མདུན་ཤོག- རིག་གནས་འཚོ་བ།- རྩོམ་རིག་ཆེད་སྒྲིག- ཁྲི་སེམས་དཔའ།

མཚན་མོ། ད་དུང་མཚན་མོ།

རྩོམ་པ་པོ། ཁྲི་སེམས་དཔའ།    2013-04-26 14:50

ང་རང་མཚན་གྱི་སྨག་རུམ་ལ་སྐྲག་སྟེ།

འཇིག་རྟེན་འོད་ངོགས་སུ་དངངས་འགྲོས་ཀྱིས་བསླེབས་དུས།

མིག་ཟུང་དང་འཛུམ་མདངས་གྲངས་མེད་ཀྱི་གོ་དོན་ནི།

མཚན་སྨག་གི་སྔོན་འགྲོ་དང་སྟ་གོན་དང་རྒྱབ་ལྗོངས་དང་བློས་བསླངས་ཡིན་པ་ཚོར།

དེ་དུས་ངས་དཀར་ནག་གི་དབྱེ་བ་ཡང་ཉིན་བྱེད་ཀྱིས་གསལ་མ་གསལ་དང་།

མུན་ནག་གིས་བསྒྲིབས་མ་བསྒྲིབས་ཤིག་ལ་འབྲེལ་བ་མེད་པ་གཞི་ནས་གོ་སོང་།

 

མཚན་མོ། མགོ་སྦྲ་སྨུག་པོའི་འོག་གི་མེས་པོའི་རྨི་ལམ་གྱི་ཁ་དོག་དང་འདྲ་བྱུང་།

གཏིང་རིང་བའི་ངལ་དུབ་ཀྱི་རྨ་ཁར་ཟུག་པའི་ཚེར་མ་རྣོན་པོ་དེས།

མུན་ནག་གི་གདོང་ལ་བུད་ནས་རང་ཉིད་ཀྱི་རུས་རྐང་མེ་ལ་སྦར་མཁན།

ནམ་ཡང་འོད་སྣང་ལ་འཐམ་འཁྱུད་དང་འོ་སྦྱོར་བྱེད་པའི །

གནམ་འོག་གི་ཁེར་རྐྱང་གི་རྐང་ཐང་པས།

སེམས་པའི་དྭངས་གཙང་བསྲུང་ཕྱིར།

ཁ་བ་བུ་ཡུག་གི་ཀློང་དུ་མཆོངས་ཏེ།

མཚན་གཞུང་དུ་རྨི་ལམ་གྱི་ས་བོན་གཏོར།

 

སྨག་ཧ་ཅང་གནག

མཚན་མོའི་གཅོང་རོང་དུ་ལུས་པའི་ཁེར་རྐྱང་གི་སེམས་པ་ཁོ་ན།

མཚན་རླུང་ཁྲོད་འདར་གྱིན་འདར་གྱིན་ཟླ་བ་ཟད་པོ་ཞིག་ལ་སྙིང་གཏམ་གླེངས།

མཚན་སྨག་གིས་སྙིང་ཙག་ཤད་སྟེར་དུས།

འོད་ལ་ཕྱོགས་པའི་འབུ་མེ་ལྕེབས་བཞིན།

ཁ་ཕྱོགས་ཐམས་ཅད་ཁ་ཕྱོགས་ཀྱིས་སྟོང་ཞིང་།

སྐྱོ་སྣང་ཐམས་ཅད་སྐྱོ་སྣང་གིས་གཙེས་ཏེ།

ཁྱོད་ཀྱིས་མཆོད་མེ་རྐོང་གང་གི་ཁ་ནས་རང་དབང་བསྙེགས།

 

མཚན་མོའི་མུན་སྨག་ལ་ལོབས་པའི་མིག་ཟུང་།

སེམས་ཀྱི་རྒྱབ་འགལ་དུ་ལངས་ཏེ།

གཉིད་ཀྱི་བདེ་བ་ལ་ཚིམ་མེད་དུ་རོལ་དུས།

རྨི་ལམ་གྱི་གངས་ཐང་དུ་ཅེ་སྤྱང་གི་སུག་རྗེས་རིང་དུ་འཐེན།

མཚན་མོར་རང་གི་སྙིང་ལ་སྦར་འདྲད་བྱེད་མཁན་ག་ཚོད་ཡོད་ཨང་།

མཚན་མོ། ད་དུང་མཚན་མོ་རེད།

མཚན་མོ་ཁོ་ན་ང་རང་གཉིད་འོངས་ཐབས་བྲལ་བའི་རྒྱུ་དང་རྐྱེན་ཡིན་པ་སུ་ལ་གསང་།

                 2013/1/12

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག