མདུན་ཤོག- རིག་གནས་འཚོ་བ།- རྩོམ་རིག་ཆེད་སྒྲིག- ཞི་བདེ་ཉི་མ།

ནམ་མ་གསལ་གོང་ལ།

རྩོམ་པ་པོ། ཞི་བདེ་ཉི་མ།    2013-04-24 09:41

    ནམ་མ་གསལ་གོང་ལ།
    སུ་ཞིག་གིས་གཞས་བཏང་སོང་།    

    གཞས་གདངས་དེ་ཁང་བའི་རྒེའུ་ཁུང་བརྒྱུད་ནས།
    ངའི་རྨི་ལམ་དུ་བབས་བྱུང་།
    ངས་ད་དུང་ཕ་ཡུལ་དུ་རྨི་ལམ་རྨིས་བཞིན་པ་སུས་རྟོགས།
    གཞས་གདངས་དེ་ངའི་ཡབ་མེས་ཀྱི་བང་སོ་ནས་འཕུར་སྟེ།
    རི་རབ་དང་ནགས་ཚལ་གྱི་དཀྱིལ་དབུས་ནས།
    རླུང་དྲིལ་བཞིན་ངའི་བྲང་ཁོངས་ལ་བབས་སོང།    

    ང་བེམ་པོ་བཞིན་འགྲེ་ལོག་མེད་པ་མིན།
    ང་རྡོ་བ་བཞིན་དབུགས་རྒྱུ་མེད་པ་མིན།
    ནམ་མ་གསལ་གོང་ང་མལ་ལས་ལངས་པའི་སྟ་གོན་མེད།    

    ནམ་མ་གསལ་གོང་།
    གཙང་མོའི་ངོགས་ནས་གཞས་ཅིག་བཏང་སོང་།
    གཞས་ཚིག་དེ་ལྷ་མོ་ཞིག་བཏང་བའི།
    བདེན་པའི་མགུར་དབྱངས་ཡིན་ནམ།    

    གཞས་ཚིག་དེ་ཞོགས་པའི་རླུང་བུ་དང་སྡེབས་ནས།
    ངའི་མིག་ཆུས་བརླན་པའི་ཞོགས་པ་ལ་སླེབས་ཡོང་།    

    ཨ་མ་ལགས། ནམ་མ་གསལ་གོང་གི་གཞིས་ཁྱིམ་འདི།
    ངའི་མིག་ཆུའི་ཁྲོད་ཀྱི་ཆེས་མཐའ་མཇུག་གི་གྲོང་ཚོ་ག་ལ་ཡིན།
    མདང་དགུང་གི་མིག་ཆུས་ངའི་སྔས་མགོ་བརླན་པར་མཛད་པ།
    ཞོགས་པའི་མཛེས་སྡུག་གི་སྟ་གོན་རེད།    

    1992.1.9ཉིན་ཟི་ལིང་།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག