བོད་གནའ་རབས་ཀྱི་ཤིང་རྐོས་སྐོར་མདོ་ཙམ་བརྗོད་པ།

微信图片_20210111135731.jpg

ཚོན་མདངས་མངོན་པར་བཀྲ་བའི་ཀ་གདུང་གི་རྒྱན་རྐོས་སྣ་ཚོགས།

1.ཤིང་རྐོས་ངོ་སྤྲོད།

གྲི་རྩེ་དང་སོར་རྩེར་བརྟེན་ནས་སྲ་སྙི་ཤིང་གི་སྟེང་དུ་བརྐོས་པའི་རི་མོ་སྣ་ཚོགས་ལས་གྲུབ་པའི་བརྩམས་ཆོས་དག་ལ་ཤིང་རྐོས་སྒྱུ་རྩལ་ཟེར། བོད་རང་ལ་ཡོད་པའི་ཤིང་ལ་བརྐོས་པ་རྒྱ་ཆེ་བ་ནི། ཁང་བའི་སྒོ་དང་སྒེའུ་ཁུང་གི་རྒྱན་རིས་སྣ་ཚོགས་དང་། དེའི་ཆ་ལག་ཏུ་གྱུར་བའི་མཆོད་སྒྲོམ་དང་མདུན་ཅོག བཞུགས་ཁྲི། ཕྱེ་མར་འབོག སྤོས་སྒམ་སོགས་ཏེ་བརྐོ་གཞི་གཙོ་བོ་ཤིང་སྦྱར་པ་དང་། མོ་འལ། གསོམ་དཀར། ཤུག་པ། སྟག་པ་སོགས་ལ་གཟུགས་བརྙན་བརྐོས་པ་རེ་འགའ་ཙམ། དེ་མིན་བོད་ལ་སྐྱེ་དངོས་ཤིང་དངོས་མེད་ཀྱང་མི་རིགས་དང་ཡུལ་གྲུ་གཞན་ལས་དྲངས་པའི་ཤིང་རྩ་ཆེན་ལ་རྒྱལ་བའི་སྐུ་གཟུགས་དང་རྒྱན་རིས་པ་ཏྲ། ཙན་དན་གྱི་གླེགས་ཤིང་དང་ཌྰ་མ་རུ། མཆོད་རྫས་རིགས་སོགས་རྒྱན་སྤྲས་ཀྱི་བརྗོད་བྱ་སྣ་མང་ཞིང་ཕུན་སུམ་ཚོགས་པ་བཀོད་ཡོད་པ་བཅས་ཡིན་ཞིང་། བོད་དུ་ཆེ་མ་ཆུང་གསུམ་གྱི་ཕོ་བྲང་དང་རིག་གནས་གཙུག་ལག་ཁང་། དེ་མིན་ཕོ་བྲང་པོ་ཏ་ལ་གཙོ་བྱས་པའི་འཛུགས་སྐྲུན་རིག་གནས་དང་ལྷ་ཁང་འདུ་ཁང་སོགས་ཀྱི་བཟོ་བཀོད་ལ་མི་རིགས་རང་གི་ཐུན་མོང་མ་ཡིན་པའི་ཤིང་རྐོས་སྒྱུ་རྩལ་ངོ་མཚར་བ་གང་སར་བརྒྱན་ཡོད་པ་དེ་དག་གིས་མི་རིགས་འདི་ལ་བཟོ་རིག་དར་སྔ་བ་དང་། བཟོ་རིག་གི་ལག་རྩལ་དང་ཁྱད་ཆོས་དེ་མི་རིགས་གཞན་དང་བསྡུར་ན་ཐུན་མོང་མ་ཡིན་པ་དང་ཤིང་བཟོ་དང་བཟོ་སྐྲུན་རིག་གནས་ཁྱད་དུ་འཕགས་པ་ཡོད་པ་གསལ་རྟོགས་བྱུང་ཐུབ། །

微信图片_202101111357311.jpg

ཀ་གདུང་གི་མཛེས་རྒྱན་རྐོས་རིས་སྤྲགས་མ།

2.ཤིང་རྐོས་ཀྱི་བྱུང་འཕེལ།

ཤིང་རྐོས་ལག་ཤེས་ནི་བོད་དུ་གནའ་རབས་བསྐལ་པ་ཡ་ཐོག་གི་མ་སངས་སྤུན་དགུའི་དུས་སྐབས་སུ་མདའ་མདུང་མཚོན་ཆ་བཟོ་ཤེས་པ་ནས་རིམ་བཞིན་འཕེལ་རྒྱས་བྱུང་ཞིང༌། སྤྱི་ལོའི་གོང་གི་ལོ་ཉིས་བརྒྱའི་སྔོན་ལ་རྒྱལ་པོ་གཉའ་ཁྲི་བཙན་པོས་ཕོ་བྲང་ཡུམ་བུ་བླ་མཁར་བཞེངས་པ་དང༌། དེ་ནས་རྒྱལ་རབས་དགུ་པ་རྒྱལ་པོ་པུ་དེ་གུང་རྒྱལ་གྱི་རིང་ལ་མཛངས་བློན་རུ་ལས་སྐྱེས་དང་བཅས་པས་མཐུ་ནུས་ལེགས་པར་སྤེལ་བར་བརྟེན། "མཛངས་པའི་ལས་སུ་ཤིང་བསྲེག་སོལ་བ་བྱུང་།། དེ་ཡིས་རྡོ་བཞུས་གསེར་དངུལ་ཟངས་ལྕགས་བྱུང་།། ཤིང་ལ་མིག་ཕིབ་གཤོལ་དང་གཉའ་ཤིང་བྱས།། ས་གཞི་བསྐོས་ནས་ཕུ་ཆུ་ཡར་ལ་དྲངས།། སྨོན་པ་དོར་བསྡེབས་སྤང་ཐང་ཞིང་དུ་རྨོས།། བརྒལ་བའི་མི་ཐར་ཆུ་ལ་ཟམ་པ་བཙུགས།། རྨོས་པའི་ལོ་ཏོག་ཐོག་མར་འདི་ནས་བྱུང་།།"ཞེས་པ་ལྟར། ཤིང་ལ་བུག་པ་ཕུག་སྟེ་གཉའ་ཤིང་དང་། གཤོལ་མདའ། གཤོལ་ཕུར་བཅས་བཟོ་བ་དང་། གཞན་ཡང་ཆུ་ཆེན་ལ་ཟམ་པ་བཙུགས་པའི་ལོ་རྒྱུས་ལ་གཞིགས་ན། སྐབས་དེ་དུས་ནས་བོད་དུ་ཤིང་བཟོའི་ལག་རྩལ་ཆུ་ཚད་ངེས་ཅན་ཞིག་ཏུ་སླེབས་ཡོད་པ་ཤེས་རྟོགས་ཐུབ་པ་ཡིན། དེ་རྗེས་བཙན་པོའི་གདུང་རྒྱུད་རྣམས་ཀྱི་སྐུ་དུས་དང་བོད་སིལ་བུའི་དུས་སུ་ཡང་དགོན་སྡེ་དང་། ལྷ་ཁང་། གཞིས་ཀ་མང་པོ་གསར་སྐྲུན་བྱས་པ་ལས་ཤིང་རྐོས་མང་པོ་དང་། དེ་བཞིན་མི་རིགས་ཀྱི་ཁྱད་ཆོས་ལྡན་པའི་སྤྱོད་ཆས་སྣ་ཚོགས་མཐོང་རྒྱུ་ཡོད་པ་ལས་བོད་ཀྱི་ཤིང་རྐོས་ལག་རྩལ་གྱི་ཆུ་ཚད་གོང་ནས་གོང་དུ་འཕེལ་བ་ཤེས་གསལ་ལྟར་རེད།

