ང་ཡོད་སར་དགུན་ཁ་སླེབ་བྱུང་། (ཞར་བཀོད་གཅིག)
༡
ང་ཡོད་སར་དགུན་ཁ་སླེབ་བྱུང
ཁྲོམ་སྲང་འདིའི་ཁ་དོག་ཡང་འགྱུར་སོང
ཡིན་ནའང ①ཡིད་འོང་གི་གཏམ་རྒྱུད་རུམ་གང་བཏེགས་ནས
རྒྱང་རིང་གི་ཁྱོད་ངའི་རྨི་ལམ་དུ་བབས་བྱུང
མཚན་མོ་དུས་ཚོད་ཀྱི་ཕྲག་པར་སྤྲོ་སྐྱིད་ཀྱི་སྒྲོན་མེ་འབར་སོང
༢
སྟོན་དུས་ཧྲིལ་བོར་ཡོངས་སུ་ཕེབས་ཚར་རྗེས
འདབ་ཆགས་དག་རང་རང་གི་གནས་ཚང་དུ་ལོག་སོང
ངའི་ནམ་མཁར་འཁྲིགས་པའི་ཁ་བ་དཀར་པོ
དགུན་ཁ་སླེབས་པའི་བརྡ་རྟགས་ལོས་ཡིན
༣
དགུན་ཁ་སླེབས་བྱུང
ང་ལ་དགའ་བའི་མི་ལགས
ཉིན་མོའི་སྐར་མ་ལྟར་མི་གསལ་བའི་ཟོལ་གྱིས་ཚེས་ཡོད་པ་ངས་རྟོགས་ཡོད
དགུན་ཁ་ཇི་ལྟར་གྲང་འཁྱག་གིས་བཟུང་རུང
ཁྱོད་ཀྱི་མཐའ་འཁོར་དུ་ངའི་བརྩེ་བ་དང་སེམས་པ་ལུས་ཡོད་པས
བརྩེ་བ་དང་ལག་འཇུ་ལྷོད་ག་ལ་སྲིད
དུས་ཀྱི་བརྩེ་བ་དལ་གྱིས་འཁྱུད་ཞིང
མཉེན་ལྕུག་གི་ལག་ཟུང་དེར་གདུ་བུ་དལ་གྱིས་བསྐོན་ངེས
༤
དགུན་ཁའི་མཚན་མོ་ཧ་ཅང་འཁྱག
བདག་གིས་སྤྱན་ཟུང་བཙུམ་ནས
རྨི་ལམ་ཞིག་རྨི་འགོ་བརྩམས་དུས
གློ་བུར་དུ་སེམས་ཀྱི་རི་ལྡེབས་སུ་དགུན་གྱི་རླུང་བུ་ལྡང་བྱུང
དགུན་ཁར་འབྱར་བའི་གྲང་རླུང་གིས
གཙང་བོའི་སྨྲ་བ་བཅད་སོང
རླུང་བུ་རྒོད་ཅིང་སྟོན་ལོ་ས་རུ་འཐོར་རྗེས་སུ
ཁ་བ་བབས་བྱུང
①ཁ་བ་ལྷ་མོའི་ཚིག་གཡར
2018/10/28
ཉམས་ཆུང་སྙན་ངག་པ་ཞིག་གི་སེམས་བསྐྱེད།
སེམས་པ་སྐྱོ་གདུང་གིས་བཟུང་ལ་ངག་མི་འཁྲོལ་བའི་ཕྱི་དྲོ་རེ་རེ།
ལག་ཟུང་ལྷོད་ཅག་གེར་བྲང་ལ་བཞག་ནས་བསམ་གཞིག་གི་འགྲམ་པར་རེག
སང་ཉིན་གྱི་གནམ་གཤིས་ལ་སེམས་ཁྲལ་བྱས་ནས།
རྒྱང་རིང་གི་ཞིང་ས་དང་ནམ་མཁར་བལྟས།
ང་ནི་ཉམས་ཆུང་གི་སྙན་ངག་པ་ཞིག
སྒྱུ་འཕྲུལ་གྱི་གཤིས་སུ་གྲུབ་པའི།
སྒྱུ་རྩལ་གྱི་སྤང་ཐང་ཁྲོད་ན།
ནང་སེམས་ཀྱི་བརྩེ་བ་གྱོན་ཏེ།
སྙན་ངག་གི་མཛེས་པ་འཚོལ་འདོད།
ཚིག་དང་ཐ་སྙད་ཀྱི་འཇའ་ཚོན་གྱོན་འདོད།
སེམས་ཀྱི་འབོད་སྒྲ་སྟོང་བའི་དབྱིངས་སུ་གྱེར།
