ཁ་བ་ལྷ་མོ།
གཡང་མོ་ལུག་གི་ལོ་སར་ཡང
འདས་སོང་གི་སྟག་ཡོས་འབྲུག་སྦྲུལ་བཞིན
གསར་བ་གསར་རྐྱང་གིས་སླེབས་བྱུང
ཚེས་གཅིག་ལ་གཡང་མོ་ལུག་གི་རང་གཤིས་ལས་འཇམ་པའི་ཉི་མ་ཤར་བྱུང
ཚེས་གཉིས་ལ་གཡང་མོ་ལུག་གི་བལ་ཁ་ལས་དཀར་པའི་ཁ་བ་ཡང་མོ་ཞིག་བབས་བྱུང
ཚེས་གསུམ་ལ་ཐག་ཉེ་རིང་གི་མགྲོན་པོའི་ཚོགས
གཡང་མོ་ལུག་ཁྱུ་ལྷས་ལ་འཁོར་འཁོར་གྱིས་ལོ་སར་ལ་ཕེབས་བྱུང
རྟེན་འབྲེལ་གྱི་ཁ་བཏགས་ཁ་བ་བཞིན་བབས་ཤིང
ཨ་སྔོན་དགུང་ནས་ཁ་བ་ཡང་ཁ་བཏགས་བཞིན་ཉིལ
ཚེས་གསུམ་ལ
རི་ཆུའི་མཚམས་ཀྱི་སྐད་ཆ་ལ་སྐེད་ནས་དཀག་ཅིང
སྤྲིན་པས་འཐེན་པའི་ཟམ་གདོང་རླུང་ཁ་ནས་རལ
ཚེས་གསུམ་ནས་སེམས་ཚེགས་དང་སེམས་ཚེགས་ཁོ་ན་ལས
ཚོར་འདུ་གང་ཡང་སྟེར་མ་ཐུབ་པའི་ཁ་བས
འབྲོག་པའི་སྒོ་ཟོག་མང་དག་ཅིག་གཏའ་མར་ཁྱེར་ནས
རྒྱང་རིང་རྒྱང་རིང་གི་སོས་ཀ་ཁྲིད་ཡོང་ཟེར
བདག་གི་སེམས་པ་ལྟ་བུའི
སེམས་པ་རལ་བོ་དག་གིས
ཉི་ཤར་དང་ཉི་ནུབ་མང་མང་ཞིག
མིག་ཆུས་དེད་ཅིང་རྔུལ་ཆུས་ཕུད
སོས་ཀ་རུ་འབོད་པའི་ལྷན་པ་ཧྲལ་ཧྲུལ་ཞིག་ལ་སྒུག་ཅིང་སྒུག
2015.3.5ཉིན།