ཀྲུང་གོ་བོད་ཀྱི་དྲ་བ།

མ་བཅོས་དང་པོའི་འགྱུར་ཁུགས།

ཡོང་ཁུངས། : ཀྲུང་གོ་བོད་ཀྱི་དྲ་བ།   རྩོམ་པ་པོ། : ཁྱུང་ཐར་རྒྱལ།   སྤེལ་དུས། : 2017-09-06
ཡིག་གཟུགས། :ཆུང་། འབྲིང་། ཆེ།

དང་པོ།

དང་པོ་རྒྱལ་སྲིད་བསྐྱངས་ཤིང་འཇིག་རྟེན་གྱི།།

འདོད་པའི་དངོས་པོ་མ་ལུས་བདག་གིར་བཞེས།།

ཞི་དྲག་འཁོར་གྱིས་བསྐོར་ཞིང་མཛེས་མའི་ཚོགས།།

ཕོ་བྲང་ཕྱི་ནང་གང་བ་དེ་ཡིས་སྐྱོངས།།

མ་རིག་འཁྲུལ་བའི་ཕུན་ཚོགས་གཡང་གི་ནོར།།

མ་ལུས་ལུས་ཅན་དག་གི་དཔྱིད་དུ་ཤར།།

མ་དག་འཁོར་བའི་གནས་ཀྱི་བུ་ཆུང་ཞིག།

མ་བཅོས་དང་པོའི་འགྱུར་ཁུགས་གླུ་རུ་ལེན།།

འཇིག་རྟེན་ཁྲ་ཁྲ་རིག་རིག་རྨི་ལམ་འདྲ།།

འདོད་སྲེད་ཚེར་མའི་སྒྱེ་མོ་ཞབས་བརྡོལ་འདྲ།།

འཁྲུལ་སྣང་ཁ་དོག་སྣ་ལྔའི་འཇའ་ཚོན་འདྲ།།

ང་ནི་ནམ་ཡང་བྱིས་པ་བསམ་མེད་འདྲ།།

འཇིག་རྟེན་ཆེ་ན་གསེར་གྱི་བྱ་སྒོང་ཙམ།།

གལ་ཏེ་ཆུང་ན་ཨ་བྲའི་མིག་འབྲས་ཙམ།།

གང་ལྟར་རང་ལ་དབང་པའི་གོ་ལ་འདི།།

ནམ་ཡང་རང་གི་གནས་ཚང་ཡིན་ན་བསམ།།

མི་མཇེད་ཞིང་གི་མགོན་པོ་འོད་དཔག་མེད།།

ནམ་ཡང་རང་གི་ཕ་རྒན་ཡིན་ན་བསམ།།

གཡུ་ལོ་བཀོད་པའི་རྗེ་བཙུན་སྒྲོལ་མ་ཡང་།།

ནམ་ཡང་བརྩེ་བའི་ཡུམ་ཆེན་ཡིན་ན་བསམ།།

མི་ལུས་རིན་ཆེན་གསེར་གྱི་མཆོད་སྡོང་ལ།།

ནམ་ཡང་རྐྱེན་ངན་བར་ཆད་མེད་ན་བསམ།།

ཤེས་རབ་ཕུན་སུམ་ཚོགས་པའི་ནོར་བདུན་པོ།།

ནམ་ཡང་རང་གི་དངོས་པོ་ཡིན་ན་བསམ།།

ཚངས་པའི་གནས་ཀྱི་ལྷ་དང་ལྷ་མོ་དག།

རང་གི་རྩེ་གྲོགས་ཏག་ཏག་ཡིན་ན་བསམ།།

ཕན་ཚུན་རྩེ་ཞིང་མེ་ཏོག་འཕེན་པ་ཡང་།།

ནམ་ཡང་འགྱུར་མེད་མཛའ་བརྩེ་ཡིན་ན་བསམ།།

གཉིས་པ།

རྫི་གླུ་སིང་སིང་འཁོར་བའི་སྡེ་ཆེན་གན།།

ནམ་ཡང་རང་གི་རུ་སྡེ་ཡིན་ན་བསམ།།

