སྒོ་མེ་ཚེ་རིང་བཀྲ་ཤིས་ཀྱི་སྒྲུང་དེབ་གཉིས་པར་དུ་བསྐྲུན།

164139004454817632.jpg

སྒོ་མེ་ཚེ་རིང་བཀྲ་ཤིས། སྨྱུག་མིང་ལ་ཁྲི་སེམས་དཔའ་ཟེར། གསར་འགོད་པ། སྙན་ངག་པ། སྒྲུང་གཏམ་པ། ཀྲུང་གོ་རྩོམ་པ་པོ་མཐུན་ཚོགས་ཀྱི་ཚོགས་མི། མཚོ་སྔོན་ཞིང་ཆེན་རྩོམ་པ་པོ་མཐུན་ཚོགས་ཀྱི་ཨུ་ཡོན། 《གངས་རྒྱན་མེ་ཏོག》གི་གདན་ཞུ་རྩོམ་སྒྲིག་པ་བཅས་ཡིན། 1979ལོར་མདོ་སྨད་ཁྲི་ཀའི་གྲོ་ཞིང་ཁ་ཞེས་པའི་གྲོང་ཚོ་ཞིག་ཏུ་སྐྱེས། 2001ལོར་ལྷོ་ནུབ་མི་རིགས་སློབ་ཆེན་ནས་མཐར་ཕྱིན། འབོལ་རྩོམ་དེབ《བསམ་གཞིག་གི་ཁ་དོག》དང་སྙན་དེབ《དིང་གླིང་ཁེར་འབུད》《ཁྲི་སེམས་དཔའི་སྙན་ངག》(རྒྱ་ཡིག  འཕྲིན་ཁྱུང་གིས་བསྒྱུར)འགྱུར་དེབ《ཕ་རི་སིའི་འཕགས་མའི་ཆོས་གྲྭ》སྒྲུང་རིང་དེབ《མར་ངོའི་ཟླ་བ》སྒྲུང་ཐུང་དེབ《སྒོ་མེ་ཚེ་རིང་བཀྲ་ཤིས་ཀྱི་སྒྲུང་ཐུང་ཕྱོགས་བསྒྲིགས》དང《བྱ་ཞིག་ཡིན་ན་བསམས་བྱུང》སོགས་ཡོད། སྔ་གཞུག་ཏུ་སྦྲང་ཆར་རྩོམ་རིག་བྱ་དགའ་དང་། གངས་རྒྱན་མེ་ཏོག་རྩོམ་རིག་བྱ་དགའ། ཟླ་ཟེར་རྩོམ་རིག་བྱ་དགའ། མཚོ་སྔོན་ཞིང་ཆེན་རྩོམ་རིག་སྒྱུ་རྩལ་བྱ་དགའ། གངས་རྒྱན་རྟགས་མའི་བྱ་དགའ། མཚོ་སྔོན་ན་གཞོན་རྩོམ་རིག་བྱ་དགའ་སོགས་ཐོབ་མྱོང་། ད་ལྟ་ཚགས་པར་ཁང་ག་གེ་མོར་གསར་འགྱུར་གྱི་ལས་ཀ་གཉེར་བཞིན་ཡོད།


221828030153204656.jpg

《བྱ་ཞིག་ཡིན་ན་བསམས་བྱུང》ནི་སྒོ་མེ་ཚེ་རིང་བཀྲ་ཤིས་ཀྱི་སྒྲུང་ཐུང་ཕྱོགས་བསྒྲིགས་དེབ་དང་པོ་ཡིན་ལ2016ལོར་ཟི་ཁྲོན་མི་རིགས་དཔེ་སྐྲུན་ཁང་གིས་པར་དུ་བསྐྲུན། དེབ་འདིར《བྱ་ཞིག་ཡིན་ན་བསམས་བྱུང》དང་། 《སད་དང་མ་སད་མི་འདུག》《ཁ་བྱང་ལྟ》《མཐའ་མཇུག་གི་རི་དྭགས་པ》《མིས་ཁྱི་ལ་རྨུགས་པ་ལྟ་བུའི་གསར་འགྱུར》སོགས་སྒྲུང་ཐུང12ཀྱིས་གྲུབ་ཅིང་།  དེ་ནི་རྩོམ་པ་པོ་སྒྲུང་གཏམ་གསར་རྩོམ་གྱི་ལམ་དུ་ཞུགས་པའི་ཐོག་མའི་སྤྱི་སྡོམ་ལྟ་བུ་ཞིག་སྟེ།  ཡུལ་གྱི་ཆ་ནས་གྲོང་ཁྱེར་དང་རོང་གྲོང་། ཡང་ན་གྲོང་རྡལ་སོགས་གཏམ་རྒྱུད་ཀྱི་ཁོར་ཡུག་ཏུ་བདམས་ཡོད་པ་དང་། རྩོམ་རིག་གི་ཐབས་རྩལ་དང་འབྲི་ཐབས་ཀྱི་ཐད་ནས་ཀྱང་དངོས་ཡོད་དང་སྒྱུ་འཕྲུལ་སོགས་ཚོད་ལྟ་སྣ་ཚོགས་བགྱིས་ཡོད་དོ།།

