ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཡེ་མིན་སྲིད་གཞུང་གིས་ཚེས་བཅུའི་ཉིན་གསལ་སྒྲོག་སྤེལ་ཏེ། ཡེ་མིན་ཧུའུ་སེ་དྲག་ཆས་པས་མི་བསྡད་མེད་པའི་གནམ་གྲུ་བཀོལ་ནས་སྲིད་གཞུང་དམག་དཔུང་ལ་འཇབ་རྒོལ་བྱེད་པའི་བྱ་སྤྱོད་ལ་རྒོལ་གཏམ་དྲག་པོ་བཏང་།
བསྒྲགས་པ་ལྟར་ན། ཡེ་མིན་སྲིད་གཞུང་གིས་གསལ་སྒྲོག་ནང་ཐེངས་འདིའི་འཇབ་རྒོལ་དོན་རྐྱེན་ནི་ཧུའུ་སེ་དྲག་ཆས་པས་རྒྱལ་སྤྱིའི་སྤྱི་ཚོགས་ལ་མངོན་སུམ་འཛེམ་མེད་དུ་འགྲན་བསླངས་པ་ཡིན། དེ་ལས་ཧུའུ་སེ་དྲག་ཆས་པས་ཆབ་སྲིད་གྲོས་མོལ་ལ་བརྟེན་ནས་ཞི་བའི་སྒོ་ནས་འཁྲུག་རྩོད་གནད་དོན་ཐག་གཅོད་བྱེད་པའི་བྱ་བ་དང་ལེན་མ་བྱས་པ་མཚོན་ཡོད་ཟེར། གསལ་སྒྲོག་ལས་བཤད་རྒྱུར། ཧུའུ་སེ་དྲག་ཆས་པས་ཡང་དང་བསྐྱར་དུ་ཕྱོགས་གཉིས་ཀྱིས་སུའེ་ཏེན་ནས་བཀོད་པའི་འཁྲུག་རྩོད་མཚམས་འཇོག་པའི་གྲོས་མཐུན་བརྩི་སྲུང་མ་བྱས་པར་དེར་འགལ་བའི་བྱ་སྤྱོད་སྤེལ་བཞིན་ཡོད་ཟེར། ཡེ་མིན་སྲིད་གཞུང་གིས་རྒྱལ་སྤྱིའི་སྤྱི་ཚོགས་ཀྱིས་ཧུའུ་སེ་དྲག་ཆས་པར་ལངས་ཕྱོགས་བརྟན་པོ་འཛིན་དགོས་པའི་འབོད་སྐུལ་བཏང་།