ཀྲུང་གོ་བོད་ཀྱི་དྲ་བ།

སྐུ་ཞབས་གངས་ཞུན་ལགས་ཀྱི་སྙན་རྩོམ་གསར་བ།(ཁག་གཉིས)

ཡོང་ཁུངས། : ཀྲུང་གོ་བོད་ཀྱི་དྲ་བ།   རྩོམ་པ་པོ། : གངས་ཞུན།   སྤེལ་དུས། : 2017-09-28
ཡིག་གཟུགས། :ཆུང་། འབྲིང་། ཆེ།

131.jpg

པེ་ཅིན་གཟའ་མཇུག་གི་སྙན་ངག

ཤིན་ཏུ་འཇམ་པའི་ངག་ཚིག་དེ།

འཐབ་ཇུས་ཡིན་ནམ་འཐབ་རྩལ་ཡིན།


ཤིན་ཏུ་དགའ་བའི་རྣམ་འགྱུར་དེ།

ཐོབ་བྱ་ཡིན་ནམ་ཐོབ་བྱེད་ཡིན།


ཤིན་ཏུ་ཞིབ་པའི་ཞབས་ཞུ་དེ།

དམིགས་བྱ་ཡིན་ནམ་དམིགས་བྱེད་ཡིན།

ལག་བསྟར་ལ་མཁས་པའི་པེ་ཅིན་པ་ཁ་ཤས།

རེས་ཉེ་རེས་རིང་གི་ཐབས་ཀྱིས་ང་དང་འགྲོགས་ཤིང་།

རྒྱབ་རི་ཡི་རྒྱབ་ན་ད་དུང་རྒྱབ་རི་སྟོང་ཕྲག་ཡོད་ཚུལ་དང་།

ལྟག་སྒོ་ཡི་ལྟག་ན་ད་དུང་ལྟག་སྒོ་ཁྲི་ཕྲག་མངའ་ཚུལ་གླེང་ནས།

ཁོ་བོ་འབྲེལ་བ་དང་འབྲེལ་འདྲིས་ཀྱི་དྲ་བའི་དཀྱིལ་འཁོར་དུ་དྲངས།


གསོལ་སྟོན་གྱི་ཁང་མིག་རེ་ནི་ནང་འཁོར་གྱི་འཇིག་རྟེན་རེ་ཡིན་ཟེར།

མངོན་ལྐོག་གི་མཐུན་ཚོགས་རེ་ནི་ཁེ་ཕན་གྱི་རྒྱལ་ཕྲན་རེ་ཡིན་ཟེར།


འགྲོ་ལམ་ཡོད་ཚད་མཛོད་ཁང་ལ་འཐེན་ཞིང་།

འབྲེལ་ཐག་ཐམས་ཅད་གནམ་ལ་སྦྲེལ་ཡོད་ཟེར།


ཁོ་ཚོས་བཤད་པ་བདེན་ན།

དམངས་ཕན་དང་མཐུན་སྒྲིལ་ཞེས་པའི་མིང་ཚིག་དག་བཀོལ་ཤེས་ན།

གནས་འདི་ནས།

རྒྱུ་ནོར་མཁོ་བ་ལ་རྒྱུ་ནོར་དང་།

དབང་ཆ་དགོས་པ་ལ་དབང་ཆ།

རྒས་འཁོགས་ལོ་ན་དགོས་པ་ལ་ལོ་ན་དགོས་་ཞེས་སྙན་ཞུ་ཕུལ་ཆོག་ཟེར།

འདི་ནི་ཁོ་བ་ཚོའི་མཐའ་མཇུག་གི་འཆར་གཞི་ཡིན་ནམ་འཆར་སྣང་ཡིན།


ཨོ།   རུའུ་ལུགས་ཀྱི་རྒྱ་མཚོའི་གཏིང་རིམ་ནས།

ངའི་བྱང་སེམས་བློ་སྦྱོང་གི་སྒྲོན་མེ་འདི་ཅི་ཙམ་གསལ་ནུས་སམ།

གཞན་གྱི་བགྲོད་ལམ། 

གཞན་གྱི་བགྲོད་ལམ་དུ།

གཞན་གྱི་རྐང་རྗེས་དེད་ནས།

བསམ་བློ་དང་དམིགས་འབེན་མེད་པར།

འཐབ་ཇུས་དང་ཕུགས་བསམ་མེད་པར།

ང་ཚོ་རྨི་ལམ་ནང་བཞིན་ཡུན་རིང་བསྐྱོད་ཅིང་འོང་།


ང་ཚོ་འདི་ལྟར་ཉིན་མཚན་མེད་པར།

ལོ་ངོ་སྟོང་ལ་མགོ་བོ་སྒུར་ནས།

གཞན་གྱི་བགྲོད་ལམ་དུ།

གཞན་གྱི་རྐང་རྗེས་དེད་ནས།

བསྐྱོད་བསྐྱོད་ནའང་།

ང་ཚོས་རང་ཉིད་ཐང་ཆད་པ་མ་ཤེས་ལ།

རང་ཉིད་རྒས་ཤིང་འཁོགས་ནས།

སྲོག་གི་ཁུགས་པ་ལན་དགུར་ཆད་པའང་མ་ཚོར།


ད་ནི།  ལག་པ་མགྱོགས་དུས་ལག་ངར་ཆག་ཟིན་ལ།

རྐང་བ་སྤོ་དུས་སྒྱིད་པའང་ཞ་ཟིན།

མིག་དང་རྣ་བ་སྐམ་ནས་བྲག་ཁུང་དང་འདྲ་ལ།

སོ་དང་སྨྲ་ལྕེ་རུལ་ནས་རླུང་གིས་ཁུར་ཚར།

བླ་སྲོག་ཀྱང་འབུ་དང་བྱིའུས་གཏུབས་ནས།

ནམ་ཡང་དུས་རབས་བདུན་པ་བརྒལ་མ་ཐུབ།


སྐབས་འདིར། ང་ཚོ་ཁེར་རྐྱང་དུ་སད།

ང་ཚོ་སད་མ་ཐག་ཏུ།

སྡིགས་མཛུབ་བརྒྱ་ཡིས་ང་ཚོ་ཐང་ལ་བསྒྱེལ་ཞིང་།

མཆུ་གྲི་སྟོང་གིས་ང་ཚོ་དུམ་བུར་གཙབས་ནས།

ང་ཚོར་བསྐྱར་གསོན་གྱི་གོ་སྐབས་གཏན་ནས་སྤྲོད་མ་འདོད།

རྩོམ་སྒྲིག་པ། : རྡོ་རྗེ་བསམ་འགྲུབ།