མདུན་ཤོག- རིག་གནས་འཚོ་བ།- བྱ་དགའ་ཡོད་པའི་རྩོམ་ཡིག- སྙན་ངག

རྟོག་པ་རབ་རིབ་བརྒྱ་བོ་མུན་པ་ཨེ་ཡིན།

རྩོམ་པ་པོ། རེང་བུ  ཡོང་ཁུངས། མཚོ་ལྷོ་མི་རིགས་མཐོ་འབྲིང་གཉིས་པ།  2013-09-29 11:03

མུ་མེད་བས་མཐའ་ལྡེམ་པ་ནགས་མའི་ཀློང་ན།།
ཏིང་འཛིན་བསིལ་རླུང་འཇམ་པོའི་གཟན་ལ་རོལ་བཞིན།།
སྲིད་པ་ཁ་སྒང་འདི་ནས་གསལ་ལེར་འཕགས་པ།།
མཁའ་སྤྱོད་འོད་ཀྱི་རྨུ་ཐིགས་རྐང་སྟེགས་ཨེ་ཡིན།།

ས་བཅུའི་ལམ་ཡིག་འཚོང་བ་དབེན་པའི་ཁྲོམ་ན།།
འདུ་ཚོགས་གཟན་ལ་འཁོར་བ་བྱ་ཁྱུ་ནག་པོ།།
མནོག་ཆུང་འཁོར་བར་ཁྲེལ་བའི་མནོ་བསམ་སྣེ་ནས།།
ངེས་འབྱུང་གདང་སྟེགས་རྙེད་པའི་འཛུམ་རིས་ཨེ་ཡིན།།

འཚུལ་ཆོས་སྲན་བས་བཏེགས་པའི་གོས་ཆེན་ཁུགས་སུ།།
གཞན་རྒྱུས་འོལ་ཚོད་སྨྲ་བའི་རྟོག་པ་རང་གྲོལ།།
ལོང་བས་ལོང་པ་འཁྲིད་པ་མུན་པའི་ལོ་ཟླ།།
རྒྱལ་བསྟན་ཉིན་མོར་བྱེད་པའི་སྐལ་བཟང་ཨེ་ཡིན།།

དད་ལྡན་རྒྱ་མཚོ་དཀྲུགས་པའི་རྦ་རླབས་རྩེ་རུ།།
མཚོ་བྱ་ཁྲུང་ཁྲུང་དཀར་མོའི་དབང་ལུང་བསྐུལ་བའི།།
རིག་འཛིན་གཅེས་མ་རུམ་པའི་གཡུ་རྣ་ཅན་པོ།།
རྫོགས་སངས་འདི་ནས་རྒྱས་པའི་སྐུ་རྒོད་ཨེ་ཡིན།།

བསིལ་ལྡན་ཁ་བའི་ལྗོངས་ནས་ཁྱི་བཞིན་ཉུལ་ཏེ།།
སྨད་རྒྱུད་འཕྱོན་མའི་འདོམས་སུ་ཕག་བཞིན་མདུར་སོང་།།
གཡོ་དང་རྫུན་གྱིས་བསྒྲིགས་པའི་རྣམ་དཀར་འོད་ཚོགས།།
གདུལ་བྱའི་དཔལ་དུ་བརྐྱངས་བའི་ཐར་ལམ་ཨེ་ཡིན།།

ཧམ་སེམས་རྣོ་ལྕགས་ལེབ་མོས་ལྷམ་པ་སྦྱར་བའི་།།
མྱི་མངོན་ཁུགས་པ་མང་བའི་དགོངས་པ་ཆེན་པོས།།
སངས་རྒྱས་ཞབས་སུ་བཅིངས་པའི་འཕྲིན་ལས་དཀར་པོ།།
སྙིགས་མའི་འགྲོ་ལ་བསླབ་པའི་གདམས་ངག་ཨེ་ཡིན།།

མཚན་མ་རྙིད་པོ་ཞིག་གི་རྟེན་སྐལ་འཇལ་ན།།
གྲངས་མེད་གཤིན་པོའི་དཀོར་རྫས་ཡོན་དུ་བསིལ་བ།།
གངྒའི་འདམ་དུ་འཁྲུངས་པའི་ཨུཏྤལ་དཀར་པོའི་།།
མ་བཅོས་བསུང་བ་འཐུལ་བའི་རང་གཤིས་ཨེ་ཡིན།།

འདོད་ཡོན་སྦྲང་ཆར་འཇོ་བའི་སྲིད་ཁམས་ཕང་ན།།
ངེས་འབྱུང་དཀར་ངོགས་རྙེད་པའི་རྫོགས་པ་ཆེན་པོ།།
གདུང་སྲས་རྒྱལ་བའི་སྨྱུ་གུ་རྡུལ་བཞིན་གཏོར་བ།།
འཁོར་བའི་རྒྱུན་ཐག་གཅོད་པའི་རྣོ་གྲི་ཨེ་ཡིན།།

