—མཚོ་སྔོན་མི་རིགས་དཔེ་སྐྲུན་ཁང་གིས《སྔོན་བྱོན་མཁས་པའི་ངག་རིག་རིན་ཆེན་གཏེར་མཛོད》ཅེས་པ་པར་སྐྲུན་འགྲེམ་སྤེལ་བྱས་པ།
ཀྲུང་གོ་བོད་ཀྱི་དྲ་བའི་འཕྲིན། (གསར་འགོད་པ། རིག་འཛིན།)ཟླ1པའི་ཚེས26ཉིན། མཚོ་སྔོན་མི་རིགས་དཔེ་སྐྲུན་ཁང་གིས་པར་སྐྲུན་བྱས་པའི་རྒྱལ་ཁབ་ཀྱི་གཙོ་གནད་དཔེ་དེབ་ལས་གཞི་སྟེ།པོད་ཉི་ཤུ་ཅན་གྱི་དཔེ་ཚོགས《སྔོན་བྱོན་མཁས་པའི་ངག་རིག་རིན་ཆེན་གཏེར་མཛོད》འགྲེམ་སྤེལ་བཞུགས་མོལ་ཚོགས་འདུ་ཟི་ལིང་དུ་བསྡུས།
《སྔོན་བྱོན་མཁས་པའི་ངག་རིག་རིན་ཆེན་གཏེར་མཛོད》དཔེ་ཚོགས།
རྒྱུས་ལོན་ལྟར་ན།《སྔོན་བྱོན་མཁས་པའི་ངག་རིག་རིན་ཆེན་གཏེར་མཛོད》ཅེས་པའི་དཔེ་ཚོགས་འདི་ནི། མཚོ་སྔོན་དགེ་འོས་སློབ་གྲྭ་ཆེན་མོའི་དགེ་རྒན་ཆེན་མོ་རིན་ཆེན་བཀྲ་ཤིས་དང་། མཚོ་སྔོན་མི་རིགས་དཔེ་སྐྲུན་ཁང་གི་ཞུ་ཆེན་པ་བསོད་ལོ། མཚོ་སྔོན་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་རིན་ཆེན་རྡོ་རྗེ་བཅས་ཀྱིས་ལོ་ངོ་དགུའི་རིང་གི་དཀའ་སྤྱད་འབད་བརྩོན་བརྒྱུད་དེ་འདེམ་སྒྲིག་བྱས་པ་ཞིག་ཡིན། དཔེ་ཚོགས་འདིར་དུས་རབས་རིམ་བྱོན་གྱི་མཁས་པ་ཉིས་བརྒྱ་ལྷག་གིས་ཤུལ་ནོམ་དུ་བཞག་པའི་རྩོམ་རིག་བརྩམས་ཆོས་ལས། ཕུལ་དུ་བྱུང་བའི་ངག་རིག་གི་བརྩམས་ཆོས་རིང་ཐུང་ཅི་རིགས་ཆིག་སྟོང་སུམ་བརྒྱ་ལྷག་བདམས་ཡོད་པ་དང་། བརྩམས་ཆོས་དག་དུས་ཀྱི་ཆ་ནས་ཐུ་བྷོད་རྒྱལ་རབས་ནས་དུས་རབས་ཉེར་གཅིག་པའི་བར་གཏུགས་ཡོད་པ་དང་། ཡུལ་གྱི་ཆ་ནས་མདོ་དབུས་ཁམས་གསུམ་གྱི་ཡུལ་གྲུ་ཡོངས་སུ་འདུས་པ། གྲུབ་མཐའི་ཆ་ནས་ཆོས་བོན་གཉིས་ཏེ། ཆོས་ལས་ཀྱང་ས་དགེ་བཀའ་རྙིང་ཇོ་ནང་ཞི་བྱེད་སོགས་བོད་ཀྱི་གྲུབ་མཐའ་ཡོངས་སུ་ཁེབས་པ། རྩོམ་ལུས་ཀྱི་ཆ་ནས་བསྟོད་རྩོམ་དང་། གསོལ་འདེབས། སྐྱེས་རབས། རྣམ་ཐར། རྟོགས་བརྗོད། ཞལ་གདམས། བསླབ་བྱ། ལེགས་བཤད། མགུར་མ། ཆབ་ཤོག