མདུན་ཤོག- རིག་གནས་འཚོ་བ།- རྩོམ་རིག་ཆེད་སྒྲིག- མཛེས་སེ།

ལི་ཡུལ།

རྩོམ་པ་པོ། མཛེས་སེ།    2013-05-24 09:09

    གངས་དཀར་རི་བོ་མཐོང་དུས།

    སྙིང་ལ་རུས་པ་ཡོད་སོང་།

    སྦྲང་དཀར་རྩམ་པ་མེད་པས།

    ཟས་བརྒྱ་ཟོས་ཀྱང་མི་འགྲང་།

    

    མིང་དོན་མཐུན་པའི་ཉིན་བྱེད།

    རྒྱང་ནས་བརྩེ་བས་གཟིགས་འདུག།

    རྟ་མཆོག་ལ་རྒྱ་འགྱུར་མེད།

    སྒ་ཆས་རྒྱབ་ནས་མི་འདོར།

    

    གནའ་བོའི་གྲོང་ཁྱེར་འཇིག་གྱུར།

    ཐང་ན་གཞས་ཤིག་ལུས་འདུག།

    གྲོ་ནས་གསེར་དང་མཚུངས་ཡང་།

    ཕྱུགས་ཀྱིས་འབྲོག་ར་དྲན་པ།

    

    ཕྱོགས་ཀྱི་དགེ་འདུན་ཁྲི་སྟོང་།

    ལྡེབས་རིས་ཕག་ཏུ་སྒོམ་ཞིང་།

    དུས་གསུམ་མུན་སེལ་སྒྲོན་མེ།

    བྱེ་མའི་ཀླུང་དུ་གཟིམ་པ།

    

    ཚ་ཟེར་འགོག་པའི་གདུགས་དེས།

    ས་གཞིའི་མིག་ཟུང་བཀག་བྱུང་།

    སྦྲང་ཆར་སྦྲུམ་པའི་སྤྲིན་གྱིས།

    སུ་ཡི་བརྩེ་དུངས་བརླན་ནམ།

    

    ཨ་སྔོན་དབྱིངས་ཀྱི་ཕྱེད་ཀ།

    མྱ་ངམ་ཐང་གིས་རྨས་སོང་།

    དྭངས་བསིལ་གཙང་བོའི་ཁོག་སྨད།

    རྒྱལ་ཁམས་གང་ལ་འགྲིམས་སམ།

    ༢༠༠༨ལོའི་ཟླ༧པར་ལི་ཡུལ་དུ།

 

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག