ཀྲུང་གོ་བོད་ཀྱི་དྲ་བ།

ཡོན་ཏན་གཞིར་གྱུར་མ།

ཡོང་ཁུངས། : སྐད་འཕྲིན་ལས་བཤུས།   རྩོམ་པ་པོ། : དགེ་རྒན་ཀླུ་རྒྱལ་འབུམ།   སྤེལ་དུས། : 2018-10-09
ཡིག་གཟུགས། :ཆུང་། འབྲིང་། ཆེ།

ཡོན་ཏན་གཞིར་གྱུར་མ། 

མཛད་པ་པོ། རྗེ་ཙོང་ཁ་པ་བློ་བཟང་གྲགས་པ། 

འཆད་ཁྲིད་གནང་མཁན། དགེ་རྒན་ཀླུ་རྒྱལ་འབུམ།

ཁག་དང་པོ།

ཁག་གཉིས་པ།

ཁག་གསུམ་པ།

ཁག་ལྔ་བ། ༼  རྫོགས་སོ།།  ༽


ཡོན་ཏན་ཀུན་གྱི་གཞིར་གྱུར་དྲིན་ཅན་རྗེ། །     

ཚུལ་བཞིན་བསྟེན་པ་ལམ་གྱི་རྩ་བ་རུ། །        

ལེགས་པར་མཐོང་ནས་འབད་པ་དུ་མ་ཡིས། །  

གུས་པ་ཆེན་པོས་བསྟེན་པར་བྱིན་གྱིས་རློབས། ། 

ལན་ཅིག་རྙེད་པའི་དལ་བའི་རྟེན་བཟང་འདི། །

ཤིན་ཏུ་རྙེད་དཀའ་དོན་ཆེ་ཤེས་གྱུར་ནས། །    

ཉིན་མཚན་ཀུན་ཏུ་སྙིང་པོ་ལེན་པའི་བློ། །     

རྒྱུན་ཆད་མེད་པར་སྐྱེ་བར་བྱིན་གྱིས་རློབས། །  

ལུས་སྲོག་གཡོ་བ་ཆུ་ཡི་ཆུ་བུར་བཞིན། །      

མྱུར་དུ་འཇིག་པས་འཆི་བ་དྲན་པ་དང༌། །    

ཤི་བའི་རྗེས་སུ་ལུས་དང་གྲིབ་མ་བཞིན། །    

དཀར་ནག་ལས་འབྲས་ཕྱི་བཞིན་འབྲང་བ་ལ། །

ངེས་པ་བརྟན་པོ་རྙེད་ནས་ཉེས་པའི་ཚོགས། །

ཕྲ་ཞིང་ཕྲ་བ་རྣམས་ཀྱང་སྤོང་བ་དང༌། །     

དགེ་ཚོགས་མཐའ་དག་སྒྲུབ་པར་བྱེད་པ་ལ། །

རྟག་ཏུ་བག་དང་ལྡན་པར་བྱིན་གྱིས་རློབས། །

སྤྱད་པས་མི་ངོམས་སྡུག་བསྔལ་ཀུན་གྱི་སྒོ། །  

ཡིད་བརྟན་མི་རུང་སྲིད་པའི་ཕུན་ཚོགས་ཀྱི། །

ཉེས་དམིགས་རིག་ནས་ཐར་པའི་བདེ་བ་ལ། །

དོན་གཉེར་ཆེན་པོ་སྐྱེ་བར་བྱིན་གྱིས་རློབས། །

རྣམ་དག་བསམ་པ་དེ་ཡིས་དྲངས་པ་ཡི། །    

དྲན་དང་ཤེས་བཞིན་བག་ཡོད་ཆེན་པོ་ཡིས། །

བསྟན་པའི་རྩ་བ་སོ་སོར་ཐར་པ་ལ། །       

སྒྲུབ་པ་སྙིང་པོར་བྱེད་པར་བྱིན་གྱིས་རློབས། །

རང་ཉིད་སྲིད་མཚོར་ལྷུང་བ་ཇི་བཞིན་དུ། །  

མར་གྱུར་འགྲོ་བ་ཀུན་ཀྱང་དེ་འདྲ་བར། །    

མཐོང་ནས་འགྲོ་བ་སྒྲོལ་བའི་ཁུར་འཁྱེར་བའི། །

བྱང་ཆུབ་སེམས་མཆོག་འབྱོངས་པར་བྱིན་གྱིས་རློབས། །

སེམས་ཙམ་བསྐྱེད་ཀྱང་ཚུལ་ཁྲིམས་རྣམ་གསུམ་ལ། །

གོམས་པ་མེད་ན་བྱང་ཆུབ་མི་འགྲུབ་པར། །    

ལེགས་པར་མཐོང་ནས་རྒྱལ་སྲས་སྡོམ་པ་ལ། །   

བརྩོན་པ་དྲག་པོས་སློབ་པར་བྱིན་གྱིས་རློབས། །  

ལོག་པའི་ཡུལ་ལ་གཡེངས་པ་ཞི་བྱེད་ཅིང༌། །    

