མདུན་ཤོག- རིག་གནས་འཚོ་བ།- རྩོམ་རིག་ཆེད་སྒྲིག- རྟོགས་སད་ལྷ་མོ།

ཡུལ་ཤུལ ངའི་བོད་པ་ཚོ།

རྩོམ་པ་པོ། རྟོགས་སད་ལྷ་མོ།    2013-05-10 10:50

༤. ༡༤ ཡུལ་ཤུལ་དུས་དྲན་ལ་ཕུལ་བ།

ད་ནིང་ རབ་ཏུ་འཚེར་བའི་ཉི་འོད་ཅིག

ངའི་ཁང་ཆུང་གི་སྒེའུ་ཁུང་ལས་འཕྲོས་ཡོང

ད་ནིང་ རབ་ཏུ་དྭངས་པའི་ནམ་མཁའ་འདིས

ས་གཞི་ཡི་རྡུལ་ཕྲན་དག་བཙོན་དུ་བཅུག་ཟིན

ད་ནིང་ ངས་ཁྱེད་ཚོ་ལ་ཉི་འོད་ཀྱི་དྲོད་ཐིགས་སྤར་མོ་གང་

མིག་ཆུ་དང་བསྲེས་ནས་བསྐུར་ཡོད

ཡུལ་ཤུལ་ ངའི་བོད་པ་ཚོ

མགོ་བོ་དགྱེ་ནས་ལྟོས་དང་

སྤྲིན་དཀར་སྲབ་མོ་ཞིག་ཁུ་སིམ་མེར

ཁྱེད་ཚོའི་གམ་དུ་བཅར་ཡོང་ན

དེ་ནི ངའི་སེམས་པ་ཡི་དྲོད་མལ་གཅིག་པུ་ཡིན་པས

དེ་རིང་ཁྱེད་ཚོར་ཕུལ་ཡོད

ཡུལ་ཤུལ་ ངའི་བོད་པ་ཚོ

ཁྱེད་ཚོ་འགྲོ་ས་དེ་མུན་ནག་རེད་བསམས་ཏེ

ངས་ཇོ་བོའི་སྐུ་མདུན་ན་མར་མེ་གང་མང་བསྒྲོན་ཡོད

ཁྱེད་ཚོ་སྡོད་ས་དེ་གྲང་གི་བསམས་ཏེ

ངས་གློ་སྙིང་གི་དྲོད་འཁོལ་ཡོད་ཚད་

ཁྱེད་ཚོར་ནན་གྱིས་གླན་ནས་ཡོད

ཡུལ་ཤུལ་ ངའི་བོད་པ་ཚོ

དེ་རིང་ཁྱོད་ཚོས་མྱ་ངན་གྱི་ཞྭ་མོ་དེ་ཕར་ལ་བསྐྱུར་ནས

མགོ་བོ་དགྱེ་ནས་ཐེངས་གཅིག་ལྟོས་དང་

ཁྱེད་ཚོ་བྲེལ་འཚུབ་ཀྱིས་སོང་ཤུལ་ན

ང་ཚོས་མིག་ཆུ་དག་ཧུར་བརྩོན་གྱིས་ཕྱི་ནས

ཁྱེད་ཚོར་གནས་མལ་ཞིག་བཅོས་ནས་བསྒུགས་ཡོད།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག