སྟོད་ལ་སྨུག་པ་འཐིབས་པ།།
ཡིད་སེམས་སྨྲེང་བ་ཨེ་ཡིན།།
ཆར་བ་ཟམ་ཟིམ་བབས་པ།།
སྤྱན་ཆབ་བསིལ་བ་ཨེ་ཡིན།།
དྲན་ཚུལ་རི་ལ་བཀུག་ཚེ།།
རི་ཆེན་སྨུག་པས་བཟུང་འདྲ།།
ཁྱེད་རང་རླུང་ལ་སྤྲུལ་ཏེ།།
ང་ཡི་ཕྱོགས་སུ་གཡུག་ཤོག།
ཡ་གིའི་རྫ་རིའི་སྨུག་པ།།
བློ་དཀར་ཅན་གྱིས་བཏང་བས།།
ལག་པས་འཛིན་རྒྱུ་མེད་ཀྱང་།།
ཡིད་ཀྱི་གཏིང་དུ་ཟིམ་ཡོད།།
གསེར་གྱི་བུམ་པའི་ནང་དུ།།
ཚངས་པས་སྒྲུབ་ཆུ་བླུགས་ཡོད།།
ཁམ་གསུམ་བཞེས་རོགས་མཛོད་དང་།།
ཚེ་རིང་འབྱུང་བའི་ཆུ་ཡིན།།
ཆང་འདི་ལོ་དགུར་བསྙལ་བའི།།
ལོ་མང་ཐེབས་པའི་ཆང་ཡིན།།
ཆུང་འདྲིས་ལོག་ཡོང་བསམས་ཏེ།།
མ་འཐུང་ཟུར་དུ་བསྐྱུར་ཡོད།།
ཆང་སྐལ་ཁྱོར་བ་གང་བོ།།
སེམས་ཀྱིས་གཙང་བཞེས་གནོངས་དང་།།
ཟླ་ཚེས་བཟང་བོར་བསྙལ་བའི།།
ལོ་ཆང་ཁམས་པ་དངོས་ཡིན།།
ཆུ་ལ་དར་ཁ་འཐེན་ཡང་།།
ཆུ་མོའི་བཞུར་རྒྱུན་ཆད་མེད།།
ཆུང་འདྲིས་བྱམས་པའི་ཞལ་རས།།
ཆུ་ཐོམ་ཁ་རུ་འཁྲུངས་སོང་།།
མཐོ་རིའི་སྒང་དུ་ཕྱིན་དུས།།
ཕ་གིའི་སྙིང་སྡུག་མཐོང་བྱུང་།།
རི་མདུན་མཚོ་མོ་འཁྱིལ་བས།།
ཀོ་གྲུ་གཏང་ན་བསམས་བྱུང་།།
ཞེ་བློ་དཀར་བའི་རོགས་ལོ།།
གངས་དཀར་སེམས་ཀྱི་དྲོད་རེད།།
སང་དང་གནངས་ལ་འཕྲད་པར།།
རྟ་ལ་སྒ་ཆ་བྱས་ཡོད།།
ཆུང་འདྲིས་འདི་རུ་བྱོན་ཏེ།།
རི་དྭགས་བརྔོན་རྒྱུ་བྱུང་ཚེ།།
ང་རང་བཙུན་མོར་ཆས་ཏེ།།
ཐགས་བལ་ལས་སུ་བྲེལ་ཆོག།
འགྱུར་ཡོང་བསམ་པ་མ་གནང་།།
ཤ་ལས་གྲུབ་པའི་སེམས་ཡོད།།
ལས་ལ་བར་ཆད་མེད་པར།།
སྐྱབས་འཇུག་ལྷ་ལ་ཞུས་ཡོད།།
འཁོར་བ་སྒྱུ་མའི་གྲོང་རེད།།
གཏད་སོ་མེད་པའི་ཡུལ་རེད།།
ཡིན་ཡང་ང་གཉིས་ལས་འདི།།
དེ་ལས་གཞན་ཞིག་ཡིན་སོང་།།
མཚན་མོའི་རྒྱུ་སྐར་ཁྲོད་དུ།།
གློ་སྙིང་གཅིག་ཏུ་བསྡེབས་པ།།
དཀར་གསལ་ཟླ་བ་མ་གཏོགས།།
སུ་དང་གང་གིས་ཤེས་ཡོང་།།
སྟོད་ལ་སྨུག་པ་འཐིབས་པས།།
