ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཁུན་ནེ་ཡཱའི་ཉེན་རྟོག་ཕྱོགས་ཀྱིས་ཚེས་བཅུ་དགུའི་ཉིན་བཤད་རྒྱུར། རྒྱལ་ཁབ་དེའི་ནུབ་ཕྱོགས་ཀྱི་ནཱ་ཁུའུ་ལུའུ་རྫོང་ནས་ཉིན་དེའི་ཞོགས་པར་འགྲིམ་འགྲུལ་དོན་རྐྱེན་ཞིག་བྱུང་སྟེ། མི་བཅུ་གཉིས་རྐྱེན་ལམ་དུ་ཤོར་བ་དང་། གཞན་ཡང་མི་གཉིས་ལ་རྨས་ལྗིད་མོ་ཕོག་ཟེར།
ནཱ་ཁུའུ་ལུའུ་རྫོང་གི་ཉེན་རྟོག་ཕྱོགས་ཀྱིས་བཤད་རྒྱུར། ས་དེའི་ཞོགས་པའི་དུས་ཚོད་གསུམ་ཡས་མས་སུ། ནཱ་ཁུའུ་ལུའུ་གྲོང་ཁྱེར་དང་ཨེ་ཨར་ཏའོ་ལོས་ཐི་གྲོང་ཁྱེར་སྦྲེལ་བའི་གཞུང་ལམ་སྟེང་། འགྲུལ་སྐྱེལ་རླངས་འཁོར་ཞིག་གིས་གཞུང་ལམ་བརྒལ་བའི་བ་གླང་ལ་ཡོལ་ཆེད་ཁ་གཏད་ནས་ཡོང་བའི་དངོས་སྐྱེལ་རླངས་འཁོར་ཞིག་ལ་ཐོ་བརྒྱབ། འགྲུལ་སྐྱེལ་རླངས་འཁོར་སྟེང་གི་ཁ་ལོ་བ་དང་འགྲུལ་བ་བཅུ་གཅིག་རྐྱེན་ལམ་དུ་ཤོར་བ་དང་། འགྲུལ་སྐྱེལ་རླངས་འཁོར་སྟེང་གི་འགྲུལ་བ་གཅིག་དང་དངོས་སྐྱེལ་རླངས་འཁོར་གྱི་ཁ་ལོ་བར་རྨས་ལྗིད་མོ་ཕོག་ཡོད་ལ། ཁོ་གཉིས་སྨན་ཁང་དུ་བསྐྱལ་ནས་མྱུར་སྐྱོབ་བྱེད་བཞིན་ཡོད།
ཁུན་ནེ་ཡཱའི་འགྲིམ་འགྲུལ་དོ་དམ་སྡེ་ཁག་གིས་ཁྱབ་སྒྲོག་བྱས་པའི་རྒྱུ་ཆ་ལྟར་ན། རྒྱལ་ཁབ་དེར་ལོ་རེར་ཧ་ལམ་མི་སྟོང་གསུམ་ཙམ་འགྲིམ་འགྲུལ་དོན་རྐྱེན་ཁྲོད་ཚེ་ལས་འདས་བཞིན་ཡོད་ཟེར།