368547170875046696.jpg

《སྒོ་མེ་ཚེ་རིང་བཀྲ་ཤིས་ཀྱི་སྒྲུང་ཐུང་ཕྱོགས་བསྒྲིགས》ནི་སྒོ་མེ་ཚེ་རིང་བཀྲ་ཤིས་ཀྱི་སྒྲུང་ཐུང་ཕྱོགས་བསྒྲིགས་དེབ་གཉིས་པ་ཡིན་ལ2016ལོར་མཚོ་སྔོན་མི་རིགས་དཔེ་སྐྲུན་ཁང་གིས་པར་དུ་བསྐྲུན། དེབ་འདིར《1986ལོའི་ཆར་ལྭ》དང《བཀྲ་ཤིས་ཞེས་པའི་ཁྱི་རྒན་ཞིག་རྗེས་སུ་དྲན་པ》《ཨ་ཡེ་མཁའ་མོ་ཚང་གི་བ་མོ》《སྐྱེ་བ་གཉིས་ཀྱི་འདས་དོན》སོགས་དང་། གསར་བྲིས་སྒྲུང་ཐུང《མཐིལ་བརྡོལ་བའི་འགྱིག་ལྷམ་ཆ་གཅིག》《ཐག་པ་ཁྲ་ཁྲ་ཞིག》《ཉི་འོད་འོག་གི་ཁྱེའུ》《མར་མེ། རླུང་གིས་གཟིམས་སོང》སོགས་ཡོད་བསྡུས་ཡོད། བསྡུས་དེབ་འདི་ནི་རྩོམ་པ་པོའི་གྲོ་ཞིང་ཁའི་སྐོར་གྱི་མུ་འབྲེལ་སྒྲུང་གཏམ་ཕྱོགས་བསྒྲིགས་དེབ་ཡིན། འདི་ནི་རྩོམ་པ་པོ“ཕ་ཡུལ་དུ་ལོག་པའི”རྣམ་པ་ཞིག་ཀྱང་ཡིན་ནོ།།


862734185884068110.jpg

ང་ནི་བོད་ཀྱི་རྩོམ་པ་པོ་ཞིག་ཡིན།


ང་ནི་བོད་ཀྱི་རྩོམ་པ་པོ་ཞིག་ཡིན།ངས་རྩོམ་རིག་ལ་དད་གུས་བླ་ལྷག་ཏུ་བྱེད་བཞིན་ཡོད།

ཕྱིར་དྲན་ཞིག་བྱས་ཚེ། ཕལ་ཆེར་ལོ་ངོ་ཉི་ཤུར་ཉེ་བའི་རིང་དུ། རྩོམ་རིག་ལ་བཅངས་པའི་དད་འདུན་རྣམ་དག་དེ་ཡིས། ང་ལ་འཚོ་བའི་དགའ་ཞེན་སྐྱེད་སྲིང་དང་། འཇིག་རྟེན་གྱི་མཐོང་ཐོས་རེག་ཡུལ་དུ་གྱུར་པའི་བྱ་དངོས་དག་ལ་གོ་བ་གསར་དུ་བསྩལ། གལ་ཏེ་ང་འདྲའི་དགའ་ཕྱོགས་མང་པོ་དབེན་པའི་མི་ཞིག་ལ་མཚོན་ན། རྩོམ་རིག་ཟེར་བའི་དགའ་མ་འདི་མེད་ཚེ། ངའི་གནས་བབ་ཇི་ལྟ་བུ་ཞིག་ཡིན་པ་ང་རང་གིས་ཀྱང་དཔོག་ཐབས་བྲལ།

