མཆིན་པའི་ཤ(ཞར་བཀོད་གཅིག)
སྡེ་ཆེན་སྡེ་བའི་གྲོང་ནས།།
ཚེས་ཆེན་ཟླ་བའི་འོག་ནས།།
བྱམས་པ་སྙིང་ལ་བཏགས་པ།།
ཐེངས་གཅིག་རྨི་ལམ་ཨེ་རེད།།
འཁོར་བརྩེགས་ལོ་ཟླའི་ཁྲོད་ནས།།
འཕྲད་པ་ཐེངས་གཅིག་མ་བྱུང་།།
ལས་དབང་གནམ་གྱི་བདག་མོས།།
མཇལ་འཛོམས་གནང་བ་ཁ་དྲོ།།
ཤ་དང་རུས་པ་གླན་ནས།།
སྙིང་དང་མཆིན་པ་ཐུག་ནས།།
བཅོས་མིན་སེམས་ཀྱི་སྐད་ཆ།།
བར་མཚམས་མེད་པར་ཤོར་བ།།
ཞལ་ངོ་དུང་ལྟར་དཀར་བ།།
ཟླ་བའི་གདོང་དང་མཚུངས་པ།།
ཆུང་འདྲིས་སེམས་ཀྱི་མེ་ཏོག།
སེམས་པ་གསོད་པའི་ལག་དམར།།
རྒྱ་ཚོས་མདངས་ཀྱིས་མ་བྱུག།
མཆུ་སྒྲོས་ལྷག་གིས་དམར་བ།།
འཇམ་ལ་སྙི་བའི་ལྕེ་རྩེ།།
བདག་དང་ཡང་ཡང་གླན་པ།།
མ་འོངས་ཕུགས་ཀྱི་འདུན་མ།།
མི་ཚེ་རིང་ཐུང་མི་ཤེས།།
འགྱུར་མེད་དམ་བཅའི་རི་མོ།།
སྙིང་དང་ཁྲག་གིས་བྲིས་ཡོད།།
མགོ་བོ་པང་ལ་བསྙེས་ཏེ།།
ལག་པའི་རྒྱབ་གཞུང་བདམས་ནས།།
ཙན་དན་ཤུག་དམར་ཕྲེང་ཆུང་།།
བདག་གི་རུམ་དུ་བཅུག་སོང་།།
མཚན་མོའི་སྐར་གཞུང་ཁྲོད་ནས།།
ཟླ་བ་ཤིན་ཏུ་གསལ་བས།།
གྱང་སྲུབས་རྒྱབ་ཀྱི་ངེད་གཉིས།།
རྩྭ་ལོའི་སྤྱིལ་བུ་བྱས་པ།།
གཅེས་ལོ་སེམས་ཀྱི་མེ་ཏོག།
ང་ཡི་སྙིང་དུ་བཞད་ཡོད།།
རླུང་འཚུབ་མི་ཁ་ཆེ་ཡང་།།
བརྩེ་དུང་འགྱུར་བ་མི་སྲིད།།
བཅོས་མིན་ཚིག་གི་དང་མ།།
ཟུར་མིག་གདོང་ལ་འཕངས་ནས།།
གཅེས་གཅེས་ལོ་ལོ་བྱས་ནས།།
རེ་ཞིག་བྲལ་དགོས་བྱུང་སོང་།།
རྐང་བའི་གོམ་ཁ་བསྒྱུར་ཡང་།།
ལག་པ་སོ་སོར་འཐམ་ནས།།
མིག་མཐའ་མཆི་མས་གང་ནས།།
སོ་སོའི་ས་ལ་ཆས་སོང་།།
ཁྱེད་ཀྱིས་ཕྱིར་ལྟ་བྱེད་དུས།།
ང་ཡི་མིག་ཆུ་ཤོར་སོང་།།
མིག་ཆུ་ལྐོག་ཏུ་མིད་དེ།།
ལག་པས་བརྡ་ཞིག་བཏང་སོང་།།
ང་རང་ཁྱིམ་ལ་འབྱོར་དུས།།
ཁྱེད་ཀྱི་འཕྲིན་ཡིག་ཐོན་འདུག།
ཐེངས་གཅིག་ཐེངས་གཉིས་བཀླགས་ཏེ།།
སེམས་ལ་རྨ་ཁ་བཟོས་སོང་།།
བརྡ་འཕྲིན་གློག་ལམ་སྟེང་ནས།།
སྙིང་གཏམ་ཞིམ་པོ་གློད་དེ།།
གཏི་མུག་གཉིད་ཀྱིས་ཁྱེར་ཡང་།།
རྨི་ལམ་ཁྱེད་ཀྱིས་ཁྱེར་སོང་།།
ཞོགས་པའི་ཉི་ཟེར་འཆར་དུས།།
ཁྱེད་རང་ལམ་ལ་ཆས་སོང་།།
བདག་ལ་ཁ་པར་བཏང་ནས།།
ང་རང་བུད་སོང་ཟེར་ཀི།
སེམས་ལ་ན་ཟུག་ཆེ་ཡང་།།
