༡ ཕ་ཡུལ་རྒས་ཀྱིན་པ།
ཕ་ཡུལ་གྱི་ཞོགས་པ་ནི
ཟིལ་བ་ཆགས་སའི་ཆུ་མིག་ཅིག་གི་ངོ་གདོང་ཡིན་ཆོག་ལ
ཉི་མ་འཆར་སའི་ཡུལ་ངོས་ཤིག་ཀྱང་ཡིན
ནམ་ཞིག ཕ་ཡུལ་གྱི
ལས་ཀྱི་རི་རྒན་ཞིག་ནས་འབྲོང་ཚའི་གཤར་ལམ་བསྣོལ་ཞིང
རེ་བའི་བླ་མཚོ་བསྐམ་ནས་ཆུ་ཡི་འཚོ་བཅུད་མེད་དུས
ངས་རྒྱང་རིང་ཞིག་ལ་འབོད་བརྡ་ཡང་ཡང་གཏང
སྐབས་དེར་རྩི་ཏོག་གི་བཞད་ལམ་ཡལ་ནས
ཆུ་མོ་ཡི་བཞུར་ལམ་བཀག་སོང་ན
ངས་ཕ་ཡུལ་གྱི་གད་པ་དག་ལ་དགོངས་དག་ཞུ་ངེས་ཡིན
ཕ་ཡུལ་གྱི
རི་ཡི་རྐེད་འཕྲང་རེ་རེ་ལ་གཉེར་མའི་ལམ་རྗེས་ཤ་ར་ར
ཡུན་གྱི་བལྟས་པས་ཕ་ཡུལ་ནི
ལུས་ཟུངས་ཟད་པའི་རྒན་པོ་འདྲ
༢ སྲོག
སྲོག ཁ་ལོ་པ་ངས
ཁྱེད་རང་ཉམ་མངའ་བའི་ཚེ་སྲོག་ཏུ་འབོད་ཀྱིན་ཡོད
ནམ་ཞིག དུར་ཐང་གི་གནས་མལ་འཚོལ་དུས
གཏམ་རྒྱུད་ཀྱི་གསང་བ་སྡེ་ཚོགས་ཤིག་ཏུ
སླར་ཡང་མྱི་ཁར་ཞོར་ནས་འགྲོ་སྲིད
སྲོག ཁ་ལོ་པ་ངས
ཁྱེད་རང་འཆི་ཉིན་ནས་ཁྱེད་ལ་གསང་བ་མེད་ན་འདོད་ཡོད
༣ ཡི་གར་འོང་བའི་མཚན་མོ།
---སྙན་ངག་པའི་མཚན་མོ་ལ།
དེ་རིང་གི་རྒྱང་མཇལ་བ་དག
ཕྱིར་རང་གི་ཤག་ཁང་ལ་ཐོན་ཏེ
སླར་ཡང་ལག་རྟེན་ལྟ་བུའི་རང་གི་འཚོ་བར་བཀོལ་གྱིན་ཡོད
ངས་ཀྱང་རང་ཤག་ཏུ་མཚན་མོ་ཟེར་བའི
དུས་ཚིགས་ཤིག་རོལ་གྱིན་སེམས་པ་རྦབ་ཆུ་ལྟ་བུའི
གཡང་གཟར་ཞིག་ཏུ་ལྷུང་ནས་ཡོད
ལྟག་རྒྱབ་ཏུ་ཟླ་བའི་བསིལ་ཟེར་ལྡང་ལ
མདུན་ངོགས་སུ་རྦབ་ཆུས་རོལ་དབྱངས་འཁྲོལ་གྱིན་འདུག
ཕྱིར་རང་ཤག་ལ་ཐོན་ཡོད
མཛེས་སྡུག་ལྡན་པའི་དབྱར་གཞུང་གི་མཚན་མོ་ལ་འགྲོགས་ཏེ
ཕྱིར་རང་ཤག་གི་སྒོ་དྲུང་དུ་ཐོན་ཡོད
སྒོ་ཐེམ་རེ་རེ་རྡོག་པས་མནན་ནས
སྒོ་ཁྱམས་ཀྱི་ནང་ལ་འཛུལ་ནས་ངའི་ཡོ་བྱད་ཀྱི་ཚོགས་ལ
ང་ཐོན་བཞག་ཅེས་བོས་པ་ཡིན