ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨུ་རུ་སིའི་ཙུང་ཐུང་ཕུའུ་ཅིན་དང་དབྱི་སི་རལ་གྱི་ཙུང་ལི་ནེ་ཐཱ་ནི་ཡཱ་ཧུའུ་ཡིས་ཚེས་བཞིའི་ཉིན་ཁ་པར་བརྒྱུད་དེ། སི་རི་ཡཱའི་གནས་བབ་ལ་གྲོས་བསྡུར་བྱས།
ཁི་ལི་མུའུ་ལིན་ཕོ་བྲང་གིས་ཚེས་བཞིའི་ཉིན་བསྒྲགས་པ་ལྟར་ན། ཕུའུ་ཅིན་གྱིས་ཉིན་དེར་དུས་བཅད་ལྟར་ནེ་ཐཱ་ནི་ཡཱ་ཧུའུ་ལ་ཁ་པར་བཏང་། ཨ་མེ་རི་ཁསི་སི་རི་ཡཱའི་དམག་དཔུང་ཕྱིར་འཐེན་བྱེད་རྒྱུ་ཁྱབ་སྒྲོག་བྱས་པའི་གནས་ཚུལ་འོག ཁོ་གཉིས་ཀྱིས་སི་རི་ཡཱའི་གནས་བབ་ཀྱི་འཕེལ་རྒྱས་ལ་གྲོས་བསྡུར་བྱས། ཕྱོགས་གཉིས་ཀྱིས་ངེས་པར་དུ་འཇིགས་སྐུལ་རིང་ལུགས་རྩ་མེད་དུ་གཏོང་དགོས་པར་མ་ཟད། གང་མགྱོགས་ཀྱིས་ཆབ་སྲིད་ལ་བརྟེན་ནས་སི་རི་ཡཱའི་གནད་དོན་ཐག་གཅོད་བྱེད་པར་སྐུལ་འདེད་གཏོང་དགོས་ལ། དམག་དོན་དང་ཕྱི་འབྲེལ་གྱི་ཐབས་ལ་བརྟེན་ནས་རོགས་ལས་ལ་ཤུགས་སྣོན་བྱེད་དགོས་པ་ནན་བཤད་བྱས།
བསྒྲགས་པ་ལྟར་ན། ཕུའུ་ཅིན་དང་ནེ་ཐཱ་ནི་ཡཱ་ཧུའུ་གཉིས་ཀྱིས་ད་རུང་ཨུ་རུ་སི་དང་དབྱི་སི་རལ་རྒྱལ་ཁབ་གཉིས་ཀྱིས་རིམ་པ་སོ་སོའི་འབྲེལ་འདྲིས་ལ་ཤུགས་སྣོན་བྱེད་རྒྱུའི་ཚུལ་བསྟན།