བུད་མེད་དང་བྱིས་པ་བརྐུ་འཚོང་བྱེད་པའི་ནག་ཉེས་བྱེད་སྒོའི་ཁྱད་ཆོས་གསར་བ།
1.ཉེས་ཅན་ལོག་སྤྱོད་ཚོགས་ཁག་གི་གནས་བབ་མངོན་གསལ་དང་ནག་ཉེས་ཀྱི་དྲ་རྒྱའི་བསྣོལ་མཚམས་རྙོག་འཛིང་ཆེ་བ། ནག་ཉེས་ཀྱི་ཁྱབ་ཡུལ་མངའ་ཁོངས་ཅུང་མང་པ། ནག་ཉེས་དེ་ཡང་བསླུ་བྲིད་དང་བརྐུ་འཁྱེར་གྱི་བྱེད་ཐབས་སྣ་གཅིག་ནས་བཟི་ཁབ་རྒྱག་པ་དང་བཙན་འཕྲོག་གཞན་སྤྲོད་བཅས་ཀྱིས་གྱོད་དོན་བརྟོལ་བར་དཀའ་ཁག་ཧ་ཅང་ཆེ།
2.བྱིས་པ་བརྐུ་འཁྱེར་བྱེད་པའི་ནག་ཉེས་ཅུང་འབུར་དུ་ཐོན་ཞིང་ནག་ཉེས་ཀྱི་གདུག་རྩུབ་ཚད་གཞི་ཡང་ཆེས་ཆེར་སོང་ཡོད། གཞན་ཡུལ་ནས་ལས་ཀ་བྱེད་དུ་འོངས་བའི་ལས་བཟོ་བའི་བུ་ཕྲུག་བརྐུ་འཁྱེར་བྱས་པའི་གྱོད་དོན་མངོན་གསལ་གྱིས་ཇེ་མང་དུ་སོང་ཡོད།
3.བརྐུ་འཚོང་བྱས་པའི་བྱིས་པ་དེ་བཙན་ཤུགས་ཀྱིས་སྤྲང་བོ་དང་སྨད་འཚོང་། བརྐུ་འཁྱེར། འཕྲོག་བཅོམ་སོགས་ཀྱི་ཁྲིམས་འགལ་བྱ་འགུལ་སྒྲུབ་དུ་བཅུག་པ་ཅུང་མང་།
4.རྒྱལ་མཚམས་བརྒལ་བ་དང་མཐའ་མཚམས་བརྒལ་ནས་བུད་མེད་དང་བྱིས་པ་བརྐུ་འཚོང་བྱེད་པའི་གྱོད་དོན་ཡང་འབྱུང་བཞིན་ཡོད།
5.བརྐུ་འཚོང་བྱས་པའི་བུད་མེད་དག་ལ་བཙན་ཤེད་ཀྱིས་སྨད་འཚོང་སོགས་འདོད་སྲེད་ཀྱི་བྱེད་སྒོ་སྤེལ་དུ་འཇུག་པ་ཡང་ཇེ་མང་དུ་འགྲོ་བཞིན་ཡོད།
དྲ་སྟེང་ནས་གྲོགས་པོ་སྒྲིག་པ་དང་ཕྱི་རོལ་དུ་ལྟད་མོར་འགྲོ་དུས་ངེས་པར་དུ་ཡིད་ལ་འཛིན་བྱ།
1.འབྲེལ་འདྲིས་བྱེད་ཡུལ་འདེམས་པ་ལ་གཟབ་ནན་བྱས་ཏེ། ཆ་རྒྱུས་མེད་པའི་མི་དང་བར་ཐག་ངེས་ཅན་ཡོད་དགོས་ལ། ཕྱི་རོལ་དུ་འགྲོ་དུས་ཆང་མང་པོ་འཐུང་མི་རུང་།
2.ཆ་རྒྱུས་མེད་པའི་མི་ལ་འབྲེལ་འདྲིས་བྱེད་དུས་ངེས་པར་དུ་མཉམ་འཇོག་དང་དོགས་ཟོན་མཐོར་འདེགས་སུ་བཏང་ནས། ཁ་ཡག་ཚིག་འཇམ་ལ་གང་འདོད་དུ་ཡིད་ཆེས་བྱེད་མི་རུང་ཞིང་ཁེ་བཟང་ལེན་པའི་ཧམ་སེམས་གཏན་ནས་སྐྱེས་མི་རུང་།
