༄༅།། དམིགས་བརྩེ་མ་བཞུགས་སོ།།
དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །
དྲི་མེད་མཁྱེན་པའི་དབང་བོ་འཇམ་པའི་དབྱངས། །
བདུད་དཔུང་མ་ལུས་འཇོམས་མཛད་གསང་བའི་བདག །
གངས་ཅན་མཁས་པའི་གཙུག་རྒྱན་ཙོང་ཁ་པ། །
བློ་བཟང་གྲགས་པའི་ཞབས་ལ་གསོལ་བ་འདེབས།།
༧རྗེ་རིན་པོ་ཆེའི་ལོ་ཚིགས་རབ་གསལ།
སྤྱི་ལོ་1357 (དགུང་ལོ 1) རྗེ་བླ་མ་ཙོང་ཁའི་ཡུལ་དུ་སྐུ་འཁྲུངས།
སྤྱི་ལོ1359 (དགུང་ལོ3 ) ཀརྨ་པའི་མདུན་ནས་དགེ་བསྙེན་བསྒྲུབས།
སྤྱི་ལོ1363 (དགུང་ལོ7 ) ཆོས་རྗེ་དོན་རིན་པའི་མདུན་ནས་དགེ་ཚུལ་བསྒྲུབས།
སྤྱི་ལོ1364 (དགུང་ལོ8 ) རྒྱལ་ཚབ་དར་མ་རིན་ཆེན་སྐུ་འཁྲུངས།
སྤྱི་ལོ1372 (དགུང་ལོ16 ) དབུས་སུ་ཕེབས།
སྤྱི་ལོ1373 (དགུང་ལོ17 )དབུས་སུ་འབྱོར།
སྤྱི་ལོ1375 (དགུང་ལོ19 ) དབུས་སུ་ཐོག་མའི་གྲྭ་སྐོར་མཛད།
སྤྱི་ལོ1378 (དགུང་ལོ22 ) རྗེ་རེད་མདའ་བ་དང་ཐོག་མ་མཇལ། བློ་གསལ་བགྲོད་པའི་ཐེམ་སྐས་མཛད།
སྤྱི་ལོ1385 (དགུང་ལོ28 )མཁས་གྲུབ་རྗེ་སྐུ་འཁྲུངས།
སྤྱི་ལོ1388 (དགུང་ལོ31 )ལེགས་བཤད་གསེར་ཕྲེང་བརྩམས།
སྤྱི་ལོ1392 (དགུང་ལོ36 ) འོལ་ཁར་བྱ་བྲལ་ལ་ཕེབས།
སྤྱི་ལོ1393 (དགུང་ལོ38 ) འོལ་ཁར་རྫིང་ཕྱི་བྱམས་པ་ཞིག་གསོ་མཛད། མཛད་ཆེན-1
སྤྱི་ལོ1395 (དགུང་ལོ39 )ལྷོ་བྲག་གྲུབ་ཆེན་ནམ་མཁའ་རྒྱལ་མཚན་དང་མཇལ།
སྤྱི་ལོ1396 (དགུང་ལོ40 )རྒྱབ་ཚབ་རྗེ་ལ་ཐོག་མ་མཇལ། གཉལ་གྱི་ལུང་ར་ཚུགས། མཛད་ཆེན།-2
སྤྱི་ལོ1397 (དགུང་ལོ41 )རྟེན་འབྲེལ་བསྟོད་པ་བརྩམས།
སྤྱི་ལོ1402 (དགུང་ལོ46 )རྭ་སྒྲེང་དུ་ལམ་རིམ་ཆེན་མོ་དང་། ལམ་མཆོག་སྒོ་འབྱེད། ལམ་རིམ་ཆུང་ངུ་བརྩམས།
སྤྱི་ལོ1403 (དགུང་ལོ47 )རྭ་སྒྲེང་དུ་བྱང་སའི་ཚུལ་ཁྲིམས་ལེའུ་དང་། རྩ་ལྟུང་དང་བླ་མ་ལྔ་བཅུ་པའི་རྣམ་བཤད་མཛད།