སྙིང་སྡུག་མཚན་གྱི་ཐོར་ཅོག་གཙུག་ལ་སྦྱར་ཏེ།།
མུག་པོའི་རྐང་ལས་བཙག་པའི་བམ་ཤ་རྡོག་རྡོག།
ལྕགས་ཀྱི་ཤན་བུ་སྦྱར་བ་མཆུ་ཏོས་གཙབ་པ།།
དབུ་མའི་ལྟ་དགོངས་རྫོགས་པའི་འབྲས་རྟགས་ཨེ་ཡིན།།

མཁའ་ཁྱབ་སྐྱེ་རྒུའི་རྒུད་ཚོགས་རྡུལ་དུ་འཐག་པའི་།།
ཕན་བདེའི་སྐྱ་རེངས་འགུག་པའི་ཆོད་སེམས་སྣེ་ན།།
ས་རྡུལ་འབག་གི་ཡོན་དུ་གཅེས་སྲོག་བརྩེགས་པ།།
མ་དག་འགྲོ་ལ་བསྲིངས་བའི་སྲི་ཞུ་ཨེ་ཡིན།།

སེམས་པ་གླང་བུའི་རྒྱུན་བུ་ཕྱི་ནས་དོར་ཏེ།།
སྣང་བའི་ཕང་ལ་བསྐྱིལ་བའི་ས་རྡོའི་ཕུང་པོ།།
ཐར་བའི་སྒེའུ་ཁུང་ནག་པོའི་ལམ་དུ་གོ་བ།།
ཐུབ་པའི་ངག་ལས་འཐོར་བའི་ཉེས་པ་ཨེ་ཡིན།།

ཁ་འདོན་ཟློས་ཀློག་མཁྱེན་པའི་རྣམ་དཔྱོད་ཡངས་པོས།།
རུང་འབྲོག་གདུལ་བྱའི་ཞིང་ལ་ཞབས་ཀྱིས་བཅགས་པའི་།།
རྔ་རྡུང་སེ་ཆ་དཀྲོལ་བའི་ལེགས་མཛད་རི་མོ།།
ཐར་བ་ཉིན་མོ་བྱེད་པའི་རབ་གསལ་ཨེ་ཡིན།།

བསྐལ་བ་སྙིགས་མའི་ཕང་གི་འོ་དོད་ཀློང་ན།།
མ་དག་འགྲོ་ཚོགས་འདྲེན་ལ་སྒྱུ་ལུས་བྲེལ་བའི།།
གསང་བའི་བདུད་རྩི་འཛིན་པ་འགྲོ་བའི་གར་བསྒྱུར།།
ཤྰཀྱའི་དགོངས་པ་འཕོས་པའི་མཚན་རྟགས་ཨེ་ཡིན།།

བཤུ་གཞོག་མུན་པ་ཆེན་པོའི་སྒྱུ་ལུས་སྒྲེན་པོར།།
རྫུ་བག་པགས་སྐྱི་ལེབ་མོས་འཇོ་སྒེག་དཀྲི་བཞིན།།
བྱམས་པའི་ཤ་ཚིགས་མཉེན་མོས་བྱིལ་བྱིལ་གཏོང་བ།།
འགྲོ་དག་དབུགས་དབྱུང་སྩོལ་བའི་ལེགས་མཛད་ཨེ་ཡིན།།

རང་དོན་རྒྱུན་བུའི་གདང་སྟེགས་རིང་ནས་ཆད་ཅིང་།།
གཞན་དོན་གཅོང་རུང་འཕྲེང་ལ་གསེར་ཟམ་འཕེན་པའི་།།
སྙིགས་མའི་རྡུལ་ཟེགས་འཕྱོ་བའི་སྨག་ཆེན་འདི་ལ།།
མཛེས་སྡུག་ཉ་རིས་རྫོགས་པའི་ཆུ་ཤེལ་ཨེ་ཡིན།།

པར་དབང་གསལ་བསྒྲགས།      ངེད་ཀྱི་སྐོར།      འབྲེལ་གཏུགས་བྱེད་ཚུལ།

གློག་འཕྲིན་ཡིག་སྒམ། tibet3@126.com    ཁ་པར། 0971-8455441

©2006-2013 China Tibetannet Corporation པར་དབང་ངེད་དྲ་བར་དབང་བས་ཆོག་མཆན་མ་ཐོབ་པར་གཞན་གྱིས་རང་དགར་སྤྱོད་མི་ཆོག