3.ཆ་རྒྱུས་མེད་པའི་མི་ལ་རང་ཉིད་ཀྱི་ཁྱིམ་ཚང་དང་གཉེན་ཉེ། མི་སྒེར་བཅས་ཀྱི་དགའ་ཕྱོགས་གནས་ཚུལ་མཚམས་སྦྱོར་བྱེད་མི་རུང་།
4.རྒྱུས་མེད་མི་སྣའི་ཟས་རིགས་དང་བཏུང་ཆུའི་རིགས་གང་འདོད་དུ་དང་ལེན་བྱེད་མི་རུང་།
5.དྲ་སྟེང་ནས་ཁ་བརྡ་བྱས་མྱོང་བའི་མི་ལ་གང་འདོད་དུ་ཡིད་ཆེས་བྱེད་མི་རུང་ལ། གང་འདོད་དུ་དྲ་གྲོགས་ལ་ཐུག་འཕྲད་བྱེད་མི་རུང་།
6.ཕྱི་རོལ་ལ་འགྲོ་བའི་ལམ་བར་དུ་གལ་ཏེ་ཉེན་ཁར་འཕྲད་པ་ན། དུས་ལྟར་སྤྱི་བདེ་མི་དམངས་ཉེན་རྟོག་པ་དང་མཐའ་འཁོར་མང་ཚོགས་ལ་རོགས་རམ་བྱེད་དུ་འཇུག་དགོས།
7.ཕྱི་རོལ་ལ་འགྲོ་བའི་སྐབས་སུ། རང་ཉིད་ཀྱི་སྡོད་གནས་དང་འབྲེལ་གཏུག་ཁ་པར་ཨང་གྲངས་དུས་ལྟར་ཁྱིམ་མི་དང་གྲོགས་པོ་དག་ལ་བཤད་ནས། ཁོ་ཚོར་རང་ཉིད་ཀྱི་ཁ་ཕྱོགས་ཤེས་སུ་འཇུག་དགོས།
ཁྱིམ་བདག་གིས་ལོ་ཚད་ཅུང་ཆེ་བའི་བྱིས་པའི་རང་སྲུང་གི་འདུ་ཤེས་ཆེས་ཆེར་གཏོང་བའི་ཐད་ཀྱི་སློབ་གསོ།
1.བྱིས་པས་སྐད་ཆ་བཤད་ཤེས་པའི་སྐབས་ཁྱིམ་ཚང་གི་ཁ་པར་ཨང་གྲངས་དང་སྡོད་སའི་གྲོང་ཁྱེར་དེའི་གཞིས་ཁུལ་གྱི་མིང་། ཁྱིམ་ཚང་གི་ཁོངས་མི་དག་གི་མིང་བཅས་བློར་འཛིན་དུ་འཇུག་དགོས།
2.བྱིས་པ་དོན་དག་ལ་འཕྲད་དུས110ལ་ཁ་པར་བཏང་ནས་མྱུར་སྐྱོབས་བྱེད་པ་ཤེས་སུ་འཇུག་དགོས།
3.བྱིས་པར་ཉེན་རྟོག་པ་དང་དམག་མི། བདེ་སྲུང་མི་སྣ་བཅས་ཀྱི་ལས་ལྭ་གྱོན་པའི་མི་སྣའི་དབྱེ་བ་འབྱེད་པ་ཤེས་སུ་བཅུག་ན། གལ་ཏེ་ཁྱིམ་མི་དང་ཁ་བྲལ་ནས་བོར་སྟོར་བྱུང་ཚེ་མྱུར་དུ་ལས་ལྭ་གྱོན་པའི་ལས་བྱེད་མི་སྣ་འཚོལ་སྲིད།
4.བྱིས་པ་སློབ་གྲྭར་འགྲོ་འོངས་བྱེད་པའི་ལམ་བར་དུ་གལ་ཏེ་ཁྱིམ་བདག་གིས་སྐྱེལ་ལེན་བྱས་པ་མིན་ན་ངེས་པར་དུ་སློབ་གྲོགས་ལ་འགྲོག་ནས་འགྲོ་བ་དང་མཐའ་འཁོབ་ལ་མི་འགྲོ་བ། མི་མེད་ས་སྟོང་གི་ལམ་ཕྲན་དུ་མི་འགྲོ་བ་བཅས་ཀྱི་སློབ་གསོ་གཏོང་དགོས།
5.བྱིས་པར་དགོང་མོ་གཅིག་པུ་ཕྱི་རོལ་དུ་འགྲོ་མི་རུང་བའི་སློབ་གསོ་གཏོང་དགོས། གལ་ཏེ་དངོས་གནས་འགྲོ་དགོས་བྱུང་ཚེ་མི་བསམ་ཤེས་ཀྱིས་འགྲོ་རོགས་བྱེད་དགོས།
6.བྱིས་པར་མི་ཆ་མེད་ལ་གང་འདོད་དུ་འབྲེལ་འདྲིས་བྱེད་མི་རུང་བ་དང་མི་ཆ་མེད་ཀྱི་སྐད་ཆར་ཡིད་ཆེས་བྱེད་མི་རུང་བ། མི་ཆ་མེད་ཀྱི་ཟས་རིགས་དང་རྩེད་ཆས། དངོས་པོ་སོགས་དང་ལེན་བྱེད་མི་རུང་བའི་སློབ་གསོ་གཏོང་དགོས།
བརྐུ་འཚོང་བྱས་པའི་བུད་མེད་དང་བྱིས་པ་ཉོ་མི་རུང་།
རང་རྒྱལ་གྱི《ཉེས་ཁྲིམས》དོན་ཚན241པའི་གཏན་འབེབས་ལྟར་ན། བརྐུ་འཚོང་བྱས་པའི་བུད་མེད་དང་བྱིས་པ་ཉོ་མཁན་ལ་དུས་བཀག་བཙོན་འཇུག་ལོ་གསུམ་མན་དང་བཙན་ཉར་ལས་སྐུལ། རྩིས་སྤྲོད་དོ་དམ་བཅས་ཀྱི་ཁྲིམས་ཆད་གཅོད་དགོས།
1.བརྐུ་འཚོང་བྱས་པའི་བུད་མེད་ཉོས་ནས་བཙན་ཤེད་ཀྱིས་ལུས་འབྲེལ་བྱུང་བ་ལ་ཉེས་ཁྲིམས་ཀྱི་འབྲེལ་ཡོད་གཏན་འབེབས་ལྟར་བཙན་གཡེམ་གྱི་ནག་ཉེས་སུ་གཏན་ཁེལ་བྱས་ཏེ་ཁྲིམས་ཆད་གཅོད་དགོས།
2.བརྐུ་འཚོང་བྱས་པའི་བུད་མེད་དང་བྱིས་པ་ཉོས་ནས་ཁྲིམས་འགལ་སྒོས་མི་ལུས་ཀྱི་རང་དབང་ལ་ཚོད་འཛིན་དང་གནོད་སྐྱོན། དམའ་འབེབས་སོགས་ཀྱི་ཁྲིམས་འགལ་ནག་ཉེས་བཟོ་མཁན་ལ་ཉེས་ཁྲིམས་ཀྱི་འབྲེལ་ཡོད་གཏན་ཁེལ་གཞིར་བཟུང་ནས་ཁྲིམས་ཆད་གཅོད་དགོས།
3.བརྐུ་འཚོང་བྱས་པའི་བུད་མེད་དང་བྱིས་པ་ཉོས་ནས་གོང་གསལ་གྱི་ཁྲིམས་འགལ་བྱ་སྤྱོད་སྤེལ་ན། ནག་ཉེས་མང་པོ་བསགས་པའི་ཉེས་ཆད་སྡེབ་གཅོད་ཀྱི་གཏན་འབེབས་ལྟར་ཁྲིམས་ཆད་གཅོད་དགོས།
4.བརྐུ་འཚོང་བྱས་པའི་བུད་མེད་དང་བྱིས་པ་ཉོས་ནས་ཡང་བསྐྱར་གཞན་ལ་བཙོང་ན། 《ཉེས་ཁྲིམས》ཀྱི་དོན་ཚན240ཡི་གཏན་འབེབས་ལྟར་བུད་མེད་དང་བྱིས་པ་བརྐུ་འཚོང་གི་ནག་ཉེས་ལྟར་ཁྲིམས་ཆད་གཅོད་དགོས།
