ཀྲུང་གོ་བོད་ཀྱི་དྲ་བ།

ཚེ་སྲོག་གི་རྒྱང་འབོད།

ཡོང་ཁུངས། : ཀྲུང་གོ་བོད་ཀྱི་དྲ་བ།   རྩོམ་པ་པོ། : ​འགར་སྐལ་བཟང་།   སྤེལ་དུས། : 2020-02-17
ཡིག་གཟུགས། :ཆུང་། འབྲིང་། ཆེ།

1011581939377_.pic_副本.jpg

འགར་སྐལ་བཟང་། དངོས་མིང་ལ་སྐལ་བཟང་རྒྱལ། མདོ་སྨད་རེབ་གོང་གི་ཆར་གཏོགས་རོང་འབྲོག་ཚོ་ལྔའི་ཡ་གྱལ་འགར་རྩེ་ཨ་བར་ཐེ་བུ་ཞེས་པའི་འབྲོག་སྡེ་རུ་སྐྱེས། མཚོ་སྔོན་རྩོམ་པ་པོ་མཐུན་ཚོགས་ཀྱི་ཚོགས་མི། ༡༩༩༨ལོར་ནུབ་བྱང་མི་རིགས་སློབ་ཆེན་ནས་མཐར་ཕྱིན། ༢༠༡༦ལོར་ལུའུ་ཞོན་རྩོམ་རིག་སློབ་གླིང་རྒྱལ་ཡོངས་སྐབས་བཅུ་དྲུག་པའི་གྲངས་ཉུང་མི་རིགས་འཛིན་གྲྭ་ནས་སློབ་མཐར་ཕྱིན། སྔ་རྗེས་སུ《སྦྲང་ཆར》དང《གངས་རྒྱན་མེ་ཏོག》གཙོས་ཞིང་ཆེན་ཕྱི་ནང་གི་དུས་དེབ་ཏུ་སྙན་ངག་དང་དཔྱད་རྩོམ་དུ་མ་སྤེལ། ད་ལྟ་མཚོ་སྔོན་མི་རིགས་སློབ་གཞི་རྩོམ་སྒྱུར་ལྟེ་གནས་སུ་སློབ་གཞི་རྩོམ་སྒྱུར་གྱི་བྱ་བ་གཉེར་བཞིན་ཡོད།


ཚེ་སྲོག་གི་རྒྱང་འབོད།

འགར་སྐལ་བཟང་།

སྙན་ངག་གིས་ནད་གསོ་ཨེ་ཐུབ།

གལ་ཏེ་མི་ཐུབ་ན།

ནད་པའི་རྣ་ལམ་གྱི་སེམས་གསོ་ཙམ་དང་།

ཤི་བོའི་སྔས་འགྲམ་གྱི་བསྔོ་སྨོན་ཙམ་གྱི་གོ་ཨེ་ཆོད།

དེ་ཡང་མི་ཆོད་ན། 

དོན་མེད་ཀྱི་ཡིག་ཚོགས་འདི།

མནར་གཅོད་ཀྱི་དངན་པ་ཙམ་དུ་ཟད་ཨང་།


མར་མེ་ཡིས་ཤི་བོའི་ལམ་སྣ་འདྲེན་ཞིང་།

ཚ་གསུར་གྱིས་དྲི་ཟའི་ལྟོགས་སྐོམ་སེལ་བ་བདེན་ན།

སྙན་ངག་གིས་ཀྱང་ཕྱི་མའི་ར་མདའ་ཙམ་ཨེ་ཡོང་ངམ།

གལ་ཏེ། དེ་ཡང་མི་ཡོང་ཟེར་ན།

རྒྱུ་འབྲས་ལ་བསྐུར་བ་བཏབ་པའམ།

རྟེན་འབྲེལ་ལ་ཐ་ཚིག་བསྒྲགས་པ་མིན་ནམ།


ཉོན་མོངས་དང་སྡུག་བསྔལ། 

ཐེ་ཚོམ་དང་མྱ་ངན་གྱིས་གདུངས་པའི།

དེ་རིང་གི་ང་ཚོར།

བདེན་དགེ་མཛེས་གསུམ་གྱི་དུག་སེལ་མེད་ན།

ནང་སེམས་ཀྱི་ར་རོ་ཇི་ལྟར་བཀྲུ།

སྣོད་བཅུད་ཀྱི་མཛེས་པ་སུ་ཡིས་བསྒྲོག


སུ་ཞིག་གིས་རང་བྱུང་གི་རྨ་ཁ་ནས།

སྐྱུག་བྲོའི་ཟློས་གར་བསྒྱུར་ཞིང་།

འབྱུང་བཞི་ཡི་གནོད་སྐྱོན་བསླངས།

སུ་ཞིག་གིས་སྙན་ངག་གི་རབས་ཁ་ནས།

བྱ་ཝང་གི་གཤོག་རྩ་བཅད་ཅིང་།

རྣག་ཁྲག་གི་འཁོར་ལོ་བསྐོར།

འདི་ཚང་མ་སྙན་ངག་དང་འབྲེལ་བ་མེད་པ་ཨེ་རེད།


འགྲོས་ཀྱིས་འཁོར་བའི་སྙན་ངག་མའི་ཕ་རོལ་དུ།

ཡན་པར་འཕྱོ་བའི་འཇིག་རྟེན་ཇི་སྙེད་ཅིག

ལྗན་ལྗིན་དང་མུན་ནག་གི་ཀློང་དུ།

ཡིད་གཉིས་སུ་གྱེས་ཤིང་།

སྡིག་བསྔལ་དུ་འབྱིང་།


དེ་བས། དུས་མིན་གྱི་བར་ཆད་སེལ་ཕྱིར།

གོ་གྱོང་འདི་ཅིས་ཀྱང་ལག་པས་ཕུར་དགོས་ལ།

འགག་འཕྲེང་འདི་ཅིས་ཀྱང་གོམ་པས་བསྒྲལ་དགོས།


འདི་ནི་འཇག་སྐྱ་རླུང་གིས་དེད་པའི་འུ་ཐུག་འོ་དོད་ཡིན།

འདི་ནི་སྙན་ངག་མེ་ཡིས་བསེགས་པའི་དྲག་པོའི་དཔུང་འཇུག་ཡིན།

འདི་ནི་བྲང་ཁོག་རྡོ་ཡིས་རྡུང་བའི་མཇུག་མཐའི་ཆོམ་སྒྲ་ཡིན།

འདི་ནི་འཆམ་མཐུན་དཔུང་རྡང་སྦྲེལ་བའི་གཟུགས་འདས་རྒྱང་གླུ་ཡིན།

༢༠༢༠ལོའི་ཟླ༢པའི་ཚེས༡༧ཉིན་གནའ་མཁར་ཟི་ལིང་དུ།

རྩོམ་སྒྲིག་པ། : འབུམ་པ་རྒྱལ།