སྤྱི་ལོ1405 (དགུང་ལོ49 ) འོལ་ཁ་བྱམས་པ་གླིང་དུ། སྔགས་རིམ་ཆེན་མོ་དང་ཀླུ་བྱང་གི་རྣམ་གཞག་པའི་ཊཱིཀ་མཛད།
སྤྱི་ལོ1408 (དགུང་ལོ52 ) མཁས་གྲུབ་རིན་པོ་ཆེ་རྗེ་ལ་ཐོག་མར་མཇལ། དྲང་ངེས་དང་རྩ་ཤེའི་ཊཱིཀ་ཆེན་མཛད།
སྤྱི་ལོ1409 (དགུང་ལོ53 )དགའ་ལྡན་དགོན་ཕྱག་བཏབ། ལྷ་ལྡན་སྨོན་ལམ་ཆེན་མོ་དབུ་འཛུགས། མཛད་ཆེན།-3
སྤྱི་ལོ1410 (དགུང་ལོ54 ) དགའ་ལྡན་དུ་ཡེ་ཤེས་རྡོ་རྗེ་ཀུན་བཏུས་ཀྱི་རྣམ་བཤད། བཤད་རྒྱུད་ལྷ་མོ་བཞིས་ཞུས་པ་མཛད།
སྤྱི་ལོ1411 (དགུང་ལོ55 ) དགའ་ལྡན་དུ་རིམ་ལྔ་གསལ་སྒྲོན་མཛད་པ་དང་རིམ་ལྔ་གདན་རྫོགས་མཛད།
སྤྱི་ལོ1412 (དགུང་ལོ56 )རྗེ་རེད་མདའ་བ་སྐུ་བཤེགས།
སྤྱི་ལོ1414 (དགུང་ལོ58 ) རྗེ་དགེ་འདུན་གྲུབ་མཇལ། འགྲེལ་བ་བཞི་སྦྲགས་མཛད།
སྤྱི་ལོ1415 (དགུང་ལོ59 )ལམ་རིམ་འབྲིང་པོ་མཛད། དགའ་ལྡན་སྒྲུབ་མཆོད་བཙུགས། མཛད་ཆེན-4
སྤྱི་ལོ1418 (དགུང་ལོ62 ) མཇུག་ཊཱིཀ་དགོངས་པ་རབ་གསལ་དང་བདེ་མཆོག་རྩ་རྒྱུད་ཀྱི་ཊཱིཀ་མཛད།(སྦུས་དོན་ཀུན་གསལ་ཞེས་ཀྱང་ཟེར)
སྤྱི་ལོ1419 (དགུང་ལོ63 )རྗེ་སྐུ་ཞི་བར་བཤེགས། སེ་ར་དགོན་ཕྱག་འདེབས།
རྗེ་ཙོང་ཁ་པ་མཆོག་ལ་ས་རྙིང་བཀའ་འབྲུག་རིས་སུ་མ་ཆད་པའི་མཁས་གྲུབ་རྣམས་ཀྱིས་བསྔགས་བརྗོད་ཀྱི་མེ་ཏོག་འཐོལ་བའི་ཚུལ་མདོ་ཙམ་བརྗོད་ན།
༡༽ བོ་དོང་པཎ་ཆེན་གྱིས།
མཁས་མཆོག་ངང་བའི་རྒྱལ་པོ་བློ་བཟང་མཆོག།གྲགས་པ་མགྲིན་པའི་རྫ་རྔ་སྒྲོག་པ་ཅན།།
ལེགས་བཤད་སྨྲ་བའི་དབང་པོའི་ཞབས་དྲུང་དུ།།འཇིགས་མེད་བུང་བ་གཞོན་ནུས་འདི་སྐད་ཞུ།།
ཁྱོད་ཀྱི་རྣམ་ཐར་ཆེན་པོའི་ཆེན་པོ་རྣམས།།རིང་ན་གནས་ཀྱང་མངོན་སུམ་བཞིན་དུ་ཐོས།།
ཕར་ཕྱིན་སྔགས་ཀྱི་ལམ་རིམ་གཉིས་ཀྱང་མཐོང་།།དེས་ཀྱང་བདག་ཡིད་སྤྲོ་དང་དགའ་བར་གྱུར།། ཞེས་སོགས་དང་།
༢༽ ཀརྨ་པ་དེ་བཞིན་བཤེགས་པས།
ཨོ་སྭ་སྟི།འཇིག་རྟེན་དབང་ཕྱུག་སྲིད་ཞིའི་དཔལ།།དཔལ་ཀུན་ཡོངས་རྫོགས་མཁྱེན་པའི་ཐུགས།།