བརྐུ་འཚོང་བྱས་པའི་བུད་མེད་དང་བྱིས་པ་ཉོས་ནས་བུད་མེད་ཀྱི་འདོད་མོས་བཞིན་ཁོ་མོའི་སྔོན་ཆད་ཀྱི་སྡོད་གནས་སུ་ཕྱིར་ལོག་པར་བཀག་འགོག་མི་བྱེད་པ་དང་ཉོས་པའི་བྱིས་པར་ཡང་མནར་གཅོད་ཀྱི་བྱ་སྤྱོད་མ་བྱས་ཤིང་མྱུར་སྐྱོབས་ལ་བཀག་འགོག་བྱས་མེད་ན་ཁྲིམས་ཆད་ཇེ་ཡང་དང་ཁྲིམས་ཆད་མེད་པར་བཟོས་ཆོག
རང་ཉིད་གཞན་གྱིས་བརྐུ་འཚོང་བྱས་པ་ཤེས་རྗེས་ཇི་ལྟར་བྱ་དགོས་སམ།
1.གལ་ཏེ་སྤྱི་གཞུང་ཡུལ་དངོས་སུ་གཡོ་འོག་ཏུ་ཚུད་པ་ཤེས་ཚེ་མྱུར་དུ་མི་མང་འདུ་སར་སོང་སྟེ་མྱུར་སྐྱོབས་བྱེད་པའི་སྐད་འབོད་བྱེད་དགོས།
2.གལ་ཏེ་ཤེས་རྟོག་བྱུང་ན་ཡང་གཞན་གྱིས་རང་གི་མི་ལུས་ལ་ཚོད་འཛིན་ཐེབས་དུས་ལྷོད་ལ་བབས་ནས་ཉོ་བདག་དང་རང་ཉིད་འདུག་སའི་སྡོད་གནས་ངོ་མ（ཞིང་ཆེན་དང་གྲོང་ཁྱེར། རྫོང་། ཤང་གྲོང་རྡལ། སྡེ་བ། ཚོ་ཆུང་། ）བཅས་ཀྱི་གཞི་རྩའི་གནས་ཚུལ་ལ་རྒྱུས་ལོན་ཐུབ་དགོས།
3.ཉོ་འཚོང་རྒྱག་མཁན་དང་ཉོ་བདག དེ་མིན་འབྲེལ་ཡོད་མི་སྣ་བཅས་ལ་རྒྱལ་ཁབ་ཀྱི་བཅའ་ཁྲིམས་སྒྲོག་སྦྱོངས་བྱས་ཏེ། མཇུག་འབྲས་ཚབས་ཆེན་བཅས་ཀྱི་གསལ་བརྡ་བཏང་ནས། ཕྱི་རོལ་དུ་རོགས་སྐྱོར་དང་བྲོས་བྱོལ་བྱེད་དགོས།
4.ཤོག་བྱང་ཆུང་ངུའི་ངོས་སུ་ཡི་གེ་འབྲི་བའི་ཐབས་ལམ་ལ་བརྟེན་ནས་ཉེ་འཁོར་གྱི་མི་ལ་ལྐོག་བརྡ་བཏང་སྟེ་ཁྱོད་ཀྱི་གནས་བབ་ཤེས་སུ་བཅུག་ནས། མི་གཞན་གྱིས་རོགས་རམ་དང་ཕྱི་རོལ་ལ་འབྲེལ་གཏུག་བྱེད་པའི་ཐབས་ལམ་བཙལ་དགོས།
5.དོར་འདོར་མི་བྱེད་པར་ཐབས་བཀོད་འཐེན་ནས་གོ་སྐབས་བཙལ་ཏེ་སྤྱི་བདེ་ལས་ཁུངས་ལ་གྱོད་དོན་སྙན་གསེང་ཞུ་དགོས། ཁ་པར་གཏོང་བ་དང་བརྡ་འཕྲིན་བསྐུར་བ། དྲ་རྒྱ་སོགས་ཕྱི་རོལ་དུ་འབྲེལ་གཏུག་བྱེད་པའི་བརྡ་འཕྲིན་ལ་བརྟེན་ནས་གང་མགྱོགས་སྒོས་སྙན་གསེང་ཞུས་ཏེ། རང་ཉིད་སྡོད་སའི་ས་གནས་དང་ཉོ་མཁན་གྱི་མིང་། འབྲེལ་གཏུག་ཁ་པར་ཨང་གྲངས་སོགས་གསལ་བཤད་བྱེད་དགོས།
