རྣམ་བཅུ་དབང་ལྡན།
དཔལ་ལྡན་དུས་ཀྱི་འཁོར་ལོའི་སྣོད་བཅུད་ཕྱི་ནང་གཞན་གསུམ་གྱི་སྙིང་པོ་གཅིག་ཏུ་བསྡུས་པའི་རྣམ་བཅུ་དབང་ལྡན་གྱི་མཚོན་དོན་དང་ཚོན་མདོག་བཤད་པ་ལ། ཐོག་མར་རྣམ་བཅུ་ཞེས་པ་ནི་ལལྫའི་ཡི་གེ་ཧྃ་ཀྵ་མ་ལ་ཝ་ར་ཡ་བཅས་ཡི་གེ་བདུན་དང་ཡི་གེ་གཟུགས་འགྱུར་ལས་སྣ་ལྡན་ནམ་ཟླ་ཚེས། ཐིག་ལེ། སྲོག་ཡིག་ཨ་མཚོན་པའི་ནཱ་ད་དང་བཅས་པའི་ཡི་གེ་བཅུ་བརྩེགས་མར་གནས་པ་རྣམས་འབྱུང་བའི་ཁམས་དང་སྦྱར་ན་ནམ་མཁའ་དང་། རླུང་། མེ། ཆུ། ས། བརྟན་པ། གཡོ་བ། གཟུགས་མེད་པའི་ཁམས། ཉི་མ། ཟླ་བ་དང་སྣ་ཚོགས་པདྨ་གདན་བཞི་དང་བཅས་པ་སྟེ། སྣ་ཚོགས་པདྨ་ཉི་མ་ཟླ་བ་དང་།། སྒྲ་གཅན་དུས་མེ་ལ་སོགས་གདན་གྱི་སྟེང་།། རླུང་ཁམས་ཡ་ལྗང་ར་དམར་མེ་ཡི་ཁམས།། ཝ་དཀར་ལྕགས་ཁམས་ལ་སེར་ས་ཡི་ཁམས།། མ་ནི་སྣ་ཚོགས་ཁམས་ལས་གྲུབ་པ་སྟེ།། ཀྵ་ནི་ཆོས་ཀྱི་བདག་མེད་རྟོགས་གྱུར་པ།། དེ་སྟེང་ཧ་དཀར་སྐྱེ་མེད་ཆོས་སྟོན་པ།། སྣ་ཚོགས་པདྨའི་སྟེང་དུ་ཟླ་བ་དཀར།། དེ་སྟེང་མེ་ཤེལ་ལས་གྲུབ་ཉི་མ་དམར།། ནཱ་ད་སྔོན་པོ་དུ་བའི་མདོག་ཅན་སོ།། སྤྲིན་རིས་སྨུག་པོ་པདྨའི་ཚལ་དང་མཉམ།། ཡིག་རྐང་མང་ཉུང་རྒྱ་གར་ཡུལ་རིགས་ཁྱད།། ཅེས་གསུངས་ཏེ།
དེའི་རིམ་པ་སྣ་ཚོགས་པད་མའི་སྟེང་དུ་ཟླ་བ་དཀར་པོ། ཉི་མ་དམར་པོ། སྒྲ་གཅན་སྔོན་པོ། དུས་མེ་སེར་པོ་བཅས་གདན་བཞིའི་སྟེང་དུ་འབྱུང་བ་རིམ་བརྩེགས་ཀྱི་རང་མདོག་སྟེ། རླུང་གི་ས་བོན་ཡ་ནག་པོ(ལྗང་གུ་ཞེས་ཀྱང་གསུངས)། མེའི་ས་བོན་ར་དམར་པོ། ཆུའི་ས་བོན་ཝ་དཀར་པོ།སའི་ས་བོན་ལ་སེར་པོ། མ་འདོད་ཁམས་འདོད་ཡོན་ལྔ་མཚོན་བྱེད་ཁ་དོག་ལྔ་ལྡན་ནམ་བརྟན་པ་རི་རྒྱལ་གྱི་ས་བོན་ཕྱོགས་མདོག་སྟེ་ཤར་ནག