ཐུགས་རྗེ་ཆེན་པོས་གདུལ་བྱའི་དོན།།དོན་བཞིན་མཛད་པ་དེ་ཡིས་སྐྱོངས།།
མང་ཐོས་བློ་གྲོས་ཡངས་པའི་མཁར།།ཏིང་འཛིན་བཟང་པོའི་དཀྱིལ་འཁོར་རྫོགས།།
རྣམ་དཀར་གྲགས་པའི་འོད་འཕྲོ་བ།།བཤེས་གཉེས་ཟླ་བ་གང་དེ་རྒྱལ།། ཞེས་སོགས་དང་།
༣༽ སྟག་ཚང་ལོ་ཙཱ་བས།
ན་མོ་གུ་རུ་མཉྫུ་གྷཱོ་ཥཱ་ཡ།བློ་ཆེན་རྒྱལ་བ་རྣམས་ཀྱི་སྤྱན་སྔ་རུ།།བཟང་པོའི་སྨོན་ལམ་རླབས་ཆེན་གྲུབ་པའི་མཐུས།།
གྲགས་པའི་སྒྲ་ཆེན་ཐུབ་བསྟན་འགྲོ་བའི་དཔལ།།བློ་བཟང་གྲགས་པའི་དཔལ་ལ་ཕྱག་འཚལ་ལོ།།
དཔག་ཡས་ཚོགས་གཉིས་ཀུན་གྱི་རྩེ་མོ་སོན།།བགྲང་ཡས་རྒྱལ་བ་ཀུན་གྱི་རིང་ལུགས་འཛིན།།
མཐའ་ཡས་འགྲོ་བ་ཀུན་གྱི་དགེ་བའི་བཤེས།།བསམ་ཡས་ཡོན་ཏན་ཀུན་གྱི་གཏེར་ལ་འདུད།། ཅེས་སོགས་དང་།
༤༽ས་བཟང་མ་ཏི་པཎ་ཆེན་གྱིས།
ཐུབ་དབང་ཞིང་དུ་ཁྱོད་ཉིད་ཁོ་ནས་ནི།།ཐུབ་བསྟན་གསལ་བའི་འཕྲིན་ལས་འདི་ལྟ་ན།།
ཐུབ་པའི་རྒྱལ་ཚབ་བདག་གིས་ཅི་བྱ་ཞེས།།མི་ཕམ་མགོན་དེས་ཕྲག་དོག་མི་མཛད་དམ།།
ཀླུ་སྒྲུབ་ཡབ་སྲས་ཞིང་གཞན་གཤེགས་པ་ན།།དབུ་མའི་ལམ་འདི་སྟོན་པ་གཞན་མེད་ཅེས།།
སྒྲོ་སྐུར་བྲག་རིའི་ཕུང་པོ་གཞོམ་སླད་དུ།།མགོན་ཁྱོད་རྡོ་རྗེའི་མེ་ཆར་ལྟ་བུར་གྱུར།། ཞེས་སོགས་དང་།
༥༽ཀརྨ་པ་མི་བསྐྱོད་རྡོ་རྗེས།
བྱང་གི་ཕྱོགས་འདིར་རྒྱལ་བའི་བསྟན་པ་ལ།།ཕལ་ཆེར་ལོག་པ་འབའ་ཞིག་སྤྱོད་པའི་སྐབས།།
འཁྲུལ་མེད་བྱི་དོར་མཛད་པའི་ཙོང་ཁ་པ།།རི་བོ་དགའ་ལྡན་པ་ལ་བསྟོད་པར་བགྱི།།
ས་དྭགས་བཀའ་གདམས་སྲོལ་འཛིན་གསང་ཕུ་བ།།བོད་ཡུལ་བསྟན་པ་ནུབ་ཏུ་ཉེ་བ་ན།།
ཉིད་བསྟན་གསལ་བར་ཁྱབ་མཛད་ཙོང་ཁ་པ།།རི་བོ་དགའ་ལྡན་པ་ལ་བསྟོད་པར་བགྱི།།
༦༽ཀརྨ་པ་དབང་ཕྱུག་རྡོ་རྗེས།
ཀུན་མཁྱེན་བུ་རམ་ཤིང་པའི་བསྟན་པ་འདིར།།ངུར་སྨྲིག་གོས་འཛིན་མཐའ་བྲལ་དབུ་མའི་དོན།།