ང་ནི་ཨ་མདོའི་རོང་ཁུལ་ཞིག་ཏུ་འཚར་ལོངས་བྱུང་བ་ཡིན་མོད། དང་ཐོག་རྩོམ་ལ་འཇུག་དུས་ངས་བསམ་པར་རང་མི་རིགས་ཀྱི་གནས་བབ་མཚོན་པའི་རྩོམ་ཡིག་ཅིག་བྲི་དགོས་ཚེ། ངེས་པར་དུ་གངས་རི་དང་རྩྭ་ཐང་། ད་དུང་འབྲོག་པའི་འཚོ་བ་བྲི་དགོས་སྙམ། དེ་ནི་མི་རིགས་གཞན་གྱིས་བོད་ཅིག་ཡིན་ཚེ་རྩྭ་ཐང་དུ་རྫི་གླུ་ལེན་ཞོར་ཕྱུགས་ཟོག་སྐྱོང་བ་དང་། བཏུང་བ་འོ་ཇ་དང་ཟ་བ་སྐམས་ཤ་ཡིན་པར་འདོད་པ་དང་གཅིག་མཚུངས་རེད། དོན་དུ་བོད་ཁུལ་མང་ཆེ་ཤོས་སུ་ཞིང་ལས་གཙོ་བོར་འཛིན་པ་དང་། ཉི་ཤར་དང་འགྲོགས་ནས་ལས་ཀར་འགྲོ་ལ། ཉི་ནུབ་དང་ཆབས་ཅིག་ངལ་གསོ་བའི་འཚོ་བའི་མུ་རྒྱུན་སྐྱོང་བ་རེད།  དེར་བརྟེན།  ད་ལྟ་སེམས་ལ་དྲན་ཚེ། སྐབས་ཐོག་དེར་རང་ལ་ཆ་ཡོད་པའི་རྣང་མ་དང་ལོ་ཏོག་བསྐྱུར་ནས། རང་ལ་རྒྱུས་མངའ་མེད་པའི་གངས་རི་དང་རྩྭ་ཐང་བྲིས་པ་ནི་ཅི་འདྲའི་ནར་མ་སོན་པའི་དྲན་ཚུལ་ཞིག་རེད་ཨང་།

བོད་ཅིག་ཡིན་པའི་ཆ་ནས། མེས་པོ་དྲིན་ཆེན་པོ་རྣམས་ཀྱིས་རིག་གནས་ཀྱི་གཏེར་མཛོད་ཆེན་པོ་ཞིག་ང་ཚོའི་བསོད་ནམས་ཀྱི་བགོ་སྐལ་དུ་བཞག་ཡོད་པ་རེད།  རྩོམ་འབྲི་མཁན་ཞིག་ལ་མཚོན་ན་གཞས་དང་གནའ་གཏམ་དང་ལྷ་སྒྲུང་སོགས་ནི་ལྷག་ཏུ་རྩོམ་རིག་གསར་རྩོམ་གྱི་ཐོན་ཁུངས་ཕུན་སུམ་ཚོགས་པ་ཞིག་ཏུ་མཐོང་བས། ཁོ་བོས་དེ་དག་གི་ཚིག་སྦྱོར་དང་ནང་དོན་ལ་མྱོང་རོལ་བྱེད་དུས།  ནམ་ཡང་སེམས་པ་འགུལ་ཞིང་ཚོར་བ་བྲུགས་པར་བྱེད། དཔེར་ན། འཛམ་གླིང་ཐོག་ཆེས་རིང་བའི་ལོ་རྒྱུས་སྙན་རྩོམ་རིང་མོ་སྟེ། རྨ་འབྲིའི་རྒྱུན་ལ་འགྲན་པའི་གེ་སེར་སྒྲུང་ལྟ་བུ་ནི་དམངས་ཁྲོད་རྩོམ་རིག་གི་ཏོག་ཡིན་པས། དེའི་ནང་གི་གསོན་ཉམས་ལྡན་པའི་ཞིབ་འབྲི་དང་། མར་དྲི་རྩམ་དྲི་བྲོ་བའི་དཔེ་འཇོག   རབ་རྟོག  འུད་རྗོད་སོགས་གང་གི་ཐད་ནས་ཀྱང་དཔེ་ལྟར་རུང་བ་ཤིན་ཏུ་མང་བོ་ཡོད་པས། བོད་ཀྱི་རྩོམ་པ་པོ་ཞིག་ཡིན་ཚེ། དམངས་ཁྲོད་རྩོམ་རིག་དེ་དག་ནི་རྩོམ་འབྲིའི་དགེ་རྒན་ཞིག་དང་ཁྱད་མེད་དོ།།