ལྷོ་དམར། བྱང་དཀར། ནུབ་སེར། དབུས་ལྗང་གུའོ།། གཡོ་བ་འདོད་གཟུགས་དང་སྣ་ཚོགས་པདྨའི་ས་བོན་ཀྵ་ལྗང་གུ(དཀར་པོ་ཡང་གསུངས)གཟུགས་མེད་བཞི་ནི་ས་བོན་ཧ་མགོ་བོ་དང་བཅས་པ་སྔོན་པོ། ཚེག་དྲག་སྟེ་རྣམ་བཅད་ཟླ་ཚེས་སུ་བྱས་པ་དཀར་པོ།ཐིག་ལེ་རོ་ཉི་མའི་ས་བོན་དམར་པོ། ནཱ་ད་ནམ་མཁའི་ས་བོན་སྔོན་པོས་མཚན་པ་སོགས་དང་། ཡང་རྟེན་གཞལ་ཡས་ཁང་གི་འོག་གཞི་རླུང་མེ་ཆུ་སའི་དཀྱིལ་འཁོར་བཞི་ཡ་ར་ཝ་ལ་དང་། རི་རབ་གཞལ་ཡས་ཁང་བཅས་པ་མ། བརྟེན་པ་སྐུ་གསུང་ཐུགས་ཀྱི་ལྷ་རྣམས་ཀྵ། ཐུགས་དཀྱིལ་གྱི་ལྷ་རྣམས་ཧ།བདེ་ཆེན་འཁོར་ལོའི་ལྷའི་སྐུ་གསུང་ཐུགས་ཟླ་ཚེས་ཐིག་ལེ་ནཱ་ད་སྟེ་རྟེན་བརྟེན་པའི་ལྷ་རྣམས་མཚོན་པར་བྱེད་པ་སོགས་དཔག་མེད་འབྱུང་ཞིང་འདི་ནི་ཁམས་གསུམ་འཇིག་རྟེན་སྣོད་བཅུད་ཐམས་ཅད་བསྡུས་པའམ་མཚོན་བྱེད་ཡིན་ནོ།།
སྲིད་པའི་འཁོར་ལོ།
སྲིད་པའི་འཁོར་ལོ་ཞེས་པ་འདི་ནི། ངན་འགྲོ་དང་བདེ་འགྲོ་གཉིས་སུ་འདུས་པའི་རིགས་དྲུག་གི་སེམས་ཅན་ཀུན་སྲིད་པ་འཁོར་བ་ན་ཇི་ལྟར་འཁོར་ཞིང་འཁྱམས་པ་དང༌། དེའི་རྒྱུ་དང་བཅས་པ་སྟོན་པའི་རི་མོ་སྟེ། རི་མོ་འདི་ཉིད་ཐོག་མར་རྒྱ་གར་གྱི་རྒྱལ་པོ་གཟུགས་ཅན་སྙིང་པོས་སངས་རྒྱས་ཤཱཀྱ་ཐུབ་པའི་བཀའ་བཞིན། སྒྲ་སྒྲོག་གི་རྒྱལ་པོ་ཨུ་ཊ་ཡ་ནར་སྐྱེས་ལན་དུ་བྲིས་པར་གྲགས།
རི་མོའི་དབུས་སུ་བྱ་སྦྲུལ་ཕག་གསུམ་གྱི་གཟུགས་བརྙན་སྣང་བ་ནི། འགྲོ་དྲུག་འཁོར་བར་འཁོར་བྱེད་ཀྱི་རྒྱུ་གཙོ་བོ་ཉོན་མོངས་དུག་གསུམ་མཚོན་པ་ཡིན་ཏེ། དང་པོ་བྱ་ནི་འདོད་ཆགས་ཀྱི་མཚོན་བྱེད་དང༌། གཉིས་པ་སྦྲུལ་ནི་ཞེ་སྡང་གི་མཚོན་བྱེད། གསུམ་པ་ཕག་པ་ནི་གཏི་མུག་གི་མཚོན་བྱེད་ཡིན་པ་དང༌། བྱ་སྦྲུལ་གཉིས་ཕག་པའི་ཁ་ནས་ཐོན་པ་བྲིས་པ་ནི་འཁོར་པའི་ཉེས་དམིགས་ཐམས་ཅད་ཉོན་མོངས་དུག་གསུམ་ལས་བསྐྱེད་ཅིང༌། ཆགས་སྡང་གཉིས་ཀྱང་མ་རིག་པའི་རྒྱུ་གཙོ་བོ་གཏི་མུག་ལས་བྱུང་བ་མཚོན་པ་ཡིན།