སྙན་ངག་ཆེན་པོ། སྙན་ངག་ཆུང་ངུ་། སྒྲུང་། གཏམ། ཟློས་གར། བཤད་པ། ཚིག་བཀྲ། བསྔོ་བ་སྨོན་ལམ་ཤིས་བརྗོད་སོགས་བོད་ཀྱི་སྲོལ་རྒྱུན་རྩོམ་ལུས་ཕལ་མོ་ཆེ་འདུ་བ་སོགས་མདོར་ན་བརྗོད་དོན་འདུ་ཕུད་ཆེ་ཞིང་གཏིང་ཟབ་པ་དང་། དོན་གྱི་གནད་འགྲིལ་བ། ཚིག་སྦྱོར་ཕུན་སུམ་ཚོགས་ཤིང་སྙན་འཇེབས་ལྡན་པ། རྒྱུད་འཁུལ་ཞིང་དང་བ་འདྲེན་པའི་ཁྱད་ཆོས་ཀྱིས་ཀུན་ནས་ཕྱུག་པས་ན། དཔེ་ཚོགས་འདི་ནི་བོད་ཀྱི་དུས་སྐབས་སོ་སོའི་ལོ་རྒྱུས་རིག་གནས་དང་། སྤྱི་ཚོགས་འཚོ་བ། ངག་རིག་སྒྱུ་རྩལ། གོམས་སྲོལ་རིག་གནས་སོགས་ལ་བལྟ་བའི་མེ་ལོང་ཞིག་རེད་ཅེས་བརྗོད་ཆོག
དཔེ་ཚོགས་ཀྱི་འདེམ་སྒྲིག་པ་རིན་ཆེན་རྡོ་རྗེ་དང་རིན་ཆེན་བཀྲ་ཤིས་དང་བསོད་ལོ།
དཔེ་ཚོགས་འདིའི་སྒྲིག་སྟངས་ཀྱི་ཆ་ནས་སྔོན་བྱོན་མཁས་པ་གསེར་རིའི་ཕྲེང་བ་ལྟར་བྱོན་པ་ལས་དུས་ཀྱི་སྔ་གཞུག་གི་གོ་རིམ་ལྟར་བསྒྲིགས་པ་གཞིར་བཞག་སྟེང་། ཀློག་མཁན་གྱིས་བལྟ་བདེ་བའི་ཆེད་དུ་བརྩམས་ཆོས་ཀྱི་སྔོན་དུ་རྩོམ་པ་པོའི་ལོ་རྒྱུས་མདོར་བསྡུས་རེ་ཡང་བཀོད་ཡོད། དེབ་འདིར་འཁོད་པའི་རྩོམ་ཡིག་དག་ནི་ད་སྔ་དཔར་དུ་བཀོད་ཟིན་པའི་མཁས་པའི་གསུང་འབུམ་དང་། དཔར་དུ་མ་བཀོད་པར་དགོན་པ་དང་། རིག་དངོས་སྡེ་ཁག ལོ་རྒྱུས་ཡིག་ཚང་སྡེ་ཁག སྒེར་གྱིས་ཉར་བའི་ཤིང་དཔར་དང་ལག་བྲིས་མ་དཔེ་རྒྱུན་དཀོན་པོ། ཕྱི་རྒྱལ་དུ་འཁྱར་བའི་ཡིག་ཚང་དཀོན་པོའི་རིགས་ལས་ཕུལ་དུ་བྱུང་བའི་རྩོམ་རིག་བརྩམས་ཆོས་དག་བདམས་ཤིང་། དེ་དག་གཤིབ་བསྡུར་དང་བསལ་གསེས་བྱས་ནས་བསྒྲིགས་ཡོད་པས། སློབ་གྲྭ་ཆེན་མོའི་གནའ་རྩོམ་དང་རྩོམ་རིག་ལོ་རྒྱུས། བོད་ཀྱི་རྩོམ་གཞུང་བཅས་ཀྱི་རིག་ཚན་འཛུགས་སྐྲུན་བྱེད་པ་དང་། བོད་ཀྱི་སྲོལ་རྒྱུན་རྩོམ་རིག་ལ་ཞིབ་འཇུག་དང་སློབ་གཉེར་བྱེད་པ་སོགས་ཀྱི་ཐད་མཐུན་རྐྱེན་གྱ་ནོམ་པ་སྦྱར་ཡོད།
དཔེ་ཚོགས་པར་སྐྲུན་འགྲེམ་སྤེལ་བཞུགས་མོལ་ཚོགས་འདུར་ཞུགས་པའི་མགོ་ཁྲིད་པ་དང་ཆེད་མཁས་པ།
