ཀྲུང་གོ་བོད་ཀྱི་དྲ་བ།

ཀྲུང་གུང་ཀྲུང་དབྱང་གིས《ཀྲུང་གོ་གུང་ཁྲན་ཏང་གི་ཏང་ཡོན་སློབ་གསོ་དོ་དམ་བྱ་བའི་སྲོལ་ཡིག》དཔར་འགྲེམ་བྱས་པ།(གཅིག)

ཡོང་ཁུངས། : མཚོ་སྔོན་བོད་ཡིག་གསར་འགྱུར།     སྤེལ་དུས། : 2019-07-10
ཡིག་གཟུགས། :ཆུང་། འབྲིང་། ཆེ།

ཉེ་ཆར། ཀྲུང་གུང་ཀྲུང་དབྱང་གིས《ཀྲུང་གོ་གུང་ཁྲན་ཏང་གི་ཏང་ཡོན་སློབ་གསོ་དོ་དམ་བྱ་བའི་སྲོལ་ཡིག》(གཤམ་དུ་བསྡུས་མིང་ལ《སྲོལ་ཡིག》ཅེས་འབྲི་རྒྱུ)དཔར་འགྲེམ་བྱས་པར་མ་ཟད། བརྡ་སྦྱོར་ཡི་གེ་བཏང་ནས་ས་ཁུལ་སོ་སོ་དང་སྡེ་ཁག་སོ་སོས་ནན་ཏན་གྱིས་བརྩི་སྲུང་དང་ལག་བསྟར་བྱེད་དགོས་པའི་བླང་བྱ་བཏོན་ཡོད།བརྡ་སྦྱོར་ནང་བསྟན་དོན། ཏང་ཡོན་སློབ་གསོ་དོ་དམ་ནི་ཏང་གི་འཛུགས་སྐྲུན་གྱི་རྨང་གཞིའི་རང་བཞིན་དང་རྒྱུན་ལྡན་རང་བཞིན་གྱི་བྱ་བ་ཞིག་ཡིན། ཏང་གི་ཚོགས་ཆེན་ཐེངས་བཅོ་བརྒྱད་པ་འཚོགས་པའི་ཚུན་ལ། བློ་མཐུན་ཞི་ཅིན་ཕེན་སྲོག་ཤིང་ཡིན་པའི་ཏང་ཀྲུང་དབྱང་གིས་ཏང་ཡོན་སློབ་གསོ་དོ་དམ་བྱ་བར་ཤུགས་སྣོན་པར་མཐོང་ཆེན་ཚད་མཐོན་པོ་གནང་བཞིན་ཡོད་པ་དང་། ཏང་ཡོངས་ཀྱིས་གཟབ་ནན་དང་ཏན་ཏིག་ངང་ཏང་ཡོན་གྱི་སློབ་གསོ་དོ་དམ་དམ་འཛིན་བྱེད་པའི་རྣམ་པ་བཟང་པོ་ཞིག་ཆགས་པར་སྐུལ་འདེད་བཏང་ཡོད། 《སྲོལ་ཡིག》ནང་། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མཛུབ་སྟོན་དུ་འཛིན་པ་དང་། ཏང་གི་སྒྲིག་ཡིག་རྩ་བའི་སྲུང་བྱར་བརྩི་བ། ལག་ལེན་གྱི་གསར་གཏོད་གྲུབ་འབྲས་ལ་ཕྱོགས་སྡོམ་དང་སྡུད་ལེན་བཅས་བྱས་ནས། ཏང་ཡོན་སློབ་གསོ་དོ་དམ་གྱི་ནང་དོན་དང་། བྱེད་ཐབས། གོ་རིམ་སོགས་ཚད་ལྡན་ཡོང་བ་བྱ་རྒྱུ་ནི་དུས་རབས་གསར་པའི་ཏང་ཡོན་སློབ་གསོ་དོ་དམ་བྱ་བའི་གཞི་རྩའི་བསྲུང་བྱ་རེད་ཅེས་བསྟན།

བརྡ་སྦྱོར་ནང་ནན་གྱིས་བསྟན་དོན།《སྲོལ་ཡིག》བཟོས་པ་དང་ལག་བསྟར་བྱས་པ་དེ་ཏང་ཡོན་དཔུང་ཁག་འཛུགས་སྐྲུན་གྱི་སྤུས་ཚད་མཐོར་འདེགས་སུ་གཏོང་བ་དང་། ཏང་རྩ་འཛུགས་ཀྱི་སྐྱེ་སྟོབས་དང་གསོན་ཤུགས་འཕེལ་བར་བྱེད་པ། ཕྱོགས་ཡོངས་ནས་ཏང་ནན་གྱིས་སྐྱོང་བ་གཏིང་ཟབ་ཀྱི་ཕྱོགས་སུ་འཕེལ་རྒྱས་འགྲོ་བར་སྐུལ་འདེད་གཏོང་བ། ཏང་གིས་ཡུན་རིང་དུ་སྲིད་སྐྱོང་བའི་རྨང་གཞི་བརྟན་པོར་འདིང་བ། ཏང་གིས་སྲིད་སྐྱོང་བའི་འགན་འཁྲི་རླབས་ཆེན་མངོན་འགྱུར་བྱེད་པ་བཅས་ཀྱི་ཐད་ལ་དོན་སྙིང་ཧ་ཅང་གལ་ཆེན་ལྡན་པ་རེད།

བརྡ་སྦྱོར་ནང་བླང་བྱ་བཏོན་དོན། ཏང་ཡོན་རེ་རེས་སོ་སོའི་གོ་གནས་ཀྱི་མཐོ་དམན་ལ་མི་བལྟ་བར། ཚང་མས་ངེས་པར་དུ་ཏང་གི་སྒྲིག་ཡིག་གི་བླང་བྱ་དང《སྲོལ་ཡིག》གི་གཏན་འབེབས་ལྟར། ཏང་རྩ་འཛུགས་ཀྱི་སློབ་གསོ་དོ་དམ་དང་ལེན་བྱེད་དགོས། རིམ་པ་སོ་སོའི་ཏང་ཨུ་དང་ཏང་ཙུའུ་སོ་སོས་ཏང་ཡོན་གྱི་སློབ་གསོ་དོ་དམ་ལེགས་འཛིན་བྱེད་པ་དེ་ཆབ་སྲིད་ཀྱི་འགན་འཁྲི་གལ་ཆེན་དུ་བརྩི་བ་དང་། ནུས་ལྡན་གྱི་བྱེད་ཐབས་སྤྱད་ནས། གཟབ་ནན་སྒོས《སྲོལ་ཡིག》ལག་བསྟར་དོན་འཁྱོལ་བྱེད་པ་དང་། དམིགས་གཏད་རང་བཞིན་དང་གོ་ཆོད་རང་བཞིན་ཆེ་རུ་གཏོང་བ་བཅས་བྱས་ཏེ་ཕྱི་ཚུལ་རིང་ལུགས་སྔོན་འགོག་བྱེད་དགོས། 《སྲོལ་ཡིག》གི་དྲིལ་སྒྲོག་འགྲེལ་བཤད་དང་སློབ་སྦྱོང་གསོ་སྦྱོང་དམ་འཛིན་ཡག་པོ་བྱས་ནས། རིམ་པ་སོ་སོའི་ཏང་རྩ་འཛུགས་དང་། རྒྱ་ཆེའི་ཏང་ཡོན། ཁྱད་པར་དུ་ཏང་ཡོན་མགོ་ཁྲིད་ལས་བྱེད་པས《སྲོལ་ཡིག》གི་དགོངས་དོན་ལ་གོ་བ་གཏིང་ཟབ་ལེན་པ་དང《སྲོལ་ཡིག》གི་ནང་དོན་ཕྱོགས་ཡོངས་ནས་ཁོང་དུ་ཆུད་པ། 《སྲོལ་ཡིག》གི་གཏན་འབེབས་གཟབ་ནན་གྱིས་ལག་བསྟར་བཅས་བྱེད་དགོས། ཀྲུང་དབྱང་རྩ་འཛུགས་པུའུ་ཡིས་འབྲེལ་ཡོད་སྡེ་ཁག་དང་མཉམ་དུ་ལྟ་སྐུལ་མཛུབ་སྟོན་ལ་ཤུགས་བསྣན་ནས། 《སྲོལ་ཡིག》ནུས་ལྡན་ངང་ལག་བསྟར་དོན་འཁྱོལ་ཐུབ་པར་འགན་ལེན་ཏན་ཏིག་བྱེད་དགོས། ས་ཁུལ་སོ་སོ་དང་སྡེ་ཁག་སོ་སོས《སྲོལ་ཡིག》ལག་བསྟར་བྱེད་པའི་ཁྲོད་ཀྱི་གནས་ཚུལ་དང་གྲོས་གཞི་གལ་ཆེན་དུས་ཐོག་ཏུ་ཏང་ཀྲུང་དབྱང་ལ་སྙན་སེང་ཞུ་དགོས།

《ཀྲུང་གོ་གུང་ཁྲན་ཏང་གི་ཏང་ཡོན་སློབ་གསོ་དོ་དམ་བྱ་བའི་སྲོལ་ཡིག》འདིའི་རྩོམ་ཡིག་ཧྲིལ་པོ་གཤམ་དུ་བཀོད་པ་འདི་ལྟ་སྟེ།

ལེའུ་དང་པོ། སྤྱིའི་རྩ་དོན།

དོན་ཚན་དང་པོ། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གཏིང་ཟབ་ཀྱིས་སློབ་སྦྱོང་དང་ལག་ལེན་མཐར་ཕྱིན་བྱེད་པའི་ཆེད་དུ། ཏང་ཡོན་སློབ་གསོ་དོ་དམ་བྱ་བར་ཤུགས་སྣོན་བྱས་ནས། ཏང་ཡོན་དཔུང་ཁག་འཛུགས་སྐྲུན་གྱི་སྤུས་ཚད་མཐོར་འདེགས་སུ་གཏོང་བ་དང་། ཏང་ཡོན་དཔུང་ཁག་གི་སྔོན་ཐོན་རང་བཞིན་དང་དྭངས་གཙང་རང་བཞིན་རྒྱུན་སྲུང་བྱས་ཏེ། 《ཀྲུང་གོ་གུང་ཁྲན་ཏང་གི་སྒྲིག་ཡིག》དང་འབྲེལ་ཡོད་ཏང་ནང་ཁུལ་གྱི་ཁྲིམས་སྲོལ་དག་གཞིར་བཟུང་ནས། སྲོལ་ཡིག་འདི་གཏན་འབེབས་བྱས་པ་ཡིན།

དོན་ཚན་གཉིས་པ། ཏང་ཡོན་སློབ་གསོ་དོ་དམ་ནི་ཏང་གི་འཛུགས་སྐྲུན་གྱི་རྨང་གཞིའི་རང་བཞིན་དང་རྒྱུན་ལྡན་རང་བཞིན་གྱི་བྱ་བ་ཞིག་ཡིན། ཏང་རྩ་འཛུགས་ཀྱིས་ཅིས་ཀྱང་ཏང་ཡོན་སློབ་གསོ་དོ་དམ་ལ་ཤུགས་སྣོན་བྱེད་དགོས་པ་དང་། ཏང་ཡོན་ལ་ཁྲིད་སྟོན་བྱས་ཏེ་གུང་ཁྲན་རིང་ལུགས་ཀྱི་རྒྱང་རིང་གཏན་གྱི་འདུན་མ་དང་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་ཐུན་མོང་ཕུགས་བསམ་ཆེན་པོ་སྔར་ལས་ཇེ་བརྟན་དུ་བཏང་ནས། “འདུ་ཤེས་བཞི”ཤུགས་ཆེར་གཏོང་བ་དང་། “རང་རྟོན་བཞི”ཇེ་བརྟན་དུ་གཏོང་བ། “སྲུང་སྐྱོང་གཉིས”སྒྲུབ་ཐུབ་པ་བཅས་བྱས་ཏེ། ཏང་གཤིས་ཇེ་དྲག་དང་བྱང་ཚད་མཐོར་འདེགས་སུ་གཏོང་དགོས་ལ། འོས་འགན་ནན་ཏན་གྱིས་ལག་བསྟར་བྱེད་པ། དབང་ཆ་ཡང་དག་པར་བཀོལ་སྤྱོད་བྱེད་པ་བཅས་ཀྱི་སྒོ་ནས། གདོང་ལེན་མིག་དཔེའི་ནུས་པ་གང་ལེགས་ཀྱིས་འདོན་སྤེལ་བྱེད་དགོས།

དོན་ཚན་གསུམ་པ། ཏང་ཡོན་སློབ་གསོ་དོ་དམ་བྱ་བས་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕིང་གི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཅས་མཛུབ་སྟོན་དུ་བཟུང་སྟེ། དུས་རབས་གསར་པའི་ཏང་གི་འཛུགས་སྐྲུན་གྱི་སྤྱིའི་བླང་བྱ་དང་དུས་རབས་གསར་པའི་ཏང་གི་རྩ་འཛུགས་ལམ་ཕྱོགས་དངོས་འབེབས་དོན་འཁྱོལ་བྱེད་དགོས་པ་དང་། སློབ་གསོ་དང་དོ་དམ། ལྟ་སྐུལ། ཞབས་ཞུ་བཅས་ཕན་ཚུན་ཟུང་དུ་འབྲེལ་བ་རྒྱུན་འཁྱོངས་བྱས་ནས། “སློབ་པ་གཉིས་དང་བྱེད་པ་གཅིག”གི་སློབ་སྦྱོང་སློབ་གསོ་རྒྱུན་རྣམ་ཅན་དང་ལམ་ལུགས་ཅན་དུ་འགྱུར་བར་སྐུལ་འདེད་བྱེད་དགོས་ཤིང་། རྒྱུན་ཆད་མེད་པར་ཏང་ཡོན་སློབ་གསོ་དོ་དམ་གྱི་དམིགས་གཏད་རང་བཞིན་དང་གོ་ཆོད་རང་བཞིན་ཤུགས་ཆེར་གཏོང་དགོས་ལ། ཧུར་བརྩོན་གྱིས་ཆབ་སྲིད་ཚད་མཐུན་ཡིན་པ་དང་སྒྲིག་ཁྲིམས་ལག་བསྟར་ཚད་མཐུན་ཡིན་པ། གཤིས་སྤྱོད་ཚད་མཐུན་ཡིན་པ། ནུས་པ་འདོན་སྤེལ་ཚད་མཐུན་ཡིན་པ་བཅས་ཀྱི་ཏང་ཡོན་དཔུང་ཁག་ཅིག་འཛུགས་སྐྲུན་བྱེད་དགོས།