འཁོར་ལོའི་རྩིབས་བར་དྲུག་ཏུ་ལྷ་དང་མི། ལྷ་མ་ཡིན་བཅས་བདེ་འགྲོ་གསུམ་དང༌། དམྱལ་བ། ཡི་དྭགས། དུད་འགྲོ་སྟེ་ངན་འགྲོ་གསུམ་བཅས་རིམ་པར་བཀོད་དེ་བྲིས་པ་ནི། འགྲོ་བ་རིགས་དྲུག་གི་སྡུག་བསྔལ་བསྟན་པ་ཡིན་ལ། མཚོན་དོན་ནི། མར་གྱུར་འགྲོ་བ་ཀུན་ཐར་བ་མ་ཐོབ་བར་དུ་འགྲོ་བ་རིགས་དྲུག་ཏུ་རེས་མོས་ཀྱིས་ཚེ་འཕོས་ཏེ་སྡུག་བསྔལ་མྱངས་ཤིང་མྱོང་བ་དེ་ཡིན། འཁོར་ལོའི་མཐའ་འཁོར་གྱི་དྲ་མིག་བཅུ་གཉིས་ནི། རྟེན་འབྲེལ་ཡན་ལག་བཅུ་གཉིས་ཀྱི་མཚོན་བྱེད་ཡིན།
དེ་ཐམས་ཅད་འཁོར་ལོའི་རྣམ་པར་འཆི་བདག་གི་ཁ་དང་རྐང་ལག་བཞིས་དམ་དུ་བཟུང་བར་བྲིས་པ་དེས། ལས་དང་ཉོན་མོངས་པའི་དབང་གིས་འཇིག་རྟེན་འདིར་སྐྱེ་བ་ལེན་པ་མཐའ་དག་མཐར་འཆི་བདག་གི་དབང་དུ་མ་གྱུར་པ་མེད་པ་དང༌། དེ་ཡང་ལན་རེ་གཉིས་ཙམ་མ་ཡིན་པར། ཇི་སྲིད་འཁོར་བའི་རྩ་བ་མ་སྤངས་པ་དེ་སྲིད་དུ། སྐྱེ་རྒ་ན་འཆིའི་སྡུག་བསྔལ་འཁོར་མོར་མྱངས་ཏེ་སྲིད་རྩེ་ནས་མནར་མེད་བར་རྟག་ཏུ་འཁོར་བ་མཚོན། སྟེང་དུ་ཟླ་བའི་གཟུགས་བརྙན་བྲིས་པ་ནི། སྡུག་བསྔལ་མཐའ་དག་གི་དབེན་པའི་ཞི་བ་མྱང་འདས་སམ་བདུད་བཞི་ཕྲ་རགས་མ་ལུས་པ་བཅོམ་པའི་རྣམ་མཁྱེན་གྱི་གོ་འཕང་མཚོན། དེ་ལ་སངས་རྒྱས་བཅོམ་ལྡན་འདས་ཀྱིས་ཕྱག་བརྐྱངས་ཏེ་བསྟན་པ་ནི། ཞི་བ་མྱང་འདས་འདི་ལྟ་བུ་ཞིག་མ་ཐོབ་ན། འཁོར་བའི་རྒྱ་མཚོའི་སྡུག་བསྔལ་གྱི་ཀློང་ནས་རྟག་ཏུ་འཁོར་བ་ལས་ཐར་དུས་མེད་པས། སེམས་ཅན་ཀུན་གྱིས་ཞི་བ་མྱང་འདས་ཀྱི་གོ་འཕང་ཐོབ་པའི་ཐབས་ལ་བརྩོན་ཅིག་ཅེས་བརྡ་ཐབས་ཀྱིས་འདོམས་པར་མཛད་པ་མཚོན་ནོ།།
ཚེ་རིང་རྣམ་དྲུག
