ཀྲུང་གོ་བོད་ཀྱི་དྲ་བ།

ཟས་རིགས་དང་འབྲེལ་བ་ཡོད་པའི་འབྲས་སྐྲན་རིགས།

ཡོང་ཁུངས། : ཀན་ལྷོའི་གསར་འགྱུར།     སྤེལ་དུས། : 2017-04-10
ཡིག་གཟུགས། :ཆུང་། འབྲིང་། ཆེ།

ཉེ་བའི་ལོ་འགའི་རིང་ལ། རང་རྒྱལ་གྱི་འབྲས་སྐྲན་འབྱུང་ཚད་དང་འབྲས་སྐྲན་ནད་ལས་ཤི་ཚད་མུ་མཐུད་དུ་ཇེ་མཐོར་འགྲོ་བཞིན་ཡོད། ལྷག་པར་གྲོང་ཁྱེར་གྱི་སྡོད་དམངས་ལ་མཚོན་ན། འབྲས་སྐྲན་ནི་མི་རྣམས་ཀྱི་བདེ་ཐང་ལ་གནོད་པ་ཆེས་ཆེན་པོ་ལྡན་པའི་ནད་རིགས་ཤིག་ཡིན། འབྲས་སྐྲན་འགོག་བཅོས་ཆེད་མཁས་པས། ཟས་རིགས་ཁ་ཤས་ནི་འབྲས་སྐྲན་གྱི་འབྱུང་རྐྱེན་གཙོ་བོ་ཡིན་པར་འདོད་ཀྱིན་ཡོད།
    1.གཤེར་མའི་འབྲས་སྐྲན་ནི“མཐོ་གསུམ”ཟས་རིགས་མང་དུ་ཟོས་པ་དང་འབྲེལ་བ་ཡོད།
    ཀྲུང་ཧྲན་སློབ་གྲྭ་ཆེན་མོའི་འབྲས་སྐྲན་འགོག་བཅོས་ལྟེ་གནས་ཀྱི་ཀྲུའུ་རེན་གཞོན་པ་ལི་ཧྲེང་ཕིང་གིས་བཤད་པ་ལྟར་ན། གཤེར་མའི་འབྲས་སྐྲན་ནི་ཚིལ་མཐོ་བ་དང་སྤྲི་དཀར་མཐོ་བ། མངར་མཐོ་བ་བཅས་ཀྱི“མཐོ་གསུམ”ཟས་རིགས་མང་པོ་ཟོས་པ་དང་འབྲེལ་བ་ཡོད་པར་འདོད།
    གཤེར་མའི་འབྲས་སྐྲན་སྔོན་འགོག་བྱ་དགོས་ན་གཙོ་བོ་ཚིལ་མཐོ་བ་དང་སྤྲི་དཀར་མཐོ་བ། མངར་མཐོ་བ་བཅས་ཀྱི་ཟས་རིགས་ཉུང་ཟ་བྱས་ཏེ། སྔོ་ཚོད་གསར་བ་དང་སིལ་ཏོག་མང་པོ་ཟ་དགོས་པ་དང་། དུས་རྒྱུན་དུ་རྒྱས་བཟའ་རྒྱས་འཐུང་བྱེད་པ་ལས་བྱུང་བའི་གཤེར་མའི་ཁུར་པོ་ཇེ་ཡང་དུ་གཏོང་དགོས། ཟས་ཚོད་མ་ཟིན་ན་གཤེར་མའི་གཉན་ཚད་ཚབས་ཆེན་འབྱུང་བའི་ཉེན་ཁ་ཆེན་པོ་ལྡན་པ་དང་། གཤེར་མའི་གཉན་ཚད་ཚབས་ཆེན་དེ་སྨན་བཅོས་ལེགས་པོ་མ་བྱས་པར་ཡང་དང་ཡང་དུ་བྱུང་ན། དལ་གཤིས་གཤེར་མའི་གཉན་ཚད་ལ་འགྱུར་སླ་བ་དང་། དེ་མིན་ཞིབ་འཇུག་གཞན་པ་ལྟར་ན། གཅིན་སྙི་ཟ་ཁུའི་ནད་ཡང་འབྲས་སྐྲན་དུ་འགྱུར་ཚད་མི་གཞན་པ་ལས་ལྡབ2ཀྱིས་མཐོ་བ་རེད།
    2.ཕོ་བའི་འབྲས་སྐྲན་ནི་ཟས་ལྷག་དང་བསྙལ་ཚོད་མང་དུ་ཟོས་པ་དང་འབྲེལ་བ་ཡོད།