དོན་ཚན་བཞི་པ། ཏང་ཡོན་སློབ་གསོ་དོ་དམ་བྱ་བས་གཤམ་གྱི་རྩ་དོན་འདི་དག་བརྩི་སྲུང་བྱ་དགོས་ཏེ།

(གཅིག) ཏང་གིས་ཏང་ལ་དོ་དམ་བྱེད་དགོས་པ་དང་། ཕྱོགས་ཡོངས་ནས་ཏང་གཟབ་ནན་གྱིས་སྐྱོང་བ་རྒྱུན་འཁྱོངས་བྱས་ཏེ། གཟབ་ནན་གྱི་བླང་བྱ་དེ་ཏང་ཡོན་སློབ་གསོ་དོ་དམ་བྱ་བའི་བརྒྱུད་རིམ་ཧྲིལ་པོ་དང་ཕྱོགས་སོ་སོར་དོན་ཐོག་ཏུ་འཁྱོལ་ཐུབ་པར་བྱེད་པ་དང་། ཏང་ཡོན་མགོ་ཁྲིད་ལས་བྱེད་པས་སྣེ་ཁྲིད་ནས་སློབ་གསོ་དོ་དམ་དང་ལེན་བྱེད་དགོས།

(གཉིས) ཏང་གི་ཆབ་སྲིད་འཛུགས་སྐྲུན་དེ་སྤྱི་ཁྱབ་བཀོད་འདོམས་པ་ལྟ་བུར་འཛིན་པ་རྒྱུན་འཁྱོངས་བྱས་ནས། ཏང་གཤིས་སློབ་གསོ་དང་ཆབ་སྲིད་གཞུང་ལུགས་ཀྱི་སློབ་གསོ་འབུར་དུ་ཐོན་པར་བྱེད་པ་དང་། ཏང་ཡོན་གྱིས་ཏང་གི་སྒྲིག་ཡིག་དང་ཏང་གི་ལམ་སྲོལ། ཏང་གི་སྒྲིག་ཁྲིམས་བཅས་བརྩི་སྲུང་བྱེད་པར་ཁྲིད་སྟོན་བྱས་ཏེ། ཐོག་མའི་བསམ་འདུན་མི་བརྗེད་པར། འགན་འཁྲི་ལས་འགན་ཡིད་ལ་དམ་པོར་འཆང་དགོས།

(གསུམ) ལྟེ་བར་དམིགས་པ་དང་སྤྱི་ཡོངས་ལ་ཞབས་འདེགས་ཞུ་བ་རྒྱུན་འཁྱོངས་བྱས་ནས། ཏང་ཡོན་སློབ་གསོ་དོ་དམ་གྱི་སྤུས་ཚད་དང་ཕན་འབྲས་དངོས་གཙིགས་འཛིན་བྱེད་དགོས་པ་དང་། ཏང་གི་རིགས་པའི་གཞུང་ལུགས་དང་ལམ་ཕྱོགས་བྱེད་ཕྱོགས་སྲིད་ཇུས། ཏང་ཀྲུང་དབྱང་གི་ཇུས་ཆོད་བཀོད་སྒྲིག་མཐའ་དག་ལག་ལེན་དངོས་འབེབས་བྱེད་པར་ཁག་ཐེག་བྱེད་དགོས།

(བཞི) དོན་དངོས་ལས་མགོ་རྩོམ་པ་རྒྱུན་འཁྱོངས་བྱས་ནས། རིགས་བགོས་མཛུབ་སྟོན་བྱེད་པར་ཤུགས་སྣོན་དགོས་པ་དང་། ཏང་ཡོན་གྱི་གཙོ་གཞིའི་གོ་གནས་ལ་བརྩི་འཇོག་བྱེད་དགོས་ཤིང་། ཏང་ཀྲི་པུའུ་ཡིས་ཐད་ཀར་ཏང་ཡོན་ལ་སློབ་གསོ་དང་དོ་དམ་དང་ལྟ་སྐུལ་བྱེད་པའི་ནུས་པ་གང་ལེགས་ཀྱིས་འདོན་སྤེལ་བྱེད་དགོས།

ལེའུ་གཉིས་པ། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་ལེན་བྱེད་དགོས།

དོན་ཚན་ལྔ་པ། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་བཀོལ་ནས་ཏང་ཡོངས་ལ་དྲག་ཆས་སྤྲ་རྒྱུ་དེ་ཏང་ཡོན་སློབ་གསོ་དོ་དམ་གྱི་ཆབ་སྲིད་ལས་འགན་གཙོ་བོ་ཞིག་ཏུ་བརྩིས་ནས། ཏང་ཡོན་རྣམས་ལ་ཁྲིད་སྟོན་གྱིས་ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་ལེན་བྱེད་པའི་དོན་སྙིང་གལ་ཆེན་གང་ལེགས་ཀྱིས་ངོས་ཟིན་དགོས་པ་དང་། རང་རྟོགས་ཀྱིས་བསླབས་ནས་ཤེས་ཤིང་ཁོང་དུ་ཆུད་པ་རྣལ་མོར་བསྒྲུབ་དགོས།