ཆོས་ཀུན་ཀུན་རྫོབ་ཏུ་ཡོད་དོན་དམ་དུ།། མེད་པར་སྟོན་མཛད་རྒྱལ་བ་དེ་ལ་འདུད།།
གསར་རྙིང་མདོ་རྒྱུད་ཀུན་ནས་ལུང་བསྟན་ཅིང་།།ཐུགས་རྗེས་དུས་ལས་མི་གཡོ་གཟིགས་པ་ཅན།།
འབྲེལ་བ་ཐོགས་པ་ཙམ་གྱིས་རང་ཉིད་ཀྱི།།གོ་འཕང་སྩོལ་མཛད་ཟླ་བྲལ་དེ་ལ་འདུད།།
བཅས་དང་ཁ་ན་མ་ཐོའི་ཉེས་པ་ཡིས།།ཅུང་ཟད་མ་གོས་འདུལ་བའི་སྲོལ་ཆེན་འཛིན།།
ཞི་དུལ་བག་ཡོད་འཕྲི་ལས་བཞི་ལ་སྤྱོད།།མཁས་བཙུན་བཟང་པོ་ཙོང་ཁ་པ་ལ་འདུད།། ཅེས་དང་།
༧ ༽ཞྭ་དམར་ཆོས་ཀྱི་གྲགས་པས།
དུས་ཕྱིས་བཀའ་ཕྱག་ས་སྐྱ་པ་སོགས་ཀྱི།།བླ་མ་མཁས་གྲུབ་རྣམས་ལ་གཏུགས་པ་ལས།།
མཁས་པ་བློ་བཟང་གྲགས་པའི་དཔལ་ཞེས་པ།།མདོ་སྔགས་བསྟན་པ་གསལ་བར་མཛད་པ་བྱུང་།། ཞེས་དང་།
༨༽འབྲུག་པདྨ་དཀར་པོས།
དགེ་ལེགས་ཆུ་གཏེར་ཆེན་པོས་འཇིག་རྟེན་ལ།།བློ་བཟང་ཉིན་མོར་བྱེད་པ་ཁྱོད་བྱོན་ཚུན།།
ས་འདི་རྨོངས་པའི་མུན་ལས་རྣམ་རྒྱལ་ཞིང་།།གྲགས་པའི་གཞིར་གྱུར་དེ་ལ་ཕྱག་འཚལ་ལོ།།ཞེས་སོགས་དང་།
འགྲན་ཟླ་ཀུན་བྲལ་ཀུན་མཁྱེན་ཙོང་ཁ་པར།།འགྲན་ཟླར་བགྱི་བའི་མཁས་རློམ་མང་ན་ཡང་།།
འགྲན་ཟླ་མི་བྱེད་པདྨ་དཀར་པོས་བསྟོད།། ཅེས་དང་།
༩༽རྗེ་ཡིད་བཟང་རྩེ་བའི་གསུང་ལས།
དེའི་དུས་སུ་ས་ཆེན་པོ་འདི་རྗེ་བཙུན་ཙོང་ཁ་པའི་འཕྲིན་ལས་ཀྱི་གདུགས་དཀར་པོ་གཅིག་གིས་ཁྱབ་པར་བྱས་ནས་ཡོད་པ་ཡིན། ཞེས་དང་།
༡༠༽ཆོས་སྒོ་བ་འཇམ་དབྱངས་ལ་ཆས་ཀྱིས།
སྤྲུལ་སྐུའི་འཁྲུངས་ཡུལ་གངས་ཅན་ཤར་གྱི་ཕྱོགས།།ཆོས་ཀྱི་རྒྱལ་པོ་རྒྱལ་བ་ཙོང་ཁ་པ།། ཞེས་སོགས་དང་།
༡༡༽མི་ཕམ་རྣམ་རྒྱལ་རྒྱ་མཚོས།
སྲས་བཅས་རྒྱལ་བའི་དགོངས་དོན་མ་ནོར་བ།།སྟོང་དང་རྟེན་འབྱུང་ཟབ་མོ་དེ་ཉིད་ལ།།
ཡིད་ཆེས་གཏིང་ནས་བརྙེད་པའི་སྒོ་གཅིག་པུ།།ཁྱོད་ཀྱི་ལེགས་བཤད་རྣམས་ལས་གཞན་པ་སུ།།
རྩོམ་སྒྲིག་པ། རིག་འཛིན་ཚེ་རིང་།
རྗེ་ཙོང་ཁ་པ་ཆེན་པོ་རྗེས་སུ་དྲན་པ-རྗེ་རིན་པོ་ཆེའི་བསྟོད་ཚོགས་བཞུགས་སོ།