དམའ་མོའི་གཞུང་དུ་ཕྱིན་ཡོད།།
གཞུང་གི་ཆུ་མོའི་རྒྱུན་ལ།།
ཤིང་ཟམ་ཟམ་པ་འཁྲུངས་འདུག།
དབྱར་ལ་ཆར་ཆུ་ཆེ་ན།།
ཆུ་མགོ་མ་བསྐོར་ལས་ཆོག།
ང་ཡིས་ཆུ་མོའི་གཞུང་དུ།།
ལྕང་མའི་ཟམ་པ་འཕངས་ཡོད།།
ཤིང་ཟམ་ཟམ་པ་རང་གྲུབ།།
ཆུ་མོར་ཞེན་ཏེ་འཁྲུངས་པས།།
དབྱར་ཆུ་ཆེ་ན་ཆེ་ཤོག།།
ཆུ་མགོ་བསྐོར་དོན་མི་འདུག།
ཁྱེད་རང་སེམས་སུ་འགྲོ་འགྲོ།
དྲིན་ཆེན་ཕ་མ་སོང་ཚེ།།
ཚེ་འདིའི་དྲིན་ལན་ཟེར་བ།།
ང་ཡིས་སྔ་ནས་འཇལ་ཚར།།
ཨ་རོགས་ཁྱེད་དང་འུ་གཉིས།།
ལས་ཀྱིས་འཛོམས་པའི་མི་རེད།།
ལུས་པོ་གར་ཕྱིན་ས་རུ།།
སེམས་ཀྱིས་འཁྱེར་སོ་བདེ་བ།།
ཕྲད་ཚེ་ཞེ་བློ་མགུ་བ།།
ཤོར་ཚེ་མིག་ཆུ་མོད་པ།།
བསྐྱུར་འཇོག་བློ་ཡིས་མ་ཐོངས།།
བསྙབ་འདོད་ཡིད་ལ་འཁོར་བ།།
ནགས་ཏེ་ཁ་ཞེང་ཅན་ཡིན།།
འཇོལ་མོ་ནགས་སྲུང་བྱ་ཡིན།།
ཁུ་ལོས་ནགས་རི་བརྒྱུད་དང་།།
དབྱར་དགུན་མེད་པའི་བྱ་ཡིན།།
ཁྱེད་ནི་ལྷ་ཤིང་ཤུག་པ།།
ང་ནི་གསོམ་པའི་ལྗོན་ཤིང་།།
ནགས་ལུང་གཅིག་ཏུ་མེད་ཀྱང་།།
མདངས་མདོག་གཅིག་ཏུ་འཁོར་ཡོད།།
ཚར་དཀར་གོང་བའི་ཁ་ནས།།
མཉན་འདོད་ཚིག་གི་མདུད་པ།།
ཐེངས་གསུམ་གྲོལ་རྒྱུ་བྱུང་ན།།
ལ་གསུམ་གོམ་པས་འཇལ་ཆོག།
ལན་གཅིག་མཇལ་བའི་དུས་ལ།།
ག་ཙམ་ཞུ་དགོས་མ་ཤེས།།
སྤྱན་ཆབ་སེམས་སུ་བབས་པས།།
སེམས་ཀྱི་རུས་པ་བཞུས་སོང་།།
དུས་ལ་སྔ་འཕྱི་ཤོར་བས།།
གཞན་གྱི་མདུན་མར་ཆས་སོང་།།
ལས་ལ་ལེ་འདེད་མི་གནང་།།
ལས་ཀྱིས་བསྐོས་པ་ཡིན་སོང་།།
དུངས་པའི་བཙན་རྫོང་མཁར་དེ།།
ཆར་ཆུས་བཤིག་རྒྱུ་བྱུང་ཚེ།།
ཤ་ཟད་རུས་ཟད་མི་བྱེད།།
ལས་ཀྱིས་བསྐོས་པ་ཡིན་སོང་།།
ཚེ་འདིར་རྨོན་མཛོ་གཤིབ་གཤིབ།།
ང་གཉིས་ལས་ལ་མེད་ཀྱང་།།
ལན་གཅིག་མཇལ་བའི་ལས་སྐལ།།
འཁོར་བའི་སྙིང་བོ་ཡིན་སོང་།།
ཁམ་སྡོང་མཐོན་པོའི་ཤིང་ཏོག།
ལག་པས་བསྙབས་རྒྱུ་དཀའ་ཡང་།།