དོན་ཚན་དྲུག་པ། ཏང་ཡོན་རྩ་འཛུགས་བྱས་ནས་མ་རྩོམ་ཀློག་པ་དང་མ་ཡིག་སློབ་པ། གནས་ལུགས་མཐར་ཐུག་རྟོགས་པར་བྱེད་དགོས་ལ། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་གཏིང་ཟབ་སྒོས་སློབ་སྦྱོང་བྱས་ཏེ།དེའི་བརྗོད་བྱའི་སྙིང་པོ་དང་རྩ་བའི་དགོངས་དོན། ལག་ལེན་གྱི་རེ་འདུན་བཅས་ལ་གོ་བ་རྙེད་དགོས་པ་དང་། དེའི་ཁྲོད་དུ་ཁྱབ་པའི་མར་ཁེ་སི་རིང་ལུགས་ཀྱི་ལངས་ཕྱོགས་དང་ལྟ་བ། བྱེད་ཐབས་བཅས་ཁོང་དུ་ཆུད་པར་བྱེད་དགོས་ལ། ཆབ་སྲིད་ཀྱི་རང་རྟོགས་དང་གཞུང་ལུགས་ཀྱི་རང་རྟོན། བརྩེ་སེམས་འདྲེས་པ་སྔར་ལས་ཇེ་དྲག་ཏུ་གཏོང་དགོས།ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་དང་ལག་ལེན་མཐར་ཕྱིན་བྱ་རྒྱུ་དེ་ནང་དོན་གཙོ་བོ་ཡིན་པའི་ཏང་ཡོན་སློབ་གསོའི་བསླབ་དེབ་མ་ལག་འཛུགས་དགོས། ཏང་ཡོན་ལ་སློབ་གསོ་དང་ཁྲིད་སྟོན་བྱས་ནས་ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་བྱེད་པ་དེ་ཉིད་མར་ཁེ་སི་ལེ་ཉིན་རིང་ལུགས་དང་། མའོ་ཙེ་ཏུང་གི་དགོངས་པ། ཏེང་ཞའོ་ཕེན་གྱི་རིགས་པའི་གཞུང་ལུགས། “མཚོན་བྱེད་གསུམ”གྱི་དགོངས་པ་གལ་ཆེན། ཚན་རིག་དང་མཐུན་པའི་འཕེལ་རྒྱས་ལྟ་བ་བཅས་དང་ཟུང་འབྲེལ་དམ་ཚགས་བྱས་ཏེ། རྒྱུན་ཆད་མེད་པར་མར་ཁེ་སི་རིང་ལུགས་ཀྱི་བསམ་བློའི་གོ་རྟོགས་དང་རིགས་པའི་གཞུང་ལུགས་ཀྱི་ཆུ་ཚད་མཐོ་རུ་འདེགས་དགོས།

དོན་ཚན་བདུན་པ། གཅིག་བསྡུས་སློབ་གསོ་དང་རྒྱུན་ལྡན་རང་བཞིན་གྱི་སློབ་གསོ་ཕན་ཚུན་ཟུང་དུ་སྦྲེལ་བ་དང་། རྩ་འཛུགས་ཀྱིས་གསོ་སྦྱོང་དང་མི་སྒེར་གྱི་རང་སྦྱོང་ཕན་ཚུན་ཟུང་དུ་སྦྲེལ་བ་རྒྱུན་འཁྱོངས་བྱས་ནས། གཅིག་བསྡུས་ཀྱི་རེས་སྐོར་སྦྱོང་བརྡར་དང་། ཏང་ཨུ(ཏང་ཙུའུ)ཡི་རིགས་པའི་གཞུང་ལུགས་སློབ་སྦྱོང་ལྟེ་གནས་ཀྱི་སློབ་སྦྱོང་། རིགས་པའི་གཞུང་ལུགས་དྲིལ་སྒྲོག་དང་།རྩ་འཛུགས་འཚོ་བ། དྲ་ཐོག་སློབ་སྦྱོང་དང་གསོ་སྦྱོང་སོགས་ཀྱི་བྱེད་སྟངས་སྤྱད་ནས། ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་སློབ་སྦྱོང་བྱེད་པའི་སློབ་གསོའི་ཡུན་ཕན་ནང་རྐྱེན་ཆགས་པར་བྱེད་དགོས་ཤིང་། ཏང་ཡོན་གྱིས་བསླབས་པ་གཏིང་ཟབ་ཅིང་གོ་བ་མཐིལ་ཕྱིན་ལོན་པ་དང་། ཀླད་པའི་ནང་དང་སེམས་ཀྱི་གཏིང་ལ་གཤགས་ཐུབ་པར་སྐུལ་འདེད་བྱེད་དགོས།

དོན་ཚན་བརྒྱད་པ། རིགས་པའི་གཞུང་ལུགས་དང་དོན་དངོས་ཟུང་འབྲེལ་བྱེད་པའི་མར་ཁེ་སི་རིང་ལུགས་ཀྱི་སློབ་སྲོལ་དར་སྤེལ་བཏང་ནས། ཏང་ཡོན་གྱིས་རང་ཉིད་ནང་དུ་འཇོག་པ་དང་འགན་འཁྲི་ནང་དུ་འཇོག་པ།བྱ་བ་ནང་དུ་འཇོག་པར་ཁྲིད་སྟོན་བྱེད་དགོས་པ་དང་།སྦྱངས་པ་དེ་སྤྱོད་གོ་ཆོད་པ་དང་ཐོས་དོན་རྒྱུད་ལ་སྦྱར་ནས་ཤེས་པ་དང་ཉམས་ལེན་ཟུང་འབྲེལ་བྱེད་དགོས་ཤིང་། ཆབ་སྲིད་ཀྱི་ལྟ་བ་ལངས་གནས་ཇེ་མཐོར་གཏོང་བ་དང་། འགན་འཁྲི་ཁུར་ལེན་ཤུགས་ཆེར་གཏོང་བ།འཇོན་ནུས་བཀན་མོ་ཇེ་དྲག་ཏུ་གཏོང་དགོས་ལ། རང་བབ་ལས་འགན་ལེགས་པར་སྒྲུབ་ཅི་ཐུབ་ཀྱིས། རང་རྟོགས་སྒོས་ཞི་ཅིན་ཕེན་གྱི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པར་བློ་བརྟན་འགྱུར་མེད་ཀྱིས་དད་མོས་བྱེད་མཁན་ཞིག་དང་བློ་དཀར་གཞུང་དྲང་གིས་ལག་ལེན་བྱེད་མཁན་ཞིག་བྱེད་དགོས།

ཏང་ཡོན་མགོ་ཁྲིད་ལས་བྱེད་པས་དེ་ལས་མཐོ་བའི་ཚད་གཞི་དང་དེ་ལས་གཟབ་ནན་གྱི་བླང་བྱ་དང་རེ་འདུན་རྒྱུན་འཁྱོངས་བྱས་ནས། ཕྱོགས་ཡོངས་ནས་སྦྱོང་བ་དང་མ་ལག་ཚང་བར་སྦྱོང་བ། བྱང་ཆུབ་པར་སྦྱོང་བ། གཏིང་ཟབ་མོར་སྦྱོང་བ།རྗེས་ཆོད་ཐུབ་པར་སྦྱོང་བ་བྱེད་དགོས་ཤིང་། རང་རྟོགས་སྒོས་ཀླད་པར་དྲག་ཆས་སྤྲ་བ་དང་ལག་ལེན་ལ་མཛུབ་སྟོན་དང་བྱ་བར་སྐུལ་འདེད། དཔེ་སྟོན་སྐུལ་ཁྲིད་ཀྱི་ནུས་པ་འདོན་སྤེལ་བཅས་བྱེད་དགོས།

