ཉིན་གཅིག་གི་དུས་འདིར།
ཆུ་ཕྲན་དང་ཆུ་ཕྲན་གྱི་འབབ་རྒྱུན་དྲག་ཏུ་བརྡོལ་ཞིང་།
ཆུ་ཆེན་དང་ཆུ་ཆེན་གྱི་རླབས་རྒྱུན་མཁའ་རུ་འཕྱོ་དུས།
ངས་ཐེངས་མང་པོར་ཁྱེད་ཀྱི་རླབས་སྒྲ་ལ་རྣ་བ་གཏད།
གསེར་ལྡན་གྱི་ཆུ་བོ་ཡ།
བདུད་རྩི་ཡི་སྨན་མཆོག
བཞུར་སྒྲ་སྙན་པ་ནི།
ཁྱེད་ཀྱི་དགེ་མཚན་དང་།
འབབ་རྒྱུན་རིང་བ་ནི།
ཁྱོད་ཀྱི་ཁྱད་ཆོས་རེད།
འོན་ཀྱང་།
དུས་རབས་ཀྱིས་ཁྱོད་རང་ཇི་ལྟར་དེད་ནའང་།
གསར་གཏོད་ཀྱི་རླབས་སྒྲ་མེད་ལ།
རྟོགས་སད་ཀྱི་བཞུར་རྒྱུན་ཀྱང་རེད།
དེ་བས།
བཞུར་སྒྲ་སྙན་པ་ཙམ་ནི།
ཁྱེད་ཀྱི་གཟི་བརྗིད་ག་ལ་ཡིན།
རྙིང་ཞེན་གྱི་ཆུ་བོ་ཡ།
རུལ་སུངས་ཀྱི་བཞུར་རྒྱུན་དེ།
ཁྱོད་ཀྱི་མིག་ཆུ་མེད་པའི་ལོ་ཟླ་མཚོན་ལ།
ཁེར་རྐྱང་གི་ཨུ་ཚུགས་ཆེ་བའི་རྙིང་ཞེན་མཚོན།
དེ་རིང་།
དུས་ཚོད་དབང་གིས་མང་པོ་མི་འབྲི་ལ།
དུངས་ཞེན་ཞིག་གིས་མང་པོ་མི་གླེང་།
འབྲི་ཆུ་ཡ།
ལྷིང་འཇགས་ཀྱི་འབྲི་ཆུ།
ཁྱེད་ཀྱི་རླབས་སྒྲ་ལ་རམ་འདེགས་དང་།
ཁྱེད་ཀྱི་འགྱུར་ཁུགས་ཀྱི་མཛེས་སྡུག་ལ།
འཚོལ་སྙེག་བྱས་ནས།
ནམ་རྒྱུན་ཁྱེད་ཀྱི་རིན་ཐང་དེ།
ངོམ་ན་ཆོག་ཨང་།
རྩོམ་སྒྲིག་པ། ཀླུ་མོ་མཚོ།
འབྲི་ཆུ།