བཙན་པོ་སྲོང་བཙན་སྒམ་པོའི་དུས་སུ། མཐའ་འདུལ་ཡང་འདུལ་གྱི་ལྷ་ཁང་ཕོན་ཆེན་བཞེངས་པའི་ཁྲོད། ད་ལྟ་གནས་པའི་ལྷ་ཁང་མང་པོར་ཤིང་ལ་བརྐོས་པ་དེང་སང་ཡང་མང་པོ་མཇལ་རྒྱུ་ཡོད། ཁྱད་པར་ལྷ་ལྡན་གཙུག་ལག་ཁང་ལ་ཀ་བ་སེང་མགོ་ཅན་དང་འབྲུག་མགོ་ཅན་སོགས་བརྐོས་པ་མཐོང་རྒྱུ་ཡོད་པ་མ་ཟད། གདུང་མ་དང་གཞུའི་ལྡེབས་ལ་ཤིང་རྐོས་ལག་རྩལ་སྤྱད་ནས་རོ་སྒྲུང་དང་དམངས་ཁྲོད་ཀྱི་སྒྲུང་གཏམ་སྣ་ཚོགས་བརྐོས་ཡོད་པས་སྐབས་དེ་དུས་ནས་བོད་དུ་ཤིང་རྐོས་ལག་རྩལ་ཤིན་ཏུ་དར་བ་མ་ཟད་ཆུ་ཚད་ཀྱང་མཐོན་པོ་ཞིག་ཏུ་སླེབས་པ་མཚོན་ཡོད།

བོད་སིལ་བུའི་དུས་ཏེ་ཡོན་དང་། མིང་། ཆིང་བཅས་ཀྱི་དུས་སུ་རིམ་བཞིན་བཞེངས་པའི་ས་སྐྱའི་ལྷ་ཁང་ཆེ་མོ་དང་། ཞྭ་ལུའི་གསེར་ཁང་ཆེ་མོ། རྒྱལ་རྩེའི་དཔལ་འཁོར་ཆོས་སྡེ་སོགས་ལ་གསོན་ཉམས་དོད་ལ་རྩེར་སོན་གྱི་ཤིང་རྐོས་སྒྱུ་རྩལ་གྱི་བརྩམས་ཆོས་མང་པོ་མཇལ་རྒྱུ་ཡོད། ལྷག་དོན་སྒྱུ་རྩལ་གྱི་ཞིང་ཁམས་སུ་འབོད་འོས་པའི་རྩེ་ཕོ་བྲང་གི་ལེགས་པར་བཀོད་པའི་འཛུགས་སྐྲུན་ནང་ཀ་བ་དང་། གཞུ། གདུང་མ་བཅས་ལ་བབས་བསྐྱངས་མ་དང་། བབས་བསྐུམ་མ། བབས་བསླངས་མ་སོགས་ཤིང་བརྩེགས་རྒྱན་སྤྲོས་རིམ་པ་བཅུ་གསུམ་གྱིས་མཛེས་པར་བྱས་ཡོད། ད་དུང་སྒོ་ཡི་རུ་བཞི་དང་། རྟ་བབས། མདའ་གཡབ་སོགས་ལ་མེ་ཏོག་སྣ་ཚོགས་དང་། པདྨ། སངས་རྒྱས་ཀྱི་སྐུ་བརྙན། དེ་བཞིན་གླང་ཆེན་དང་། སེང་གེ ཤྭ་བ། འབྲུག རྨ་བྱ་སོགས་རྩ་ཆེའི་སྲོག་ཆགས། སྤྲིན་ཚོམས། ནོར་བུའི་དྲ་བ་དྲ་ཕྱེད། རྡོ་རྗེ། བུམ་པ་སོགས་མཛེས་ལ་བཀྲ་ཤིས་པའི་རྫས་སྣ་མ་ཚང་བ་མེད་པ་ཤིང་བརྐོས་ཀྱི་བརྗོད་བྱར་གྱུར་ཡོད། ད་དུང་དུས་འཁོར་བློས་བསླངས་ཀྱི་དཀྱིལ་འཁོར་ལྷ་ཁང་ནང་ལུང་ལས་བསྟན་པའི་དག་ཞིང་གི་བཀོད་པ་ཡུལ་གྱི་མཛེས་ཉམས་ཡོད་དོ་ཅོག་བརྐོས་དཀྲོལ་གྱི་ལམ་ནས་མཚོན་པར་བྱས་ཡོད་པ་དེ་ནི་ཕོ་བྲང་དེའི་སྒྱུ་རྩལ་གྱི་རིན་ཐང་གནམ་འོག་ཏུ་གྲགས་པའི་བརྗོད་གཞི་ཆེན་པོ་ཞིག་ཡིན།

微信图片_202101111357312.jpg

བོད་ལུགས་ཀྱི་ལག་རྩལ་ཕུལ་བྱུང་བ་ལས་བརྐོས་པའི་སྒོ་རྒྱན།

བོད་སིལ་པོའི་དུས་དང་ཡང་སྒོས་བོད་ས་གནས་སྲིད་གཞུང་སྐབས་སུ། གསར་སྐྲུན་བྱས་པའི་གཞིས་ཀ་དང་སྐུ་དྲག་གི་གནས་གཞི་མི་ཉུང་བ་ཞིག་ད་ཆ་མཐོང་རྒྱུ་ཡོད་པ་དེ་ཚོར་ཡང་ཤིང་རྐོས་ཀྱི་བརྩམས་ཆོས་མང་པོ་ཡོད་པ་དེ་དག་ནི་བོད་ཀྱི་ཤིང་རྐོས་ལོ་རྒྱུས་ཀྱི་དཔང་པོ་ལྟ་བུ་ཡིན།