ལེའུ་གསུམ་པ། ཏང་ཡོན་སློབ་གསོའི་གཞི་རྩའི་ལས་འགན།

དོན་ཚན་དགུ་པ། ཆབ་སྲིད་གཞུང་ལུགས་ཀྱི་སློབ་གསོར་ཤུགས་སྣོན་བྱས་ཏེ། ཏང་གི་གསར་སྐྲུན་གཞུང་ལུགས་སློབ་སྦྱོང་འབུར་ཐོན་བྱེད་པ་དང་། ཏང་ཡོན་རྩ་འཛུགས་བྱས་ནས་ཏང་གི་གཞི་རྩའི་རིགས་པའི་གཞུང་ལུགས་དང་གཞི་རྩའི་ལམ་ཕྱོགས། གཞི་རྩའི་ཐབས་ཇུས་རྣམས་སློབ་སྦྱོང་བྱེད་དགོས་ལ། མར་ཁེ་སི་རིང་ལུགས་ཀྱི་གཞི་རྩའི་རྩ་བའི་རིགས་པ་དང་ཏང་གི་གཞི་རྩའི་ཤེས་བྱ་སློབ་སྦྱོང་བྱེད་པ། ཏང་ཡོན་ལ་ཁྲིད་སྟོན་བྱས་ནས་ཕུགས་འདུན་ཡིད་ཆེས་ཇེ་བརྟན་དུ་གཏོང་དགོས་པ་དང་།ཏང་གཤིས་བློ་སྦྱོང་ཇེ་དྲག་ཏུ་གཏོང་བ། མར་ཁེ་སི་རིང་ལུགས་ཀྱི་ལངས་ཕྱོགས་ལྟ་བའི་བྱེད་ཐབས་ཧུར་བརྩོན་གྱིས་ཁོང་དུ་ཆུད་དགོས་པར་མ་ཟད་རང་རྟོགས་ཀྱིས་བཀོལ་སྤྱོད་བྱེད་དགོས།

དོན་ཚན་བཅུ་པ། ཆབ་སྲིད་སློབ་གསོ་དང་སློབ་གསོ་སྦྱོང་བརྡར་འབུར་དུ་ཐོན་པར་བྱས་ནས། ཏང་ནང་ཁུལ་གྱི་ཆབ་སྲིད་འཚོ་བའི་སྦྱོང་བརྡར་གཟབ་ནན་བྱེད་དགོས་པ་དང་། ཏང་ཡོན་ལ་སློབ་གསོ་བཏང་ནས་དར་ཆ་གསལ་སྒྲེང་སྒོས་ཆབ་སྲིད་ལ་དོ་སྣང་བྱེད་དགོས་ལ། ཆབ་སྲིད་ཀྱི་གོ་རྟོགས་དང་ཆབ་སྲིད་ཀྱི་ནུས་པ་ཇེ་མཐོར་གཏོང་དགོས་ཤིང་། ཆབ་སྲིད་ཀྱི་སྒྲིག་ཁྲིམས་དང་ཆབ་སྲིད་ཀྱི་ལམ་སྲོལ་ནན་སྲུང་བྱས་ཏེ།གུང་ཁྲན་ཏང་མིའི་ཆབ་སྲིད་ཀྱི་རང་མདངས་མི་ཉམས་པར་གཏན་སྲུང་བྱེད་དགོས་པ་དང་། “བསྟུན་པ་བཞི”སྒྲུབ་ཐུབ་པ་བྱས་ནས། བསམ་བློ་དང་ཆབ་སྲིད་དང་བྱ་སྤྱོད་བཅས་ཀྱི་སྟེང་ནས་བློ་མཐུན་ཞི་ཅིན་ཕེན་སྲོག་ཤིང་ཡིན་པའི་ཏང་ཀྲུང་དབྱང་དང་གཅིག་གྱུར་ཚད་མཐོན་པོ་ཡོང་བ་རྒྱུན་སྲུང་བྱེད་དགོས།

དོན་ཚན་བཅུ་གཅིག་པ། ཏང་གི་སྒྲིག་ཡིག་དང་ཏང་གི་ལམ་སྲོལ།ཏང་གི་སྒྲིག་ཁྲིམས་བཅས་ཀྱི་སློབ་གསོ་ཤུགས་ཆེར་བཏང་སྟེ། ཏང་ཡོན་ལ་ཁྲིད་སྟོན་གྱིས་ཏང་ཞུགས་མནའ་ཚིག་ཡིད་ལ་དམ་པོར་འཛིན་དགོས་པ་དང་། ཚད་དང་མཐུན་པའི་ཏང་ཡོན་གྱི་ཚད་གཞི་རྒྱུན་འཁྱོངས་བྱས་ཏེ། ཏང་གི་སྒྲིག་ཁྲིམས་རང་རྟོགས་ཀྱིས་བརྩི་སྲུང་བྱེད་དགོས་ཤིང་། སྤྱི་ཚོགས་རིང་ལུགས་ཀྱི་སྲོག་ཤིང་རིན་ཐང་ལྟ་བ་སྣེ་ཁྲིད་ནས་ལག་ལེན་བྱེད་དགོས་ལ། བླ་ན་མེད་པའི་ཀུན་སྤྱོད་བསམ་ཚུལ་སྐྱེད་སྲིང་བྱས་ནས། བསམ་བློའི་སྤྱོད་ཚུལ་དང་སློབ་སྲོལ། བྱ་བའི་སྤྱོད་ཚུལ། འཚོ་བའི་སྤྱོད་ཚུལ་དང་ཁྱིམ་སྲོལ་བཟང་པོ་ཞིག་གསོ་སྐྱོང་བྱེད་དགོས། རྩ་ཁྲིམས་དང་བཅའ་ཁྲིམས་དང་ཁྲིམས་སྲོལ་གྱི་སློབ་གསོར་ཤུགས་སྣོན་བྱས་ཏེ། ཏང་ཡོན་ལ་ཁྲིད་སྟོན་གྱིས་ཁྲིམས་བརྩི་ཁྲིམས་སློབ་ཁྲིམས་སྲུང་ཁྲིམས་བཀོལ་ཚུལ་བཞིན་བྱེད་དགོས།

དོན་ཚན་བཅུ་གཉིས་པ། ཏང་གི་དགོངས་དོན་སློབ་གསོར་ཤུགས་སྣོན་བྱས་ཏེ། ཏང་ཡོན་ལ་ཁྲིད་སྟོན་གྱིས་བློ་གཅིག་སེམས་གཅིག་གིས་མི་དམངས་ལ་ཞབས་འདེགས་ཞུ་བའི་རྩ་བའི་དགོངས་དོན་ལག་ལེན་བྱེད་དགོས་པ་དང་། ཏང་གི་མང་ཚོགས་ལམ་ཕྱོགས་ལག་ལེན་མཐར་ཕྱིན་བྱས་ཏེ།མང་ཚོགས་ཀྱི་བྱ་བའི་འཇོན་ནུས་ཇེ་མཐོར་གཏོང་བ་དང་། འབྲེལ་བ་དམ་ཟབ་སྒོས་མང་ཚོགས་ལ་ཞབས་འདེགས་ཞུ་དགོས།