བྱིས་པ་ཞིག་གིས་སྒྱུ་རྩལ་འཚོང་བ་དང་སྦྲང་སློང་བྱེད་པ་མཐོང་དུས་ཅི་ལྟར་བྱེད་དགོས་སམ།
110ལ་ཁ་པར་བཏང་ནས་ས་གནས་དེའི་མངག་གཏོང་ཁང་ལ་ཡར་ཞུ་བྱེད་དགོས། ཁྱོད་ཀྱི་ཁ་པར་ཐེངས་གཅིག་གིས་བྱིས་པ་ཞིག་མྱུར་སྐྱོབས་བྱེད་ཐུབ་ལ། ཕལ་ཆེར་ཁྱིམ་མི་ལྷན་འཛོམས་བྱུང་སྟེ། བྱིས་པ་མང་པོ་ཞིག་བརྐུ་འཚོང་གི་ཆག་སྒོ་ལས་ཐར་སྲིད་ངེས།
གལ་ཏེ་ཁྱོད་ཀྱི་རང་གི་བྱིས་པ་བོར་སྟོར་བྱུང་ཚེ་ཇི་ལྟར་བྱ་དགོས་སམ།
གལ་ཏེ་རང་གི་བྱིས་པ་བོར་སྟོར་བྱུང་བ་ཤེས་ཚེ་མྱུར་དུ་སྤྱི་བདེ་ལས་ཁུངས་ལ་ཁ་པར་བཏང་ནས་སྙན་ཞུ་བྱེད་དགོས་ཤིང་། ཆེས་རིན་ཐང་བྲལ་བའི་གྱོད་བརྟོལ་དུས་ཡུན་ནི་བྱིས་པ་བོར་སྟོར་བྱུང་བའི་དུས་ཚོད24ཡི་ནང་ཡིན་པས། བླང་བློང་དང་འཚུབ་ཆ་ནི་ཕལ་ཆེར་ང་ཚོ་མི་རེ་རེའི་ཆེས་ཐོག་མའི་སྣང་ཚུལ་ཡིན་མོད། འོན་ཀྱང་ལྷོད་ལ་བབས་ནས་དངོས་ཡོད་ལ་གདོང་ལེན་བྱེད་དགོས།
ཁྱིམ་བདག་གིས་ན་ཆུང་བྱིས་པའི་ལྟ་སྐྱོང་ལ་ཤུགས་སྣོན་བྱེད་དགོས།
1.བྱིས་པ་ཁྱིམ་བདག་གི་མཐོང་སྣེ་ཁྱབ་ཁོངས་ལས་བརྒལ་དུ་འཇུག་མི་རུང་།
2.བྱིས་པ་གཅིག་པུ་རང་ཁྱིམ་དང་ཚོང་ཁང་ནང་དུ་འཇོག་མི་རུང་།
3.བྱིས་པ་མི་ཆ་མེད་ལ་བཅོལ་ནས་ལྟ་རྟོག་བྱེད་དུ་འཇུག་མི་རུང་ཤིང་། བྱིས་པར་བདག་སྐྱོང་བྱེད་པའི་དུས་ཚོད་མེད་ན། རང་གིས་ཡིད་རྟོན་ཆོག་པའི་གཉེན་ཉེ་དང་གྲོགས་པོ་ལ་བཅོལ་དགོས།
4.བྱིས་པ་གཅིག་པུ་ཕྱི་རོལ་དུ་རྩེད་འཇོར་རོལ་དུ་འཇུག་མི་རུང་།
5.བྱིས་པ་ལ་མི་བསམ་ཤེས་ཀྱི་ལྟ་སྐྱོང་མེད་པའི་གནས་ཚུལ་འོག་བྱིས་པ་གཞན་དག་ལ་འགྲོགས་ནས་ཕྱི་རོལ་ལ་འགྲོ་རུ་འཇུག་མི་རུང་།
