ཇི་འདྲའི་སྐྱིད་པ་ལ།
ཁྲི་གོང་ཨོ་རྒྱན་ཚེ་རིང་།
དུས་རྒྱུན་ཞོགས་པ་རེ་རེར
ང་རྨི་ལམ་གྱི་གཤོག་འོག་ནས་ལངས་དུས
ཁྱེད་ཀྱི་འཛུམ་མདངས་འཇའ་ཚོན་བཞིན་ངའི་མཁའ་དབྱིངས་སུ་འཚེར་ཞིང
ཁྱེད་ཀྱི་གོམ་སྒྲ་སིལ་སྙན་བཞིན་ངའི་སེམས་ཁོང་ན་བཞད་ཡོད
ཇི་འདྲའི་སྐྱིད་པ་ལ
ཡོད་ཚད་ཉི་འོད་བཞིན་ཤར་བས
འཇིག་རྟེན་དྲོད་ཀྱིས་ཁེངས་ཤིང
ས་གཞི་འོད་ཀྱིས་ཁྱབ
ཁྱེད་ཀྱི་འཇམ་ཤ་དོད་པའི་སྐད་ཆ་རེ་རེར་འོ་ཇའི་དྲི་ངད་འཐུལ་ཞིང
ཁྱེད་ཀྱི་བརྩེ་གདུང་གི་མིག་མདངས་རེ་རེར་རེ་བའི་འོད་ཀོར་འཁྱིལ་ལ
ཁྱེད་ཀྱི་འཛུམ་མདངས་དེ་ཡང་ངའི་ཉིན་གཅིག་གི་ཉི་འོད་དང
ཁྱེད་ཀྱི་གོམ་སྒྲ་དེའང་ངའི་ཚེ་གཅིག་གི་རྨི་ལམ་དུ་གྱུར་ཡོད
ཇི་འདྲའི་སྐྱིད་པ་ལ
ཡོད་ཚད་མཛེས་སྡུག་གིས་ཁྱབ་ཅིང
ཁྱེད་རང་གཞོན་ཤ་དོད་པའི་ལང་ཚོའི་འཛུམ་བུ་དང
ཁོ་བོ་དྲོད་ཀྱིས་བརླན་པའི་ས་གཞི་སྣུམ་པོ་སྟེ
ནམ་མཁའ་སྔོ་ཞིང་དྭངས་ལ
ས་གཞི་ལོ་ལེགས་ཀྱིས་ཁེངས་པས
ཡོད་ཚད་སྔོ་ལྗང་ངེར
བསིལ་རླུང་གི་རླབས་གཉེར་ཁྲོད་དུ
གཡོ་ཞིང་འཛུམ
༢༠༡༩ལོའི་ཟླ་༣ཚེས་༧ཉིན།
༢༠༡༩ལོའི་ཟླ་ཟེར་དེབ་གཉིས་པ་ལས་བཤུས།