དངོས་མིང་། དབྲ་ཚང་ཀརྨ་བསམ་གཏན། སྙུག་མིང་། མུན་གྲོལ། གངས་རྒྱན་མེ་ཏོག་སོགས་ཀྱི་དེབ་ཐོག་ཏུ་རྩོམ་ཡིག་འགའ་རེ་བཀོད་ཡོད་ཅིང་། ད་སྐབས་གཞུང་ལུགས་ལ་ལྟ་ཞོར་ནས་རྩོམ་རིག་འབྲི་བའི་དགའ་ཕྱོགས་ཀྱི་ལས་འདི་རྒྱུན་བཅད་ཐུབ་མེད།
ནད་ཡམས། (མུན་གྲོལ།)
—— ཝུའུ་ཧན་གྱི་ཕྱོགས་སུ་སྙིང་རླུང་འཚུབ་པ།①
སྙིགས་དུས་ཀྱི་མི་རྣམས་ཟོ་ཆུན་གྱི་འཁྱུད་མོ་བཞིན།
འཁོར་བ་དང་བུ་ལོན་གྱི་འདོད་རྔམས་ལ་བྲེལ།
ད་ཞག་གཅིག་པུར།
དགུང་གནང་གི་ངལ་གསོ་གཏོང་ཡང་།
ནད་ཡམས་དེ།
འཇགས་མའི་རྩྭ་ཐག་ལ་སྟུག་པའི་མེ་ལྕེ་ལྟར།
ཝུའུ་ཧན་ནས་སྦར་ཏེ།
མཐའ་མེད་པའི་སྐམ་སའི་ཕྱོགས་སུ་མཆེད་ཤོར།
གོ་ཚོད་དུ།
ནད་ཡམས་ཀྱི་མཁའ་དབུགས་ཁྲོད།
མི་ཚོགས་ཁྲི་ཚོ་ལྔ་བརྒྱ་ཝུའུ་ཧན་ནས་ཕྱི་ལ་བུད་སོང་སྐད།
ཀྱེ་མ། ད་ལྟ་གང་དུ་རྒྱང་བཀྱེས་ཡོད།
ཁ་སང་དག་ཞིང་གཅིག་པུ།
ནད་ཡམས་མ་འགོས་པར་ལྷིང་འཇགས་སུ་ལུས།
བཟོད་བསྲན་བྲལ་བས།
ནད་ཡམས་དེས་རྡོ་ཡི་ཕོ་བྲང་བཤིག་སྟེ།
ད་ནི་ཤར་ཕྱོགས་སྐམ་ས་ཆེན་མོ་ཧྲིལ་གྱིས་བཟུང་ཚར།
བྱ་ཕོ་ཀེང་ཀེང་ལོངས་པའི་ས་ཁྲ།
ཉིན་རེར་ཁ་མདོག་འགྱུར་བཞིན་པས།
དཔལ་ཡོན་གྱི་ཙི་ན།
ད་ལྟ་འཇིགས་སྣང་གི་ཁྲོད་ན་གབ་སྦས་བྱས་ཡོད།
དུག་གི་ཁ་རླངས་དང་རྣག་གི་མཆིལ་མའི་བར།
ནད་ཡམས།
རིན་པོ་ཆེའི་པྲོག་ཞུ་མནབས་ནས།
གཟུགས་མེད་ཀྱི་གདོན་ལྟར་ཞུགས་པས།
སྐྱེ་དགུ་རྣམས་འཇིགས་སུ་རུང་བའི་དུར་སར་བསྐྱལ།
མྱ་ངན་ཐང་གི་ཝུའུ་ཧན་བས།
གནམ་སར་ངུ་འབོད་དྲག་ཏུ་བཏབ་ཀྱང་།
འཇིགས་སྣང་གི་སྐྱོ་གར་རིང་མོ་ཅི་ཡང་མ་རྙེད།
ད་ཐེངས་ཚེ་སྲོག་གི་གཡུལ་ལ།
གོས་དཀར་གྱོན་མཁན་རེ་གཉིས་ཆས་པ།
སྙིང་འདར་བའི་ངུ་ངག་ལས།
ཡིད་ཆེས་ཀྱི་དབུགས་རྒྱུན་ལྷག་མ་གང་ཡང་མ་འཁྲོལ།
མི་རྣམས་གདུང་སྨག་གིས་བཟི་སྟེ།
མཆི་མའི་ཆབ་རྒྱུན་གྱིས་སྨྲ་བ་ཡོངས་སུ་འགག་སྐབས།
སེམས་སྔངས་ལ་འཁྲེང་བའི་སྙན་ངག།
ངས་རྒྱུ་འབྲས་ལ་ཁྲེལ་མེད་དུ་བྲིས་པ་མ་ཡིན།
མགོ་ནག་གི་སྐྱིད་སྡུག་གནམ་ལ་དབང་ཟེར་ཡང་།
ང་ཚོའི་སྐྱིད་སྡུག་ལག་མཐིལ་ན་ཡོད།
ནད་ཡམས་ཀྱིས་ཟིན་པའི་ཝུའུ་ཧན་བ།
ང་ཚོས་དཀའ་སྡུག་འདི་བརྒལ་རྗེས།
ང་ཚོས་ཁྱོད་ཀྱི་རྫོགས་ལྡན་ལ་ངང་གིས་བསྒུག།
གྲོང་ཁྱེར་སྣོལ་མཚམས་ཀྱི་ལམ་བུ་བཅད་དེ།
འགྲོ་འོང་རྣམས་སྟབས་གཅིག་ཏུ་བཀག་པས།
ནད་ཀྱིས་མ་འཆི་ནའང་།
ལུང་སྟོང་ནང་མུ་གེ་བྱུང་བར་སྐྲག།
མདོར་ན་ནག་པོ་དགུ་སྦྱོར་ཁྱེར་ནས།
འཆི་བདག་ལ་བགད་མོ་སློང་མཁན་སུ་ཡང་མི་སྲིད།
ངན་ཁག་ཡོད་ཚད་ཕ་ཝང་ལ་དཀྲིས།
མུན་ཁྲོད་ན་ལྷབ་ལྷུབ་ཏུ་ལྕེབས་པའི་ཕ་ཝང་།
དོན་དམ་ཏུ།
མི་རིགས་ཁྱོད་ལ་ནག་ཉེས་བཟོ་མཁན་
ཡིན་ནམ་་་ ་་་
ཁྱོད་མི་རིགས་ལ་ནག་ཉེས་བཟོ་མཁན་ཡིན་་་ ་་་
2020/2/6
——
① མཆན། སྙིང་རླུང་འཚུབ་པ་ནི་ཞེ་སྡང་དང་སེམས་སྡུག་གཉིས་ལས་འདི་ཕྱི་མ་གོ་དགོས།