བདེ་ལེགས་རིག་པའི་རལ་གྲི་ནི་ཕྱི་ལོ་(༡༩༩༢)ལོར་ཡུལ་ཤུལ་གྱི་འབྲོག་ཁྱིམ་དཀྱུས་མ་ཞིག་ཏུ་སྐྱེས་ཤིང་། གཞུང་ཆེན་བཀའ་པོད་ལྔ་དང་སྔགས་ཀྱི་ས་ལམ་དང་སྤྱི་དོན། ཕྱག་ཆེན་དང་རྫོགས་ཆེན། འཁོར་འདས་དབྱེར་མེད་དང་གཞན་སྟོང། སུམ་རྟགས་སྙན་ངག ལྷག་པར་བོད་སྔ་ཕྱིའི་ཆོས་བརྒྱུད་རྣམས་ཀྱི་གཞུང་ལུགས་སྤྱི་དང་རྒྱ་གར་གྱི་གཞུང་ཆེན་སོགས་ལ་ཐོས་བསམ་བྱས་ཤིང་། ད་ལྟ་དགེ་རྒན་གྱི་ལས་རིགས་གཉེར་བཞིན་ཡོད།
བརྩམས་ཆོས་ལ། <དོགས་དཔྱོད་སེམས་ཀྱི་རླབས་སྒྲ།> <དབུ་མའི་བསྟན་བཅོས་ལྟ་བའི་ཐེམ་སྐས།> <དབུ་མའི་དཀའ་འགྲེལ་ས་དགེ་ལྟ་བ་གཅིག་སྒྲུབ།> <དབུ་ཕར་ཚད་གསུམ་གྱི་དྲིས་ལན།> ཟབ་དོན་དབུ་མའི་རྣམ་བཤད།> སོགས་ཡོད།
ཕ་མའི་ལག་ནས་ཟན་གོས་མ་བསླངས་ཤིང་།།
མཛའ་གྲོགས་འཛུམ་ལ་རེ་བས་མ་བལྟས་པར།།
ཚེ་འདིའི་སོ་ཚིས་ལས་རྣམས་རབ་དོར་ནས།།
དབེན་པའི་གནས་སུ་གཅིག་པུར་བཞུད་དེ་རྨད།།
མི་དབང་གང་གི་འབངས་སུ་གྱུར་པ་ན།།
དེ་ཡི་ཁྲིམས་ལ་ལེགས་པར་གནས་དགོས་ལྟར།།
དམ་པ་གང་ལ་སྐྱབས་སུ་སོང་བ་ན།།
དེ་ཡི་བསླབ་བྱ་དག་ཀྱང་གཙི་དགོས་གསུངས།།
གཅོང་དང་གཡང་ས་ཟབ་པའི་ལྷུན་པོའི་སྤོར།།
དཀར་གཙང་ཁ་བ་བབས་འདྲའི་དད་པ་ནི།།
གཡོ་ཟོལ་ཟོག་ཁྲོམ་འདྲེས་པའི་བློ་ཡིན་ཕྱིར།།
དེ་འདྲ་དེ་ཡིས་ཅི་ཡང་མི་ཕན་གསུངས།།
གསོད་སར་ཁྲིད་པའི་ཕྱུགས་དང་ལམ་ཞུགས་འགྲོན།།
མྱུལ་བར་འགྲོ་ཞིང་ཕྱིར་ཟློག་མེད་པ་བཞིན།།
ལས་ཉོན་དབང་གིས་བྱུང་བའི་འོ་སྐོལ་ཡང་།།
མྱུལ་བར་འཆི་བས་མི་རྟག་བསྒོམ་དགོས་གསུངས།།
སྤྱིར་ན་ཉོན་མོངས་གཞོམ་དགོས་ཁྱད་པར་དུ།།
འཆི་ཁར་དེ་ཡིས་དབང་དུ་མ་སོང་བར།།
དགོས་ཏེ་གཞན་དུ་མྱ་ངན་མེད་པ་བཞིན།།
འགྱུར་བས་དེ་ལ་བག་ཡོད་དགོས་ཞེས་གསུངས།།
ཁ་སྦུབ་ཞབས་རྡོལ་དྲི་མ་ཅན་རྣམས་ནི།།
ཤེས་རབ་གསུམ་ལ་སྦྱར་བའི་གནས་དེ་ཀོ།།
ཧྭ་ཤང་ལྟ་བ་དགག་པའི་གནད་མཐོང་བས།།
ཚུལ་དེར་ཕྱག་རྫོགས་སྨྲ་བས་གཟིགས་པར་རིགས།།
ཁྲོམ་ནས་ཕ་དང་སྟོར་བར་དོགས་པ་ཡིས།།
བྱིས་རྣམས་ཕ་ཡི་ཐུ་གཤམ་འཇུས་པ་བཞིན།།
དམ་པའི་བཤེས་དང་འབྲལ་བར་མེད་པའི་ངང་།།
ལུས་ངག་ཡིད་ཀྱིས་བཀུར་བསྟི་བྱེད་དགོས་གསུངས།།
སྒོ་ང་མ་ཡི་དྲོད་ལས་བརྡོལ་བ་དང་།།
བུ་ཆུང་མ་ཡི་དྲོད་ལས་མཚར་བ་ལྟར།།
དམ་པའི་བཤེས་ལ་སྙིང་ནས་གུས་པ་རྣམས།།
ལེགས་ཚོགས་ཡོན་ཏན་རྣམས་ནི་རྒྱས་ཞེས་གསུངས།།
འོན་ཏང་རིང་ཐུང་ཐག་ལ་མི་ལྟོས་པར།།
མོས་གུས་ཡོད་ན་བྱིན་བརླབས་འབྱུང་བ་དང་།།
དད་གུས་མེད་པའི་གཡག་འགྲོགས་ལྟ་བུ་ནི།།
བཤེས་དང་སྦྲེལ་ཡང་ཕན་པ་དཀའ་ཞེས་གསུངས།།
སྐྱེ་དང་འཆི་བ་བརྩིགས་དང་འཇིག་པ་དང་།།
འདུས་དང་བྲལ་བ་བསགས་དང་འཛད་པ་སོགས།།
རྒྱུ་འབྲས་གནས་ལུགས་གཤིས་སུ་གོ་བ་ན།།
ཚེ་འདིའི་སྣང་ཤས་ལྡོག་ཅེས་གསུངས་པ་མད།།
འཇིག་རྟེན་ལ་དགའ་སྐྱེ་འཆི་འཇིགས་པ་དང་།།
སྐྱེ་འཆི་མི་འཇིགས་སྐྱབས་འགྲོ་ཡོད་ཅེས་དང་།།
འདོད་པ་མ་སྤངས་སྒོམ་ཆེན་ཡིན་པ་དང་།།
ལས་འབྲས་མི་ཤེས་ལྟ་བ་རྟོགས་པ་དང་།།
སྲིད་པའི་གཡང་ས་མ་སྤངས་སངས་རྒྱས་ཏེ།།
འདི་དག་རྫུན་དུ་འགྲོ་བ་ཡིན་ཞེས་གསུངས།།
མ་བསྒོམས་སངས་རྒྱས་མི་འོང་གསུངས་པ་དང་།།
དམ་ཚིགས་མ་ཉམས་དམྱལ་བར་མི་འགྲོ་དང་།།
ཐབས་དང་བྲལ་ན་དམན་སར་ལྟུང་བ་དང་།།
ལྟ་སྤྱོད་ཡ་བྲལ་ལོག་ལམ་གྱུར་པ་དང་།།
རང་བཞིན་གཤིས་ལ་དྲི་མས་མ་གོས་ཏེ།།
འདི་དག་བདེན་དུ་འགྲོ་བ་ཡིན་ཞེས་གསུངས།།
མ་བསྒོམས་སངས་རྒྱས་འགྲོ་བའི་མན་ངག་འགའ།།
བདུད་འཇོམས་ཡབ་སྲས་རྣམས་ཀྱི་གསུང་རབ་ཏུ།།
ཡོད་ཀྱང་དགོས་དང་དགོངས་པ་མི་འདྲ་བས།།
རྫོགས་ཆེན་སྨྲ་བ་རྣམས་ཀྱིས་ཤེས་པར་གལ།།
དོན་མེད་ལྔ་དང་གདམས་པ་བརྒྱད་ལ་སོགས།།
སྤང་བླང་རྣམ་གཞག་དག་ལ་བྱན་ཚུད་དེ།།
རྟོགས་མྱོང་གདེང་གསུམ་ལྡན་པའི་བླ་མའི་མདུན།།
ཐོས་དང་བསམ་པས་སྡུག་བསྔལ་ཐེག་དགོས་གསུངས།།
གསུམ་དུ་འགྲོགས་ན་རྩོད་པ་འབྱུང་བ་དང་།།
གཉིས་སུ་གནས་ན་ཉོན་མོངས་འཕེལ་ངེས་པས།།
གཅིག་པུར་བསྡད་ནས་ཕྱག་རྫོགས་དབུ་མའི་གནད།།
དད་དང་བརྩོན་པས་ངལ་བ་བསྲན་དགོས་གསུངས།།
དགེ་སྦྱོང་དག་ནི་སོ་གསོད་མ་ཤོར་ཞིང་།།
ཆོས་ཤེས་ཚིག་གི་ཐོག་ཏུ་མ་ལུས་ལྷན།།
རྟོགས་པ་གོ་ཡུལ་ཙམ་དུ་མ་སོང་བར།།