ཡང་དག་དོན་ལ་ཚུལ་བཞིན་དཔྱོད་པ་ཡིས། །   

ཞི་གནས་ལྷག་མཐོང་ཟུང་དུ་འབྲེལ་བའི་ལམ། ། 

མྱུར་དུ་རྒྱུད་ལ་སྐྱེ་བར་བྱིན་གྱིས་རློབས། །      

ཐུན་མོང་ལམ་སྦྱངས་སྣོད་དུ་གྱུར་པ་ན། །      

ཐེག་པ་ཀུན་གྱི་མཆོག་གྱུར་རྡོ་རྗེ་ཐེག།         

སྐལ་བཟང་སྐྱེ་བོའི་འཇུག་ངོགས་དམ་པ་དེར། །

བདེ་བླག་ཉིད་དུ་འཇུག་པར་བྱིན་གྱིས་རློབས། །

དེ་ཚེ་དངོས་གྲུབ་རྣམ་གཉིས་སྒྲུབ་པའི་གཞི། ། 

རྣམ་དག་དམ་ཚིག་སྡོམ་པར་གསུངས་པ་ལ། ། 

བཅོས་མ་མིན་པའི་ངེས་པ་རྙེད་གྱུར་ནས། །   

སྲོག་དང་བསྡོས་ཏེ་སྲུང་བར་བྱིན་གྱིས་རློབས། །

དེ་ནས་རྒྱུད་སྡེ་སྙིང་པོ་རིམ་གཉིས་ཀྱི། །          

གནད་རྣམས་ཇི་བཞིན་རྟོགས་ནས་བརྩོན་པ་ཡིས། །

ཐུན་བཞིའི་རྣལ་འབྱོར་སྤྱོད་ལས་མི་གཡེལ་བར། ། 

དམ་པའི་གསུང་བཞིན་སྒྲུབ་པར་བྱིན་གྱིས་རློབས། །

དེ་ལྟར་ལམ་བཟང་སྟོན་པའི་བཤེས་གཉེན་དང༌། །

ཚུལ་བཞིན་སྒྲུབ་པའི་གྲོགས་རྣམས་ཞབས་བརྟན་ཅིང༌། །

ཕྱི་དང་ནང་གི་བར་དུ་གཅོད་པའི་ཚོགས། །    

ཉེ་བར་ཞི་བར་བྱིན་གྱིས་བརླབ་ཏུ་གསོལ། །    

སྐྱེ་བ་ཀུན་ཏུ་ཡང་དག་བླ་མ་དང་། །          

འབྲལ་མེད་ཆོས་ཀྱི་དཔལ་ལ་ལོངས་སྤྱོད་ཅིང་། །

ས་དང་ལམ་གྱི་ཡོན་ཏན་རབ་རྫོགས་ནས། །     

རྡོ་རྗེ་འཆང་གི་གོ་འཕང་མྱུར་འཐོབ་ཤོག །     

ཅེས་པ་འདི་ནི་རྗེ་ཙོང་ཁ་པ་བློ་བཟང་གྲགས་པས་མཛད་པའོ། ། 




     སློབ་དཔོན་ཆེན་མོ་ཀླུ་རྒྱལ་འབུམ་ལགས་ནི1952ལོར་རེབ་གོང་ཐོ་ཀྱྰ་ཡུལ་ཚོར་སྐྱེས་པ་དང་། མཚོ་སྔོན་མི་རིགས་སློབ་ཆེན་གྱི་ཞིབ་འཇུག་སློབ་མའི་མཛུབ་སྟོན་དགེ་རྒན་ཡིན་པ་དང་། མཚོ་སྔོན་ཞིང་ཆེན་དམངས་ཆེན་རྒྱུན་ཨུ་ལྷན་ཚོགས་ཀྱི་ཨུ་ཡོན་ཡིན། ཁོང་གི་ཞིབ་འཇུག་གི་ཁ་ཕྱོགས་ལ་གཙོ་བོ་ནང་བསྟན་རིག་པ་དང་ཚད་མ་ཡིན་ཞིང་ཞིབ་འཇུག་གི་གྲུབ་འབྲས་མང་པོ་ཞིག《ཀྲུང་གོའི་བོད་རིག་པ》སོགས་རྒྱལ་ནང་གི་དུས་དེབ་གཙོ་གྲས་ཁག་ཏུ་བཀོད་ཡོད་པ་དང་། 1999ལོར་ཙིན་ཞོན་ཞིན་སློབ་གསོའི་བྱ་དགའི་ཐེབས་རྩའི་བྱ་དགའ་ཐོབ་པ་དང་། 2004ལོའི་ཁོང་གིས་འཆད་ཁྲིད་གནང་བའི“བོད་ཀྱི་གནའ་རབས་རྩོམ་རིག”ལ་རྒྱལ་ཡོངས་ཀྱི་གྲངས་ཉུང་མི་རིགས་སྐད་ཡིག་གིས་འཆད་ཁྲིད་གནང་བའི“རྒྱལ་ཁབ་རིམ་པའི་བསླབ་ཚན་ལེགས་གྲས”ཀྱི་མཚན་སྙན་ཐོབ།  །


རྩོམ་སྒྲིག་པ། : མཁའ་འགྲོ་ཚེ་བརྟན།