ཚན་པ་དང་པོ།
ཚན་པ་གཉིས་པ།
ཚན་པ་གསུམ་པ།
ཚན་པ་བཞི་བ།
ཚན་པ་ལྔ་བ།
ཚན་པ་དྲུག་པ། རྫོགས་སོ།།
དག་ཡིག་མཁས་པ་དགའ་སྐྱེད་ཀྱི་རྩ་བ་བཞུགས་སོ། །
ངག་གི་དབང་ཕྱུག་ལྷ་མོ་དབྱངས་ཅན་མ་ལ་ཕྱག་འཚལ་ལོ། །ན་མོ་ཝ་གཱི་ཨིནྡྲ་ནི་དེ་ཝི་སྭ་ར་སྭ་སྟྱཻ། འདྲེན་མཆོག་ཤཱཀྱ་སེངྒེ་ཡིས། །ལེགས་གསུངས་ཆོས་ཀྱི་འཁོར་ལོའི་དོན། །ཚུལ་བཞིན་དཔྱོད་པའི་ཤེས་རབ་མིག །སྩོལ་མཛད་ལྷ་འདང་བླ་མར་འདུད། །གང་དེའི་བསྟན་པའི་ཉིན་བྱེད་འབུམ། །གངས་ཅན་དགུང་དུ་འདྲེན་པའི་མཆོག །ཐོན་མིའི་གཞུང་ལས་ཉེར་མཁོའི་ཆ། །འགའ་ཞིག་བཏུས་ནས་འདིར་གཅིག་བྱ། །འཇམ་དབྱངས་ཐོན་མིས་འཕགས་ཡུལ་དུ། །ཡིག་རིགས་ཀུན་བསླབས་གངས་ཅན་བརྡར། །མཁོ་བའི་གསལ་བྱེད་སུམ་ཅུ་དང་། །དབྱངས་བཞི་དང་བཅས་གཏན་ལ་ཕབ། །གསལ་བྱེད་རྣམས་ལས་ཡ་བཏགས་བདུན། །ར་བཏགས་བཅུ་དང་ལ་བཏགས་དྲུག །ཝ་བཏགས་བཅུ་གཉིས་མགོ་ཅན་གསུམ། །འཕུལ་དང་མཐའ་རྟེན་སོགས་སུ་དབྱེ། །ཡ་བཏགས་བདུན་ནི་ཀ་ཁ་དང་། །ག་དང་པ་ཕ་བ་མ་འོ། །ར་བཏགས་ཀ་ཁ་ག་དང་ད། །པ་ཕ་བ་མ་ས་ཧ་འོ། །ལ་བཏགས་དྲུག་ནི་ཀ་དང་ག །བ་ཟ་ར་དང་ས་ཡིན་ནོ། །ཝ་བཏགས་ཀྭ་ཡེ་འདབ་ཆགས་ཁྭ། །བཅྭོ་བརྒྱད་ཉྭ་བཞི་དྭ་ཕྲུག་བུ། །རྩྭ་སྔོན་ལན་ཚྭ་ཕྲུག་ཞྭ་གྱོན། །རྭ་ཅོ་ཤྭ་དྲག་ལྭ་བའི་ཧྭ། །ར་ལ་ས་ཡི་མགོ་ཅན་ནི། །ར་མགོ་ལྡན་པ་ཀ་ག་ང་། །ཇ་ཉ་ཏ་ད་ན་དང་ནི། །བ་མ་ཙ་དང་ཛ་ལ་འོ། །ལ་མགོ་བཅུ་ནི་ཀ་ག་ང་། །ཅ་ཇ་ཏ་ད་པ་བ་ཧ། །ས་མགོ་ཀ་ག་ང་ཉ་ཏ། །ད་ན་པ་བ་མ་ཙ་ལའོ། །ག་ད་བ་མ་འ་དང་ལྔ། །འཕུལ་ཡིག་ཡིན་ལ་གས་འཕུལ་ནི། །ཅ་ཉ་ཏ་ད་ན་ཙ་ཞ། །ཟ་ཡ་ཤ་ས་བཅུ་གཅིག་གོ །དས་འཕུལ་དྲུག་ནི་ཀ་ག་ང་། །པ་བ་དང་ནི་མ་ཡིན་ནོ། །བས་འཕུལ་བཅུ་ནི་ཀ་ག་ཅ། །ཏ་ད་ཙ་ཞ་ཟ་ཤ་སའོ། །མས་འཕུལ་ཁ་ག་ང་ཆ་ཇ། །ཉ་ཐ་ད་ན་ཚ་ཛའོ། །འས་འཕུལ་ཁ་ག་ཆ་ཇ་ཐ། །ད་ཕ་བ་ཚ་ཛ་དང་བཅུ། །རྗེས་འཇུག་བཅུ་ནི་ག་ང་ད། །ན་བ་མ་འ་ར་ལ་ས། །སྔོན་རྗེས་གཉིས་པོ་ལས་གཞན་པའི། །ཡི་གེ་རྣམས་ནི་མིང་གཞིའོ། །༈ ད་ནི་སྔ་མའི་ཚིག་ཤུགས་ཀྱིས། །ཕྱི་མ་ཇི་ལྟར་འཐོབ་ཚུལ་བཤད། །ཐོག་མར་རྣམ་དབྱེ་དྲུག་པ་ཡི། །ཀྱི་གི་གྱི་འི་ཡི་རྣམས་ནི། །ད་བ་ས་དང་ད་དྲག་དག །ཐོབ་མཐར་ཀྱི་དང་ག་ང་གི །ན་མ་ར་ལ་བཞི་བོ་གྱི། །མཐའ་རྟེན་མེད་མཐར་འི་འཐོབ་ཅིང་། །རྐང་བ་སྐོང་ཚེ་ཡི་ཞེས་འཐོབ། །འོ་འུ་འམ་གྱི་ཚེག་ཁྱིམ་ཡང་། །ཁ་སྐོང་ཁ་སྐོང་མིན་པས་དབྱེ། །དེ་ཡང་དགའ་འོ་བདེ་འོ་སོགས། །རྫོགས་ཚིག་ལ་ནི་འོ་ཉིད་དེ། །མཛེས་དགའ་བོ་དང་ཀུན་དགའ་བོ། །མཛའ་བོ་དཔའ་བོ་ངོ་བོ་དང་། །སྤྱི་བོ་ལ་སོགས་མིང་གི་ཆ། །ཝ་ཕྱེད་ཉིད་དུ་འབྲི་ཞིང་བཀླག །ཀུག་བསྐྱེད་ཅན་དང་བརྩེགས་པ་དང་། །མཐའ་རྟེན་ཅན་མཐར་འ་མཐའ་སྤང་། །རྣམ་དབྱེ་བདུན་པ་ལ་དོན་གྱི། །ཏུ་དུ་སུ་རུའི་ཞབས་ཀྱུ་ནི། །ག་བ་ད་དྲག་ཅན་མཐར་ཏུ། །ང་ད་ན་མ་ར་ལ་དུ། །ས་སུ་མཐའ་རྟེན་མེད་པ་དང་། །འ་མཐར་རུ་ཞེས་བརྗོད་པ་ཡིན། །ཚིག་ཕྲད་ག་བ་ད་རྗེས་སུ། །ཅིང་ཅེས་ཅེ་འོ་ཅེ་ན་ཅིག །ང་འ་ན་མ་ར་ལ་དང་། །མཐའ་རྟེན་མེད་པའི་རྗེས་དག་ཏུ། །ཞིང་ཞེས་ཞེ་འོ་ཞེ་ན་ཞིག །ས་མཐར་ཤིང་ཤེས་ཤེ་ན་ཤིག །ད་དྲག་ཐོབ་ངེས་ན་ར་ལའི། །རྗེས་སུ་ཅིང་སོགས་ལྔ་པོ་སྦྱོར། །ན་ར་ལ་ས་ད་དྲག་གི །རྗེས་སུ་ཏེ་རྐྱང་ད་མཐར་དེ། །ག་ང་བ་མ་འ་དང་ནི། །མཐའ་རྟེན་མེད་རྗེས་སྟེ་ཞེས་འཐོབ། །ག་ད་བ་ས་ཉིད་དང་ནི། །ད་དྲག་ཐོབ་པའི་རྗེས་སུ་ཀྱང་། །ང་འ་ན་མ་ར་ལ་ཡང་། །མཐའ་རྟེན་མེད་མཐར་འང་དང་ནི། །རྐང་བ་སྐོང་ཚེ་ཡང་ཞེས་བྱ། །དྲི་དང་རྫོགས་ཚིག་སྐབས་སུ་ནི། །མཐའ་རྟེན་མེད་མཐར་འམ་དང་འོ། །མཐའ་རྟེན་ཅན་རྣམས་རང་རང་དང་། །ད་དྲག་ཅན་མཐར་ད་ཡིག་ལ། །རིམ་བཞིན་མ་དང་ན་རོ་གཉིས། །མཁས་པས་ཡང་དག་སྦྱར་བར་བྱ། །མིང་མཐའི་པ་བའི་ཁྱད་པར་ནི། །ག་ད་ན་བ་མ་ས་དང་། །ད་དྲག་ཅན་མཐར་པ་དང་ནི། །ང་འ་ར་ལ་མཐའ་མེད་མཐའི། །ཝ་ཕྱེད་བར་འབོད་རྣམས་ལ་བ། །གཞན་ལ་པ་ཉིད་སྦྱར་ཏེ་བཀླག །གཅོད་མཚམས་མཐའ་རྟེན་ག་ཡིག་མཐར། །གཅིག་ཤད་ང་ཡིག་མ་གཏོགས་པའི། །ཤད་གོང་རྣམས་སུ་ཕྱི་ཚེག་སྤང་། །ཚིགས་སུ་བཅད་པའི་རྐང་མཐའ་དང་། །ལྷུག་པའི་སྡེ་ཚན་རྫོགས་མཚམས་ཀྱི། །ན་རོ་ཅན་མཐར་གཉིས་ཤད་བྱ། །སྡེ་ཚན་ཆེན་པོ་རྫོགས་མཚམས་དང་། །ལེའུ་མཚམས་ལྟ་བུར་བཞི་ཤད་འཐོབ། །ཚེག་ཤད་དང་ནི་རྐྱང་ཤད་གཉིས། །འཐོབ་ཚུལ་རང་རང་སྐབས་དང་སྦྱོར། །༈ ད་ནི་འཕུལ་དང་མཐའ་རྟེན་མགོ ། མེད་ལ་སྦྱོར་དང་ཡོད་ལ་སྤོང་། །འདམ་ང་ཅན་ལ་མཐའ་གཅིག་ཏུ། །འཛིན་པའི་འཁྲུལ་སྤོང་ཅུང་ཟད་བཤད། །རྔ་ཡབ་གེ་སར་སིལ་སྙན་དང་། །མངོན་སུམ་ཕུན་སུམ་ཚོགས་སོགས་ལ། །གས་འཕུལ་ནོར་རོ་གཤའ་མ་དང། །གཤགས་འབྱེད་སོགས་ལ་མེད་ན་ནོར། །སར་བ་ལྟ་བུར་གང་ཡང་རུང་། །སྐྱིལ་ཀྲུང་སོགས་ལ་དས་འཕུལ་མེད། །དགུང་ལོ་མཚན་དགུང་ལོང་ཁྲིད་ཀྱི། །དམིགས་བུ་སོགས་ལ་མེད་ན་ནོར། །སྙན་དངགས་སོགས་ལ་གང་ཡང་རུང་། །ཕྱག་དར་ལག་དར་གད་མོ་དང་། །སྐྲ་ཤད་སོགས་ལ་བས་འཕུལ་སྤང་། །བསེར་བུ་སྐྱོ་བསངས་རྒྱ་མོ་བཟའ། །བྱི་བདར་སོགས་ལ་མེད་ན་ནོར། །སྔོ་སངས་ལྟ་བུ་གང་ཡང་རུང་། །ཐ་གྲུ་ཐ་མ་ཚར་དུ་དངར། །ཚོན་རྩིས་སོགས་ལ་མས་འཕུལ་སྤང་། །མཐེ་བོ་མཚེ་མ་སྔོ་སྨན་མཚེ། །ཁྱིམ་མཚེ་སོགས་ལ་མེད་ན་ནོར། །ཐུན་མོང་ལ་སོགས་གང་ཡང་རུང་། །ཚོང་འདུས་ཁམས་དང་ཚོགས་པ་ཚོམས། །ཕྲ་མ་ཁོན་འཛིན་ཁྲོ་བ་ཁྲོས། །རིམ་གྲོ་ཕྲ་མོ་ཕོངས་པ་དང་། །ཕྱུགས་པོ་སོགས་ལ་འས་འཕུལ་སྤང་། །མཐའ་འཁོབ་འཁྲི་ཤིང་འཁུར་བ་དང་། །ཚུལ་འཆོས་སོགས་ལ་མེད་ན་ནོར། །ཕྲིན་ལས་ཕྲེང་སོགས་གང་ཡང་རུང་། །ཡི་གེ་མྱུ་གུ་ལུ་གུ་རྒྱུད། །ཤཱཀྱ་སོགས་ལ་ག་མཐའ་སྤང་། །ཕྲག་དོག་ཕྲུག་གུར་མེད་ན་ནོར། །པུས་མོའི་ལྷ་ང་སྒོ་ང་དང་། །སླ་ང་སོགས་ལ་ང་མཐའ་ནོར། །ཡི་དམ་ཡི་རང་ཡི་དྭགས་སོགས། །སྲི་ཞུ་སོགས་ལ་ད་མཐའ་ནོར། །སྐད་ཅིག་ལྟ་བུར་གང་ཡང་རུང་། །སེ་མོ་དོ་ལ་ན་མཐའ་སྤང་། །བྱན་མོ་ལྟ་བུར་མེད་ན་ནོར། །ལྷ་བཙུན་བཟའ་བཏུང་གདུ་བུ་དང་། །ལེ་བརྒན་སོགས་ལ་བ་མཐའ་ནོར། །རྒྱ་འདྲེ་ཁ་མཆུ་ར་མདའ་དང་། །ར་མཉེ་ན་བཟའ་རྩྭ་མཆོག་གྲོང་། །རྒྱ་མཚོ་སོགས་ལ་མ་མཐའ་ནོར། །ལྷ་རྗེ་མདོ་རྒྱུད་ང་རྒྱལ་ཅན། །བྱ་རྒོད་རྡོ་རྗེ་མཐའ་རྟེན་དང་། །ལྷ་རྟེན་སོགས་ལ་ར་མཐའ་ནོར། །དུར་ཁྲོད་མདོར་བསྡུས་མེད་ན་ནོར། །བདེ་གཤེགས་སོགས་ལ་གང་ཡང་རུང་། །སྙུན་གྱི་གསོ་སྨན་ཁ་དྲོ་དང་། །གྲྭ་ལྔ་སོགས་ལ་ལ་མཐའ་ནོར། །རིག་སྔགས་གསུང་རབ་མཁྱེན་རབ་དང་། །ནམ་མཁའ་གོ་འཕང་ཁྲི་འཕང་མཆོག །བསྐྱེད་རིམ་རྫོགས་རིམ་འདུ་ཤེས་དང་། །མཁའ་སྤྱོད་ས་སྤྱོད་དོ་ཤལ་འཕྲེང་། །ཉམ་ཆུང་ཉམ་ཐག་ཉམ་ང་བ། །ལོག་རྟོག་སོམ་ཉི་ཆོམ་རྐུན་དང་། །ཆོ་ག་སོགས་ལ་ས་མཐའ་ནོར། །ལྷས་བྱིན་ཀླུས་བྱིན་གདམས་ངག་སོགས། །མང་པོ་ཞིག་ལ་མེད་ན་ནོར། །དྲི་བཟང་རྒྱུད་མངས་གོ་རིམ་དང་། །འཁོར་ལོས་བསྒྱུར་སོགས་གང་ཡང་རུང་། །ཀླད་ཀོར་སྟོད་ཀོར་གདུབ་ཀོར་དང་། །པད་ཀོར་ཐན་ཀོར་འོད་ཀོར་འཕྲེང་། །ཨ་མྲ་སོགས་ལ་ས་མགོ་མེད། །ངུར་སྨྲིག་སྨིག་རྒྱུར་མེད་ན་ནོར། །ཡི་གེ་ཞལ་ཏ་ད་ལྟ་དང་། །ལ་སོགས་ཐ་དད་ཅེས་རྣམས་ལ། །བར་ཚེག་མི་བྱེད་བླུན་པོའི་ལུགས། །འཁྲུལ་སྤོང་འདི་ནི་ཆེས་ཆེར་དུ། །མཁོ་ཕྱིར་ལོ་ཙཱའི་གསུང་དངོས་བྲིས། །༈ རྗེས་འཇུག་ག་སོགས་ཕལ་ཆེར་ལ། །ཡང་འཇུག་ས་མཐའ་ཡོད་མེད་ཀྱི། །དོན་གྱི་ཁྱད་པར་ཐ་དད་དུ། །འབྱེད་པའི་ཚུལ་དེ་ཅུང་ཞིག་སྨྲ། །རྒྱུན་དུ་རྟག་དང་རྟགས་མཚན་དང་། །མི་རྟག་འཇིག་དང་སྐྲག་ནས་འཇིགས། །གཡང་སའི་གྲོག་དང་མཛའ་བའི་གྲོགས། །ཉིན་མཚན་ཞག་དང་ཐག་པའི་ཞགས། །གཅན་གཟན་གཟིགས་དང་སྤྱན་གྱིས་གཟིགས། །མི་དགེ་སྡིག་དང་གཤེ་བའི་བསྡིགས། །གནོད་པའི་གདུག་དང་འབུབས་པའི་གདུགས། །རུས་ཀྱི་གདུང་དང་ཉི་མས་གདུངས། །ཞལ་གྱི་གདོང་དང་ཁ་མིག་གདོངས། །དུད་འགྲོའི་ལུག་དང་དཔེ་ཡི་ལུགས། །ནོར་གྱི་ཕྱུག་དང་དུད་འགྲོའི་ཕྱུགས། །ལུས་ཀྱི་ལག་དང་ཞེ་སའི་ལགས། །བློ་ཡི་རིག་དང་རྒྱུད་ཀྱི་རིགས། །སྨྲ་བའི་ཚིག་དང་མཚམས་ཀྱི་ཚིགས། །རི་མོའི་ཐིག་དང་ཟག་པའི་ཐིགས། །ཁ་དོག་ནག་དང་ཤིང་གི་ནགས། །དུམ་བུར་ཆག་དང་ཡུལ་དེར་ཆགས། །རྡུལ་གྱི་དྲེག་དང་སྟོབས་ཀྱི་དྲེགས། །མིག་འབྲས་ལོང་དང་འཛོམས་པའི་ལོངས། །ཕྱིན་ཅི་ལོག་དང་ཟུར་གྱི་ལོགས། །ཆུང་བའི་དོག་དང་དགྲ་ལ་དོགས། །སྟེང་གི་ཐོག་དང་གཞན་གྱིས་ཐོགས། །གྱེན་དུ་བསླང་དང་སློང་མོས་བསླངས། །གསོར་གྱིས་དབུག་དང་ཁ་ཡི་དབུགས། །མིག་གིས་མཐོང་དང་ནམ་