མདུན་ཤོག- རིག་གནས་འཚོ་བ།- རྩོམ་རིག་ཆེད་སྒྲིག- ཚེ་རིང་འཚོ།

དབྱངས་རྟ་མི་གཅིག་པའི་གཞས་ཆུང་།

རྩོམ་པ་པོ། ཚེ་རིང་འཚོ།    2013-05-13 09:51

རྟ་ཕོ་སྒྲོག་ལས་ཐོལ་གྱིས་ཤོར་བའི་ས་ལམ་ཡངས་བོའི་ཕ་མཐའ་ནས།།

རྡུལ་གྱིས་སྨུག་ལོང་བར་སྣང་གང་སྟེ་རང་དབང་འཚེར་སྐད་སྒྲོག་པའི་ཚེ།།

རྟ་བདག་བུ་ལོ་སྙིང་ཁ་དཀྲོགས་པས་ཞགས་ཐག་ཨ་ལོང་དགུང་དུ་བསྐོར།།

རྐང་བཞི་དུད་འགྲོའི་རང་དབང་འཕྲོག་པའི་མི་ཡི་ཉེས་བ་སུ་ལ་བཤད།།

 

དགུང་གི་འཇའ་ཚོན་མདངས་མཛེས་ཅན་པོར་ཆར་ཤུལ་ཉི་མའི་བསུ་མ་ཡོད།།

ས་ཡི་མེ་ཏོག་དྲི་བསུང་ཅན་པོར་དྲོད་འཇམ་ཉི་མའི་འོད་སྣང་དགོས།།

ས་གནམ་གཉིས་ཀྱི་མཛེས་བ་འདི་ཡང་རྟ་བདུན་དབང་བོར་བྲལ་མེད་ཡིན།།

དྭ་ཕྲུག་འཁྱམ་པོར་སེམས་ཀྱིས་རེ་སའི་སྐྱབས་གནས་ཡོད་ཀྱང་ཅི་ལ་སྐྱོན།།

 

དབྱར་ཟླ་དྲོན་མོའི་ཚ་རླབས་ཁྲོད་ནས་ངལ་བའི་རྔུལ་ཆུ་ཁྲོམ་ཁྲོམ་བཞུར།།

དགུན་འཁྱག་གྲང་མོའི་ལྷག་རླུང་ཁྲོད་ནས་འཁྱག་པའི་ལུས་ཕུང་འདར་སུག་སུག།

དྲོད་འཁྱག་གཉིས་ཀྱི་མནར་གཅོད་འདི་ལ་རྒོལ་བའི་སེམས་ནད་རབ་སྤངས་ཏེ།།

ཞི་འཇགས་ཐབས་ཀྱི་ཨ་ལོང་བསྐོར་བའི་སྙིང་སྟོབས་སེམས་ཀྱི་གཏིང་ལ་སིམ།།

 

ལུས་སེམས་གཉིས་ཀྱི་འཕར་རྩའི་བར་ན་ཚོར་བ་སྐྱུར་མོའི་ཟུག་རྔུ་ཞིག།

ཁ་ལྕེ་གཉིས་ཀྱི་གཏམ་བརྗོད་བར་ན་སྨྲེང་གླུའི་སྐྱོ་མགུར་ཐབས་ཟད་ཅིག།

ངག་གི་འགྱུར་ཁུག་ཀྱ་ཀྱུའི་བར་ན་དབང་མེད་ཤོར་བའི་མིག་ཆུ་ཞིག།

དབྱངས་རྟ་མི་གཅིག་གཞས་ཆུང་སྐྱོ་བོ་ཁྱོད་ལ་བླངས་བའི་སྨྲེ་ངག་ཡིན།།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག