ལུག་ཁྱུ་ཞིག་གི་འཚོ་སྟངས།

     —གློག་བརྙན《མི་གསོད་གཤེད་མ》བལྟས་རྗེས།
    རྐང་ལམ་གྱི་འཕར་རྩ་བཞུར་མགོ་བརྩམས་པ་ནས།
    ལུག་ཁྱུ་དེས་ནམ་མཁའ་དང་གྲིབ་གཟུགས་སྔས་སུ་བསྟེན།
    གཏམ་རྒྱུད་མང་པའི་སྤང་ཐང་དེ་ལ་ཉན་བཞིན།
    ནགས་ཚལ་གྱི་གསང་ཚིག་འབར་བའི་མཚན་ལྗོངས་ལ་བལྟས།    

    གཙང་ཆུ་དང་དབྱར་ཀའི་སྐོར་བྲོར་འཇུས།
    སྙན་འཇེབས་མེད་པའི་ལོ་ཏོག་ལ་རྔུལ་ཆུ་གཏོར།
    རེ་ཞིག་ལག་ངར་དང་བདེན་ལུགས་ཕྱར་བས།
    རྐང་ལམ་སྟེང་མེ་ལྕེའི་ཚོགས་ལ་གཡོ་འགུལ་བྱུང་།
    མེ་དཔུང་དང་ས་ནག་ཁྲོད་འཚང་པའི་ལུག་ཁྱུས།
    སྔར་བཞིན་མཚམས་སྤྲིན་མེད་པའི་ཞོགས་པ་ལ་རྒྱང་གླུ་ལེན།
    སྔར་བཞིན་མནར་གཅོད་མང་བོའི་ལྷས་རའི་ནང་མི་ཆུ་འཐུང་།    

    ཞི་འཇམ་གྱི་འབའ་དབྱངས།
    ཚ་དྲོད་འབར་བའི་སྨྲ་བརྗོད།
    ཉི་མས་ཁྱེར་ནས་ཡང་ཡང་དུར་ཁྲོད་དུ་བསྙེགས།    

    གྲགས་འགུལ་མང་པོའི་ཕ་ཡུལ་དུ།
    ལུག་ཁྱུ་དེས་རི་ཆེན་ཉིལ་བའི་སྒྲ་ལ་ཉན་བཞིན།
    ཐང་ཆེན་དུ་སྤྱང་ཚོགས་དང་དཔུང་ཤ་བརྡར།
    དུས་དེར།
    སླར་ཡང་གཙང་ཆུ་དམར་པོ་ཐེངས་ཤིག་བཞུར།
    དམར་དྲི་བྲོ་བའི་ས་སྲོད་ཀྱིས་ཀྱང་ཡང་བསྐྱར་སྨྲེ་ངག་བཏོན།

    1993.5.7ཉིན་བྲིས།