ཀྲུང་གོ་བོད་ཀྱི་དྲ་བའི་འཕྲིན། ཟླ12པའི་ཚེས9ཉིན་ནས་ཚེས10ཉིན་གྱི་བར་དུ། ཡུན་ནན་ཞིང་ཆེན་སེམས་ཀྱི་ཉི་ཟླ་ནས་ཧྲིན་ཀྲིན་བར་གྱི་མཁའ་ལམ་ཤར་གཏོང་བྱེད་རྒྱུའི་ཁྱབ་བསྒྲགས་བྱེད་སྒོ་སྟེ་འཛམ་གླིང་གི་སེམས་ཀྱི་ཉི་ཟླ་ཞེས་པའི་ཡུལ་སྐོར་འོས་སྦྱོར་བྱེད་སྒོ་ཧྲིན་ཀྲིན་དུ་འཚོགས་པ་རེད།
ཐེངས་འདིའི་འོས་སྦྱོར་ལམ་བསྒྲགས་བྱེད་སྒོར་སེམས་ཀྱི་ཉི་ཟླའི་མི་རིགས་ཁྱད་ཆོས་དང་ས་གནས་ཁྱད་ཆོས་ལྡན་པའི་གོས་རྒྱན་དང་གླུ་དབྱངས། ཞབས་བྲོ་སོགས་ནས་བདེ་ཆེན་གྱི་རང་བྱུང་ཡུལ་ལྗོངས་དང་མི་རིགས་རིག་གནས། ཡུལ་སྲོལ་གོམས་གཤིས་སོགས་ཧྲིན་ཀྲིན་གྱི་གྲོང་མི་རྣམས་ལ་འགྲེམ་སྟོན་བྱེད་པ་རེད། ཡུལ་དངོས་སུ་ད་དུང་དྲིས་ལན་དང་བྱ་དགའ་རྒྱན་སྒྲུག་བྱེད་སྒོ་བཀོད་སྒྲིག་བྱེད་ཡོད་དེ་བྱ་དགའ་ནི་སེམས་ཀྱི་ཉི་ཟླའི་ལྗོངས་ཁུལ་འགའི་པཱ་སེ་དང་ཡུལ་སྐོར་གྱི་དྲན་རྟེན་དངོས་རྫས་སོགས་ཡོད་པ་རེད།
2019ལོའི་ཟླ1པོའི་ཚེས1ཉིན་ནས་བཟུང་། ཧྲིན་ཀྲིན་ནས་སེམས་ཀྱི་ཉི་ཟླ་བར་གྱི་མཁའ་ལམ་ཤར་གཏོང་བྱེད་རྒྱུ་རེད། མཁའ་ལམ་དེ་ཤར་གཏོང་ཐུབ་ན་ཧྲིན་ཀྲིན་ནས་བདེ་ཆེན་བར་གྱི་བར་ཐག་ཐུང་ངུར་གཏོང་རྒྱུ་ཡིན་པ་དང་། ས་གནས་གཉིས་ཀའི་ཡུལ་སྐོར་དར་འཕེལ་ལ་སྐུལ་ཁྲིད་བྱེད་རྒྱུ་རེད། །