མཁའི་མཐོངས། །ཐམས་ཅད་ཚང་དང་གཙང་བའི་ཚངས། །རེག་བྱའི་གྲང་དང་རྩིས་ཀྱི་གྲངས། །གྲངས་ཀྱི་སྟོང་དང་ཟད་ནས་སྟོངས། །བུ་གུའི་ཁུང་དང་ཕུགས་ཀྱི་ཁུངས། །དྲི་བའི་གང་དང་ཁ་བའི་གངས། །མཚན་མོའི་མདང་དང་ཚོན་གྱི་མདངས། །མཚམས་ཀྱི་དང་དང་གསལ་བའི་དྭངས། །ཡོ་མེད་དྲང་དང་གནས་ནས་དྲངས། །ནུབ་པའི་བྱིང་དང་ཕལ་ཆེའི་བྱིངས། །དུད་ཚོའི་གྲོང་དང་གུམ་པའི་གྲོངས། །བཏེགས་པའི་ཡང་དང་རྒྱ་ཆེའི་ཡངས། །ནངས་བར་སང་དང་རིག་པ་སངས། །སྒྱེད་པུའི་ཐབ་དང་བློ་ཡི་ཐབས། །བཟང་པོའི་རབ་དང་རིམ་པའི་རབས། །ཟས་སོགས་སྟོབ་དང་ཤེད་མོང་སྟོབས། །སྔ་གཞུག་རིམ་དང་ཡམས་ཀྱི་རིམས། །ཟ་བའི་ཁམས་དང་འབྱུང་བའི་ཁམས། །བརྗིད་པའི་རྔམ་དང་འཐུག་པའི་རྔམས། །མདུན་གྱི་དྲུང་དང་དྲུངས་ནས་འབྱིན། །ཆ་ལང་སོགས་དང་གྱེན་ལ་ལངས། །ཁ་བསྐང་བ་དང་ཐུགས་དམ་བསྐངས། །རྩྭ་ཡི་འཇག་མ་འཐས་པའི་འཇགས། །རྐང་བ་འཁུམ་དང་ཤེས་པ་འཁུམས། །འཁྱག་ནས་འཁོབ་དང་ཆུམ་པའི་འཁོབས། །ཟིན་པའི་གྲུབ་དང་ཆག་འབྱོར་གྲུབས། །ཐག་རིང་རྒྱང་དང་མངོན་པའི་རྒྱངས། །རྐང་བའི་རྒྱུག་དང་ཇ་སོགས་རྒྱུགས། །བྲབ་པའི་ལྕག་དང་མགར་བའི་ལྕགས། །འདབ་ཆགས་གླག་དང་བསླུ་ཐབས་གླགས། །རྡོ་སོགས་བཅག་དང་ཞབས་ཀྱིས་བཅགས། །ཁང་པའི་ལྕོག་དང་བློ་ཡིས་ལྕོགས། །བཏུང་བའི་ཆབ་དང་ལྷན་ཅིག་ཆབས། །བཅག་པའི་ཆོག་དང་རུང་བའི་ཆོགས། །ཉམ་ང་བ་དང་ཉམས་རྟོགས་བཟང་། །སྙོམ་འཇུག་སོགས་དང་ཀུན་ལ་སྙོམས། །སྨྲ་བའི་གཏམ་དང་མཛོད་ཀྱི་གཏམས། །ཐ་གས་བཏག་དང་དེ་ལ་བཏགས། །རྣམ་རྟོག་སོགས་དང་བློ་ཡིས་རྟོགས། །ནགས་ཀྱི་སྟག་དང་ཡས་སྟགས་དང་། །སྐས་ཀྱི་གདང་དང་སྐད་ཀྱི་གདངས། །གདེང་ཐོབ་པ་དང་ཞལ་སྒོ་གདེངས། །རྣམ་གྲངས་སོགས་དང་མང་པོའི་རྣམས། །བདེན་རྫུན་དཔང་དང་མཐོན་པོའི་དཔངས། །ས་གཞིའི་སྤང་དང་ཉེས་པ་སྤངས། །དད་པའི་ཕྱག་དང་ས་རྡུལ་ཕྱགས། །ལྷ་མིའི་གོ་འཕང་རྒྱང་དུ་འཕངས། །སྐྱེན་པོའི་འཕོང་དང་ལུས་ཀྱི་འཕོངས། །གཡོ་འགུལ་འཕག་དང་མཐོ་བའི་འཕགས། །ལྷག་པའི་ལྷག་དང་བྱོན་པའི་ལྷགས། །ཤ་གཟུག་དང་ནི་དབྱིབས