ཀྲུང་གོ་བོད་ཀྱི་དྲ་བ།

༄༅། །རྗེ་ཙོང་ཁ་བའི་རྣམ་ཐར་མདོར་བསྡུས་ཚིགས་བཅད་བཅུ་བདུན་པ།

ཡོང་ཁུངས། : ཀྲུང་གོ་བོད་ཀྱི་དྲ་བ།     སྤེལ་དུས། : 2016-11-24
ཡིག་གཟུགས། :ཆུང་། འབྲིང་། ཆེ།

85566540550385167.jpg

༄༅།  །རྗེ་ཙོང་ཁ་བའི་རྣམ་ཐར་མདོར་བསྡུས་ཚིགས་བཅད་བཅུ་བདུན་པ།

རྗེ་ཤེས་རབ་རྒྱ་མཚོ།

 

༄༅། ། འཇམ་དབྱངས་ངུར་སྨྲིག་ཟློས་གར་ཙོང་ཁ་བའི། །

ཕྲ་ཞིབ་རིགས་ལམ་རྡོ་རྗེ་གཟེགས་མའི་མཚོན། །

གངས་ཅན་ལོ་སྨྲའི་གཤེད་དུ་གདེངས་པའི་གཏམ། །

འཛམ་གླིང་བློ་ལྡན་སྐྱེ་བོའི་ངག་ན་མཛེས། །

 

རབ་བྱུང་དྲུག་པའི་མེ་མོ་བྱ་ཡི་ལོར། །

སངས་རྒྱས་བྱང་སེམས་མང་བོའི་ལུང་བསྟན་བཞིན། །

དཔལ་ཆེན་ཀླུ་འབུམ་དགེ་དང་སྲས་སུ་འབྲེལ། །

ཙོང་ཁའི་ཡུལ་དུ་བལྟམས་པའི་རྣམ་ཐར་ཡིན། །

 

ལྟེ་བའི་མཚལ་ཐིགས་ས་ལ་འཕོས་པ་ལས། །

ཙནྡན་ལྗོན་པ་ལོ་འདབ་འབུམ་ཕྲག་ཅན། །

སེངྒེ་ང་རོའི་སྐུ་ཡིས་བརྒྱན་པ་འཁྲུངས། །

སྔ་རབས་གཞན་ལ་མེད་པའི་རྣམ་ཐར་ཡིན། །

 

དགུང་ལོ་གསུམ་པར་གྲུབ་དབང་ཀརྨ་བས། །

དགེ་བསྙེན་བསྒྲུབས་ཤིང་བདུན་པར་ཆོས་ཀྱི་རྗེ། །

དོན་གྲུབ་རིན་ཆེན་དྲུང་ནས་རབ་ཏུ་བྱུང་། །

རྒྱལ་བའི་བསྟན་ལ་ཞུགས་པའི་རྣམ་ཐར་ཡིན། །

 

བཅུ་བདུན་པ་ལ་དུས་གསུམ་གཟིགས་པ་ཡི། །

བླ་མའི་བཀའ་དང་རང་གི་དད་སྟོབས་ཀྱིས། །

དབུས་གཙང་ཆོས་ཀྱི་ལྗོངས་སུ་གོམ་ཁ་བསྒྱུར། །

ཉི་ཟླ་ཤར་ནས་འཆར་བའི་རྣམ་ཐར་ཡིན། །

 

རྒྱ་གར་པཎ་གྲུབ་ལྟ་བའི་མཁས་མང་ལས། །

མདོ་སྔགས་ཐ་སྙད་གཙུག་ལག་ཀུན་ལ་སྦྱངས། །

རབ་འབྱམས་ཤེས་བྱ་ནམ་མཁའི་ཕ་མཐར་སོན། །

དང་བོར་ཐོས་པ་བཙལ་བའི་རྣམ་ཐར་ཡིིན། །

 

གདུལ་བྱའི་ཁམས་དང་འཚམ་པར་འཇུག་པ་ཡི། །

རྒྱལ་བའི་བཀའ་ལས་ཡི་གེ་འབྲུ་གཅིག་ཀྱང་། །

ལུས་པ་མེད་པར་ཐར་བའི་ཐབས་སུ་དགོངས། །

བར་དུ་གདམས་པར་ཤར་བའི་རྣམ་ཐར་ཡིན། །

 

མཁའ་ཁྱབ་སྐྱེ་རྒུ་སྐྱོབ་པའི་བརྩེ་བ་དང་། །

ཟབ་རྒྱས་ལམ་གྱི་རིམ་པའི་དམིགས་རྣམ་ལ། །

མཉམ་རྗེས་ཉིན་མཚན་ཀུན་ཏུ་གཡེལ་བ་མེད། །

ཐ་མར་ཉམས་སུ་བླངས་པའི་རྣམ་ཐར་ཡིན། །

 

བཀའ་དང་བསྟན་བཅོས་བྱ་བའི་གནད་ལ་རྣོ། །

སོ་ཐར་བྱང་སེམས་གསང་སྔགས་ཚུལ་ཁྲིམས་གཙང་། །

བྱམས་དང་སྙིང་རྗེ་ཕྱིན་དྲུག་བསྡུ་བཞིའི་གཏེར། །

ཕུལ་བྱུང་མཁས་བཙུན་བཟང་བོའི་རྣམ་ཐར་ཡིན། །

 

དོན་དམ་དབུ་མ་ཆེན་པོའི་དེ་ཉིད་གཟིགས། །

ཉེས་པ་ལྔ་སྤོང་འདུ་བྱེད་བརྒྱད་དང་འགྲོགས། །

འདོད་གདུང་མཐའ་གཉིས་སྐྱོན་བྲལ་པདྨའི་ལྗོན། །

ཟླ་མེད་ལྟ་སྒོམ་སྤྱོད་པའི་རྣམ་ཐར་ཡིན། །

 

གཞུང་ཆེན་བཅུ་ཕྲག་མང་བོ་བློ་ནས་འགྲེལ། །

ཕས་རྒོལ་གླང་སྨྱོན་ཀླད་པའི་བུམ་པ་འགེམས། །

ཕྲ་ཞིབ་གསུང་ངག་སྲིད་ཞིའི་ཁོངས་ན་བརྗིད། །

ངོ་མཚར་འཆད་རྩོད་རྩོམ་པའི་རྣམ་ཐར་ཡིན། །

 

རྫིང་ཕྱིའི་མི་ཕམ་རྟེན་དང་བརྟེན་པ་གསོས། །

གཉལ་གྱི་ལུང་རར་སྔོན་མེད་ཆོས་འཁོར་བསྐོར། །

ཆོ་འཕྲུལ་སྨོན་ལམ་སྟག་རྩེའི་སྒྲུབ་མཆོད་སྤེལ། །

བསྔགས་འོས་མཛད་ཆེན་བཞི་ཡི་རྣམ་ཐར་ཡིན། །

 

སྣང་ཡང་སྟོང་བའི་རྟེན་འབྱུང་ཟབ་མོ་དང་། །

གཉུག་རླུང་ལྷ་སྐུར་ཤར་བའི་སྒྱུ་ལུས་ལ། །

ལེགས་བཤད་གློག་གི་སྒྲོན་མེ་ཆེར་སྦར་བ། །

གནད་ཀྱི་རྨོངས་མུན་སེལ་བའི་རྣམ་ཐར་ཡིན། །

 

ང་གསུམ་ས་མོ་གླང་ལ་དགའ་ལྡན་བཏབ། །

རེ་གསུམ་ཕག་ལ་བྱམས་པའི་མདུན་སར་གཤེགས། །

རྗེས་འཇུག་དགོན་དང་སློབ་མས་ས་སྟེང་ཁྱབ། །

སྲིད་ན་འགྲན་ཟླ་བྲལ་བའི་རྣམ་ཐར་ཡིན། །

 

དེ་ལས་འོངས་པའི་བསོད་ནམས་འོ་མའི་ཀླུང་། །

ཟླ་བ་བདུད་རྩིའི་མཛོད་ལ་འཁུ་འདྲ་བས། །

དབྱིག་གི་བློས་གྲོས་མ་འདི་ནད་མཚོན་དང་། །

མུ་གེའི་བསྐལ་པས་ཀུན་ནས་དབེན་གྱུར་ཅིག །

 

དེ་ལྟར་ཆོས་ཀྱི་རྒྱལ་བོ་ཙོང་ཁ་བའི། །

རྣམ་ཐར་མདོར་བསྡུས་ཚིགས་བཅད་བཅུ་བདུན་པ། །

ཤིས་ངན་བཀང་རིན་ཟི་ཡི་ཏཱ་བླ་མ། །

གོན་ཧྥུ་ཆིན་གྱིས་རིང་ནས་བསྐུལ་བའི་ངོར། །

 

རྒྱལ་བ་གཉིས་པའི་བྱིན་གྱི་ཆ་ཤས་ཙམ། །

སྙིང་གི་ཟེའུ་འབྲུར་རོལ་བའི་མཐུ་ཉིད་ལས། །

མདོ་རྒྱུད་གཞུང་མང་སྨྲ་བའི་སྤོབས་པ་ཅན། །

ཤེས་རབ་རྒྱ་མཚོས་འཕྲལ་མར་བྲིས་ཏེ་ཕུལ། ། ཅེས་ཆིན་ཧེ་སིན་ཀྲིན་ཧྥུའི་གར་འདུག་ནས་རབ་རྒྱལ་ལྕགས་སྟག་ཟླ༡༡ཚེས༣ལ།


རྩོམ་སྒྲིག་པ། : དོ་རྒྱ་དོན་གྲུབ་ཚེ་བརྟན།