ལས་ནི་རླུང་བུ་ཇི་བཞིན་བར་སྣང་ཁམས་སུ་མངོན་པར་ལྡང་ཞིང་།།
མི་ཚོགས་སྲང་བར་དག་ན་ཉིན་མཚན་མེད་པར་འདུ་ལོང་འཁྲིག་ཚེ།།
བྲང་གོག་རྡོ་ལ་གཞུས་པའི་ཁོ་བོ་ཡང་ནི་འཚུབ་ཅིང་བྲེལ་བས།།
སྡུག་གི་གད་པ་མཐོན་པོ་ལུས་སེམས་གཉིས་ལ་ཡང་ཡང་དོད་བྱུང་།།
ནུབ་མཐའི་སྤྲིན་པ་དམར་པོ་ཚེ་རབས་དོར་བའི་ཚུལ་དུ་ལྷུང་སྟེ།
ཕྱི་དྲན་རྒྱ་མཚོའི་ཁ་རུ་སྲོག་གི་མེ་ལྕེ་ལམ་ལམ་འབར་དུས།།
ཆགས་སྡང་མཆེད་པའི་སྒོ་ཆེན་འཁོར་བའི་རི་ལ་ཕྱེ་བར་དོགས་ནས།།
ཨམ་གཙིགས་ཅི་མིན་སྙམ་པ་ལན་རེར་ལམ་ཐག་རིང་དུ་བུད་འགྲོ།།
རྒྱབ་རི་སྨུག་གིས་བཟུང་སྟེ་རྡོག་པོའི་གདན་ལ་རབ་རུབ་འཐིབ་ཅིང་།།
རྣམ་ཤེས་བོར་བའི་ཡུལ་ལ་བདག་ཡིད་གཏིང་ནས་སྐྱོ་བ་འདོན་ཞོར།།
རྟོག་བཏགས་སྒྱུ་མའི་ལོག་ན་སྐད་ཅིག་ཙམ་དུ་ཨ་ཐང་ཆད་ན།།
ལྷིང་འཇགས་དབུལ་བའི་མི་ལ་ཚེ་ཡི་ནང་སྙིང་ཡོད་དུ་མི་དཔེ།།
སྙིང་དང་གློ་ཕུག་མ་ལུས་ནམ་ཟླ་སྐྱ་བོས་བཙེམ་པར་བྱས་ཏེ།།
འཚོ་བའི་བཤུད་ལམ་རིང་མོ་སྲོག་དང་རྒྱུ་མའི་མཚམས་སུ་མཐེན་དུས།།
གནམ་གྱི་མྱ་ངན་བག་གོས་བདག་རང་ཅིས་ཀྱང་བགོ་བར་མཛད་དེ།།
གློ་བུར་འཚུབ་པའི་འོ་དོད་སྟོན་ལོ་རྒུད་པའི་ཉམས་དང་འདྲ་ཨང་།།
2017.5.25
མཚན་རྒྱབ་ཀྱི་ངག་རིག
ད་ནི་མཚན་རྒྱབ་ལ་ཟིན་འདུག
ཕྱི་རོལ་གྱི་དྲྭ་ཁར་བརྡུངས་བའི་ཆར་འབྲི་དེ་དག
ལས་མཐའ་ཟད་པ་ནང་བཞིན་བདག་གི་མདུན་ཐད་ནས་ཡང་ཡང་སྨྲེང་།
གློག་འོད་དང་འཚུབ་རླུང་རབ་མེད་བཙན་དམག་སྒོང་ནས་གཤར་བ་ལྟར།
འཇིགས་གཡེར་བའི་ཟོལ་གྱིས་ཉེ་སར་གཅར་ན་ཡང་།
ངས་སྔར་བཞིན་ཆུང་མ་ལ་སྙན་ངག་འབྲི་བཞིན་ཡོད།
མུན་ནག་དང་སྲོད་ཁ་རེ་རེར་ནི་ངེད་གཉིས་ཀྱི་ལྐོག་གྱུར་ཞིག་ཡིན་ཚོད་འདུག
སུས་ཀྱང་ཤེས་པར་མི་འགྱུར་ལ་བདག་གིས་ཀྱང་མི་དཔོག
སྟོང་འདང་གི་གཏིང་རིམ་ན་ལུས་པའི་ཕྱིར་མིག་དང་ཞེ་འདང་ཡོད་ཚད།
ཆར་པ་ལྷན་དུ་ཡུལ་འདིའི་ཕྱི་ནང་ཀུན་ཏུ་བབས་བྱུང་།
གཅིག་བྱས་ན་དབྱར་གྱི་རི་མོ་སྦྲུན་པའི་སྔོན་བརྡའང་ཡིན་སྲིད།
སྟོང་བའི་མཚན་ལྗོངས་སུ་རྩེན་པའི་སྙིང་གི་འཕར་ཁ།
སོང་ཟིན་གྱི་བྱུང་བ་སློག་པའི་གཤེད་མ་ཞིག
སེམས་ཀྱི་བང་རིམ་ལས་མཆེད་པའི་འཆར་ཡན་གྱི་ཁྲོད་དུ་འཁུམས་ཙ་ན།
ཡལ་གའི་སྒོང་གཤོང་ནས་གཞུར་བའི་ཆུ་ཐིགས་གྲངས་མེད།
བསྐལ་བའི་རི་ངོགས་ནས་ལྷབ་ལྷུབ་ཀྱིས་གཡོ་བའི་གཟན་སྣེའི་ངོས་སུ་ཟག
དོན་དངོས་སུ་བདག་ཉིད་ནི་འཆི་བར་ཉེ་བའི་མི་ཨང་།
2017.5.24