ཚེ་རིང་རྣམ་དྲུག་སྐོར་གྱི་རི་མོའི་གཟུགས་བརྙན་དེ་ནི་བོད་པའི་ཁྱིམ་ཚང་མང་ཆེ་བའི་ནང་རྟག་ཏུ་མཐོང་རྒྱུ་མང་བའི་རི་མོ་ངོ་མཚར་ཅན་ཞིག་རེད། དེའི་བྱུང་སྟངས་སྐོར་དམངས་ཁྲོད་ཀྱི་བཤད་སྲོལ་ལྟར་ན། རྡོ་རྗེའི་ཆོས་སུ་གྲུབ་པའི་བྲག་རི་དེའི་ངོགས་ནས། འཆི་མེད་བདུད་རྩིའི་རྒྱུན་མཆོག་ལྷུང་ལྷུང་སྙན་པའི་སྒྲ་དང་བཅས། འཛད་མེད་འབབ་པའི་བརླན་བཤེར་ལས། རོ་མཆོག་བརྒྱད་ལྡན་འབྲས་བུ་གཡུར་ཟ་བའི་ཚེ་རིང་ལྗོན་ཤིང་བྱུང་། དེ་ཡི་དྲུང་དུ་ཚེ་དང་ཡེ་ཤེས་དཔག་མེད་མགོན་པོའི་བྱིན་རླབས་སྙིང་ལ་ཞུགས་པའི་ཡེ་ཤེས་ཏིང་འཛིན་མངོན་འགྱུར་གྱི་དྲང་སྲོང་སྟེ། མི་ཚེ་རིང་བྱུང་། དྲང་སྲོང་དེ་ཡིས་ཆབ་གཏོར་རིལ་བུའི་ཚོགས་ལོངས་སུ་སྤྱད་པས། རི་དྭགས་ཚེ་རིང་བྱུང་། ཚེ་རིང་ལྗོན་ཤིང་གི་འབྲས་བུ་དང་འཆི་མེད་བཏུང་བའི་རྒྱུན་ལ་ལོངས་སུ་སྤྱད་པ་ལས། བྱ་ཚེ་རིང་བྱུང་བར་གྲགས། གང་ལྟར་ཡང་དེ་ནི་རྟེན་འབྲེལ་ཕུན་ཚོགས་མི་བསླུ་བ་བདེན་པའི་མཐུ་ལས་བྱུང་བ་ཞིག་ཡིན་པས། བསྟན་བྱ་གཙོ་བོ་ནི་མི་དང་རི་དྭགས་སེམས་ཅན་ཀུན་ལ་ཚེ་ཡི་འཇིགས་པ་མི་ཡོང་བ་བྱ་རྒྱུ་དེ་ཡིན་པར་བསམས།
བཀྲ་ཤིས་རྟགས་བརྒྱད།
༡ དུང་དཀར་གཡས་འཁྱིལ། བཀྲ་ཤིས་པའི་དུང་དཀར་ནི་བྱང་ཆུབ་སེམས་དཔའ་གཞན་དོན་དུ་དུང་དཀར་གཡས་སུ་འཁྱིལ་བར་སྐྱེ་བ་ཞེས་པ་དེ་ལ་སངས་རྒྱས་ཀྱི་ཚེམས་ཕྲེང་བཞི་བཅུའི་མཚན་མ་གསལ་བ་སོགས་དང་གཞན་ཡང་ལྷའི་དབང་བོ་རྒྱལ་བྱིན་གྱིས་སངས་རྒྱས་བཅོམ་ལྡན་འདས་ལ་དུང་དཀར་གཡས་འཁྱིལ་ཕུལ་བ་བཀྲ་ཤིས་པའི་རྫས་སུ་བྱིན་གྱིས་རླབས་པ་སོགས་ཡིན།
༢ གདུགས། ཚངས་པ་ལ་སོགས་པས་སངས་རྒྱས་ལ་ཕུལ་བ་དང་། སངས་རྒྱས་རང་གི་སྐུ་ལ་ཐོད་ཁྱིམ་ཟླུམ་པོ་གདུགས་ལྟར་དུ་ཡོད་པ་སོགས་བསོད་ནམས་དང་ཡེ་ཤེས་ཀྱི་རང་རྩལ་ལས་སོ་སོའི་མཚན་མ་མངོན་པའི་རིན་ཆེན་གདུགས་གསེར་གྱི་ཡུ་བ་ཅན་སེམས་ཅན་ཐམས་ཅད་ཉོན་མོངས་པའི་ཚ་གདུང་སེལ་བར་བྱེད་པ།