ཐོས་དོན་ཉམས་སུ་ལེན་པའི་ཚུལ་དེ་གསུངས།།
འཚོང་དང་རྨེ་དང་སྟོར་དང་རེ་བ་དང་།།
རྒྱུག་དང་མཁས་པ་བཞིན་དུ་མ་སོང་བར།།
སྒྲོ་སྐུར་བྲལ་ཞིང་མདོ་སྔགས་ཟུང་འཇུག་དང་།།
སྣང་སྟོང་ལྟ་སོགས་ཇི་བཞིན་རྟོགས་དགོས་གསུངས།།
དང་པོ་འཛིན་པའི་དབང་དུ་མ་སོང་ཞིང་།།
བར་དུ་བསྒོམས་པས་སུན་དུ་མ་སོང་བར།།
ཐ་མ་ལྟ་བ་གོལ་སྒྲིབ་མ་སོང་ངང་།།
ཐོས་དོན་བསམ་ཞིང་བསམ་དོན་བསྒོམ་དགོས་གསུངས།།
གདམས་ངག་མང་པོ་བསོགས་ན་བཟང་མོད་ཀྱང་།།
གང་ལ་བློ་གཏད་མེད་པར་འགྱུར་སྲིད་པས།།
གདམས་ངག་ཇི་ཙམ་ཐོས་པ་དེ་ཙམ་དུ།།
བློ་གཏད་ཆོད་པོ་ཡོད་པར་བྱེད་དགོས་གསུངས།།
སྣང་བ་སེམས་དང་སེམས་ནི་སྟོང་བ་རུ།།
རྟོགས་ན་ཕྱི་ནང་སྒྲོ་འདོགས་ཆོད་པ་དང་།།
སྟོང་པ་གཉིས་མེད་གཉིས་མེད་རང་གྲོལ་དུ།།
ཤེས་ན་གསལ་དང་དེ་ཉིད་ཆུད་པར་གསུངས།།
ཀུན་རྫོབ་ཆོས་རྣམས་ཁྱད་དུ་མ་གསད་ཅིང་།།
སྟོང་རྐྱང་ཙམ་ལ་ཞེན་པ་མ་ཆེ་བར།།
སྣང་སྟོང་ལྟ་ལ་གདེང་དང་ལྡན་གྱུར་ན།།
མི་ཚེ་དོན་ལྡན་ཞེས་པ་དེ་ཡིན་གསུངས།།
སྒེའུ་ཁུང་བྱང་དུ་བསྟན་ནས་ཉི་འོད་ལ།།
རེ་བའི་བློ་བཞིན་ནམ་ཡང་མ་སོང་བར།།
ལྟ་སྒོམ་སྤྱོད་པའི་ཉམས་ལེན་བཟང་པོ་ཡིས།།
མི་ཚེ་དོན་དང་ལྡན་པར་བྱེད་དགོས་གསུངས།།
འཇིག་རྟེན་ཆོས་ལ་ངེས་པར་མ་འབྱུང་ཡང་།།
ཆོག་ཤེས་ཡོན་ཏན་རྟག་ཏུ་བསླབ་པར་བྱ།།
དེ་ནི་དབུལ་ཕྱུག་ཀུན་གྱི་མཛའ་བཤེས་ཏེ།།
གང་གིས་བརྟེན་ན་མི་ཚེ་བདེ་ཞིང་སྐྱིད།།
བདག་གཞན་མགོ་སྙོམས་བལྟ་བར་མ་ནུས་ཀྱང་།།
འཚེ་མེད་བསམ་པ་རྟག་ཏུ་བསླབ་པར་བྱ།།
དེ་ནི་མཐོ་དམན་ཀུན་གྱི་མཛའ་བཤེས་ཏེ།།
གང་གིས་བརྟེན་ན་འདི་ཕྱི་དགའ་ཞིང་སྤྲོ།།
འཁོར་འདས་གདོད་ནས་སྟོང་བར་མ་ཤེས་ཀྱང་།།
གུ་ཡངས་བློ་ལ་རྟག་ཏུ་བསླབ་པར་བྱ།།
དེ་ནི་མཁས་བླུན་ཀུན་གྱི་མཛའ་བཤེས་ཏེ།།
གང་གིས་བརྟེན་ན་སྔ་ཕྱི་བཟང་ཞིང་དགེ།
༢༠༡༩/༢/༥/ཉིན་ཟུར་ཆུང་བའི་ལེགས་བཤད་རྣམས་མཇལ་བའི་མྱོང་ཚོར་དང་ལོ་སར་ལ་ལེགས་སྐྱེས་ཀྱི་དོད་དུ་བདེ་ལེགས་རིག་པའི་རལ་གྲི་རུ་འབོད་པས་བྲིས་པ་དགེའོ། །