ཀྲུང་གོ་བོད་ཀྱི་དྲ་བ།

དུར་བྱང་གི་སྙན་ངག་བདམས་བཀོད།

ཡོང་ཁུངས། : ཀྲུང་གོ་བོད་ཀྱི་དྲ་བ།   རྩོམ་པ་པོ། : དུར་བྱང་།(མགོ་ལོག)   སྤེལ་དུས། : 2018-05-24
ཡིག་གཟུགས། :ཆུང་། འབྲིང་། ཆེ།

  ཁ་ཆེམས།

ངའི་ནི་འཚོ་བའི་ཡང་སྙིང་དང་དོན་སྙིང་ལོན་གྱིན་མི་འདུག

རྒྱུ་མཚན་ཞིག་བཙལ་ཀྱང་སྐྱོ་སྣང་ཇེ་སྡུག་ཏུ་འགྲོ་བས

ཆེས་མཐའ་མཇུག་གི་ཐབས་ལམ་ཞིག་མེད་པ་འདྲ

ངས་ཁྱོད་ཁོ་ན་ལ་གློ་སྙིང་བྲང་གསུམ་འབུལ་ན་འདོད

སྡུག་རུས་ཀྱི་ངང་ནས་འབྱོར་ཕྱུག་ལྟ་བུའི་སྙན་ངག་མང་པོ་བྲི་དགོས

ང་ནི་ཉལ་སར་ལྷུང་བ་ཐག་མི་རིང་བའི

ངས་དཀའ་བ་སྤྱད་ནས

སྙན་ངག་གི་ཚེ་སྲོག་མཛེས་སྡུག་གི་ངང་ནས

ཁྱོད་ཀྱི་ཁོར་ཡུག་ཏུ་སྙོམ་ལག་རྒྱས་སུ་འཇུག་རྒྱུ

སྐྱོ་གདུང་གི་ནད་དེ་ཡུད་ཙམ་གྱི་རྗེས་སུ

ངའི་རྩ་ལམ་ལ་སིམ་འགྲོ་བའི་སྐབས་ཤིག་ལ

དེ་དུས་ང་ལ་འཆི་ལམ་ཁོ་ན་མ་གཏོགས་མེད

ང་ལ་རྒྱུས་མངའ་ཡོད་པའི་ཁྱོད་ཀྱིས

ངའི་སྙན་ངག་དག

ང་དང་མཉམ་དུ་དུར་ཏུ་སྦས་རོགས

2018-4- 3-ཉིན།

ཁ་བྱང་མེད་པའི་སྙན་ངག     

ཆར་ཞོད་དྲག་པོ་ཞིག་གི་རྗེས་ནས

མི་ལོ་བདུན་གྱི་དབུལ་ཁོངས

ནང་སེམས་ཀྱི་མེ་རི་འཁྱག་པོ་དེ་ཡི་རྩེ་ལ

ཞེ་ནག་པའི་སྒོ་ནས་བླུགས་ཏེ་དྲག་ཏུ་འཕྱུར

བདག་གི་སེམས་དང་སེམས་བྱུང་དག

རང་བྱུང་ཁམས་དང་འབྲེལ་ཆེ་བས

མ་གཞི་གནམ་ངོ་སྔོན་པོ་ཡིན་ན་ཡང

ང་སྨྲེང་བ་དང་བསྟུན་ནས་གནམ་མཁའ་ནག་པོ་རུ་གྱུར

མ་གཞི་ས་གཞི་བསྟན་པོ་ཡིན་ན་འང

ངའི་སེམས་ཁམས་དང་འདྲ་བར་ཡོམ་ཡོམ་འགུལ     

2018.5.18.ཉིན། 

སྨྲེང་སྐྱོ།      

སེམས་པ་ནི་དྲིལ་ལྕེ་བཞིན་འགུལ་ན་ཡང

སེམས་གླན་ནས་དགའ་སྐྱོ་འཆད་ས་ཞིག་གང་ན་ཡོད

རང་ཉིད་ལ་སྡོམ་རྒྱ་ཞིག་བཟོས་ནས

ཕ་རོལ་པོའི་འཕྱ་དམོད་འགོག་སླད

ཕྱི་དོན་ལྐོག་ན་མོ་ནང་བཞིན

