ཆུ་རིས་མགུལ་དུ་འཆང་བའི་བརྩེ་དུང་གི་རྒྱ་ཕིབས།

སྐབས་འགར་ལོ་ཟླའི་འཁོར་སྐྱོད་ནི་འཇའ་རིས་བཞིན་ཕར་ལ་ཡལ།

མཆི་མའི་རྒྱུན་ཐག་ནི་གོས་ཀྱི་རི་མོ་བཞིན་ཐུར་དུ་དཔྱངས་དུས།

ང་ཡི་ལོ་ཟླར་དྭངས་གཙང་གི་གུས་འདུད་ཞུ་དགོས།

རྐང་གི་རྣམ་ཤེས་བརླན་དུས།

བརྩེ་བའི་མེ་ལྕེ་གྱེན་དུ་འབར་ནས་ལོ་ཟླའི་ལྷིང་འཇགས་ཁད་ཀྱིས་བཞེས་ཚུལ་དྲན།

དུངས་བའི་མཚོ་མོས་རི་ཀླུང་བསྣུབས་ཏེ་སེམས་ཀྱི་སྤང་ཐང་བརླན་ཚུལ་དྲན།

འདི་ལྟར།

ལོ་ཟླ་དག་བརྩེ་དུང་གི་བང་རིམ་དུ་དཀྲི་འདོད་ཅིང་།

དྲན་གདུང་ཉིད་རྒྱ་མཚོའི་ནང་རོལ་དུ་འཕྱོ་བའི་རླབས་ཀྱི་འོད་ཟེགས་བཞིན།

དྲན་པའི་དྲག་ཆར་གྱི་འགུལ་སྟངས་ཤིག་གིས་ཐལ་བར་བཟོས་སོང་།

དབྱངས་ཀྱི་ང་རོ།

དྲན་པ་དང་གདུང་བ།

སྣང་བ་དང་མུན་པ།

ཡོད་ཚད་ས་སྲོད་ཅིག་གི་རྨི་ལམ་དང་འདྲ།

ཡོད་ཚད་ཨ་རག་ཅིག་གི་བཟི་ཁ་དང་འདྲ།

དེ་དུས་སུ།

ལང་ཚོ་རབ་རིབ་ཀྱི་གཡའ་རྡོ་དང་སྤང་རྒོད་ངོས་སུ་འཚང་ཞིང་།

དངན་པ་དང་ཁུར་བོའི་ཁྲོད་ན་ལུས།

བརྩེ་བའི་རྨུ་ཐག་དམ་པོ་ཞིག་ཁད་ཀྱིས་ཆད་སོང་།

དུངས་བའི་དགུ་ཚིགས་རིང་མོ་ཞིག་སྙིང་དུ་ཟུག་སོང་།

ལོ་ཟླའི་ཤ་འོད་སེམས་སུ་བྲུག་སོང་།

ཀྱི་ཧུད།

མི་རྟག་སྒྱུ་མའི་རྨི་ལམ།

མི་རྟག་ཚེ་ཡི་འདུ་འགོད།

མི་རྟག་པའི་བརྩེ་བའི་འཕྱོ་འཇགས།

མི་རྟག་པའི་ལས་ཀྱི་བཀོད་པ།

དེ་དག་བསམ་ན་ངའི་རུས་རྐང་ལ་བཟོད་མི་ཚུགས་པའི་ན་ཟུག་ཅིག་སྐྱེས་ཡོང་།

ན་ཟུག་འདི་ང་ཡི་ཁུར་བོ་དང་སྡུག་ཡུས་སུ་གྲུབ།

ན་ཟུག་འདི་ང་ཡི་དྲན་གདུང་དང་མིག་ཆུ་རུ་བཞུར།

ཀྱེ།

བརྩེ་དུང་གི་རྒྱ་ཕིབས་ལྗང་ཁུ།

དོ་ནུབ་ཁྱོད་གང་དུ་བཞུད་སོང་།

ཁྱོད་ཀྱིས་ང་ལ་ཅི་ཞིག་བསྐྱུར་ནས་གང་དུ་བཞུད་སོང་།

དོན་དམ་གང་དུ་བཞུད་སོང་ཡ།

ལྗང་ཁུ་དེ་ཁ་དོག་ཉིད་དུ་གྲུབ་པ་ཞེ་རེ་སྨྲེང་ཨང་།

2018/5/1ཉིན་མཚོ་ལྷོ་མང་རྫོང་ནས་སྦྱར།

རྩོམ་སྒྲིག་པ། མཁའ་འགྲོ་ཚེ་བརྟན།

དཔྱད་མཆན 0 ཡོད།