དོན་ཚན་བཅུ་གསུམ་པ། གསར་བརྗེའི་སྲོལ་རྒྱུན་གྱི་སློབ་གསོ་སྤེལ་ཏེ། ཏང་ཡོན་ལ་ཁྲིད་སྟོན་གྱིས་ཏང་གི་ལོ་རྒྱུས་དང་རྒྱལ་ཁབ་ཀྱི་ལོ་རྒྱུས།བཅོས་བསྒྱུར་སྒོ་འབྱེད་ཀྱི་ལོ་རྒྱུས། སྤྱི་ཚོགས་རིང་ལུགས་ཀྱི་འཕེལ་རྒྱས་ལོ་རྒྱུས། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་བཅས་ལ་སློབ་སྦྱོང་བྱེད་དགོས་པ་དང་། ཏང་གི་འབད་བརྩོན་ལོ་རྒྱུས་ཀྱི་ལམ་ཚད་ཡིད་ལ་དམ་པོར་བཟུང་ནས། ཏང་གི་སྲོལ་རྒྱུན་བཟང་པོ་དར་སྤེལ་གཏོང་བ་དང་གསར་བརྗེའི་གཞི་རྒྱུ་དམར་པོ་རྒྱུན་འཛིན་བྱེད་པ། གུང་ཁྲན་ཏང་མིའི་རིན་ཐང་ལྟ་བ་ལག་ལེན་བྱེད་པ། རྒྱལ་གཅེས་རིང་ལུགས་ཀྱི་སྤྲོ་སེམས་སྐུལ་སྤེལ་བྱེད་དགོས།

དོན་ཚན་བཅུ་བཞི་པ། གནས་བབ་སྲིད་ཇུས་ཀྱི་སློབ་གསོ་སྤེལ་ཏེ། ཏང་དང་རྒྱལ་ཁབ་ཀྱི་ཇུས་ཆོད་གལ་ཆེན་ལག་བསྟར་དོན་འཁྱོལ་བྱེད་པ་དང་ལས་འགན་ཆེན་པོ་དངོས་འབེབས་བྱེད་པར་སྐུལ་འདེད་གཏོང་བར་དམིགས་ནས། ཏང་གི་ལམ་ཕྱོགས་བྱེད་ཕྱོགས་སྲིད་ཇུས་སྒྲོག་འགྲེལ་བྱེད་དགོས་པ་དང་། འཛམ་གླིང་གི་གནས་ཚུལ་དང་རྒྱལ་ཁབ་ཀྱི་གནས་ཚུལ།ཏང་གི་གནས་ཚུལ་བཅས་འགྲེལ་བཤད་བརྒྱབ་ནས། ཏང་ཡོན་གྱིས་དོ་སྣང་བྱེད་པའི་གནད་དོན་ལ་ཨ་ལན་སློག་པ་དང་། ཏང་ཡོན་ལ་ཁྲིད་སྟོན་གྱིས་གནས་བབ་ཡང་དག་པར་ངོས་ཟིན་དུ་འཇུག་པ་དང་། བསམ་བློ་དང་བྱ་སྤྱོད་གཉིས་ཀ་ཏང་ཀྲུང་དབྱང་གི་རེ་འདུན་སྟེང་གཅིག་གྱུར་ཡོང་བར་བྱེད་དགོས།

དོན་ཚན་བཅོ་ལྔ་པ། ཤེས་བྱ་རྩལ་ནུས་ཀྱི་སློབ་གསོ་གཙིགས་སུ་བཟུང་ནས། ཏང་ཡོན་གྱི་ལས་གནས་འགན་འཁྲིའི་བླང་བྱ་དང་བྱ་བའི་དགོས་མཁོ་དག་གཞིར་བཟུང་ནས། ཏང་ཡོན་ལ་རྩ་འཛུགས་ཁྲིད་སྟོན་གྱིས་ལས་སྒོའི་ཤེས་བྱ་དང་ཚན་རྩལ་ཤེས་བྱ། དངོས་སྤྱོད་ལག་རྩལ་སོགས་སློབ་སྦྱོང་དང་ཁོང་དུ་ཆུད་པར་བྱེད་དགོས་ལ། ཏང་ཡོན་ལ་རོགས་རམ་བྱས་ནས་ཕྱོགས་བསྡུས་བྱང་ཚད་དང་ལས་འགན་སྒྲུབ་པའི་ནུས་པ་ཇེ་མཐོར་གཏོང་དགོས་ཤིང་། ཞབས་ཞུ་སྒྲུབ་པའི་འཇོན་ཐང་ནུས་པ་ཤུགས་ཆེར་གཏོང་དགོས། །

ལེའུ་བཞི་པ། ཏང་ཡོན་གྱི་ཉིན་རྒྱུན་སློབ་གསོ་དོ་དམ་གྱི་བྱེད་སྟངས་གཙོ་བོ།

དོན་ཚན་བཅུ་དྲུག་པ། ཏང་ཀྲི་པུའུ་ཡིས“ཚོགས་འདུ་གསུམ་དང་སློབ་ཐུན་གཅིག”གི་ལམ་ལུགས་ངེས་པར་བཀོལ་སྤྱོད་བྱེད་དགོས་པ་དང་། ཏང་ཡོན་ལ་རྒྱུན་ལྡན་རང་བཞིན་གྱི་སློབ་གསོ་དོ་དམ་བྱེད་དགོས། ཏང་ཡོན་དུས་ལྟར་ཏང་ཡོན་ཚོགས་ཆེན་དང་ཏང་ཚན་ཆུང་ཚོགས་འདུ། ཏང་གི་སློབ་ཁྲིད་བཅས་ལ་ཞུགས་ནས་སློབ་སྦྱོང་བརྗེ་རེས་བྱེད་དགོས་ལ། བསམ་བློ་དང་བྱ་བ་སོགས་ཀྱི་གནས་ཚུལ་ཇི་ལྟ་བ་བཞིན་ཡར་ཞུ་བྱེད་དགོས། ཏང་ཡོན་མགོ་ཁྲིད་ལས་བྱེད་པ་ངེས་པར་རྩ་འཛུགས་འཚོ་བ་ཉིས་བརྩེགས་ལ་ཞུགས་དགོས།

ཏང་ཀྲི་པུའུ་ཡིས་ཟླ་བ་རེ་རེར་བརྗོད་གཞི་གཙོ་བོའི་ཏང་གི་ཉིན་མོ་ཐེངས་གཅིག་རེ་སྤེལ་ནས། ཏང་ཡོན་གྱི་བསམ་བློ་དང་བྱ་བའི་དོན་དངོས་ལ་ཉེ་བར་བཅར་དགོས་པ་དང་། ཏང་ཡོན་རྩ་འཛུགས་བྱས་ཏེ། གཅིག་བསྡུས་སློབ་སྦྱོང་དང་རྩ་འཛུགས་འཚོ་བ་རོལ་བ། གཞུང་དོན་ལ་དམངས་གཙོ་གྲོས་བསྡུར་བྱེད་པ། རང་འདོད་ཀྱིས་དང་བླངས་ཞབས་ཞུ་སྤེལ་བ་སོགས་བྱེད་དགོས།

ཏང་ཡོན་གྱིས་ཏང་རྩ་འཛུགས་ལ་དུས་ལྟར་ཏང་དངུལ་སྤྲོད་དགོས། ཏང་རྩ་འཛུགས་ཀྱིས་ཏང་དངུལ་རྩིས་ལེན་དང་བཀོལ་སྤྱོད། དོ་དམ་བཅས་ཀྱི་བྱ་བ་ལེགས་སྒྲུབ་བྱེད་དགོས།