6.བྱིས་པ་ཁྲིད་ནས་སྒོར་རྩེ་རུ་འགྲོ་དུས་ཉེ་འཁོར་གྱི་གནས་ཚུལ་ལ་མཉམ་བཞག་སྟེ། མི་དང་རླངས་འཁོར་གྱིས་རྗེས་དེད་ཡོད་མེད་གསལ་བོ་ཤེས་དགོས།
7.བྱིས་པ་ལ་ཁྱིམ་ཚང་དང་འབྲེལ་བ་ཡོད་པའི་གནས་ཚུལ་གྱི་བྱ་དངོས་གང་རུང་ཞིག་འདོགས་སུ་འཇུག་དགོས།
8.བྱིས་པ་ཁྲིད་དེ་མི་མེད་ས་སྟོང་དུ་འགྲོ་མི་རུང་ལ། བྱིས་པ་ཁྲིད་དེ་གཞུང་ལམ་སྟེང་འགྲོ་དུས་གང་ནུས་ཀྱིས་ནང་ཕྱོགས་སུ་འགྲོ་རུ་བཅུག་སྟེ། རྒྱབ་ཕྱོགས་ནས་འོངས་བའི་འཕྲུལ་རྟ་དང་རླངས་འཁོར་སོགས་ལ་མཉམ་འཇོག་བྱེད་དགོས།
9.སྨན་ཁང་ནང་དུ་གསར་སྐྱེས་བུ་ཕྲུག་ངོ་མི་ཤེས་པའི་སྨན་བཅོས་མི་སྣ་ལ་སྤྲོད་མི་རུང་ཞིང་། གཉིད་ལོག་སྐབས་ཁང་བའི་སྒོར་ཟྭ་རྒྱག་དགོས།
10.བྱིས་གཉོར་མཁན་མཁོ་དུས་བྱིས་གཉོར་ཚད་ལྡན་ངོ་སྤྲོད་བྱེད་པའི་སྒྲིག་འཛུགས་ལས་ཁུངས་སུ་སོང་ནས་ལས་བསྡུ་བྱེད་དགོས་ཤིང་། བྱིས་གཉོར་མཁན་གྱི་ཐོབ་ཐང་དཔང་ཡིག་བསྐྱར་དཔར་དང་ཉེ་དུས་ཀྱི་འདྲ་པར་གསལ་བོ་ཞིག་ཉར་ཚགས་བྱེད་དགོས།
11.ནམ་རྒྱུན་བྱིས་གཉོར་མཁན་དང་ཁྱིམ་མི་དག་ལ་རང་སྲུང་གི་འདུ་ཤེས་མཐོར་འདེགས་སུ་གཏོང་བའི་གསལ་འདེབས་དང་སློབ་གསོ་གཏོང་དགོས།
12.གལ་ཏེ་ཁྱོད་ནི་ཕྱི་ནས་འོངས་བའི་ངལ་རྩོལ་པ་ཞིག་དང་ཁྱོད་ཀྱི་བྱིས་པ་ལོ3ལས་ཆུང་ཤིང་། སྡོད་གནས་ནི་གྲོང་མཐའི་སྣ་འཛོམས་རང་བཞིན་གྱི་མི་ཚོགས་འཁོར་རྒྱུག་ཅུང་སྟུག་སའི་ས་ཁུལ་ཡིན་ལ། བྱིས་པར་གཏན་ཁེལ་གྱི་ལྟ་སྐྱོང་མཁན་མེད་ན། ཁྱོད་ཀྱིས་དེ་ལས་ལྷག་པའི་སྒོ་ནས་དོན་དག་འདིར་མཐོང་ཆེན་བྱེད་དགོས།
མཁར་གྲོང་དུ་ཞོར་ལས་བྱེད་བཞིན་པའི་ན་གཞོན་བུ་མོ་དག་གི་ཡིད་ལ་འཛིན་བྱ།