རྒྱང་ཐག་རིང་ནས་བསྐོར་དུས།།
མ་ཟས་མིག་ལ་མཛེས་པ།།
ད་རེས་ལས་འཕྲོ་ཟད་ཀྱང་།།
སེམས་ཀྱི་འབྲེལ་ཐག་ཆད་མེད།།
སེམས་པར་གཤོག་པ་བཙུགས་ཏེ།།
ཁྱེད་ཀྱི་མཁའ་རུ་ལྡིང་ཆོག།
ཚེ་འདིར་ལས་འཕྲོ་མེད་པ།།
ལས་ཀྱི་སྔོན་ལས་ཡིན་སོང་།།
ཁྱེད་དང་ལན་གཅིག་བགྲོད་པ།།
ཚེ་འདིའི་སྙིང་བོ་ཡིན་སོང་།།
ད་རེས་ཁྱེད་དང་ལྷན་དུ།།
ཚེ་ལོ་བསྐྱལ་ན་བསམས་ཀྱང་།།
འུ་གཉིས་ཐོད་པའི་ཁ་ཡིག།
འཁོར་ཕྱོགས་གཞན་ཞིག་ཡིན་འདུག།
སང་དང་གནངས་ལ་འགྲོ་ན།།
འགྱོད་སེམས་ང་ལ་མི་འདུག།
ང་ཡི་དྲན་པའི་གཙང་བོར།།
དང་མ་ཁྱེད་རང་བགྲོད་མྱོང་།།
ལས་ཀྱིས་བསྐོས་པ་འདི་ཉིད།།
ཟློག་ཐབས་མེད་པ་ཁྲིམས་རེད།།
སེམས་པར་རྐང་བ་ཡོད་ན།།
ཕར་འགྲོ་ཚུར་འོང་གནང་ཆོག།
ལན་གཅིག་འཛོམས་པའི་མཐའ་ལ།།
གཏན་བྲལ་མེད་ན་བསམས་ཀྱང་།།
མཚན་དེ་ངང་ཐུང་ཡིན་པས།།
ང་གཉིས་རང་སོར་དེད་སོང་།།
བྱ་ལ་དགོས་པ་ཚང་ཡིན།།
དེ་ལ་ཡམ་ཡོམ་མི་གཏོང་།།
ང་ནི་ཞག་གསུམ་མགྲོན་པོ།།
གར་འཕུར་མེད་པའི་བྱ་ཡིན།།
ང་རང་སྤང་དུ་བབས་པའི།།
ཧ་ཅང་འཕྱི་བའི་ཁ་བ།།
ལན་གཅིག་སྤང་ལ་འཁྱུད་པ།།
བདེ་བ་གཞན་ཞིག་ཡིན་སོང་།།
གཞི་ཁྱིམ་གཅིག་ཏུ་འཁོར་ཏེ།།
མཉམ་དུ་བགྲོད་ལོང་མེད་ཀྱང་།།
ཡིད་ཀྱི་དྲན་པའི་ངོས་སུ།།
རྟག་ཏུ་འཁོར་བ་ཁྱེད་ཡིན།།
ཁྱེད་ཀྱི་གཟིམ་ཁང་ནང་དུ།།
ལམ་ལམ་འཚེར་བའི་སྐར་ཆེན།།
ཁྱེད་ཀྱིས་ང་ཡིན་སོམས་དང་།།
ང་ཡི ཕྲ་ཆུང་མིག་ཡིན།།
མཚོ་ལ་དར་ཁ་འགྲིག་ཀྱང་།།
ང་ཡིས་ཕྱིར་བསྐོར་བརྒྱབ་ཆོག།
སང་ལོ་དཔྱིད་ཟླ་སླེབས་དུས།།
མཚོ་མཐའ་བསྐོར་ཏེ་མཇལ་ཡོང་།།
ཡར་འཁོར་ལྷ་དང་བླ་མར།།
སྐྱབས་འཇུག་སྙིང་ནས་ཞུས་ཡོད།།
མ་ཤི་ཚེ་རིང་བྱུང་ན།།
ཁྱེད་ལ་གཡས་བསྐོར་བརྒྱབ་ཆོག།
ལས་འཕྲོའི་དར་དཀར་མདུད་པ།།
མི་གཅོད་ཕྱི་མར་བཅོལ་ཆོག།
སྐྱེ་བ་ཕྱི་མའི་ལས་ལ།།
ངས་ཀྱང་སྨོན་ལམ་བརྒྱབ་ཡོད།།