རྩིག་རྡེབ་ཀྱི་ངེས་འབྱུང་མཚོན་པའི་སངས་རྒྱས་ཀྱི

འདྲ་སྐུའི་ནང་དུ་འཛུལ་རྗེས

ཚུལ་འཆོས་ལ་གོམས་པའི་ལྐོག་གྱུར་གྱི་མི་ཞིག་ཏུ་འགྱུར

2018- 4- 6-ཉིན། 

 མིང་མེད།    

ས་རྡུལ་དག་བརྟོལ་ཏེ

གཉེར་མ་མང་བའི་ངོ་གདོང

མེ་ལོང་ནང་དུ་བསྐྱིལ

མུག་ཤི་འཐེམས་པའི་རི་དྭགས

སྒྲ་གཟན་པོ་དག

རྣ་ལམ་དུ་འཚངས

ཆོ་འཕྲུལ་གྱི་ངོ་ལ་འབྱར་བའི

མེད་མུག་དག

བཤས་ར་ལྟ་བུའི་འཁྱག་རུམ་གྱི་འཕྲལ་དུ

འདོམས་ན་སྐྱེས་པའི་རླིག་རྩིད་བཞིན

ས་གཞི་བྱིངས་ལ་སྤུ་བཏོན་ཏེ

དབུགས་རིང་འབྱིན       

 2017-/ 9- 7-ཉིན།

 ཆར་བ།    

ཆར་ལྭ་གྱོན་ཏེ

མི་རེ་རེ་ལ་འབྱར་བའི་གྲིབ་མ་དག

སྲང་ལམ་ནས་འགོ་མཇུག་མཐའ་དག་དྲུད་དེ

འབུ་སྦྲང་དང་བྱིའུ་དག་ཆར་བས་བསད་དེ

ཞེན་ཆགས་དག

ཁྱི་སྨྱོན་གྱི་མཆེ་བ་ལྟར་འགྲེང་འདུག

 2017- 8- 18-ཉིན།

དབུགས་ཐེངས་གཅིག་གིས།   

རང་ཉིད་ལ་སྙིང་ཕུར་བརྡབ་སྟེ

མགོ་བོ་ཡར་ལ་དགྱེ་དགོས་བསམ

ཆེ་ཡིས་ཆུང་ཆུང་ཟ་བ་ཆོས་ཉིད་དུ་བརྩིས་ནས

ང་ཚོ་འདུག་ཁོམ་ལར་ནས་མེད

སྒྱིད་ལུག་གིས་འདུག་དགོས་པ་སུ་ཡིས་བཤད་མེད

སེམས་པའི་ཕྱི་ཤུན་མེད་འདྲའི་སྐབས་རེ་ལ

ང་ལ་རྨི་ལམ་ཅི་ཡང་མེད་པར་འདོད་དུས

རྨི་ལམ་ཅི་ཡང་ཡོད་ངེས

2017- 9- 13-ཉིན།

འུ་ཐུག་དུས།             

 དགེ་རྒན་ཞིག་ལ་བྲིས།

ཁ་ལྕེའི་མཐིལ་དུ་རེ་བའི་ཚང་མལ་བཅས

འུ་ཐུག་པའི་ཉམས་ཀྱིས

མིག་ཞགས་ཀྱི་ནང་ནས་སྦྱིན་ཆབ་བསིལ

འུ་ཐུག་པའི་ཉམས་ཀྱིས

ཆད་ལ་ཁད་ཀྱི

འོད་ཀྱི་རྣོ་སྐུད

སྟེང་དུ་འཐིམ

མུན་དོང་ནང་གི་མི

གཏིང་རིམ་དགུ་བརྩེགས་ཀྱི་འོག་ཏུ

ཁྱེད་རང་དཔྱངས་སྟེ

འོད་ཀྱི་ཡས་སྒྲོན་ཞིག

རྟོག་བཟོ་བྱས                         

2017- 9- 29-ཉིན་མཇུག་གྲུབ། 

རྩོམ་སྒྲིག་པ། : རྡོ་རྗེ་བསམ་འགྲུབ།