ཐེངས་འདིའི་ཚོགས་ཞུགས་ཆེད་མཁས་པ་དག་གིས་ཀྱང་དཔེ་ཚོགས་འདིའི་རིན་ཐང་གི་ཆ་ལ་ཚད་མཐོའི་གདེང་འཇོག་གནང་བ་སྟེ། 《སྔོན་བྱོན་མཁས་པའི་ངག་རིག་རིན་ཆེན་གཏེར་མཛོད》འདིར་བདམས་པའི་རྩོམ་ཡིག་དག་ནི་བོད་ཀྱི་རྩོམ་རིག་ལོ་རྒྱུས་ཁྲོད་མིང་དུ་གྲགས་པའི་མཁས་པ་དང་རྩོམ་པ་པོ་དག་གི་བརྩམས་ཆོས་ཁོ་ན་ཡིན་པས། དུས་རབས་ཀྱི་ཁྱད་ཆོས་དང་རྩོམ་རིག་གི་རང་བཞིན་མངོན་པར་གསལ་བ་དང་། བོད་ཀྱི་ཆོས་བརྒྱུད་གྲུབ་མཐའ་མི་འདྲ་བ་དང་རྩོམ་ལུས་མི་འདྲ་བ། རྩོམ་གཤིས་མི་འདྲ་བ་ཕལ་མོ་ཆེ་འདུ་བས། བརྗོད་བྱ་རྒྱ་ཆེ་ཞིང་འདུ་ཕུད་ཆེ་བའི་ཁྱད་ཆོས་དང་ལྡན་པ་བཅས། བོད་ཀྱི་དུས་རབས་རིམ་བྱོན་གྱི་རྩོམ་རིག་གི་འཕེལ་རྒྱས་དང་རྩོམ་གཤིས་ཀྱི་འགྱུར་བ་སོགས་ཇི་བཞིན་དུ་མངོན་ཡོད་པས། མིག་སྔར་མ་ལག་ཆ་ཚང་བའི་སྔོན་བྱོན་མཁས་པའི་ངག་རིག་བརྩམས་ཆོས་གྲགས་ཅན་གྱི་དཔེ་ཚོགས་ཤིག་རེད།
དཔེ་ཚོགས་པར་སྐྲུན་འགྲེམ་སྤེལ་བཞུགས་མོལ་ཚོགས་འདུའི་ཡུལ་དངོས།
དུས་ཡུན་རིང་མོ་ཞིག་ལ། རྩོམ་རིག་བརྩམས་ཆོས་ཚུད་པའི་ཡིག་ཚང་དཀོན་པོ་མང་པོ་ཞིག་དགོན་པ་དང་མི་སྒེར་བས་བདག་ཏུ་ཉར་ཏེ་ཁྲོམ་བསྒྲགས་མ་བྱས་པས། མི་སེར་དཀྱུས་མ་དག་ལ་དེ་དག་གི་ལོ་རྒྱུས་ཀྱི་རིན་ཐང་དང་རྩོམ་རིག་གི་རིན་ཐང་ལ་བལྟ་བའི་གོ་སྐབས་ཤིན་ཏུ་ཉུང་། ད་རེས་དཔེ་ཚོགས་འདི་སྡུད་སྒྲིག་པར་སྐྲུན་བྱས་པ་ལས། སྔོན་ཆད་ཀློག་མཁན་གྱི་མཐོང་ལམ་དུ་མ་གྱུར་པའི་སྔོན་བྱོན་མཁས་པའི་ངག་རིག་གི་བརྩམས་ཆོས་མང་པོ་གསར་དུ་ཐོན་པས། བོད་ཀྱི་རྩོམ་འབྱུང་ལོ་རྒྱུས་ལ་ངོས་འཛིན་གསར་བ་འབྱུང་སྲིད་པ་དང་། རིག་གཞུང་ཞིབ་འཇུག་དང་སློབ་ཁྲིད་སོགས་ཀྱི་བྱ་བའི་ཐད་སྟབས་བདེ་གང་ལེགས་བསྐྲུན་ཡོད་པས་རིན་ཐང་བྲལ་བའི་དཔྱད་གཞིའི་རྒྱུ་ཆ་ཞིག་ཏུ་གྱུར་ཡོད།
དཔེ་ཚོགས་པར་སྐྲུན་འགྲེམ་སྤེལ་བཞུགས་མོལ་ཚོགས་འདུའི་ཡུལ་དངོས།