བོད་དུ་ཤིང་རྐོས་ལག་རྩལ་དར་ཁྱབ་བྱུང་ནས་དུས་ཡུན་རིང་པོའི་ནང་བོད་ཡིག་གི་པར་བརྐོའི་ལག་རྩལ་གསར་གཏོད་བྱུང་མེད། མིང་རྒྱལ་རབས་ཀྱི་གོང་མ་ཡུང་ལོའི་དུས་སུ་མེས་རྒྱལ་ནང་སར་བོད་ཡིག་གི་བཀའ་འགྱུར་ཟངས་དཔར་མ་ཐོག་མར་ཐོན་ཡོད། དེ་ནས་མི་རིང་བར་ཕག་གྲུ་སྡེ་སྲིད་ཁྲི་རབས་ལྔ་པ་དབང་གྲགས་པ་རྒྱལ་མཚན་གྱིས་བོད་ཀྱི་ཤིང་རྐོས་དང་རྡོ་རྐོས་ཀྱི་ལག་རྩལ་མཐོ་པོ་ཡོད་པ་དང་ཤིང་ཆ་འབེལ་བའི་ལེགས་ཆ་སྤྱད་ནས་ས་སྐྱ་གོང་མ་རྣམ་ལྔའི་གསུང་འབུམ་ཐོག་མར་དཔར་བརྐོས་བྱས་པ་དང་། རྗེ་ཙོང་ཁ་པ་འདས་རྗེས་སྣེའུ་རྫོང་དཔོན་ནམ་མཁའ་བཟང་པོས་སྦྱིན་བདག་བྱས་ནས་རྗེ་ཙོང་ཁ་པའི་གསུང་འབུམ་ཆ་ཚང་པར་བརྐོས་བྱས་པའི་པར་ཤིང་ལ་ཡོངས་གྲགས་སུ་དགའ་ལྡན་དཔར་རྙིང་ཟེར་ཞིང་། དཔར་ཤིང་དེའི་ཐོག་དཔར་འདེབས་བྱས་པའི་དཔེ་ཆ་མང་པོ་དེང་སང་སེ་འབྲས་དང་པོ་ཏ་ལ་སོགས་སུ་མཇལ་རྒྱུ་ཡོད། 

   微信图片_202101111357316.jpg         

བཀོད་པ་ངོ་མཚར་ཞིང་རྐོས་རིས་སྒྲོས་གཙང་བའི་ཕོ་བྲང་པོ་ཏ་ལའི་ཀ་མགོ་དང་རྒྱན་རྐོས་པ་ཏྲ།

微信图片_202101111357315.jpg

སྡེ་དགེ་དཔར་ཁང་ཆེན་མོ།

བོད་དུ་དཔར་སྐྲུན་ལག་རྩལ་འཕེལ་རྒྱས་བྱུང་རྗེས། བོད་ཡོངས་ལ་དཔར་སྐྲུན་ལག་རྩལ་གྱི་སྒོ་འཕར་ཡངས་པོར་ཕྱེ་བ་མ་ཟད། བོད་ཁུལ་གཞན་དང་། ཡུན་ནན། སོག་ཡུལ་ཕྱི་ནང་སོགས་སུ་བོད་ཡིག་གི་ཤིང་དཔར་དང་ཁྲོ་དཔར་མང་པོ་ཐོན་ཡོད། དཔར་བརྐོའི་ལས་རིགས་ཀྱི་མཐོ་རླབས་གཅིག་རྗེས་གཉིས་མཐུད་དུ་འཕྱུར་བ་དང་སྦྲགས། དཔར་ཁང་མང་པོ་ཐོན་པ་མ་ཟད། འཛམ་གླིང་ཁྱོན་ལ་དུས་ད་ལྟ་ཡང་སྙན་པར་གྲགས་པའི་དཔར་ཁང་ཆེན་པོ་བཞི་ཐོན་ཡོད་པ་རེད། དེ་དག་ནི་སྤྱི་ལོ1741ལོར། སྐབས་དེའི་བོད་ས་གནས་ཀྱི་སྲིད་འཛིན་པ་ཕོ་ལྷ་བ་བསོད་ནམས་སྟོབས་རྒྱལ་གྱིས་ཤིང་དཔར་གྱི་བཀའ་འགྱུར་དང་བསྟན་འགྱུར་ཆ་ཚང་ཞིག་པཎ་ཆེན་སྐུ་ཕྲེང་ལྔ་པ་བློ་བཟང་ཡེ་ཤེས་ལ་ཕུལ་ཏེ་སྣར་ཐང་དགོན་པའི་ནང་བཞག་པ་དེར་སྣར་ཐང་དཔར་ཁང་ཟེར་བ་དང་། སྤྱི་ལོ1744ལོར། སྡེ་དགེ་རྒྱལ་པོ་བསྟན་པ་ཚེ་རིང་གིས་སྡེ་དགེ་དགོན་ཆེན་དུ་བཀའ་འགྱུར་དང་བསྟན་འགྱུར་དཔར་བརྐོས་བྱས་ནས་བཞུགས་སུ་གསོལ་བའི་དཔར་ཁང་དེར་ཕྱིས་ཡོངས་གྲགས་སུ་སྡེ་དགེ་དཔར་ཁང་ཞེས་ཟེར། སྤྱི་ལོ1752ལོར། ཅོ་ནེ་དཔོན་བསྟན་སྲུང་ཚེ་རིང་དང་མེ་མོ་རིན་ཆེན་དཔལ་འཛོམས་གཉིས་ཀྱིས་དབུས་དཔར་དང་། པེ་ཅིང་གི་དཔར་མ། སྣར་ཐང་དཔར་མ་བཅས་ལ་ཕྱི་མོ་བྱས་ཏེ་བཀའ་བསྟན་ཆ་ཚང་ཤིང་དཔར་དུ་བརྐོས་ནས་བཞུགས་སུ་གསོལ་བར་ཅོ་ནེ་དཔར་ཁང་དུ་གྲགས། ཡང་དུས་རབས་ཉི་ཤུ་པའི་དུས་འགོར། ཏཱ་ལའི་བླ་མ་སྐུ་ཕྲེང་བཅུ་གསུམ་པ་རྒྱ་གར་ནས་ཕྱིར་ལོག་ཕེབས་རྗེས། པོ་ཏ་ལའི་ཞོལ་དུ་དེ་སྔ་ཏཱ་ལའི་བླ་མ་སྐུ་ཕྲེང་ལྔ་པའི་སྐབས་ནས་ཡོད་མུས་ཀྱི་དཔར་ཁང་རྙིང་པ་རྒྱ་བསྐྱེད་གནང་ཐོག་བཀའ་འགྱུར་སོགས་དཔར་སྐྲུན་གནང་སྟེ་བཞུགས་པར་ཞོལ་དཔར་ཁང་ཞེས་པ་བཅས་བྱུང་། དེ་མིན་ས་སྐྱ་དགོན་དང་སེ་འབྲས་དགའ་གསུམ་གྱིས་གཙོས་པའི་བོད་ཀྱི་དགོན་སྡེ་ཁག་དང་བླ་བྲང་བཀྲ་ཤིས་འཁྱིལ་དང་རྗེ་སྐུ་འབུམ་སོགས་བོད་ཁུལ་གཞན་གྱི་དགོན་སྡེ་ཁག་སོ་སོར་ཡང་ཆོས་དཔེ་དང་། རིག་གནས་ལོ་རྒྱུས། སྨན་གཞུང་བཅས་སྐོར་གྱི་དཔར་ཤིང་ཕོན་ཆེན་ཉར་ཚགས་བྱས་ཡོད་པ་ནི་འཛམ་གླིང་ཐོག་མཐོང་དཀོན་པ་ཞིག་ཡོད། དཔར་ཁང་དེ་དག་གིས་གཅིག་རྗེས་གཉིས་མཐུད་ཀྱིས་མདོ་དབུས་ཁམས་གསུམ་གྱི་གྲུབ་མཐའ་རིས་མེད་ཀྱི་མཁས་དབང183གྱི་གསུང་འབུམ་པོད960ལྷག་ལས་བརྒྱ་ཆ་དགུ་བཅུ་ཡན་པར་དུ་བརྐོས་ནས་གང་སར་བཀྲམ་པས་བོད་ཁམས་ཡོངས་སུ་འཆད་རྩོད་རྩོམ་གསུམ་རྒྱ་ཆེར་དར་ཞིང་། མཁས་བཙུན་བཟང་གསུམ་མང་པོ་བྱུང་བ། ལྟ་སྒོམ་སྤྱོད་གསུམ་ཀུན་གྱིས་བརྩི་མཐོང་ཆེ་བའི་རྣམ་པ་ཡག་པོའི་གཞི་རྐང་ཚུགས་ཤིང་བོད་ཀྱི་སྐད་ཡིག་གཅིག་གྱུར་དང་རིག་གཞུང་གོང་འཕེལ་གཏང་རྒྱུར་ནུས་པ་ཆེན་པོ་ཐོན་ཡོད། །

微信图片_202101111357313.jpg

སྒོ་བྱང་སྟེང་གི་བྱ་རྒྱལ་ཁྱུང་ཆེན་ཤིང་བརྐོས་མ།

3.ཤིང་རྐོས་ཀྱི་ལག་ཆ་དང་བརྐོ་གཞིའི་ཤིང་།

ཤིང་རྐོས་ཀྱི་ལག་ཆ་ལ། ངར་ལྕགས་ཤིང་གི་རིགས་ལ་ཤིན་ཏུ་རྣོ་བའི་རིགས་ཀྱིས་མགར་ལ་རྣོ་མཉེན་ངར་གསུམ་དང་ལྡན་པ་ནི། གཅོད་བྱེད་ཀྱི་རིགས་སྤྱི་དང་འདུ་ལ། ཤིང་བཟོའི་ལག་ཆ་འབུར་ལེན། སོག་ལེན། གསེར་ལོ། གསོར་སོགས་སྣ་འཛོམས་པའི་ཐོག གཞོག་གྲི་སེན་གཟུགས་མ། ཤིང་གི་ཡུ་བ་འཛིན་བདེ་ཅན་ཆེ་འབྲིང་ཆུང་གསུམ་ཅུ་ཙམ། གཟོང་ཁ་རྒྱ་ཆེ་ཆུང་ལྔ་དྲུག་ཙམ་སོགས་རྐོ་བྱེད་དང་། གཤོང་བྱེད། གཅོད་བྱེད། རྡར་བྱེད། འབིག་བྱེད་ཆ་ཚང་ཞིག་མེད་དུ་མི་རུང་བ་ཞིག་ཡིན། རྒྱུན་མཁོའི་ལག་ཆ་ནི་ཤིང་ལས་བྱེད་པའི་རྨང་གཞི་ཡིན་ལ་ཤིང་མཁན་གྱི་བྱ་བ་སྒྲུབ་པར་མེད་མི་རིང་བའི་ཡོ་བྱད་ཡིན་པས་དེ་བེད་སྤྱོད་བྱེད་སྟངས་ཡང་གོ་རིམ་ཡོད་ལ་ཞིབ་ཚགས་ཆེ་བའི་ལས་ཀ་ཞིག་ཡིན་པས་ཤིང་མཁན་གྱིས་དེ་དག་སྤྱོད་སྐབས་གཟབ་ནན་དང་བློ་རིག་སྒྲིམ་ནས་བེད་སྤྱོད་གྱིན་ཡོད། བརྐོ་གཞིའི་ཤིང་ནི། ལྕང་མ་དང་མོ་འལ། གསོམ་དཀར། ཤུག་པ། སྟག་པ། ཙན་དན་དམར་པོ། ཙན་དན་དཀར་པོ། ཨ་ག་རུ། བྱང་ཆུབ་ཀྱི་ཤིང་ལ་སོགས་ཡིན་ལ། བརྐོ་གཞི་གཙོ་བོ་ནི་ལྕང་མ་དང་མོ་འལ་གཉིས་ཡིན་ལ། རྒྱུ་མཚན་ནི་ཤིང་དེ་གཉིས་རྒྱུ་སྙི་ཞིང་འབོལ་ལ། གས་སྐྱོན་མི་འབྱུང་བར་བཤད་ལ། ཤིང་གཅོད་དུས་ཤིང་སྡོང་ཆུང་དྲགས་ན་སྙི་ཞིང་སྣ་ཐུང་ལ། ཞེང་ཕྲ་བའི་སྐྱོན་དང་ཤིང་འཛེར་འཁོར་བཅས་ཀྱི་སྐྱོན་ཡོད་པས། ཤིང་སྡོང་རྒྱས་ལ་བབས་ཤིང་སྡོང་བོ་དྲང་ལ་ཤིང་སྡོང་གི་དཀྱིལ་དང་སྨད་དུ་འཛེར་བ་ཉུང་བ་དེ་བཅད་དེ། སྲབ་མཐུག་རན་པར་དྲས་པའི་ཐོག ས་རློན་དང་ལྕི་བ་རློན་པ་བྱུགས་པ། ཟུར་རྡོ་ཡིས་མནན་ནས་ག་ལེར་གྲིབ་སྐམ་བྱེད་དགོས། ལག་ལེན་ཤིན་ཏུ་ཞིབ་མོ་ལ་ནི་ཤིང་ལེབ་སྐམ་པོ་དེ་ཡང་བསྐྱར་ཆུར་བཙོ་བ་དང་ཡང་ན་ཆུར་ཡུན་དུ་སྦངས་བ། ཤིང་བརྐོས་ལ་ཚོན་བཀྱེ་ཡུལ་མ་ཡིན་པ་ལ་སྣུམ་བྱུགས་བྱེད་པ་སྟེ། སྣུམ་གྱི་རྒྱུ་རབ་སྟར་གའི་སྣུམ་སོགས་རྒྱུ་ཤིང་ལས་བྱུང་བའི་སྣུམ་གྱི་རིགས་བྱུགས་ནས་ཡུན་ཙམ་བཞག་པའི་སྟེང་བརྐོས་ན་ཤིང་གི་བཀྲ་ཐོན་ཞིང་མདངས་ལེགས་ཚུལ་དང་། ཡང་ན་ཤིང་རྐོས་ལེགས་པར་འགྲུབ་པའི་སྟེང་སྣུམ་བྱུགས་བྱེད་པའང་ཡོད་པར་བཤད།

微信图片_2021011113573111.jpg

བོད་ལུགས་ཤིང་རྐོས་སུ་སྤྱོད་པའི་ལག་ཆ་སྣ་ཚོགས།

微信图片_20210111135731.png

ཤིང་རྐོས་རྐོ་སྟངས།

4.ཤིང་རྐོས་ཀྱི་ལག་རྩལ་སྐོར།

དང་པོ། འབུར་ལེན་རྒྱག་ཐབས། འབུར་ལེན་རྒྱག་ཐབས་ནི་ཤིང་ལས་བྱེད་པའི་ཁྲོད་མེད་དུ་མི་རུང་བའི་ལས་ཀ་ཞིག་ཡིན་ལ་དེ་ནི་རྒྱུ་མཚན་མེད་པར་འབུར་ལེ་མི་རྒྱག་ལ་སྐབས་བབས་སུ་བེད་སྤྱོད་པའི་ཁེ་ཕན་དང་དམིགས་ཡུལ་ལ་གཞིགས་ནས་ད་བཟོད་འབུར་ལེན་རྒྱུག་གིན་ཡོད། དཔེར་ན། ནང་ཚགས་བྱེད་པའི་སྐབས་སུ་བར་སྟོང་རེ་རེ་ལ་འཇལ་ཆས་ཀྱིས་འཇལ་བ་དང་ཡང་དག་པར་ཚད་རྗེས་ད་བཟོད་དེ་ལ་མཁོ་བའི་བཟོ་ཤིང་གཞོགས་གཏུབས་དང་འབུར་ལེན་རྒྱབ་ནས་བར་སྟོང་དང་ནང་ཚགས་བྱེད་ཀྱིན་ཡོད། རྒྱུན་ལྡན་འབུར་ལེན་རྒྱག་སྐབས་ངོས་སྙོམས་མིན་དང་འཇམ་པོར་གཏོང་ཡོད་མེད་ལ་ཤིང་བཟོ་བས་ཞིབ་ཏུ་བལྟས་རྗེས་ཡང་བསྐྱར་སྲབ་མཐུག་དང་ཆ་འགྲིག་ཡིན་མིན་ཞིབ་བཤེར་ཡང་ཡང་བྱས་རྗེས་ད་གཟོད་ལས་ཀ་ཡོངས་འགྲུབ་བྱེད་ཀྱིན་ཡོད། རྒྱུན་དུ་ཤིང་ལས་ཅུང་ཡག་ཤོས་དང་ཤིང་འཛེར་བ་མེད་པ་ཅན་དང་ཤིང་རྒྱུ་བཟང་པོར་བརྟེན་ནས་ད་བཟོད་འབུར་ལེན་རྒྱག་གིན་ཡོད།

གཉིས་པ།  རྟགས་དང་ཁུང་ཕུབ་རྒྱག་ཐབས། རྟགས་རྒྱག་པ་ནི་རིམ་པ་དང་ཐོད་གཏུགས་ཡོང་བར་བྱ་ཕྱིར་དང་བར་སྟོང་གང་ལ་གང་ཙམ་མཁོ་བ་སོགས་མི་ནོར་བ་དང་ལས་ཀ་བསྐྱར་ཟློས་མི་བྱེད་པ་དང་འགོར་འགྱངས་མི་ཡོང་བའི་ཆེད་དུ་ཡིན་པས་རྟགས་ལ་བརྟེན་ནས་ཁུང་བུ་འབུགས་པ་འབུར་རྒྱག་པ་སོགས་གང་ཡིན་ཡང་མྱུར་མོའི་སྒོ་ནས་ལས་དོན་ལེགས་པར་འགྲུབ་པའི་ཐོག་མའི་ཆ་རྐྱེན་ཡིན། གལ་སྲིད་རྟགས་སོགས་ཅི་ཡང་མ་བཀོད་ན་རང་གི་བསམ་ཚོད་ཁོ་ན་བརྟེན་ནས་ཁུང་ཕུབ་དང་འབུར་རྒྱག་བྱས་ན་ནོར་འཁྲུལ་དང་སྐྱོན་ཆ་ཆེན་པོ་བཟོ་སྲིད་པས་རྟགས་རྒྱག་ནི་ཤིང་ལས་གོ་རིམ་ཁྲོད་ཀྱི་ཐོག་མའི་ལས་དོན་ཞིག་ཡིན་ལ་ལས་དོན་སོ་སོ་བདེ་བླགས་ཡོང་བའི་རྨང་གཞི་ཡིན་པས་རྟགས་རྒྱག་ལ་བརྟེན་ནས་བར་སྟོངས་བཅད་པ་དང་གཞོགས་གཏུབས་བྱེད་པ་དེ་མིན་ད་དུང་ཆེ་ཆུང་དང་ཚད་ལོན་ལེན་སོགས་ཧ་ཅང་མང་ལ། ཁུང་ཕུབ་རྒྱག་པ་ནི་གཙོ་བོ་རྟགས་གཞི་འཛིན་ས་བྱས་ནས་བརྐོ་ཤིང་གི་མགོ་ལ་ཐོ་བ་དང་སྟ་རེ་སོགས་ཀྱིས་རྒྱབ་ནས་ཁུང་བུ་ཕུག་པ་དང་དེ་དག་ཡང་ཆ་འཕྲོད་དུ་བཅུག་ནས་ཤིང་བརྐོས་ལས་ཀ་སྒྲུབ་པའི་ཤིང་བཟོ་བའི་ཤིང་ཆས་ལག་ཆ་ལ་བརྟེན་ནས་ལས་ཁུང་བུ་ཕུབ་པ་དང་འབུགས་རྒྱག་པའི་ལས་ཀ་ཞིག་ཡིན་པས་ཁུང་བུ་ཡོངས་སུ་བརྟོལ་དགོས་ཚེ་ཡོངས་སུ་བརྟོལ་དགོས་ལ་དེ་མིན་མི་དགོས་ཚེ་འཇལ་ཆས་སོགས་ཀྱི་ཚད་པའི་གཞི་དེ་གཞིགས་ནས་ཁུང་ཕུབ་རྒྱག་གིན་ཡོད་ལ་དེ་ནི་འབུར་རྒྱག་དང་ལེན་རྒྱག་པ་གཞོགས་གཏུབས་ཀྱི་ལས་ཀ་དང་བསྡུར་ན་ཅུང་རྙོག་འཛིང་ཆེ་ལ་ཞིབ་ཆ་ལྡན་དགོས་པའི་ལས་ཀ་བྱེད་ཐབས་དེ་ཡིན།

微信图片_202101111357317.jpg

པེ་ཅིན་དགའ་ལྡན་བྱིན་ཆགས་གླིང་གི་ཤིང་སྡོང་གཅིག་ལ་བརྐོས་པའི་རྒྱལ་བ་བྱམས་པའི་སྐུ་བརྙན་འཇིག་རྟེན་ན་མཐོང་དཀོན་པ།

གསུམ་པ། བཅད་ཁ་དང་སྟེར་ཤུར་རྒྱག་ཐབས། ཤིང་བཟོ་བས་འབུར་བརྐོས་བྱེད་སྐབས་སྐབས་བབས་ཀྱི་དགོས་མཁོ་ལ་དམིགས་ནས་བཅད་ཁ་རྒྱག་གིན་ཡོད་ལ་དེ་ནི་འཇལ་ཆས་སོགས་ཀྱིས་ཡང་དག་པར་ཚད་རྗེས་ད་བཟོད་ལག་པ་འགུལ་ནས་ཚད་ངོས་བཟུང་གི་མཚམས་ཐིག་ནས་བཅད་ཁ་རྒྱག་གིན་ཡོད་པ་ཡིན། སྟེར་ཤུར་རྒྱག་ཐབས་ཡང་དེ་དང་འདྲ་བར་བཅད་ཁ་རྒྱབ་ཡོད་པའི་ཤིང་བཟོ་རྒྱུ་ཆ་ལ་ཤུར་རྒྱབ་ནས་རི་མོ་དང་ཚད་གཞི་ལ་གཞིགས་ནས་ལག་ལེན་དུ་འདེབས་པའི་ཤིང་བཟོའི་ལས་ཀ་བྱེད་ལུགས་ཞིག་ཡིན་ལ་དེ་ཡང་ཧ་ཅང་གི་ཞིབ་ཚགས་ཅན་དང་གོ་རིམ་ཅན་ཞིག་ཡིན། ཤིང་ལ་བཅད་ཁ་རྒྱག་པ་ལས་ཤིང་བཟོའི་ལས་ཀ་བྱེད་པའི་ཁྲོད་ནས་སྐབས་བབས་ཤིང་གི་དགོས་མཁོ་ལ་དམིགས་ནས་ཚད་ཐིག་དང་ཚད་ཤིང་གི་རྟགས་ལ་བརྟེན་ནས་བཅད་ཁ་རྒྱག་པ་དང་དེ་ནས་སྟེར་ཤུར་རྒྱག་གིན་ཡོད། དེ་མི་ཚད་སྟེར་ཤུར་རྒྱག་པ་ནི་ཡོ་འཁྱག་མི་འབྱུང་བ་དང་བཅད་ཁ་ལྟར་ཤིང་ངོས་ནས་ལས་ཀ་བྱེད་པའི་གོ་རིམ་ཁྲོད་དུ་འཕྲོ་བརླག་དང་བེད་མི་ཆོད་པའི་ཚུལ་དུ་མི་འགྲོ་བས་དེ་གཉིས་ནི་ཤིང་བཟོ་བའི་ལས་ཤ་དེ་དག་རིམ་པ་ལྟར་སྒྲུབ་པའི་བརྒྱུད་རིམ་ཁྲོད་ནས་མེད་དུ་མི་རིང་ལ་གཟབ་ནན་དང་ཞིབ་ཚགས་དང་དོད་བྱེད་དགོས་བའི་ལས་ཀ་གཉིས་ཡིན།

