ཞི་ཅིན་ཕིང་གིས་རྒྱལ་ཁབ་རྩ་ཁྲིམས་ཉིན་མོ་ཐེངས་ལྔ་པ་སླེབས་པའི་སྐབས་སུ་མཛུབ་སྟོན་གལ་ཆེན་གནང་།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།  རྒྱལ་ཁབ་རྩ་ཁྲིམས་ཉིན་མོ་ཐེངས་ལྔ་པ་སླེབས་པའི་སྐབས་སུ། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི། རྒྱལ་ཁབ་ཀྱི་ཀྲུའུ་ཞི། ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་མཛུབ་སྟོན་གལ་ཆེན་གནང་ནས། ཁྲིམས་ལྟར་རྒྱལ་ཁབ་སྐྱོང་བ་རྒྱུན་འཁྱོངས་བྱེད་ན་ཐོག་མར་རྩ་ཁྲིམས་ལྟར་རྒྱལ་ཁབ་སྐྱོང་བ་རྒྱུན་འཁྱོངས་བྱེད་དགོས་པ་དང་། ཁྲིམས་ལྟར་སྲིད་འཛིན་པ་རྒྱུན་འཁྱོངས་བྱེད་ན་ཐོག་མར་རྩ་ཁྲིམས་ལྟར་སྲིད་འཛིན་པ་རྒྱུན་འཁྱོངས་བྱེད་དགོས། རང་རྒྱལ་གྱི་ད་ལྟ་ལག་བསྟར་བྱེད་བཞིན་པའི་རྩ་ཁྲིམས་ནི་ཏང་གི་འགོ་ཁྲིད་འོག་ཏུ། རང་རྒྱལ་གྱི་སྤྱི་ཚོགས་རིང་ལུགས་ཀྱི་གསར་བརྗེ་དང་འཛུགས་སྐྲུན། བཅོས་སྒྱུར་བཅས་ཀྱི་ལག་ལེན་ཉམས་མྱོང་སྤྱི་སྡོམ་ཟབ་མོ་བྱས་པའི་རྨང་གཞིའི་སྟེང་གཏན་འབེབས་བྱས་པ་དང་རྒྱུན་ཆད་མེད་པར་འཐུས་ཚང་དུ་བཏང་ནས། ཏང་གི་འདོད་བློ་དང་མི་དམངས་ཀྱི་འདོད་བློ་ཚད་མཐོའི་གཅིག་གྱུར་ཡོང་བར་བྱས་པས། གསོན་ཤུགས་ཆེན་པོ་ལྡན་ལ། དེས་བཅོས་སྒྱུར་སྒོ་འབྱེད་དང་སྤྱི་ཚོགས་རིང་ལུགས་དེང་རབས་ཅན་འཛུགས་སྐྲུན་ལ་གཞི་རྩའི་ཁྲིམས་སྐྱོང་གི་འགན་སྲུང་འདོན་སྤྲོད་བྱས་ཡོད། ཏང་གིས་མི་དམངས་ལ་འགོ་ཁྲིད་ནས་རྩ་ཁྲིམས་གཏན་འབེབས་བྱེད་པ་དང་འཐུས་ཚང་དུ་གཏོང་བ་ལ། རྩ་ཁྲིམས་ཀྱིས་རྒྱལ་སྐྱོང་སྲིད་འཛིན་ཁྲོད་དུ་ཐོན་པའི་ནུས་པ་གལ་ཆེན་འདོན་སྤེལ་བྱེད་དགོས། ཚན་རིག་ཕན་ལྡན་དང་འཐུས་སྒོ་ཆ་ཚང་གི་ལམ་ལུགས་མ་ལག་བཀོལ་ནས་རྩ་ཁྲིམས་ལག་བསྟར་བྱེད་པར་ཁག་ཐེག་བྱེད་པ་དང་། རྩ་ཁྲིམས་ཀྱི་ལྟ་སྐུལ་ལ་ཤུགས་སྣོན་དང་རྩ་ཁྲིམས་ཀྱི་དབང་ཟིལ་ལ་སྲུང་སྐྱོབ་བྱས་ཏེ། རྩ་ཁྲིམས་ལག་བསྟར་བྱེད་པ་དེ་ཆུ་ཚད་གསར་པ་ཞིག་ཏུ་གོང་འཕེལ་ལ་གཏོང་དགོས། ཏང་ཡོངས་དང་སྤྱི་ཚོགས་ཡོངས་ཀྱིས་རྩ་ཁྲིམས་བཀུར་བ་དང་རྩ་ཁྲིམས་སློབ་པ། རྩ་ཁྲིམས་བརྩི་བ། རྩ་ཁྲིམས་སྲུང་བ། རྩ་ཁྲིམས་བཀོལ་བ་བཅས་ཀྱི་དྲིལ་སྒྲོག་སློབ་གསོའི་བྱ་འགུལ་ཟབ་མོར་སྤེལ་ནས། རྩ་ཁྲིམས་ཀྱི་དབང་ཟིལ་བརྟན་པོར་བཙུགས་ཏེ། མི་དམངས་ཡོངས་རྫོགས་སྤྱི་ཚོགས་རིང་ལུགས་ཁྲིམས་སྐྱོང་གི་བློ་དཀར་བའི་བཀུར་མོས་པ་དང་། རང་རྟོགས་ཀྱི་བརྩི་སྲུང་པ། འགྱུར་མེད་ཀྱི་རྒྱབ་སྐྱོར་པ་ཅས་སུ་འགྱུར་བར་བྱེད་དགོས་ཟེར།  །


རྩོམ་སྒྲིག་པ། མཁའ་མཚོ་སྐྱིད།

དཔྱད་མཆན 0 ཡོད།