1.ལས་ཀ་བཙལ་ན་ཡང་ཚད་ལྡན་གྱི་ངོ་སྤྲོད་སྒྲིག་འཛུགས་ལ་སོང་ནས་ཁྲིམས་མཐུན་གྱི་འགྲོ་རིམ་དང་ཡིད་ཆེས་ཆོག་པའི་གཉེན་ཉེ། གྲོགས་པོ་སོགས་ཀྱི་ངོ་སྤྲོད་བརྒྱུད་ནས་བཙལ་དགོས།
2.རྨོངས་ཚོད་ཀྱིས་ཕྱི་རོལ་དུ་ཞོར་ལས་ལ་འགྲོ་མི་རུང་ཞིང་ཁྲིམས་འགལ་གྱི་ཚགས་པར་དང་གང་སར་སྦྱར་བའི་ལས་བསྡུའི་བརྡ་ཡིག་སོགས་ལ་ཡིད་ཆེས་བྱེད་མི་རུང་།
3.གལ་ཏེ་དངོས་གནས་ཕྱི་རོལ་དུ་ཞོར་ལས་ལ་འགྲོ་དགོས་ཚེ་རབས་ཡིན་ན་གྲོགས་པོ་དང་མཉམ་དུ་འགྲོ་དགོས།
4.ལས་ཀ་མཚམས་སྦྱོར་དང་སྡོད་ཁང་བཙལ་རོགས་བྱེད་པ། ཁྱོད་ཀྱི་གཉེན་ཉེ་ཡི་ཚབ་བྱེད་ས་ཚིགས་སོགས་ཀྱི་རྒྱུ་རྐྱེན་ལ་ཡིད་ཆེས་བྱེད་མི་རུང་ཞིང་། ཁྱོད་ལ་ཆ་རྒྱུས་མེད་པའི་མི་དང་འགྲོགས་ནས་ས་ཆ་ཆ་མེད་ལ་གཏན་ནས་འགྲོ་མི་རུང་།
5.རླངས་འཁོར་ས་ཚིགས་དང་མེ་འཁོར་འབབ་ཚུགས་ཀྱི་ཉེ་འཁོར། དེ་མིན་གཞན་པའི་ཡུལ་དངོས་སུ་འགྲུལ་བ་བསྡུ་བའི་བྱ་སྤྱོད་ལ་འཕྲད་དུས་ངེས་པར་དུ་གཏན་འགོག་བྱེད་དགོས།
6.རང་ཉིད་ཀྱི་ཐོབ་ཐང་ལག་འཁྱེར་དང་ཕྱིར་སྐྱོད་དཔང་ཡིག དེ་མིན་ཡིག་ཆ་གལ་ཆེན་བཅས་ལ་བདག་དོམ་ནན་མོ་བྱས་ཏེ། མ་ཡིག་གང་འདོད་དུ་མི་གཞན་པར་སྤྲོད་མི་རུང་། དེའི་ཁོངས་སུ་ལས་བདག་ཡང་འདུ།
7.རང་ཉིད་ཀྱིས་ལས་ཀ་བྱེད་སའི་སྡོད་གནས་ཞིབ་ཚགས་དང་འབྲེལ་གཏུག་ཨང་གྲངས་སོགས་ཁྱིམ་མི་དང་གྲོགས་པོ་དག་ལ་བཤད་དགོས། རབས་ཡིན་ན་རང་ཉིད་ཀྱི་འདུག་རོགས་དང་ལས་གྲོགས། སྦྱིན་བདག་བཅས་ཀྱི་འབྲེལ་གཏུག་ཨང་གྲངས་ཡང་ཁྱིམ་མི་དང་གྲོགས་པོ་དག་ལ་བཤད་དེ་ཁོ་ཚོར་ཁྱོད་ཀྱི་ཁ་ཕྱོགས་ཤེས་སུ་འཇུག་དགོས།
8.རང་གི་ལག་ན་མཁར་གྲོང་དུ་གཟའ་འཁོར་གཉིས་ལྷག་ལ་འདང་ངེས་ཀྱི་སྒོར་མོ་ཡོད་པ་ཁག་ཐེག་བྱེད་དགོས། དེ་མིན་འཚོ་བའི་བཙུར་འདེད་ཀྱི་དབང་གིས་ཁྱོད་རང་ལས་ཀ་ངོ་སྤྲོད་བྱེད་མཁན་ལ་ཡིད་ཆེས་སྐྱེ་སྔ་ངེས།
རྫོགས་སོ།