མཚན་ལམ་རིང་མོ་ཟླ་བའི་གྲོང་ཁྱེར་ཡིན།།
རང་སེམས་དྲོན་མོ་ཁང་ཆུང་མར་མེ་ཡིན།།
ལོ་ཟླའི་སྲིབ་ཁ་རླུང་གིས་བརྡར་བ་དེ།།
མཛའ་མོ་ཡིད་ལ་ཆགས་པའི་དུས་ཤིག་ཡིན།།
འཇིག་རྟེན་གྲུབ་བཞི་མི་ཡི་རྒྱལ་ཁབ་ཡིན།།
ཕ་ཡུལ་ལུང་བ་རང་གི་གཞིས་ཁྱིམ་ཡིན།།
ཁྲག་གི་དྲོད་ལ་སྦས་པའི་ཉེས་མི་དེ།།
ལུས་ཀྱི་མཆོད་པ་འབུལ་སའི་སྙིང་ཆུང་ཡིན།།
དབྱངས་གསལ་སོ་བཞི་སྲོག་གི་དམི་ཐག་ཡིན༎
ཀ་ཁའི་སྦྱོར་ཀློག་ཁྱིམ་གྱི་བདེ་སྐྱིད་ཡིན།།
སྙན་ངག་གཤིས་ལ་འཐམ་པའི་བུ་ཕྲུག་དེ།།
བྱམས་པ་ཞེ་ལ་ཐོག་པའི་དམ་ཚིག་ཡིན།།
དཔྱིད།
རི་གྲོང་ཐལ་བ་ཉུང་དུ་བྱིན་ཏེ༎
ལྷོ་མཐའི་ཉི་འོད་རྒྱང་ན་འཚེར༎
ཆབ་རོམ་དཀར་བོ་དགུང་ལ་འཕྱིར་ཏེ༎
ཚིང་ཚིང་ནགས་ལོ་ལྗོན་པའི་སྐས༎
རྨི་ལམ་རྟ་ཁྱུ་མཁའ་རུ་གཤར་ཚེ༎
རྩྭ་ལོ་གཡོ་བའི་ལྗང་སྨྱུག་མཐོང་༎
ཁུགས་རྟས་གཅོས་སྐད་རྣ་བར་བརླག་ཚེ༎
འདམ་སྐྱེས་པད་མའི་མགོ་བོ་བསྒུར༎
ནོར་ལུག་ཁུལ་སྟོད་དབྱིངས་ལ་བསེད་དེ༎
རྭ་ལུག་འབའ་སྒྲས་རི་ཐང་གང་༎
བེའུ་ཆུང་འཚོ་བའི་བྱིས་པའི་རྩེ་རྡོ༎
ཆུ་འགྲམ་བྱེ་མའི་ཐང་དུ་ལྷག།
སྲོད་ཁའི་སྣང་བ་གསར་བ།
སྨུག་སྤྲིན་རབ་ཏུ་མཐུག་པོའི་བང་རུམ་ནས༎
རྟ་བདུན་དཀྱིལ་འཁོར་ཡངས་པོ་ནུབ་ཏུ་འཕགས༎
ཆར་བས་ངུ་གཤམ་བརྒྱབ་པའི་ཚེ་མཇུག་ནས༎
གནམ་ངོ་འོད་ཀྱི་གུར་ཁང་ས་གཞིར་འཕྲོས༎
ལྗོན་ཤིང་རལ་བ་སྟུག་པོའི་ཡལ་གའི་རྩེར༎
ཟིལ་ཆུ་དལ་གྱིས་ལྡིང་ནས་གཙང་ཆུ་འདྲེས༎
ཆོས་རྒྱལ་ཁྲུས་ལ་རོལ་བའི་བར་སྐབས་ནས༎
དགེ་སྡུག་མེ་ལོང་ཆེན་པོ་ཐེངས་གཅིག་བསྐུལ༎
ནུབ་རི་གཏུམ་དྲག་ཁྲ་བོའི་ཕྲག་སྟེང་ནས༎
འོད་ཀྱི་སྙེ་མ་སེར་བོ་ཐུར་དུ་ལྷུང་༎
སོ་ཕག་རྡོ་ཡི་ཁང་བཟང་ཉམ་དགའ་བ༎
རེ་ཞིག་ཟངས་མདོག་དཔལ་རིའི་གཟུགས་སུ་སྤྲུལ༎
འཁྲུལ་ལམ་རིང་མོའི་གཅོང་སྐད།
ཉི་ཟླ་གཟའ་ཡིས་བཟུང་བའི་སྤྲིན་ནག་གི་འོག་ན།།
ཆུ་བོ་གྱེན་ལ་འཐེན་པའི་རྐང་ལམ་གྱི་སྣེ་ན།།
ཁེར་འདུག་སྨྲེངས་གླུ་ལེན་པའི་སྨན་མོ་ཡི་ལས་ཀ།།
ཆ་བྱད་བུ་མོ་མཛེས་མའི་གཟུགས་བརྙན་ལ་འཁྲུལ་སྲིད།།
སྡུག་སྲིན་དམ་ལ་བཏགས་པའི་འཇིག་རྟེན་གྱི་ཁམས་ན།།
རྒྱ་མཚོར་གངས་རི་འཛུགས་པའི་སྣོན་བཅུད་ཀྱི་ཡུལ་ན།།
སྦྲ་ནག་གུར་གྱིས་ཉོ་བའི་དུག་ཅན་གྱི་ཚོང་བ།།
ཨ་ཕ་ཁ་ཁུར་སྣང་བས་མུན་སྒོམ་ལ་དད་སྲིད།།
ལུག་ཁྱུ་རི་ལ་འཁྱམས་ཡང་ལུག་རྫིས་ཤིག་མི་འདུག།
ཞིང་ཐང་ས་རྒོད་གྱུར་ཡང་རྨོ་མཁན་ཞིག་མི་འདུག།
དཔལ་འབྱོར་བོས་ཐུང་བཟུང་བའི་གཤེད་མ་ཡིས་ལས་མཁན།།
སྙིང་ཁ་དུམ་བར་གཙབ་ཡང་བྱམས་པ་ཞིག་སྒོམ་སྲིད།།
ཤེས་རབ་མཁའ་ལ་ཆད་ཡང་བརྩོན་འགྲུས་ཀྱི་གཤོག་པ།།
ཧམ་སེམས་ང་རྒྱལ་གཏོར་བའི་ཐོག་རྒོད་ཀྱི་འཕར་ཁ།།
འགད་རྫས་ཆུ་ལ་འཕང་བའི་ངར་ཤུགས་ཀྱི་རླབས་རིས།།
གྱོང་རྒུད་གཏེར་ཁ་བརླག་པའི་ཕ་སྐད་དེ་འགག་འདུག།
མིག་འབྲས་ཚང་ནས་བྲིས་པའི་མནར་གཅོད་ཀྱི་བྱ་འགུལ།།
སྒོ་ཁྱི་མགོ་བོས་སྤྲད་བའི་རྩེད་མོ་ཡིས་བྱེད་སྒོ།།
གཙུག་ལག་མེ་ལ་འཐིམས་པའི་རུལ་སོང་གི་བསམ་བློ།།
གོང་མ་རྡོ་ཡིས་རྟོག་པ་དེ་ཙམ་རང་མིན་ནམ།།