དོན་ཚན་བཅུ་བདུན་པ། ཏང་ཀྲི་པུའུ་ཡིས་ལོ་རེར་ཉུང་མཐའ་ཡང་རྩ་འཛུགས་འཚོ་བའི་ཚོགས་འདུ་ཐེངས་གཅིག་རེ་འཚོགས་དགོས་ལ། བྱ་བའི་དགོས་མཁོ་གཞིར་བཟུང་ནས་དུས་གང་རུང་དུ་འཚོགས་ཀྱང་ཆོག སྤྱིར་བཏང་དུ་ཏང་ཡོན་ཚོགས་ཆེན་དང་ཏང་ཀྲི་པུའུ་ཨུ་ཡོན་ལྷན་ཁང་གི་གྲོས་ཚོགས་སམ་ཡང་ན་ཏང་ཚན་ཆུང་གི་ཚོགས་འདུའི་རྣམ་པས་འཚོགས་དགོས།

དོན་ཚན་བཅོ་བརྒྱད་པ། ཏང་ཀྲི་པུའུ་ཡིས་སྤྱིར་བཏང་དུ་ཏང་ཡོན་ལ་དམངས་གཙོ་དཔྱད་བསྡུར་ལོ་རེར་ཐེངས1རེ་སྤེལ་དགོས། ཏང་ཀྲི་པུའུ་ཡིས་ཏང་ཡོན་ཚོགས་ཆེན་བསྡུས་ནས། རང་གིས་རང་ལ་གདེང་འཇོག་དཔྱད་བསྡུར་དང་ཏང་ཡོན་ཕན་ཚུན་ལ་དཔྱད་བསྡུར། དམངས་གཙོ་ཚད་ལེན་དཔྱད་བསྡུར་བཅས་ཀྱི་བརྒྱུད་རིམ་ལྟར། ཏང་ཡོན་རྩ་འཛུགས་བྱས་ཏེ་དཔྱད་མོལ་གྲོས་བསྡུར་བྱེད་དགོས། ཏང་ཀྲི་པུའུ་ཨུ་ཡོན་ལྷན་ཁང་གི་གྲོས་ཚོགས་སམ་ཡང་ན་ཏང་ཡོན་ཚོགས་ཆེན་གྱིས་དཔྱད་བསྡུར་གདེང་འཇོག་བྱས་པའི་གནས་ཚུལ་དང་ཏང་ཡོན་གྱི་དུས་རྒྱུན་གྱི་རྣམ་འགྱུར་མཚོན་ཚུལ་དག་གཞིར་བཟུང་ནས། དཔྱད་བསྡུར་གཏན་འཁེལ་བྱེད་པའི་བསམ་འཆར་འདོན་དགོས།  

ཏང་ཡོན་ལ་དམངས་གཙོ་དཔྱད་བསྡུར་བྱེད་དུས། རྩ་འཛུགས་འཚོ་བའི་ཚོགས་འདུ་དང་ཟུང་འབྲེལ་བྱས་ནས་མཉམ་གཅིག་ཏུ་འཚོགས་ཆོག

དོན་ཚན་བཅུ་དགུ་པ། གཞི་རིམ་ཏང་རྩ་འཛུགས་ཀྱིས་ངེས་པར་ཏང་ཡོན་གྱི་བསམ་བློའི་གནས་ཚུལ་དང་སེམས་ཁམས་རྣམ་པར་དབྱེ་ཞིབ་བྱེད་པ་གཙིགས་སུ་བཟུང་ནས། ཏང་རྩ་འཛུགས་ཀྱི་འགན་འཁུར་མཁན་གྱིས་རྒྱུན་དུ་ཏང་ཡོན་ལ་སེམས་གཏམ་གླེང་མོལ་བྱེད་དགོས་པ་དང་། དམིགས་གཏད་རང་བཞིན་ཡོད་པའི་སྒོ་ནས་བསམ་བློའི་ཆབ་སྲིད་བྱ་བ་ལེགས་སྒྲུབ་བྱེད་དགོས།

དོན་ཚན་ཉི་ཤུ་པ། གྲོང་ཁྱེར་དང་རྫོང་ཏང་ཨུ། ཡང་ན་གཞི་རིམ་ཏང་ཨུ་ཡིས་ངེས་པར་ལོ་རེ་རེ་ལ་ཏང་ཡོན་རྩ་འཛུགས་བྱས་ཏེ་གཅིག་བསྡུས་ཀྱིས་རེས་སྐོར་སྦྱོང་བརྡར་བྱེད་དགོས་ཤིང་། གཙོ་བོ་རྫོང་རིམ་པའི་ཏང་གི་སློབ་གྲྭ(སྲིད་འཛིན་སློབ་གྲྭ)དང་གཞི་རིམ་ཏང་གི་སློབ་གྲྭ་སོགས་ཀྱི་མིང་ཐོག་ནས་བསྒྲུབ་དགོས། ལས་དོན་འཕེལ་རྒྱས་དང་ཏང་གི་འཛུགས་སྐྲུན་གྱི་གནད་སའི་ལས་འགན་གཞིར་བཟུང་ཐོག རང་ས་ཁུལ་དང་རང་སྡེ་ཁག རང་ལས་ཁུངས་ཀྱི་དཀྱིལ་སྙིང་བྱ་བ་དང་ཏང་ཡོན་གྱི་དོན་དངོས་གནས་ཚུལ་དང་ཟུང་འབྲེལ་བྱས་ནས། གསོ་སྦྱོང་གི་ནང་དོན་དང་བྱེད་སྟངས་གཏན་འཁེལ་བྱེད་དགོས། ཏང་ཡོན་གྱིས་ལོ་རེར་གཅིག་བསྡུས་སློབ་སྦྱོང་བྱེད་པའི་གསོ་སྦྱོང་དུས་ཚོད་ནི་སྤྱིར་བཏང་དུ་སློབ་ཁྲིད་དུས་ཡུན32ལས་མི་ཉུང་བ་བྱེད་དགོས།

དོན་ཚན་ཉེར་གཅིག་པ། ཏང་རྩ་འཛུགས་ཀྱིས་ངེས་པར་ཏང་ཀྲུང་དབྱང་གི་བཀོད་སྒྲིག་དང་བླང་བྱ་ལྟར། ཏང་ཡོན་རྩ་འཛུགས་བྱས་ཏེ། ཏང་ནང་ཁུལ་གྱི་གཅིག་བསྡུས་སློབ་སྦྱོང་སློབ་གསོ་ལ་ནན་ཏན་གྱིས་ཞུགས་དགོས་པ་དང་། ཏང་ཡོན་ལ་ཁྲིད་སྟོན་གྱིས་སློབ་སྦྱོང་སློབ་གསོའི་བརྗོད་གཞི་གཙོ་བོར་དམིགས་ཏེ། ཏང་གི་གསར་སྐྲུན་གཞུང་ལུགས་ལ་གཏིང་ཟབ་ཀྱིས་སློབ་སྦྱོང་བྱེད་དགོས་ཤིང་། རང་སྟེང་ན་གནས་པའི་འབུར་ཐོན་གནད་དོན་མ་ལུས་འཚོལ་ཞིང་ཐག་གཅོད་བྱེད་དགོས།