ང་ཚོས་རྩོམ་མ་འཁྱོངས་པའི་གནད་ཅིག་འཚོལ་དགོས་ན། ང་རང་གིས་བསམས་ཚེ་དེ་ནི་ནམ་ཡང་རང་ལ་ཡོད་པ་དེ་སྣང་མེད་དུ་བསྐྱུར་ནས། གཞན་གང་ཞིག་ཧབ་ཐོབ་བྱེད་པའི་བློ་དེ་དང་འབྲེལ་བ་དམ་པོ་ཡོད་པར་སྙམ། དོན་དུ་དེ་ནི་རྒྱའི་གཏམ་དཔེ་ལྟར་ན། གསེར་གྱི་ཅ་ནེ་བཟུང་ནས་ལྟོ་སློང་བ་ཟེར་བ་དང་། བོད་ཀྱི་གཏམ་དཔེ་ལྟར་ན། ནོར་བུ་ལག་ཏུ་ཡོད་དུས་ནོར་བུའི་ནོར་ངོ་མ་ཆོད་ཟེར་བ་བཞིན་ནོ།། བློ་སྐྱེད་དེ་འདྲ་གང་གིས་སྟེར་ཟེར་ན། ལ་ཏིན་མེ་གླིང་དང་ཧྥེ་གླིང་གི་གི་རྩོམ་པ་པོ་དེ་དག་ནི་དཔེ་གསོན་པོ་ཞིག་སྟེ། མར་རྒེ་སི(马尔克斯)དང་ཧྥུ་ཨིན་སི་ཐེ(富恩斯特)སོགས་ཀྱིས་ནོར་བུའི་ནོར་ངོ་ཆོད་པའི་རྟགས་སུ《ལོ་བརྒྱའི་ཁེར་ཧྲེང》《百年孤独》དང《ཆེས་དྭངས་གཙང་གི་ཡུལ་གྲུ》《最明净的地区》སོགས་དང་། ཨ་ཆེ་པེ(阿契比)དང་སྦིན་ཨོ་ཁི་རོས(本.奥克瑞)ཀྱི《ཐོར་ཞིག》(《瓦解》)དང《བཀྲེས་སྐོམ་གྱི་ལམ》(《饥饿的路》)སོགས་འཇིག་རྟེན་སྐྱེ་འགྲོའི་མིག་གི་དགའ་སྟོན་དུ་བསྟར་བ་རེད། དེ་ལྟ་ནའང་། ང་ཚོས་ནམ་ཡང་གཞན་སུ་ཞིག་གི་བློ་ཁར་བསྟུན་པ་དང་མགུ་ཨེ་གང་ལ་དམིགས་དྲགས་པས། ས་ཡི་རྡོ་བཏུས་པས་རུམ་གྱི་བྲོ་ལྷུང་བའི་དཔེ་ཟླར་གྱུར་པ་རེད།  དེ་ལ་མར་རྒེ་སིས་བཤད་པ་ཤིན་ཏུ་དོན་ལ་གནས་ཏེ། ཇི་སྐད་དུ།གཞན་གྱི་ཚད་གཞི་ལྟར་རང་གི་དངོས་ཡོད་གནས་ཚུལ་ལ་འགྲེལ་བ་བརྒྱབ་ཚེ།རང་ཉིད་རང་ལ་ལྐོག་གྱུར་དང་།བཀག་རྒྱ་ཇེ་མང་ནས་ཇེ་མང་།ཁེར་རྐྱང་ནས་ཁེར་རྐྱང་དུ་འགྱུར་སྲིད་དོ།།