་ཀྱི་གཟུགས། །དྲི་མ་དག་དང་རི་དྭགས་སོགས། །བྲན་གྱི་གཡོག་དང་ཐུམ་གྱིས་གཡོགས། །ལག་པའི་འདོམ་དང་གསང་གནས་འདོམས། །ཤུབ་བུར་སྨྲ་དང་མཚོན་ཆའི་ཤུབས། །སྤུན་གྱི་སྲིང་དང་ཕྱོགས་སུ་སྲིངས། །འཕྲད་པའི་ཐུག་དང་ལྷ་ཡི་ཐུགས། །ནོར་རྫས་སོག་དང་མང་སྡུད་སོགས། །འདི་འདྲའི་ཚིག་གི་གདངས་མཐུན་ཀྱང་། །དོན་ཁྱད་ས་མཐའ་ཁོ་ན་ཡིས། །འབྱེད་དགོས་ཕྱིར་ན་མཁས་རྣམས་ཀྱིས། །ས་མཐའ་ཡོད་མེད་ཤེས་གལ་ཆེ། །འོན་ཀྱང་འདས་དང་སྐུལ་ཚིག་འགར། །ཡང་འཇུག་ཐོབ་ངེས་སྐབས་ཤེས་དགོས། །༈ ཚིག་ཙམ་མཐུན་པ་ལ་འཁྲུལ་ནས། །ཡི་གེ་ལོག་པར་བྲིས་པ་དེའི། །སེམས་ཀྱི་རྨོངས་པ་བསལ་བའི་ཕྱིར། །ཁྱད་པར་ཅུང་ཟད་ཕྱེ་སྟེ་བཤད། །རྒྱལ་བའི་བསྟན་པ་ས་བསྟན་ལ། །མི་འགྱུར་བརྟན་པ་ར་བརྟན་ཡིན། །རང་གིས་བསྟེན་པ་ས་བསྟེན་ལ། །གཞན་ལ་བརྟེན་པ་ར་བརྟེན་ཡིན། །གནོད་པའི་དགྲ་ནི་ད་དགྲ་ལ། །སྙན་པའི་སྒྲ་ནི་ས་སྒྲ་ཡིན། །ལུས་ཀྱི་མགོ་ནི་མ་མགོ་ལ། །ནད་སོགས་འགོ་བ་འ་འགོ་ཡིན། །རིན་ཆེན་དངུལ་ནི་ད་དངུལ་ལ། །ལུས་ཀྱི་རྔུལ་ནི་ར་རྔུལ་ཡིན། །མགྲིན་པའི་མགུལ་ནི་མ་མགུལ་ལ། །གཡོ་བའི་འགུལ་ནི་འ་འགུལ་ཡིན། །ཕན་པའི་དྲིན་ནི་ད་དྲིན་ལ། །ཉོ་ཚོང་བྲིན་པ་བ་བྲིན་ཡིན། །སྟོབས་ཀྱི་དྲེགས་པ་ད་དྲེགས་ལ། །ཕྱོགས་སུ་གྲགས་པ་ག་གྲགས་ཡིན། །གཞན་ལ་སྩལ་བ་ས་སྩལ་ལ། །ལུས་ཀྱི་རྩལ་ནི་ར་རྩལ་ཡིན། །བསྲན་ཐུབ་བཟོད་ནི་བ་བཟོད་ལ། །རྗེས་ཀྱི་གཟོད་ནི་ག་གཟོད་ཡིན། །ཐུང་ངུར་བསྟུངས་པ་ས་བསྟུངས་ལ། །ཉེས་པའི་ལྟུང་བ་ལ་ལྟུང་ཡིན། །མཛའ་བའི་གྲོགས་ནི་ག་གྲོགས་ལ། །ཁུར་བའི་དྲོགས་ནི་ད་དྲོགས་ཡིན། །ལྷན་ཅིག་འགྲོགས་པ་ག་འགྲོགས་ལ། །བྲེད་ནས་འདྲོགས་པ་ད་འདྲོགས་ཡིན། །འགུག་པའི་དགུག་ནི་ད་དགུག་ལ། །གྲོགས་པོས་སྒུག་པ་ས་སྒུག་ཡིན། །ཡི་གེ་ཀློག་པ་ཀ་ཀློག་ལ། །ཕྱི་ནང་སློག་པ་ས་སློག་ཡིན། །མཚུངས་བའི་འགྲེ་བ་ག་འགྲེ་ལ། །གནོད་པའི་འདྲེ་ནི་ད་འདྲེ་ཡིན། །ས་མཐོའི་སྒང་ནི་ས་སྒང་ལ། །ཆུ་སྣོད་ལྒང་ནི་ལ་ལྒང་ཡིན། །བློ་རིག་གྲུང་བ་ག་གྲུང་ལ། །མདུན་གྱི་དྲུང་ནི་ད་དྲུང་ཡིན། །མི་གཙང་རྟུག་ནི་ར་རྟུག་ལ། །འཐུག་པའི་སྟུག་ནི་ས་སྟུག་ཡིན། །རི་དྭགས་གླ་ནི་ག་གླ་ལ། །ཚེགས་ཆུང་སླ་བ་ས་སླ་ཡིན། །སྟེང་གི་བླ་ནི་བ་བླ་ལ། །ལུས་ཀྱི་བརླ་ནི་ར་བརླ་ཡིན། །གཅོད་པའི་སྟེའུ་ས་སྟེའུ་ལ། །རྒོད་མའི་རྟེའུ་ར་རྟེའུ་ཡིན། །ནང་རོལ་རྒྱུ་མ་ར་རྒྱུ་ལ། །མི་བདེན་སྒྱུ་མ་ས་སྒྱུ་ཡིན། །འཕོང་གི་སྐྱེན་ནི་ས་སྐྱེན་ལ། །མཐུན་པའི་རྐྱེན་ནི་ར་རྐྱེན་ཡིན། །གནས་སོགས་སྐོར་བ་ས་སྐོར་ལ། །དཀོན་མཆོག་དཀོར་ནི་ད་དཀོར་ཡིན། །ཆུ་ལ་བརྒལ་བ་ར་བརྒལ་ལ། །ལུས་ཀྱི་སྒལ་བ་ས་སྒལ་ཡིན། །ས་བདག་ཀླུ་ནི་ཀ་ཀླུ་ལ། །སྙན་པའི་གླུ་ནི་ག་གླུ་ཡིན། །རེག་བྱ་འཇམ་པ་ཇ་འཇམ་ལ། །ཁྱབ་པའི་འབྱམས་པ་བ་འབྱམས་ཡིན། །སྲ་བའི་རྡོ་ནི་ར་རྡོ་ལ། །བསླུ་བའི་བསྡོ་ནི་ས་བསྡོ་ཡིན། །དུས་ཀྱི་དབྱར་ནི་ད་དབྱར་ལ། །ནོམ་པ་གཡར་བ་ག་གཡར་ཡིན། །རྣམ་ཤེས་གཡེང་བ་འགྲེང་ཅན་ལ། །གང་བའི་གཡང་ནི་འགྲེང་མེད་ཡིན། །གུག་ཅན་དབྱིངས་ནི་ཆོས་དབྱིངས་ལ། །གུག་མེད་དབྱངས་ནི་སྐད་དབྱངས་ཡིན། །གནམ་གྱི་སྐར་མ་ས་སྐར་ལ། །ཁ་དོག་དཀར་བ་ད་དཀར་རོ། །ར་རྟག་ས་སྟག་ལ་ལྟག་རྣམས། །མི་འགྱུར་གཅན་གཟན་མགོ་བོའི་རྒྱབ། །ར་རྡང་ས་སྡང་ལ་ལྡང་རྣམས། །འདོགས་ཐག་གཤེ་དང་སྟན་ལས་ལངས། །ར་རྐུ་ས་སྐུ་ད་དཀུ་རྣམས། །གསང་ལེན་ཞེ་ས་ལུས་ཀྱི་ཟུར། །ར་རྒ་ས་སྒ་ད་དགའ་རྣམས། །ན་ཚོད་བཞོན་ཆས་སེམས་ཡིད་སྤྲོ། །ར་རྔ་ས་སྔ་ལ་ལྔ་རྣམས། །བརྡུང་བྱ་དུས་དང་རྩིས་ཀྱི་གྲངས། །ར་རྦ་ས་སྦ་ལ་ལྦ་རྣམས། །ཆུ་དྲག་མི་མངོན་མགུལ་བའི་རྒྱན། །ར་རྒོ་ས་སྒོ་བ་བགོ་རྣམས། །རི་དྭགས་ཁང་སྒོ་གོས་རྣམས་གྱོན། །ར་རྐ་ད་དཀའ་ས་སྐ་རྣམས། །ཆུ་ལམ་མི་ནུས་ལྕེ་ཡི་ལུས། །ལ་ལྐལ་ས་སྐལ་བ་སྐལ་རྣམས། །མེད་དང་ཐོབ་དང་དུས་ཡིན་ནོ། །ག་གྲལ་ད་དྲལ་བ་བྲལ་རྣམས། །བསྒྲིགས་དང་རལ་བ་གྱེས་པའོ། །ག་གྲ་ད་དྲ་བ་བྲ་རྣམས། །ཚོགས་པ་གོས་བཟོ་སེམས་སྟོར་རོ། །ག་གྲི་ད་དྲི་བ་བྲི་རྣམས། །མཚོན་དང་སྣའི་ཡུལ་ཉམས་པའོ། །ག་གྲེད་ད་དྲེད་བ་བྲེད་རྣམས། །འགྱེད་དང་དུད་འགྲོ་སྐྱེངས་པའོ། །ག་གྲོད་ད་དྲོད་བ་བྲོད་རྣམས། །ཟས་སྣོད་ཚ་བ་ཡིད་དགའ་འོ། །འདི་འདྲའི་ཚིག་མཐུན་ལ་འཁྲུལ་ནས། །ཡི་གེ་གང་བྱུང་བྲིས་གྱུར་ན། །དོན་རྣམས་ལོག་པར་འགྱུར་བའི་ཕྱིར། །རྟག་ཏུ་མཁས་པའི་གཞུང་རྣམས་བསྟེན། །༈ རྣམ་དབྱེ་བརྒྱད་ལས་དྲུག་པ་དང་། །གསུམ་པའི་ཁྱད་པར་ཅུང་ཟད་དབྱེ། །ཆ་ཅན་དང་ནི་ཆ་ཤས་ཀྱི། །བར་གྱི་ཀྱི་སོགས་དྲུག་པའི་སྒྲ། །ཡིན་ཚེ་ས་མཐའ་མི་འཐོབ་དཔེར། །ཁྱོད་ཀྱི་སྐུ་དང་བདག་གི་ལུས། །སྨན་གྱི་བཅུད་དང་མཁས་པའི་བློ། །ལྷ་ཡི་སྤྱན་སོགས་ལྟ་བུའོ། །རྣམ་དབྱེ་གསུམ་པ་བྱེད་ཅན་དང་། །བྱ་བའི་བར་གྱི་ཀྱི་སོགས་ཀྱིས། །ས་མཐའ་ངེས་པར་འཐོབ་དགོས་དཔེར། །ཁྱོད་ཀྱིས་ཆོས་བྱེད་རང་གིས་མཐོང་། །སྨན་གྱི་ནད་གསོས་མང་བོས་བཀུར། །ལྷ་ཡིས་ཆར་ཕབ་མཁས་པས་མཆོད། །ཉི་ཟླས་མུན་སེལ་ལྟ་བུ་སོགས། །རྣམ་དབྱེ་ས་མཐའ་ཡོད་མེད་ཀྱི། །དོན་ལ་ཁྱད་པར་ཆེ་བའི་ཕྱིར། །མཁས་པས་འདི་ལ་ནན་ཏན་མཛོད། །ལེགས་པའི་ཡོན་ཏན་ཀུན་གྱི་གཞི། །ཡི་གེའི་གཙུག་ལག་ཡིན་པའི་ཕྱིར། །བློ་ལྡན་སྐྱེ་བོ་གང་གིས་ཀྱང་། །རྒྱ་ཆེན་གཞུང་ལ་བརྟུན་པ་བསྐྱེད། །མཁས་མཆོག་གསུང་གིས་བསྐུལ་བའི་ངོར། །མདོར་བསྡུས་ཙམ་ཞིག་བརྗོད་པ་འདིས། །དགེ་བའི་དཔག་བསམ་འབྲས་བུ་ལ། །ལུས་ཅན་ཡོངས་ཀྱིས་སྤྱོད་གྱུར་ཅིག །ཅེས་དག་ཡིག་མཁས་པ་དགའ་སྐྱེད་ཅེས་བྱ་བ་འདི་ནི་གསོ་བ་རིག་པའི་གཞུང་ལུགས་མཐའ་ དག་ལ་བློ་གྲོས་ཀྱི་སྤོབས་པ་མཆོག་ཏུ་ཡངས་པ་དགེ་སློང་བསོད་ནམས་བསྟན་པའི་གསུང་ གིས་བསྐུལ་བ་ལྟར། ཡི་གེའི་སྡེབ་སྦྱོར་ལ་སྨྲ་བའི་ལྗགས་ཅུང་ཟད་རིང་བ་དབྱངས་ཅན་རོལ་བའི་འོ་མཚོར་ འབོད་པས། འཛམ་གླིང་ཡོངས་ལ་གྲགས་པའི་མཁས་པ་ཆེན་པོ་ཐོན་མི་སམྦྷོ་ཊ་དང་། རྔོག་ལོ་ཙཱ་བ་བློ་ལྡན་ཤེས་རབ་རྗེ་བྱམས་པ་གླིང་བ། ཞ་ལུ་ལོ་ཙཱ་བ་ཆེན་པོ་དཔལ་ཁང་ལོ་ཙཱ་བ་སོགས་ཀྱི་གསུང་རབ་རྒྱ་མཚོ་ལྟ་བུ་ལས་ ཉེར་མཁོའི་ཆ་རྣམས་བསྡུས་ཏེ་རབ་བྱུང་བཅུ་གཉིས་པའི་མོས་ལྡན་ཞེས་པ་ས་མོ་ཡོས་ ཀྱི་ལོའི་དབོ་ཟླ་བའི་དམར་ཕྱོགས་བཟང་བོ་གཉིས་པར་སྦྱར་བ་ཛ་ཡནྟུ།། །།