微信图片_202101111357319.jpg

རྐོས་རྒྱན་ཕུན་སུམ་ཚོགས་པའི་མཆོད་སྒྲོམ།

4.ཤིང་རྐོས་ལ་ཚོན་རྩི་བྱུག་སྟངས་དང་ཉར་ཚགས་སྐོར།

དང་པོ། ཚོན་རྩི་བྱུག་སྟངས། “ཚོན་སྦྱོར་མེ་དང་མ་བྲལ་ཞིང་། དམ་ཚོད་ཟུངས་ལ་སྣུམ་ཤ་འཆོར།” ཅེས་ཟེར་ཏེ་རི་མོ་དང་ཐང་ག་སོགས་ལ་ཚོན་ཆུས་དམ་ཚོད་བྱ་རྒྱུ་ཡིན་པས་མེ་དང་དྲོད་ལ་མི་འབྲལ་བ་སོགས་བོད་ཀྱི་ལག་ཤེས་ཀུན་འདུས་ཆེན་མོ་ལས་ཚོན་བྱུག་གི་ཤེས་བྱའི་སྐོར་ནས་གསུང་ཡོད་། ཚོན་རྩི་བྱུག་པ་ནི་སྤྱིར་བཏང་གི་ཤིང་ལས་ལས་ཀའམ་ནང་ཚགས་དེ་མིན་ཀ་གདུང་སོགས་བཏེགས་ཚར་རྗེས་སམ་ནང་གི་སྒྲིག་བཀོད་དང་ཤིང་བཟོ་འཛུགས་བསྐྲུན་ཡོངས་སུ་འགྲུབ་རྗེས་ད་བཟོད་ཁྱིམ་ཚང་གི་རེ་འདུན་དང་མོས་མཁོ་ལ་གཞིགས་ནས་ཤིང་ངོས་ལ་ཚོན་རྩི་བྱུག་པའི་རྣམ་པ་དེ་ལ་བྱ་ཞིང་དེ་ནི་རི་མོའི་སྒྱུ་རྩལ་གྱི་བྱང་ཆ་དང་ཆུ་ཚད་ལ་བརྟེན་ནས་ཡོངས་འགྲུབ་བྱེད་པའི་ལས་ཀ་དེ་ཡིན། ལས་ཀ་འདི་ནི་ཐང་གའི་སྒྱུ་རྩལ་དང་འདྲ་བར་སྐྱ་ཐིག་དང་ཐོག་མར་ཇི་ཞིག་བར་དུ་ཇི་དང་དེ་ནས་ཇི་ཞིག་སོགས་རིམ་པ་ཡོད་པའི་སྒོ་ནས་བྱེད་ཀྱིན་ཡོད། ཚོན་རྩི་བྱུག་པ་ལ་ཐོག་མར་ཤིང་ངོས་གཙང་མ་ཡིན་དགོས་ལ་དེ་མིན་ཁང་བ་ཧྲིལ་བོའི་ངོས་སུ་དཀར་ཆུ་བྱུག་ནས་དེ་དག་སྐམ་པོར་གྱུར་ཚར་རྗེས་ད་བཟོད་ལྷ་བཟོ་ཡིས་ཁང་བའི་ངོས་དང་ཀ་གདུང་སོགས་ཆ་འགྲིག་ཡིན་པ་ལ་ཆ་འགྲིག་ཅན་དང་དེ་མིན་པར་ཁང་བདག་གི་རེ་བ་ལྟར་ཚོན་སྣ་གང་བྱུག་པ་དང་རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། དཀྱིལ་འཁོར་དང་སྟག་སེང་ཁྱུང་འབྲུག དེ་མིན་ནོར་བུ་དང་བུམ་པ་རླུང་རྟ་སྡེ་བཞི་སོགས་རི་མོའི་སྒྱུ་རྩལ་གྱི་ལམ་ནས་བྲིས་ཚར་རྗེས་དེ་དག་རེ་རེ་ཡི་ཐོག་ལ་གསེར་ཆུ་དངུལ་ཆུ་བྱུག་ནས་ཚོན་སྣ་སྡེབ་པ་དང་ཁ་དོག་རྣམ་པར་བཀྲ་བའི་ཚོན་རྩི་དང་རི་མོའི་སྒྱུ་རྩལ་ཟུང་འབྲེལ་སྒོས་ཡོངས་འགྲུབ་བྱེད་པ་དེ་ཡིན། ཤིང་བཟོ་བ་བོ་འདི་ཉིད་ལྷ་བཟོ་བ་བོ་དང་འདྲ་བར་རང་གི་ལས་ཀར་དད་ཞེན་དང་དགའ་མོས་ཡོད་པ་དེ་མིན་ལྷག་པར་དུ་རི་མོའི་མཚོན་དོན་ཅན་གྱི་ལྷ་རྟེན་སོགས་བཞེངས་སྐྲུན་བྱེད་སྐབས་ལུས་ངག་གཙང་མའི་དམ་ཚིག་ཐུགས་ལ་བདམས་ནས་ལས་ཀ་བྱེད་མཁན་དེ་ཚོ་བྱིན་གྱིས་རློབས་ཞེས་བསྔགས་བརྗོད་དང་རེ་སྨོན་གནང་ཡོད།

གཉིས་པ། ཉར་ཚགས་སྐོར། དེ་ཡང་གུད་པ་དང་། ཆག་པ། འཇིག་པ་ནི་ལོག་ཏུ་མེད་པའི་དངོས་པོའི་ཆོས་ཉིད་ཡིན་མོད། བོད་ཀྱི་གནའ་དཔེར་མི་ལ་ནོར་དགོས། ནོར་ལ་བདག་པོ་དགོས་ཞེས་བརྗོད་པ་ལྟར། ཤིང་རྐོས་རིག་དངོས་ལ་ལོ་རྒྱུས་དང་སྒྱུ་རྩལ། ཚན་རིག་སོགས་ཀྱི་རིན་ཐང་འཇལ་དུ་དཀའ་བ་ལྡན་ཡོད་པས་ན་རང་ཅག་གིས་དེ་དག་ལ་གཅེས་སུ་འཛིན་དགོས་པ་ནི་སྨོས་མེད། འོ་ན་དེ་དག་ལ་དོ་དམ་གང་འདྲ་བྱ་དགོས་སམ་ཞེ་ན། རིག་དངོས་ཀྱི་ཆ་ཚད་དང་བཟོ་དབྱིབས། རྒྱུ་ཆ། བཟོ་བཀོད། ཡང་ལྕི། འབྱུང་ཁུངས་སོགས་ཆ་འཕྲིན་ཚང་བའི་ཡིག་ཚགས་ལེགས་པོ་བཟོ་རྒྱུ་དང་། ཐོ་འགོད་ཁ་གསལ་བྱ་རྒྱུ་ནི་རྨང་གཞི་ཡིན་ལ། དེ་དག་སོ་སོའི་རྒྱུ་ཆ་དང་། སྤྱོད་ཡུལ། ནུས་པ་སོགས་ཚད་དུ་བཟུང་ནས་རང་རང་གི་འཚོ་གནས་བྱུང་བའི་ངོ་བོ་དང་བསྟུན་ནས་ཁོར་ཡུག་སྐྲུན་དགོས་པ་གལ་ཆེན་ཡང་། ཡར་ལེན་མར་འཇོག་སོགས་བེད་སྤྱོད་པའི་སྐབས་སུ་ལག་ཉེས་མི་ཤོར་བ་བྱ་དགོས།