སྡེ་མཐའ་དམ་པའི་ཆོས་ཀྱིས་བསྐོར་བ་ཡང་།།

རང་གི་དགེ་བའི་ཚོགས་བསགས་ཡིན་ན་བསམ།།

སྟོང་ལུག་མ་བུ་ཤོད་ལ་ཕབ་པ་གན།།

ང་ཡི་ཨ་ཕའི་ལུག་ཁྱུ་ཡིན་ན་བསམ།།

གཡང་གི་འབྲི་མོ་ངུར་བའི་སྒྲ་དབྱངས་གན།།

ཨ་མའི་དཀར་ཆུ་འོ་མ་ཡིན་ན་བསམ།།

རྩྭ་ཐང་གཡུ་ཡི་མཎྜལ་བཤམས་འདྲ་གན།།

རང་ཉིད་གཅིག་པུའི་མལ་སྟན་ཡིན་ན་བསམ།།

དུ་བའི་ལྕང་ལོ་གཡོ་བའི་སྦྲ་རྒན་གན།།

ནམ་ཡང་ཕ་ཁྱིམ་དྲོན་མོ་ཡིན་ན་བསམ།།

ལང་ཚོའི་འཇོ་སྒེག་ལྡེམ་པའི་སྨན་ཆུང་གན།།

ཚེ་གཅིག་ལས་ཀྱི་ཆུང་མ་ཡིན་ན་བསམ།།

བུ་ཆུང་རྩེ་ལ་དགོད་ཅིག་སྐྱེས་ནས་ཀྱང་།།

ཕ་ཤུལ་བུ་ཡིས་འཛིན་རྒྱུ་བྱུང་ན་བསམ།།

གསུམ་པ།

ནམ་ཡང་དུ་སྨུག་འཐིབ་པའི་གྲོང་ཁྱེར་གན།།

ང་ལ་འབྲེལ་བ་སྤུ་ཙམ་མེད་ན་བསམ།།

གྲོང་ཁྱེར་ཆེན་པོའི་ཟང་ཟིང་འདུ་འཛི་དང་།།

ནམ་ཡང་ཁ་ཐག་ཅུང་ཙམ་རིང་ན་བསམ།།

དུས་ནི་མི་འགྱུར་མི་རྣམས་འགྱུར་ན་ཡང་།།

ང་ལ་འགྱུར་བའི་སྡུག་བསྔལ་མེད་པར་ཤོག།

འགྱུར་ནས་གྲོང་ཁྱེར་ཆེན་པོ་ལོག་དགོས་པའི།།

དུས་ཀྱི་ཀུ་རེ་དེ་འདྲ་མེད་ན་བསམ།།

རྒྱང་རིང་ཡུལ་གྱི་སྐུ་མགྲོན་རྩིས་ཆེ་ཡང་།།

ང་ལ་དེ་འདྲའི་མགྲོན་པོ་མེད་ན་བསམ།།

ཐོབ་དང་དབང་ཐང་ཅན་གྱི་སྐྱེས་ཆེན་ཚོའི།།

རྡོ་རྗེའི་བཀའ་ལུང་བཙན་པོ་མེད་ན་བསམ།།

ཕ་མེས་རིང་གི་སྦྲང་དཀར་རྩམ་པ་འདི།།

སྔོ་ཚལ་འགའ་ལ་བརྗེ་རྒྱུ་མེད་ན་བསམ།།

ཕ་སྐད་གཙང་མའི་ཟ་འོག་གོས་ཆེན་འདི།།

ནམ་ཡང་བརྗེ་བའི་དུས་ངན་མེད་ན་བསམ།།

ཁྲ་ཁྲ་རིག་རིག་མང་པོས་སེམས་བྲིད་ཀྱང་།།

རང་སེམས་རི་བོ་གཡོ་བ་མེད་ན་བསམ།།

གལ་ཏེ་ཡོད་ན་བར་བར་མཛེས་མ་རེ།།

ལན་རེར་ལོངས་སུ་སྤྱོད་རྒྱུ་ཡོད་ན་བསམ།།

༢༠༡༧ ༩ ༦ཉིན་རྩེ་གཞུང་།

རྩོམ་སྒྲིག་པ། : རྡོ་རྗེ་བསམ་འགྲུབ།