༣ རྒྱལ་མཚན། ཟ་འོག་ལས་གྲུབ་པའི་བསྟན་པ་མི་ནུབ་བསྐལ་བརྒྱར་གནས་པའི་རྒྱལ་མཚན་རྫོགས་པའི་སངས་རྒྱས་ཀྱི་སྐུ་ལུས་ལྟ་བུ་ཕས་ཀྱི་རྒོལ་བ་དང་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་མི་མཐུན་གཡུལ་རྒྱལ་གྱི་མཚན་མས་རབ་ཏུ་རྒྱན་པ།
༤ གསེར་ཉ། ཤེས་རབ་དང་ཡེ་ཤེས་ཀྱི་སྤྱན་གྱི་མཚོན་བྱེད་གཡུའི་འདབ་གཤོག་དང་ལྡན་པ། གསེར་མིག་སྒོར་ཞིང་མཛེས་ལ་འོད་འཁྱུག་པ་སྐྱེ་བོ་ཀུན་ལ་ཤེས་རབ་ཀྱི་མིག་སྦྱིན་པར་བྱེད་པ།
༥ འཁོར་ལོ། ཚངས་པ་ལ་སོགས་པས་དེ་བཞིན་གཤེགས་པར་ཕུལ་ཞིང་། དེ་བཞིན་གཤེགས་པའི་ཞབས་ཀྱི་མཐིལ་དུ་བསོད་ནམས་ཀྱི་སྟོབས་ལས་འཁོར་ལོའི་མཚན་མ་རང་བཞིན་གྱིས་མངོན་པ་སྟེ། དེ་བཞིན་གཤེགས་པའི་ཞབས་ཀྱི་མཚོན་བྱེད་སྲིད་པའི་དྲ་བ་ཉོན་མོངས་པའི་རང་བཞིན་ཅན། རྩད་ནས་གཅོད་ཅིང་ཕ་རོལ་གྱི་རྒོལ་བ་ཐམས་ཅད་ཟིལ་གྱིས་གནོན་པར་བྱེད་པའི་གསེར་གྱི་རྩིབས་སྟོང་དང་ལྡན་པ་རང་གི་དཔལ་དང་ལོངས་སྤྱོད་དབང་ཐང་ཐམས་ཅད་བསྐྱེད། ཐེག་གསུམ་ཆོས་ཀྱི་འཁོར་ལོ་བསྐོར་ནས་གདུལ་བྱ་ཐམས་ཅད་ཡོངས་སུ་སྨིན་པར་བྱེད་པ།
༦ དཔལ་བེའུ། བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་མཚོན་བྱེད་རིན་པོ་ཆེ་དཔལ་བེའུ་འཇའ་དང་འོད་ཀྱི་རང་བཞིན་ཅན་སངས་རྒྱས་ཀྱི་མཁྱེན་པ་ཐམས་ཅད་ཐོགས་མེད་དུ་མཁྱེན་ཅིང་གཏིང་དཔག་པར་དཀའ་བའི་སྟོབས་ཐམས་ཅད་རང་གི་རྒྱུད་ལ་འཐོབ་པར་བྱེད་པ།
༧ མེ་ཏོག་པདྨ། མཛེས་ཤིང་དྲི་བཟང་པོ་ཕྱོགས་མེད་དུ་འཐུལ་བ། རྫུན་ལ་སོགས་ངག་གི་མི་དགེ་བ་ཐམས་ཅད་ཡོངས་སུ་སྤངས་ཏེ་ཚིག་འཇམ་པོ་སྨྲ་མཁས་པ། དམ་པའི་ཆོས་ཀྱི་བདུད་རྩི་མྱངས་ནས་འཆད་རྩོད་ལ་ཐོགས་པ་མེད་པའི་ལྗགས་པདྨ་ལྟ་བུ་འཐོབ་པར་བྱེད་པ།