བོད་ཀྱི་དགོན་པའི་ལྷ་ཁང་གི་རྨང་རྒྱུ་ཚང་མ་ཤིང་བཟོ་བའི་བརྐོ་ལུགས་དང་ལྷ་བཟོ་བའི་ཚོན་དང་རི་མོའི་སྒྱུ་རྩལ་གཉིས་འདུས་ཀྱིས་སྒྲུབ་པའི་རིག་གནས་སྒྱུ་རྩལ་ཞིག་ཡིན་ལ་དེ་དག་ཤིང་བཟོ་བའི་ཤིང་བརྐོས་བཟོ་ལུགས་རྒྱུ་ཆས་རྨང་གཏིང་ཞིང་ལྷ་བཟོ་བས་རི་མོའི་སྒྱུ་རྩལ་དང་རིག་གནས་རིན་ཐང་གིས་སྲོག་བྱུག་པ་རེད། ཤིང་བརྐོ་བཟོ་ལུགས་ལས་བསྐྲུན་པའི་ལྷ་ཁང་དང་བོད་རང་གི་ཁང་པ་ཆེ་མ་ཆུང་གསུམ་འདི་དག་ལ་ནི་དྲོད་གྲང་གི་སྲུང་འཛིན་ཡོད་ལ་ཚ་བ་ཆེ་བའི་སྐབས་སུ་རང་བཞིན་གྱིས་ནང་དུ་རླུང་བསུ་བཞིན་ཡོད་ལ་གྲང་ངར་ཆེ་བའི་སྐབས་སུ་ནང་ནས་ལྕགས་ཐབ་སོགས་ཀྱིས་མེ་བཏང་ཡང་དྲོད་གྲང་གི་སྙོམས་ཚད་མིའི་བདེ་ཐང་ལ་འཚམས་པ་དང་ཚེ་སྲོག་ལ་བསམ་པའི་ཚན་རིག་གི་རང་བཞིན་དང་ཐུན་མིན་གྱི་ཁྱད་ཆོས་ཡོད། དེ་མིན་ཚོན་རྩི་ལ་ཡང་དུས་ཡུན་རིང་བོར་ཡལ་དུ་མི་འགྲོ་བར་ཤིང་གི་རྒྱུ་ངོས་དང་ཚེ་སྲོག་རྒྱུན་གནས་སོགས་ལ་ཕན་པ་རྒྱ་ཆེན་པོ་ཡོད་པས་དེ་དག་ཉར་ཚགས་ཀྱི་དུས་ཡུན་རིང་ལ་ལྷག་དུ་མི་རིགས་གཞན་གྱི་མིག་ནང་ན་ཤིང་ཁང་གི་བཟོ་བཀོད་ནི་བྱིས་པའི་རྩེད་ཁང་དང་འདྲ་བར་རིན་ཐང་ཆུང་ལ་ཉར་ཚགས་ཆེར་བྱེད་མི་ཐུབ་པའི་བཟོ་ལུགས་རྗེས་ལུས་བ་ཞིག་ལ་སེམས་ཀྱིན་ཡོད། ཡིན་ཡང་དེ་ལྟ་བུ་ཞིག་གཏན་ནས་མ་ཡིན་ལ་ང་ཚོས་མི་རིགས་རང་གི་བཟོ་ལུགས་དེ་གཏན་དུ་ཤིང་ཚོན་རྡོ་གཡའ་མ་སོགས་ལ་བརྟེན་པ་ལས་མི་རིགས་གཞན་པ་དང་དེང་རབས་གྱི་ཨར་འདམ་དང་ལྕགས་སྟར་སོགས་ལ་མི་བརྟེན་པ་ནི་རྗེས་ལུས་ཞིག་ག་ལ་ཡིན། དེ་ནི་གོང་དུ་སྨྲས་པ་བཞིན་བཟོ་ལུགས་ཀྱི་རིན་ཐང་ཡོད་ལ་ཉར་ཚགས་ཀྱི་དུས་ཡུན་ཡང་རིང་བ་དང་ཚན་རིག་པས་ཀྱང་ཚོད་དཔག་དང་བཟོ་བསྐྲུན་པ་ཚོས་ཀྱང་བསམ་གཞིགས་བྱེད་མ་ཐུབ་པའི་ཆ་དང་བཟོ་ལུགས་རིག་གནས་ངོ་མཚར་བ་དང་གཞན་ལ་ངོམ་ཆོག་ཆོག་ཡིན་པའི་སྒྱུ་རྩལ་བཟོ་ལུགས་དང་རིག་གནས་ཉར་ཚགས་ཀྱི་རིན་ཐང་དང་ལོ་རྒྱུས་ཀྱི་རིན་ཐང་རྒྱ་ཆེན་པོ་ལྡན། །

微信图片_202101111357314.jpg

ཀ་རྒྱན་གསར་བརྐོས།

མདོར་ན། ཤིང་རྐོས་རིག་གནས་ནི་རྣམ་དཔྱོད་བློ་གྲོས་ལྡན་པའི་དྲིན་ཆེན་གྱི་མེས་པོ་དག་གིས་ཕྱི་རབས་པའི་སྣང་ངོར་སྐལ་དུ་བཞག་པ་ཁོ་ན་ཡིན་ཞིང་། ཤིང་དཔར་གྱི་བཀའ་བསྟན་དེ་དག་ནི་འཛམ་གླིང་ཡོངས་ནས་གྲངས་འབོར་ཨང་དང་པོའི་གོ་གནས་ཟིན་ཡོད་པས། འགྲོ་བ་མིའི་རིགས་ཀྱི་ལོ་རྒྱུས་ཐོག་གི་ངོ་མཚར་ཆེ་བའི་མཛད་རྗེས་ཤིག་ཅི་ལ་མིན། འཛམ་གླིང་གི་ཡང་རྩེ་མདོ་དབུས་ཁམས་གསུམ་ནི་གྲི་རྩེ་དང་སོར་རྩེ་ལས་འཁྲུངས་པའི་ཤིང་རྐོས་གྱི་སྒྱུ་རྩལ་ཁང་ཆེན་མོ་དང་ཤིང་དཔར་གྱི་དཔེ་མཛོད་ཁང་ཆེན་མོ་ཞིག་ཀྱང་རེད། ཤིང་རྐོས་དེ་དག་ནི་བོད་ཀྱི་ལོ་རྒྱུས་དང་ཆོས་ལུགས། སྤྱི་ཚོགས་དང་དཔལ་འབྱོར་བཅས་ལ་རྒྱུས་ལོན་བྱེད་རྒྱུར་ཕན་ཐོགས་ཡོད་པར་མ་ཟད། དེས་བོད་མི་རིགས་ཀྱི་ཐུན་མོང་མ་ཡིན་པའི་དཔར་བསྐྲུན་དང་བཟོ་རིག་སྒྱུ་རྩལ་གྱི་ཡོན་ཏན། ཤིང་རྐོས་ལག་རྩལ་གྱི་ཁྱད་ཆོས་བཅས་ལ་ཞིབ་འཇུག་དང་ངེས་ཤེས་ཟབ་མོ་ལོན་རྒྱུར་ཡང་ཕན་ཐོགས་ཆེན་པོ་ཡོད་པ་རེད། །

རྩོམ་སྒྲིག་པ། ཚེ་རིང་དོན་འགྲུབ།

དཔྱད་མཆན 0 ཡོད།