ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཧྥེ་ལེ་ཕིན་རྒྱལ་ཁབ་ཀྱི་ཉེན་རྟོག་ཕྱོགས་ཀྱིས་ཚེས8ཉིན་ཤར་ཕྱོགས་ཀྱི་ཁོས་སུང་ཞིང་ཆེན་གྱི་གྲོང་སྡེ་ཞིག་ནས་ཐོབ་ཐང་གསལ་བོར་མི་ཤེས་པའི་དྲག་ཆས་ཉེས་ཅན་བར་འཁྲུག་རྩོད་དྲག་པོ་བྱུང་ཞིང་། དྲག་ཆས་ཉེས་ཅན་བདུན་བསད་པ་དང་། གཞན་ཡང་མི་གཅིག་སྨན་ཁང་དུ་བསྐྱལ་ནས་སྨན་བཅོས་བྱས་ཀྱང་ཕན་མ་ཐོགས་པར་ཚེ་ལས་འདས་ལ། ཉེན་རྟོག་ཕྱོགས་ལ་མི་སྣ་ཤི་རྨས་བྱུང་མེད་ཟེར།
བསྒྲགས་པའི་གནས་ཚུལ་ལྟར་ན། ས་དེའི་ཚེས8ཉིན་གྱི་ཞོགས་པའི་དུས་ཚོད་ལྔ་ཡས་མས་སུ། དྲག་ཆས་ཉེས་ཅན་སྐོར་ཞིག་ཁོས་སུང་ཞིང་ཆེན་གྱི་ཁན་ཏི་ལཱ་ལི་ཡཱ་གྲོང་བརྡལ་འདེམ་བསྐོ་ཨུ་ཡོན་ལྷན་ཁང་ཉེ་འདབས་ཀྱི་ཞིབ་བཤེར་ས་ཚིགས་བརྒྱུད་སྐབས་ཞིབ་བཤེར་བྱེད་དུ་མ་བཅུག་པར་བདེ་འཇགས་རྟོག་ཞིབ་མི་སྣའི་ཕྱོགས་ལ་མེ་མདས་བརྒྱབ། ཉེན་རྟོག་ཕྱོགས་ཀྱིས་དེ་མ་ཐག་ཕྱིར་རྒོལ་ལན་སྤྲད་དེ། འཁྲུག་རྩོད་དེ་སྐར་མ་བཅུ་ཙམ་འགོར་བ་དང་། མིག་སྔར་ཉེན་རྟོག་ཕྱོགས་ཀྱིས་དྲག་ཆས་ཉེས་ཅན་དེ་དག་གི་ཐོབ་ཐང་ལ་ཞིབ་བཤེར་བྱེད་བཞིན་ཡོད། །