ཐ་སྙད་དང་ཚིག་ལ་བརྒྱུས་ནས་བྱུང་བའི་ཡིག་འབྲུ་འདི་དག
གཅེས་སུ་འོས་པའི་བདག་གི་མི་ཚེ་ཡི་སྲོག་རྟེན།
ཡིན་ནའང་། འཆི་བའི་དོང་ཁར་སླེབས་ཚེ།
ཐ་ན་རང་གིས་བྲིས་པའི་རྩོམ་ཉོག་དེ་དག་ཀྱང་དབང་མི་སྲིད།
སེམས་ཀྱི་ས་གཞི་ཁྱོན་ཆུང་བས།
ང་ནི་ཉམས་ཆུང་གི་སྙན་ངག་པ་ཞིག་སྟེ།
ངས་ལོ་ཟླ་དང་དུས་ཚོད་མགྱོགས་སོང་ཟེར་ནས་གཤེ་གཤེ་མི་གཏོང་།
ངས་ནད་ཡམས་ཀྱིས་ཟིན་པའི་ཕུང་པོ་འདི་བྱ་རྒོད་ལ་མི་སྟེར།
ངས་གཞན་གྱིས་དཔར་བའི་རྐང་རྗེས་ཀྱི་ནང་དུ་རྐང་བ་མི་སྤོ།
ངས་མེ་ལོང་གི་མདུན་དུ་ལང་ཚོ་མི་སྤུངས།
ངས་སྙན་འཇེབས་ཀྱི་པི་ཝང་དེ་བཞིན་ནང་སེམས་ཀྱི་སྨྲེང་བ་དབྱིངས་སུ་གཏོར།
ངས་འཇིག་རྟེན་གྱི་སྡུག་བསྔལ་མ་ལུས་པ་བཙན་གྱིས་བསུབ།
ངས་ལུས་ཅན་ཀུན་བགྲོད་པར་དཀའ་བའི་མྱང་འདས་ཀྱི་རི་རྩེར་སྤྲད་འདོད།
ངས་རང་ཉིད་ཀྱི་ངོ་གདོང་ལ་གདོང་འབག་མི་གྱོན།
ངས་ད་ལྟ་ནས་ཕུགས་འདུན་ཡོད་ཚད་ཉི་ཟླའི་མགུལ་དུ་སྒྲོན།
ངས་སེམས་ཤུགས་ཡོད་རྒུ་རྩལ་དུ་སྤྲུགས་ནས་དུས་ཚོད་ལ་མདུད་པ་རྒྱག་དགོས།
ཐ་སྐར། མིང་དངོས་ལ་བསྟན་པ་དར་རྒྱས། ལོ་རབས་དགུ་བཅུ་བའི་སྨད་ཀྱི་གྲྭ་གཞོན་རྩོམ་འབྲི་བ། མཚོ་སྔོན་པོའི་ཤར་རྒྱུད་མགོ་ལོག་པདྨར་སྐྱེས། དམའ་འབྲིང་མཐར་ཕྱིན་རྗེས། རྩིས་མདའ་དགོན་གྱི་ཚོགས་གྲལ་ཏུ་ཞུགས་ནས་འདོན་ཆོས། སྤྱོད་འཇུག ཐུན་མོང་རིག་གནས་སྐོར་དང་། དབུ་མ་འཇུག་པ་སོགས་ལ་སྦྱངས་བ་བྱས་ཤིང་། 2016ལོར་ཁམས་ཀྱི་གསེར་རྟ་བླ་རུང་ལྔ་རིག་ནང་བསྟན་སློབ་གླིང་དུ་ཞུགས་ནས་ཡང་བསྐྱར་ཐུན་མོང་རིག་གནས་དང་། ཚད་མ་རྣམ་འགྲེལ་སོགས་སྦྱངས། ཞོར་དུ་རྩོམ་རིག་གི་དཔེ་ཆ་བལྟས། བརྩམས་ཆོས་གང་མང་ཞིག་གཞུང་སྒེར་གྱི་དུས་དེབ་དང་མཆོད་མེ་བོད་ཀྱི་རྩོམ་རིག་དྲྭ་ཚུགས་སོགས་སུ་བཀོད་ཡོད། 2019ལོར་སྙན་ངག་སྐོར་གྱི་དེབ་གཅིག་བསྐྲུན་རྒྱུའི་སྟ་གོན་འགྲིན་ནས་ཡོད། ད་ལྟ་མུ་མཐུན་ནས་དཔེ་ཀློག་དང་རྩོམ་འབྲིའི་ལས་ལ་རྟུལ་གྱིན་ཡོད།