༨ བུམ་པ། དེ་བཞིན་གཤེགས་པའི་མགུལ་གྱི་རྣམ་པ་སྟེ། གསེར་གྱི་བུམ་པ་འཆི་མེད་བདུད་རྩིས་གང་བའམ་ཡང་ན་རིན་པོ་ཆེས་གང་བ་མ་ཟད་མི་ཤེས་པའི་བཅུད་ཀྱི་གང་བ་ལྟར་རང་རྒྱུད་ཆོས་ཀྱི་གང་ནས་གདུལ་བྱའི་རྒྱུད་ཚིམས་པ་དང་། ཡང་ན་འདོད་དགུ་ལོངས་སྤྱོད་ཐམས་ཅད་འབད་མེད་དུ་འབྱུང་བའི་གཏེར་གྱི་བུམ་པ་པད་མ་འདམ་ལས་སྐྱེས་ཀྱང་འདམ་གྱི་དྲི་མས་མ་གོས་པ་ལྟར་འཁོར་བ་ལ་གནས་ཀྱང་འཁོར་བའི་སྐྱོན་གྱིས་མི་གོས་པ་མཚོན་བྱེད་བཅས་སོ།།
བཀྲ་ཤིས་རྫས་བརྒྱད།
བཀྲ་ཤིས་རྫས་བརྒྱད་ཅེས་པ་ནི་མེ་ལོང་དང་། གི་ཝང་། ཞོ། རྩྭ་དུར་བ། ཤིང་ཏོག་བིལ་བ། དུང་དཀར་གཡས་འཁྱིལ། ལི་ཁྲི། ཡུངས་དཀར་བཅས་བརྒྱད་ལ་བྱ་སྟེ།
མེ་ལོང་ནི་ལུས་ཅན་ཐམས་ཅད་རྒྱལ་བའི་ཡེ་ཤེས་སྒྲིབ་བྲལ་མངོན་འགྱུར་གྱིས་རྣམ་དག་ཆོས་ལ་ཐོགས་མེད་ལོངས་སྤྱོད་པའི་བཀྲ་ཤིས་རྫས་སུ་བྱིན་གྱི་བརླབས་པའི་དོན་ལ་འཇུག་པ་དང་།
གི་ཝང་ནི་ཉོན་མོངས་ཟུག་ངུའི་ནད་དང་སྡུག་བསྔལ་དག་པའི་སྨན་མཆོག་ཆོས་ཉིད་ཀྱི་དོན་རབ་ཏུ་རྟོགས་པར་འཇུག་པ།
ཞོ་ནི་དུག་གསུམ་ཞི་ཞིང་སྙིང་པོ་རྣམ་དག་ཡེ་ཤེས་མཆོག་རབ་རྟོགས་པར་འཇུག་པ།
རྩྭ་དུར་བ་ནི་ཉོན་མོངས་སྐྱེ་ཤེའི་རྒྱུན་ཆད་པའི་རྡོ་རྗེ་སེམས་པའི་ཚེ་སྟེ། འཆི་མེད་ཐོབ་པར་འཇུག་པ།
ཤིང་ཏོག་བིལ་བ་ནི་འཇིག་རྟེན་ལས་འདས་པའི་བྱང་ཆེན་སྤྱོད་པའི་རྒྱུ་རྐྱེན་རྣམ་པར་དག་པའི་འབྲས་བུར་སངས་རྒྱས་ཀྱི་འཕང་མངོན་འགྱུར་གྱི་དོན་ཀུན་འགྲུབ་པར་འཇུག་པ།
དུང་དཀར་གཡས་འཁྱིལ་ནི་ཐེག་གསུམ་ཆོས་འཁོར་གང་འདུས་མ་ནོར་བ་ཡོངས་སུ་སྟོན་པར་འཇུག་པ།
ལི་ཁྲི་ནི་སྲིད་གཞིའི་དཔལ་འབྱོར་ཀུན་ལ་ཆོས་ཀྱི་རྒྱལ་སྲིད་ཆེན་པོས་དབང་བསྒྱུར་བར་འཇུག་པ།
ཡུངས་དཀར་ནི་བདུད་བགེགས་བར་ཆད་མཐའ་དག་གི་གཡུལ་ལས་རྒྱལ་བའི་སྟོབས་ལ་དབང་འབྱོར་བའི་བཀྲ་ཤིས་རྫས་ལ་འཇུག་པ་བཅས་སོ།།