ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཟླ5པའི་ཚེས3ཉིན་གྱི་བར་རང་རྒྱལ་དུ་དབང་པོ་ཞལ་འདེབས་འབུལ་རྒྱུར་དང་བླངས་ཐོ་འགོད་བྱེད་མཁན་མི་གྲངས་ཁྲི42ཟིན་པའི་ཁྲོད“སྦྱིན་པ་དང་དང་ལེན”ཞེས་པའི་དབང་པོ་ཞལ་འདེབས་ཀྱི་ལས་སྟེགས་བརྒྱུད་ཐོ་འགོད་བྱེད་མཁན་མི་གྲངས་ཁྲི30ལས་བརྒལ་ཡོད་པ་རེད།
2015ལོའི་ཟླ1ཚེས1ཉིན་ནས་བཟུང་། རང་རྒྱལ་དུ་དབང་པོ་ཞལ་འདེབས་འབུལ་ཚད་དང་དབང་པོ་བརྗེ་ཚད་ལོ་རེ་བཞིན་མང་དུ་ཕྱིན་ཡོད་ཅིང་། ད་ལོའི་ཟླ3ཚེས28ཉིན་བར། དབང་པོ་ཁྲི1.65ཞལ་འདེབས་ཕུལ་ཡོད། ཀྲུང་གོ་ནི་ཨ་རི་དང་སི་ཕེན་རྗེས་ཀྱི་གོ་ལ་ཧྲིལ་པོའི་དབང་པོ་ཞལ་འདེབས་འབུལ་ཚད་ཨང་གསུམ་པར་སླེབས་པའི་རྒྱལ་ཁབ་ལ་གྱུར་ཡོད། ཡིན་ནའང་རང་རྒྱལ་གྱི་དབང་པོ་ཞལ་འདེབས་འབུལ་བའི་ལས་དོན་ཁྱབ་གདལ་གྱི་གནས་ཚུལ་སྔར་བཞིན་ཛ་དྲག་པོ་ཡོད། འབྲེལ་ཡོད་བསྡོམས་རྩིས་ལྟར་ན། རང་རྒྱལ་དུ་ལོ་ལྟར་དབང་པོ་བརྗེ་དགོས་པའི་ནད་པ་ཁྲི30ལྷག་ཙམ་ཡོད། འོན་ཀྱང་དེ་དང་བསྡུར་ན་དབང་པོ་བརྗེ་ཐུབ་པའི་ནད་པའི་གྲངས་འབོར་ཧ་ཅང་ཉུང་ཉུང་ཡིན་པ་རེད། །