རྩོམ་རིག་བརྗོད་བྱའི་ངོས་ནས་བཤད་ན།རྩོམ་རིག་གིས་མིའི་རིགས་ཀྱི་ལས་དབང་ལ་དོ་སྣང་བྱ་དགོས།བོད་མི་རིགས་ནི་ཐུབ་བསྟན་ལ་དད་མོས་བྱེད་མཁན་ཞིག་རེད།ཐུབ་བསྟན་གྱི་དགོངས་དོན་ནི་བྱམས་དང་སྙིང་རྗེ་སྟེ། མིའི་རིགས་སྡུག་བསྔལ་ལས་བསྒྲོལ་པ་མ་ཟད། འགྲོ་བ་རིགས་དྲུག་དང་མར་གྱུར་སེམས་ཅན་ཐམས་ཅད་ལ་སྙིང་རྗེ་བསྒོམ་པའི་ལྟ་དགོངས་ཡངས་པོ་ནི་སྲིད་ན་དཀོན་ཞིང་། ཆེས་བླ་ན་མེད་པའི་ལྟ་དགོངས་ཤིག་ཡིན་པ་སྨོས་ཅི་དགོས། འདི་ལྟ་བུའི་རྨད་བྱུང་བསམ་བློ་རྩོམ་རིག་གི་ཞིང་དུ་འདྲེན་པ་ནི་ང་ཚོའི་འོས་འགན་དང་། རྩོམ་རིག་གི་རིན་ཐང་མངོན་པའི་ཐབས་ལམ་གཙོ་བོ་ཞིག་ཀྱང་ཡིན་པ་རེད། གཞན་ཡང་བོད་མི་ནི་རྟེན་འབྲེལ་གྱི་བདག་པོ་ཟེར་བ་སྟེ། བྱ་བ་ཆེ་མ་ཆུང་གསུམ་གང་ཞིག་སྒྲུབ་ཀྱང་རྟེན་འབྲེལ་བརྟག་པ་ནི་བོད་ཀྱི་ཁྱད་ཆོས་གཙོ་བོ་ཞིག་ཡིན་པས།  རྩོམ་རིག་དེ་དྲོད་ཀྱིས་བརྟས་པ་ཞིག་དང་སྨོན་འདུན་གྱིས་ཁེངས་པ་ཞིག་འཁྱོངས་པར་འབད་པ་བྱ་དགོས། མདོར་ན་བོད་ཀྱི་རྩོམ་རིག་དེ་བོད་རང་གི་ཁྱད་ཆོས་མངའ་བ་དང་། བོད་རང་གི་འཇིག་རྟེན་ལྟ་ཚུལ་དང་འཕྲོད་པ་ཞིག་ཏུ་ཅིས་ཀྱང་བརྩོན་ཐབས་བྱ་དགོས་སོ།།

བོད་ཡིག་གི་རྩོམ་འབྲི་མཁན་ཞིག་ལ་མཚོན་ན།ང་ཚོར་ཀློག་པ་པོ་མང་པོ་མེད།དེ་བཞིན་དུ་ཚོང་ར་རྒྱ་ཆེན་པོ་དང་དཔལ་འབྱོར་གྱི་ཡོང་འབབ་སོགས་ཀྱང་གླེང་ས་མེད་པས། ང་ཚོ་ནི་དོན་ངོ་མའི་སྟེང་གི་རྩོམ་དགའ་དང་རྩོམ་རིག་ཕུགས་བསམ་དུ་སྒོམ་མཁན་འབའ་ཞིག་ཡིན་ཞེས་བཤད་ཆོག   རྩོམ་རིག་ནི་རྫུན་གཏམ་ས་མི་འགྲོ་བ་ཞིག་དང་། རྩོམ་རིག་ནི་བླ་སྲོག་དང་འབྲེལ་ཞིང་།རྩོམ་རིག་ནི་རྣམ་ཤེས་དང་ཉེ་བ་ཞིག་ཡིན་པས། རྩོམ་རིག་གི་ཁེ་ཕན་རང་བཞིན་དང་རིང་དུ་བྲལ་བའི་ཕ་སྐད་རྩོམ་རིག་འདི་རྩོམ་རིག་གི་རང་མདངས་དང་ཤིན་ཏུ་ཉེ་བས། ནམ་ཞིག་བོད་ཁུལ་་དུ་ལ་ཏིན་མེ་གླིང་ནང་བཞིན་རྩོམ་རིག་གི་འགས་གཏོར་ཆེན་པོ་ཞིག་བྱུང་ཚེ།  དེ་ནི་བོད་ཡིག་རྩོམ་རིག་ཡིན་པའི་ཡིད་ཆེས་ཁོ་བོར་ཡོད་ཅེས་སྨྲ་བར་འདོད་དོ།།

རྩོམ་སྒྲིག་པ། དོ་རྒྱ་དོན་གྲུབ་ཚེ་བརྟན།

དཔྱད་མཆན 0 ཡོད།