མི་བཟོད་ཐབས་གཞན་མི་འདུག།
མིག་ནས་མིག་ཆུ་བཞུར་ཡང་།།
ཁྱེད་ལ་གསང་བ་བྱས་བཞག།
འདང་ཆེན་མཚོ་ཁའི་མེ་ཏོག།
མཚོ་བྱ་ངང་བ་སེར་བོ།།
རྒྱང་རིང་ཡུལ་ལ་འཕུར་ཡང་།།
ཕྱིར་ལ་ནམ་ཐོན་སྒུག་འདུག།
ཁ་ཚིག་མནའ་ཡི་ཨ་ལོང་།།
ཁྱེད་དང་ང་ཡིས་མགར་ཡོད།།
ལས་དབང་གཏན་གྱི་འདུན་མ།།
གྲོས་ཐག་གཅིག་ལ་བཅད་ཡོད།།
སེར་ཆེན་སེམས་ཀྱི་དུང་བ།།
ཡིད་འཕྲོག་ལྷ་མོར་བཅོས་ཡོད།།
ཚེ་ཐོག་འདི་ཡི་ཡོད་ཚད།།
ཁྱེད་རང་ཁོ་ནས་སྤྱོད་ཆོག།
ཁྱེད་དང་འུ་གཉིས་དགའ་བ།།
སྦྲང་རྩི་མངར་བོའི་རོ་ཡིན།།
ང་ཡི་མཆུ་ཏོ་རྩོག་རུང་།།
ཁྱེད་ལ་གཅེས་གཅེས་བྱས་ཡོད།།
སེམས་རྟེན་བྱུར་དཀར་ཕྲེང་བ།
སེམས་ཀྱི་ངོགས་ན་འབུར་དུ་ཐོན་པའི་རི་མོ་ཞིག།
རི་མོའི་སྟེང་ན་འོད་དུ་འཚེར་བའི་ཡིག་འབྲུ་ཞིག།
ཡིག་འབྲུའི་ཁྲོད་ན་གསང་བ་སྦས་པའི་ཁ་དོག་ཅིག།
ཁ་དོག་དེ་ནི་ཁྲག་གིས་འཁྱུད་པའི་ཁ་དོག་རེད།།
མིག་གི་མདུན་ན་ལང་ཚོ་མཛེས་པའི་ལོ་མ་ཞིག།
ལོ་མའི་གསེང་ན་དུང་བ་རུམ་པའི་སྐྲ་རྒྱན་ཞིག།
སྐྲ་ཡི་རྒྱན་ལ་ལྷག་ཏུ་ཞེན་པའི་འབུག་སྲས་ཤིག།
འབུག་སྲས་དེ་ནི་གསེར་གྱིས་བཞུས་པའི་སྐུད་པ་རེད།
ཁ་བའི་ཁྲོད་ན་དྲོད་ཀྱིས་གསོས་པའི་ཟླ་བ་ཞིག།
ཟླ་བའི་གདོང་ན་མིག་ཆུ་འདྲུད་པའི་སྐར་མ་ཞིག།
སྐར་མའི་ཡིད་ལ་སྙན་ངག་འབྲི་བའི་ལྕགས་སྨྱུག་ཅིག།
ལྕགས་སྨྱུག་དེ་ནི་བརྩེ་བའི་དབྱངས་ཚིག་རྩོམ་མཁན་རེད།།
རྨི་ལམ་ནང་ན་རྣམ་ཤེས་འཁྱམས་སའི་ཕོ་བྲང་ཞིག།
ཕོ་བྲང་ནང་ན་མགོ་དཀྲིས་མནབ་པའི་འབྲོག་མོ་ཞིག།
འབྲོག་མོའི་རྒྱུད་ན་བལ་ལྟར་འཇམ་པའི་རང་གཤིས་ཤིག།
རང་གཤིས་དེ་ནི་བག་ཆགས་གཏོར་བའི་མདའ་མོའོ།།
འཁྲབ་རའི་ནང་ན་གྲིབ་མ་འགུལ་བའི་སྣང་བརྙན་ཞིག།
སྣང་བརྙན་དེ་ལ་གློག་འོད་འཚེར་བའི་སྙིང་གཏམ་ཞིག།
སྙིང་གཏམ་དམར་རྗེན་རྡོག་སྒྲ་འཐེན་པའི་ཆང་ཕོར་ཞིག།
ཆང་ཕོར་དེ་ནི་ཡིད་ཁ་བསླུ་བས་འཇའ་ཚོན་རེད།།
ཤེས་བྱའི་གླིང་ན་གླེགས་བམ་བསྣམས་པའི་ཕྱེ་ལེབ་ཅིག།
ཕྱེ་ལེབ་གཤོག་ཁྲ་ཡབ་མེས་ཚང་གི་ཡུམ་ཆེན་ཞིག།
ཡུམ་ཆེན་ལང་ཚོ་མཛེས་སྡུག་ཁུར་བའི་ཕུགས་བསམ་ཞིག།
ཕུགས་བསམ་སྒོ་གླེགས་བདག་གིས་བརྡུང་བ་ཆོས་ཅན་ནོ།།