ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་བུན་ཅ་པའོ་ཡིས་ཟླ1པོའི་ཚེས11ཉིན་ནས་ཟླ2པའི་ཚེས6ཉིན་བར་ཀྲུང་ནན་ཧེ་ནས་སྔ་གཞུག་ཏུ་མགོ་འཛིན་མཛད་དེ་བཞུགས་མོལ་ཚོགས་འདུ་ཐེངས་ལྔ་བསྡུས་ཏེ། གཏན་འབེབས་བྱེད་བཞིན་པའི་རྒྱལ་ཁབ་ཀྱི་དུས་ཡུན་རིང་འབྲིང་གི་སློབ་གསོའི་བཅོས་བསྒྱུར་དང་འཕེལ་རྒྱས་འཆར་འགོད་རྩ་གནད་ཅེས་པའི་ཐད་ནས་སྤྱི་ཚོགས་ལས་རིགས་སོ་སོའི་མི་སྣའི་བསམ་འཆར་དང་གྲོས་གཞི་ལ་ཉན། བཞུགས་མོལ་ཚོགས་འདུའི་སྟེང་། རིམ་པ་སོ་སོ་དང་རིགས་སོ་སོའི་སློབ་གྲྭའི་སློབ་གཙོ་དང་དགེ་རྒན་གྱི་འཐུས་མི། སློབ་གསོའི་ཆེད་མཁས་པ། ཤེས་ལྡན་པ། སློབ་གྲྭ་ཆེ་འབྲིང་གི་སློབ་མ། སློབ་མའི་ཁྱིམ་བདག་གི་འཐུས་མི། སློབ་གསོ་དོ་དམ་ཁོངས་གཏོགས་ཀྱི་འགན་ཁུར་མི་སྣ་བཅས་ཀྱིས་རང་རང་གི་ལྟ་ཚུལ་རྒྱས་བཤད་བྱས་པར་མ་ཟད། སློབ་གསོའི་བཅོས་བསྒྱུར་དང་འཕེལ་རྒྱས་ཐད་བསམ་འཆར་དང་གྲོས་གཞི་མང་བོ་བཏོན།།