ་ཞིག་ཡིན་ཞེས།
ལ་ཁའི་རྫི་བོ་ཞིག་ནས།
རྒྱལ་སྤྱི་ཕྱི་ནང་ཀུན་ཏུ།
དབྱར་གྱི་འབྲུག་སྒྲ་ལྟར།
ལྷང་ལྷང་གིས་གྲགས་ཤིང་ལྡིར་ལྡིར་དུ་སྒྲོག་དུས།
ཁྱེད་ཉིད་གང་དུ་བཞུགས་ན།
དེ་རུ་བདེ་སྐྱིད་དང་དགོད་སྒྲས་ཁེངས་ཤིང་།
ཁྱེད་རང་གང་དུ་བཞུད་ཀྱང་།
གཟུགས་དང་གྲིབ་མ་ཇི་བཞིན།
ང་ཚོར་མཁོ་བ་དེ་དག
རྗེས་སུ་འབྲངས་ནས་ཡོད་པས།
གཅིག་ཀྱང་བཙལ་མི་དགོས།
ཡིན་ན་ཡང་།
འབྲི་ཚུལ་འདི།
མི་བུ་ཁྱོད་འཇིག་རྟེན་ནས་འཕུར་བའི་ལ་རྒྱ་ཞིག
གླེང་ཚུལ་འདི།
སྐྱེས་ཆེན་ཞིག་མི་ཡུལ་ནས་བཞུད་སྔ་བའི་ན་ཟུག་ཅིག
དྲན་ཚུལ་འདི།
ས་སྟེང་འདིར་བཞག་པའི་བླ་མེད་ཀྱི་རེ་སྨོན་ཞིག་ཅི་ལ་མིན།
རྩོམ་པ་པོ་ངོ་སྤྲོད།
འཇམ་དཔལ། 1968ལོར་མདོ་སྨད་གསེར་ལྗོངས་སྣང་རའི་གྲམ་པ་ནང་གི་ཞིང་ཁྱིམ་དཀྱུས་མ་ཞིག་ཏུ་ལྟེ་ཁྲག་འཕོས་ཤིང་གཉོམ་ལག་རྒྱས།རང་ལོ་བདུན་གྱི་སྟེང་།(སྣང་ར་སློབ་ཆུང)ནས་འགོ་བརྩམས་ཏེ་དམའ་དམའ་འབྲིང་(རྫོང་མི་རིགས་སློབ་འབྲིང)དང་། མཐོ་མཐོ་འབྲིང་(རྫོང་མི་རིགས་སློབ་འབྲིང)། ཆེ་སློབ་ཆེན་(མཚོ་སྔོན་མི་རིགས་སློབ་ཆེན)རིམ་གྱིས་འགྲིམས། 1987ལོར་མཚོ་སྔོན་མི་རིགས་སློབ་ཆེན་གྱི་བོད་སྐད་ཡིག་རྩོམ་རིག་འཛིན་གྲྭར་ཞུགས།1992ལོར་སློབ་མཐར་ཕྱིན་རྗེས། གཅན་ཚ་རྫོང་མི་རིགས་སློབ་འབྲིང་དུ་བོད་སྐད་ཡིག་དགེ་རྒན་གྱི་ཕྱག་ལས་གནང་ཤིང་། སློབ་ཁྲིད་ཀྱི་ཞོར་དུ་སྔ་རྗེས་སུ་《སྦྲང་ཆར་》དང《བོད་ཀྱི་སློབ་གསོ》། 《མང་ཚོགས་སྒྱུ་རྩལ》། 《བོད་ཀྱི་རྩོམ་རིག་སྒྱུ་རྩལ》། 《བོད་ལྗོངས་སློབ་གསོ》། 《ལྷོ་ཁའི་རྩོམ་རིག་སྒྱུ་རྩལ》། 《གངས་རྒྱན་མེ་ཏོག》།《 མཚོ་སྔོན་བོད་ཡིག་གསར་འགྱུར》། 《གངས་རྒྱན་ན་ཆུང་ཚགས་པར》། 《ཁྲིམས་ལུགས་ཚགས་པར》སོགས་ཀྱི་སྟེང་དུ་དཔྱད་རྩོམ་དང་། སྒྲུང་གཏམ། ལྷུག་རྩོམ། སྙན་ངགདཔྱད་བརྗོད། གཏམ་རྒྱུད། སྒྱུར་རྩོམ། གླུ་ཚིག་བཅས་དྲུག་ཅུ་ལྷག་སྤེལ། གཞན་དགེ་གྲོགས་དང་མཉམ་དུ་རྨ་ལྷོའི་ས་མིང་རིག་གནས་བརྡ་འགྲེལ་དང་། མདོ་སྨད་སྣང་རའི་ལོ་རྒྱུས་ཀུན་གསལ་མེ་ལོང་། གཅན་ཚ་མི་རིགས་སློབ་འབྲིང་གི་ལོ་རྒྱུས།གཡང་རྫོང་རིག་པའི་གཟི་དཔལ་བཅས་དཔེ་དེབ་བཞི་པར་བསྐྲུན་མཛད། དཔེ་ཁྲིད་མི་སྐྱོང་གི་བྲེལ་ཟིང་ཁྲོད་ནས་སློབ་ཁྲིད་ཀྱི་རྣམ་གཞག་ལས་《སློབ་ཁྲིད་ཀྱི་རྒྱབ་ཡིག》ཅེས་པ་དང་། དཔྱད་རྩོམ་ཕྱོགས་བསྒྲིགས་《ཕྲན་དཔྱད་རིགས་པའི་མེ་ལྕེ》། ལྷུག་རྩོམ་ཕྱོགས་བསྒྲིགས་《ཕྱིར་དྲན་ཁྲོད་ཀྱི་ན་ཟུག》 སྙན་ངག་ཕྱོགས་བསྒྲིགས་《རྟོག་འགྱུ་སེམས་ཀྱི་མཆོད་པ》རྣམས་སྤེལ་འཆར་ཡོད། གཞན་《མཐོ་འབྲིང་གི་བརྗེད་བྱང》་ཞེས་པའི་འོད་སྡེར་བརྩམས་ཆོས་ཤིག་ཀྱང་ཡོད། །