    ཀྲུང་ཧྲན་སློབ་གྲྭ་ཆེན་མོའི་འབྲས་སྐྲན་འགོག་བཅོས་ལྟེ་གནས་ཀྱི་ཕོ་བའི་སྐྲན་ནད་སྨན་བཅོས་ཆེད་མཁས་པ་ཀྲོའུ་ཀྲི་ཝེས་བཤད་པར་ལྟར་ན། བཟའ་བཏུང་གི་གོམས་སྲོལ་མི་བཟང་བ་ནི་ཕོ་བའི་འབྲས་སྐྲན་བྱུང་བའི་རྒྱུ་རྐྱེན་གཙོ་བོ་ཡིན། རྒྱུན་དུ་ཚོད་ལྷག་བཟའ་བ་ནི་ཕོ་བའི་འབྲས་སྐྲན་ནད་པ་ཆེས་འགྱོད་པ་སྐྱེ་བར་བྱེད་པའི་འཚོ་བའི་གོམས་སྲོལ་རེད། ཟས་ལྷག་ནང་དུ་ཡ་ཞའོ་སྐྱུར་ཚ་ཉུང་ཙམ་འབྱུང་སླ། དེའི་འདྲེས་ཚད་མཐོན་པོ་མིན་རུང་དུས་རྒྱུན་དུ་ཟས་ལྷག་ཟོས་ན་ལུས་པོར་གནོད་པ་ཆེན་པོ་ལྡན། དེ་བཞིན་བསྙལ་ཚོད་ཟ་བའང་ཕོ་བའི་འབྲས་སྐྲན་འབྱུང་བའི་རྒྱུ་རྐྱེན་གཙོ་བོ་ཞིག་ཡིན། དེའི་རྒྱུ་མཚན་ནི། བསྙལ་ཚོད་ནང་དུ་ཡ་ཞའོ་སྐྱུར་ཚ་འདྲེས་ཡོད་པས་དེ་ནི་འབྲས་སྐྲན་འབྱུང་བའི་རྒྱུ་རྐྱེན་གཙོ་བོ་ཡིན་ནོ།
    3.མཆིན་པའི་འབྲས་སྐྲན་ནི་ངོ་བོ་འགྱུར་བའི་ཟས་རིགས་ཟོས་པ་དང་འབྲེལ་བ་ཡོད།
    མཆིན་པའི་གཉན་ཚད་ལས་བྱུང་བའི་མཆིན་པའི་འབྲས་སྐྲན་ཕུད། མི་མང་པོ་ཞིག་གི་མཆིན་པའི་འབྲས་སྐྲན་ནི་ཟས་རིགས་དང་འབྲེལ་བ་དམ་པོ་ཡོད། གཙོ་བོ་ནི་ཧོང་ཆུས་མེ་དུག་རྫས་ཟེར་བ་དེ་དང་ཆང་འཐུང་བ་གཉིས་ཡིན། རྒྱུན་མཐོང་གི་ཟས་རིགས་ནང་དུ་སྲན་སེར་དང་མ་རྨོས་ལོ་ཏོག་སོགས་སིང་ཕྱེ་འདྲེས་པའི་ཟས་རིགས་དེ་ཧོང་ཆུས་མེ་དུག་རྫས་དང་འཕྲད་དེ་ངོ་བོ་འགྱུར་བ་ནི་འབྲས་སྐྲན་ནད་ཀྱི་འབྱུང་རྐྱེན་གཙོ་བོ་ཡིན། ངོ་བོ་འགྱུར་བའི་སྲན་མ་དང་བ་དམ་གྱིས་བཙིར་བའི་སྣུམ་ཟོས་རྗེས་འབྲས་སྐྲན་འབྱུང་བའི་ཉེན་ཁ་ཆེ།  ཡུན་རིང་དུ་ཆང་འཐུང་བ་དེ་ཡང་མཆིན་པའི་འབྲས་སྐྲན་འབྱུང་བའི་རྒྱུ་རྐྱེན་གཙོ་བོ་ཞིག་ཡིན། ཆང་ཚོད་མེད་དུ་བཏུངས་ན་མཆིན་པར་གནོད་པ་ཆེན་པོ་ལྡན་པ་དང་། ལྷག་པར་མཆིན་པའི་གཉན་ཚད་ནད་དེ་མཆིན་པ་མཁྲེགས་འགྱུར་དང་དེ་ནས་མཆིན་པའི་འབྲས་སྐྲན་དུ་འགྱུར་ཚད་ཇེ་མཐོར་གཏོང་བ་རེད།  

རྩོམ་སྒྲིག་པ། : མཁའ་འགྲོ་ཚེ་བརྟན།