རྒྱུ་རྐྱེན་གྱུར་ཚུལ། རིམས་ནད་ཁྱབ་གདལ་དུ་འགྲོ་བའི་སྐབས་སུ་ཟས་སྤྱོད་ལོག་པ་དང་། ལྷག་པར་དུ་ཀླད་རིམས་ན་མཁན་དང་འབྲེལ་ཐུག་བྱས་ནས་སློང་གི་ཡོད། ནད་འདི་གཉན་རིམས་ཀླད་པའི་རྒྱ་དར་རམ་སྐྱི་མོར་བབས་པའི་ནད་ཅིག་རེད། ནད་འདི་དགུན་དཔྱིད་ཀྱི་དུས་སུ་ན་མང་བ་ཡོད། ནད་ངོས། མགོ་བོ་ན་ཟུག་ཆེ་བ། ཚ་བ་རྒྱག་པ། མུར་འགྲམ་དང་ལྟག་ཁུང་ན་བ། མཚོགས་མ་ལྕི་བ། སྐྱུག་མེར་ལངས་ཤིང་སྐྱུགས་པ་ཡང་ཡང་ཤོར་བ། མིག་གི་རྒྱལ་མོ་ཆེ་ཆུང་མི་སྙོམས་པ། ཤེས་པ་ཟ་ཟི་ཆགས་པ། མཇིང་པ་རེངས་བ། རེ་འགའ་ཡན་ལག་རེངས་པའམ་བསྒུལ་བསྐྱོད་བྱ་བ་ཉམས་པ་སོགས་ཀྱི་མངོན་ཚུལ་ཡོད། རྩ་རྒྱུད་ཕྲ་མགྱོགས་གཡོ་བ་དང་ཕྲ་ལ་གྲིམས་ཤིང་མྱུར་དུ་འཕར་བ། ཆུ་དམར་དྲི་མ་དུགས་ལ་ཀུ་ཡ་མཐུག་པ་དང་ཆུ་མདོག་རྙོག་པ། ལྕེ་མཆུ་སོ་སོགས་ལ་དྲེག་པ་ཆགས་པ་དང་མདོག་དམར་ཞིང་ངོ་བོ་སྐམ་ལ་རྩུབ་པ།
བཅོས་ཐབས། གཙོ་བོ་ཐོག་མ་ཉིད་ནས་གཉན་ཚད་གཅོག་ཐབས་བྱ་དགོས་པའོ། ཟས་སུ་འབྲས་ཐུག་དང་ཡོས་ཐུག ཆུ་ཁོལ་སོགས་བསྟེན་རྒྱུ་དང་། དཀར་མངར་སོགས་སྤང་དགོས། ལུས་ཚ་ཆེས་གྲང་ཆེས་མ་ཡིན་པར་བསིལ་དྲོད་སྙོམས་པའི་གནས་སུ་ནད་པ་ལོག་སུ་བཞག་ནས་སྨན་བཅོས་བྱེད་དགོས།
སྨན་དུ། གཅིག ཕུར་ནག་དགུ་ཐང་།ཉིན་རེར་ཐེངས་༡དང་ཐེངས་རེར་ཁེ་༣ཙམ་ཐང་དུ་བསྐོལ་ནས་གཏོང་རྒྱུའོ།། གཉན་རིམས་ཀྱི་ནད་ཀུན་ལ་ཕན་པའོ། གཉིས། འཕྲུལ་ཐང་། ཉིན་རེར་ཐེངས་༡ནས་༢བར་དང་ཐེངས་རེར་ཁེ་༣ཙམ་གྱི་བསྡུས་ཐང་གཏོང་རྒྱུའོ། རིམས་ཚད་རང་བཞིན་གྱི་གཉན་ཚད་སོགས་སྨིན་སྡུད་བྱེད་པ་དང་རིམས་ནད་སྔོན་འགོག་ཐུབ། གསུམ། ལོ་གྱོན། ཉིན་རེར་ཐེངས་༡དང་ཐེངས་རེར་རིལ་བུ་༡རེ་ཁ་ཟས་ཟོས་རྗེས་ཆུ་ཁོལ་གྱིས་གཏོང་དགོས། མགོ་གཟེར་དང་། གཉན་གཟེར། གཉན་ཚད་རིམས་སོགས་ལ་ཕན། བཞི། རྟ་ཟི་དམར་པོ། ཉིན་རེར་ཐེངས་༡དང་ཐེངས་རེར་རིལ་བུ་༣རེ་ཁ་ཟས་ཟོས་རྗེས་ཆུ་ཁོལ་གྱིས་གཏོང་དགོས། ཚད་རིམས་གཉན་དང་བསྡོངས་པ་དང་། ཚ་བ་གཅོག་པ། བལ་རིམས་སོགས་ལ་ཕན།
སྔོན་འགོག རྒྱུན་དུ་ཁོར་ཡུག་སྤྱི་དང་མི་སྒེར་གྱི་གཙང་སྦྲ་འཕྲོད་བསྟེན་ཡག་པོ་བྱ་དགོས། ནད་པའི་སྣོད་ཆས་མ་འདྲེས་པ་དང་ཁ་རླངས་མི་འགོས་པ་དོག་ཟོན་བྱ་རྒྱུ་དང་། འགོས་འཁྱབ་རང་བཞིན་གྱི་ནད་ན་མཁན་བྱུང་ན་ངེས་པར་དུ་ཟུར་དུ་བཞག་སྟེ་སྨན་བཅོས་བྱས་ནས་ནད་གཞི་ཁྱབ་གདལ་དུ་མི་འགྲོ་བར་ཤུགས་སྣོན་རྒྱག་དགོས་སོ།།