ཞིང་ཆེན་རིམ་པའི་ཏང་ཨུ་དང་ལས་རིགས་ཁོངས་གཏོགས་ཀྱི་ཏང་རྩ་འཛུགས་ཀྱིས་ཏང་ཡོན་གྱི་བསམ་བློའི་གནས་ཚུལ་དང་ཏང་གི་འཛུགས་སྐྲུན་གྱི་དགོས་མཁོ་གཞིར་བཟུང་ནས། དུས་དང་མཐུན་པར་ཆེད་དམིགས་སློབ་སྦྱོང་སློབ་གསོ་སྤེལ་དགོས།

དོན་ཚན་ཉེར་གཉིས་པ། ཏང་རྩ་འཛུགས་ཀྱིས་ངེས་པར་ཏང་ཡོན་གྱི་གདོང་ལེན་མིག་དཔེའི་ནུས་པ་འདོན་སྤེལ་གང་ལེགས་བྱས་ཏེ། ཚོགས་པ་མི་འདྲ་བའི་ཏང་ཡོན་གྱི་དོན་དངོས་གནས་ཚུལ་དང་ཟུང་དུ་སྦྲེལ་ནས། ཉེ་འགྲམ་གྱི་མིག་དཔེ་བཟང་པོ་གསར་འཛུགས་དང་དེར་ཁ་མིག་ཡར་བལྟས་ཀྱིས་སློབ་སྦྱོང་བྱས་ཏེ། ཏང་ཡོན་དཔེ་སྟོན་ལས་གནས་དང་ཏང་ཡོན་འགན་འཁྲི་ས་ཁུལ་འཛུགས་དགོས་པ་དང་། ལས་རྐང་བཙུགས་ནས་འགན་འཁྲི་གཏན་འཁེལ་བྱེད་པ། ཁས་ལེན་དམ་བཅའ་ལག་ཏུ་བསྟར་བ་སོགས་ལེགས་པར་སྤེལ་ཏེ། ཏང་ཡོན་ལ་ཁྲིད་སྟོན་གྱིས་རང་འགན་བྱ་བ་ལེགས་སྒྲུབ་བྱེད་དགོས་ཤིང་། དེས་མི་ཚད་ཡུལ་དངོས་སུ་སྒྲུབ་པ། མདུན་གྲལ་དུ་སྐྱོད་པ། སྔོན་ཐོན་གསར་སྐྲུན་དང་ཕུལ་བྱུང་བརྩོན་ལེན་བྱེད་པ། མང་ཚོགས་ལ་འབྲེལ་གཏུག་ཞབས་ཞུ་དང་ལས་འགན་གལ་ཆེན་འགྲུབ་པར་བྱེད་པའི་ཁྲོད་དུ་རང་མོས་ཀྱིས་ཁུར་དུ་ལེན་ཕོད་པ་ཞིག་བྱེད་དགོས་ལ། རྒྱུན་ལྡན་གྱི་དུས་སུ་མཐོང་ཐུབ་པ་དང་། ཉེན་ཚབས་ཆེ་བའི་གནད་འགག་གི་སྐབས་སུ་གློ་བུར་ཐོན་ཡོང་བ་ཞིག་བྱེད་དགོས།

ཏང་ཡོན་རྣམས་དང་བླངས་ཞབས་ཞུ་ལ་ཞུགས་པར་སྐུལ་ལྕག་དང་ཁྲིད་སྟོན་བྱེད་དགོས། ཏང་ཡོན་རྣམས་ཧུར་ཐག་གིས་ཏང་རྩ་འཛུགས་ཀྱིས་སྤེལ་བའི་དང་བླངས་ཞབས་ཞུ་བྱ་འགུལ་ལ་ཞུགས་དགོས་ཤིང་། དང་བླངས་ཞབས་ཞུ་བྱ་འགུལ་རང་ཉིད་ཀྱིས་སྤེལ་ཀྱང་ཆོག

དོན་ཚན་ཉེར་གསུམ་པ། ཏང་རྩ་འཛུགས་ཀྱིས་གཟབ་ནན་སྒོས་སློབ་གསོ་དོ་དམ་བྱེད་པ་དང་སྤྲོ་སེམས་འཁོལ་བའི་ངང་ཐུགས་ཁུར་གཅེས་སྐྱོང་བྱེད་པ་ཕན་ཚུན་གཅིག་གྱུར་ཡོང་བ་བྱེད་དགོས་ཤིང་། ཆབ་སྲིད་དང་བསམ་བློ་དང་བྱ་བ་དང་འཚོ་བ་བཅས་ཀྱི་སྟེང་ནས་ཏང་ཡོན་ལ་ཐུགས་ཁུར་དང་རོགས་སྐྱོར་གནང་བར་སྐུལ་མ་གཏོང་དགོས།

ཏང་ཡོན་རྒན་པའི་ལུས་ཕུང་དང་འདུག་སྡོད་དང་ཁྱིམ་ཚང་ལ་སོགས་པའི་དོན་དངོས་གནས་ཚུལ་ལ་གཞིགས་ནས། གང་ལ་གང་འཚམ་གྱི་བྱེད་སྟངས་སྤྱོད་དགོས་པ་དང་། སློབ་གསོ་དོ་དམ་ཞབས་ཞུ་བསྒྲུབ་དགོས་ལ། ཁོ་ཚོ་རྩ་འཛུགས་བྱས་ནས་ཏང་གི་རྩ་འཛུགས་འཚོ་བའི་ནང་དུ་ཞུགས་དགོས་ཤིང་། རང་ནུས་ཀྱི་ནུས་པ་གང་ཡོད་ལེགས་པར་འདོན་སྤེལ་བྱེད་དགོས། ལོ་ན་རྒས་ཤིང་ལུས་ཕུང་ཞན་པ། འགྲོ་འདུག་སྟབས་བདེ་མིན་པ། ལུས་ལ་ནད་གཞི་ལྗིད་མོ་ཕོག་ཅིང་ཐ་ན་འགུལ་སྐྱོད་ནུས་པ་ཡང་ཤོར་བའི་ཏང་ཡོན་དག་ལ། རྩ་འཛུགས་བྱ་འགུལ་དང་སློབ་སྦྱོང་སློབ་གསོ་སྤེལ་རྒྱུ་ཨུ་ཚུགས་ནན་མོ་མི་བྱེད་པར། ཏང་རྩ་འཛུགས་ཀྱིས་སློབ་སྦྱོང་སློབ་གསོ་སྒོ་ཁར་སྐྱེལ་བ་དང་ཉེ་སར་བཅར་ནས་སེམས་གསོ་འཚམས་འདྲི་བྱེད་པ་སོགས་ཀྱི་བྱེད་སྟངས་བརྒྱུད་ནས། ཁོ་ཚོར་དེ་ལས་མང་བའི་ཐུགས་ཁུར་དང་གཟིགས་སྐྱོང་གནང་དགོས། །

(མུ་འགོད)

རྩོམ་སྒྲིག་པ། : ཀླུ་མོ་མཚོ།