《སྔོན་བྱོན་མཁས་པའི་ངག་རིག་རིན་ཆེན་གཏེར་མཛོད》འདི་རྩོམ་ལུས་ཀྱི་ཁྱབ་རྒྱ་དང་བདམས་པའི་བརྩམས་ཆོས་གང་ལ་བལྟས་ཀྱང་། མིང་དོན་མཚུངས་པའི་བོད་ཀྱི་དུས་རབས་རིམ་བྱོན་གྱི་རྩོམ་ཡིག་གཅེས་བསྡུས་ཤིག་ཏུ་གྲུབ་ཡོད་པས། མེད་པ་གསར་སྐྲུན་དང་ཆད་པ་ཁ་གསབ་ཀྱི་དོན་སྙིང་ལྡན་པ་ཡིན། ལྷག་པར་དུ་མིག་སྔར་བོད་ཀྱི་མཐོ་རིམ་སློབ་གྲྭ་ཁག་གི་གནའ་རབས་རྩོམ་རིག་སློབ་དེབ་ཁྲོད་བདམས་མེད་པའི་དཔེ་ཚོགས་འདིའི་ཁྲོད་ཀྱི་མཁས་པ་མང་པོ་ཞིག་གི་བརྩམས་ཆོས་དག་ལ་མཚོན་ན། ཡིག་ཚང་གི་རིན་ཐང་དང་བཀོལ་སྤྱོད་ཀྱི་རིན་ཐང་ཆེན་པོ་ལྡན་པས། བོད་ཀྱི་གནའ་རབས་རྩོམ་རིག་གི་སློབ་དེབ་སྒྲིག་རྩོམ་དང་སློབ་ཁྲིད་ཀྱི་བྱ་བ་འཐུས་ཚང་དུ་གཏོང་བ། བོད་ཀྱི་རྩོམ་འབྱུང་ལོ་རྒྱུས་སྒྲིག་རྩོམ་དང་ཞིབ་འཇུག་བྱེད་པ་སོགས་མཐོ་རིམ་སློབ་གྲྭའི་བསླབ་ཚན་འཛུགས་སྐྲུན་གྱི་ཐད་གལ་ཆེའི་དོན་སྙིང་ལྡན་པ་ཡིན།
དཔེ་ཚོགས་པར་སྐྲུན་འགྲེམ་སྤེལ་བཞུགས་མོལ་ཚོགས་འདུའི་ཡུལ་དངོས།
གཞན་ཡང་། ཚོགས་ཞུགས་ཆེད་མཁས་པ་དག་གིས་ཉེ་བའི་ལོ་ཤས་རིང་མཚོ་སྔོན་མི་རིགས་དཔེ་སྐྲུན་ཁང་གིས་རྒྱལ་ཁབ་ཀྱི་མ་དངུལ་རོགས་སྐྱོར་ལ་བརྟེན་ནས། རིག་གནས་རྒྱུན་འཛིན་གྱི་རིན་ཐང་གིས་ཁྱོགས་པའི་ཕུལ་བྱུང་དཔེ་དེབ་རབ་དང་རིམ་པ་པར་སྐྲུན་འགྲེམ་སྤེལ་བྱས་པ་ལ་གདེང་འཇོག་ཚད་མཐོན་པོ་གནང་བ་དང་། མིག་སྔའི་བར་པར་དུ་བསྐྲུན་པའི་སྤྱི་ཚོགས་ཐོག་དགའ་བསུ་ཐོབ་པའི་དཔེ་དེབ་དག་ནི་རྩོམ་སྒྲིག་པ་དག་གིས་རྔུལ་ཆུས་བསྐྲུན་པའི་བྱས་འབྲས་ཤིག་ཡིན་པར་ཁས་ལེན་གནང་། མཚོ་སྔོན་མི་རིགས་དཔེ་སྐྲུན་ཁང་གིས་དུས་དང་རྣམ་པ་ཀུན་ཏུ་ཡང་དག་པའི་ཆབ་སྲིད་ལམ་ཕྱོགས་དང་པར་སྐྲུན་ཁ་ཕྱོགས་རྒྱུན་འཁྱོངས་དང་། སྤུས་ཚད་ཨང་དང་པོ་ཡིན་པའི་རྩ་དོན་རྒྱུན་འཁྱོངས། ཡག་ཐོག་ཡག་བརྩེགས་ཀྱི་སྲོལ་རྒྱུན་བཟང་བོ་རྒྱུན་འཁྱོངས་བཅས་བྱས་པས། ཕུལ་བྱུང་གི་དཔེ་དེབ་གང་མང་རྒྱ་ཆེའི་ཀློག་མཁན་གྱི་བསམ་པའི་རྒྱགས་ཕྱེ་རུ་ཕུལ་ཡོད་པ་དང་། དཔེ་སྐྲུན་པ་ཞིག་ལ་འཛོམས་དགོས་པའི་སྙིང་སྟོབས་དེ་མཚོ་སྔོན་མི་རིགས་དཔེ་སྐྲུན་ཁང་གི་རྩོམ་སྒྲིག་པ་སོ་སོའི་ལུས་སྟེང་དུ་རང་ཆོས་སུ་མངོན་ཡོད་པར་བརྗོད་དོ། །