དོན་བདེན་གཉིས་གྲུབ་པའི་དགའ་སྟོན་ལ།།
དུས་རྟག་ཏུ་རོལ་བའི་ལྷ་ཡི་ལྷ།།
མ་འགྲོ་དྲུག་ཡིད་ཀྱི་ཞིང་ས་ལ།།
ཐུགས་བྱིན་རླབས་སྟོང་གིས་སྤྲང་ཆར་ཕོབ།།
ཤ་ཉེ་འབྲེལ་འདུས་པ་ཚོང་གི་མགྲོན།།
སྟོབས་འབྱོར་བ་ཐུན་གཅིག་རྨི་ལམ་ཙམ།།
སྐྱིད་རེས་མོས་དུས་བཞིའི་འགྱུར་ལྡོག་ཉིད།།
འདི་བསམ་བཞིན་སྨྲེང་གླུ་ངག་ནས་ཤོར།།
ཟས་མེད་ན་བཟའ་བཏུང་འབད་པས་འཚོལ།།
ཟས་ཡོད་ཀྱང་ཟད་ལ་རབ་དོགས་ནས།།
ཁྱིམ་ཡ་ཕུགས་མཛོད་དུ་བསྒྱུར་ན་འང་།།
ཡུན་ཐུང་ཐུང་མི་ཚེ་རྫོགས་ལ་ཁད།།
དོན་འགྲུབ་རྒྱུ་མེད་པས་འཇིག་རྟེན་གྱི།།
མཐའ་ཟད་རྒྱུ་མེད་པའི་བྱ་བཞག་ལ།།
ཡིད་གཏིང་ནས་ཆད་པས་སྐྱོ་གླུ་ཞིག།
དུས་དེ་རིང་ངག་ནས་དབང་མེད་ཤོར།།
ཁྲམ་གཡོ་སྒྱུ་རྩེད་མོའི་ཕྲེང་བསྒྲིགས་ཏེ།།
ཡུན་རིང་ཏུ་འབད་པ་བརྒྱ་ཕྲག་གིས།།
ལྐོག་ལྐོག་ནས་བསླུས་བས་མཛའ་གྲོགས་ལ།།
གློ་མཆིན་པའི་གཏིང་ནས་ཨ་ཐང་ཆད།།
ང་ཧ་ཅང་དབུལ་བས་སྐབས་ཐོག་དེར།།
གཉེན་ཉེ་འབྲེལ་ཡོད་མེད་མ་ཤེས་ཐ།།
ང་དེང་སང་འབྱོར་བ་རྒྱས་པའི་ཚེ།།
གཉེན་མང་བོས་བསྐོར་འདི་དགོད་པའི་གཞི།།
གང་བྱས་ཀྱང་རྣམ་རྟོག་སེམས་ངོས་ལ།།
གང་སྣང་བ་བདེན་པར་གྲུབ་མ་གྲུབ།།
སེམས་ནང་ལ་ཕྱོགས་ནས་བརྟག་བརྟག་མཐར།།
ནོར་མེད་ན་དབུ་མའི་ལམ་ཞིག་རྙེད།།
ཡུལ་མདོ་སྨད་ལྗོངས་ནས་རི་དྭགས་བཞིན།།
གནས་རྒྱས་མེད་འགྲིམས་པས་ཁ་འཁྱམས་ངའི།།
སེམས་བྲན་ལ་ཤོར་བའི་སྐྱོ་གར་འདི།།
དོན་གལ་ཆེན་བརླགས་པའི་སྔ་ལྟས་རེད།།
དེ་བསམ་བཞིན་སྣང་བ་མི་རྟག་པ།།
བདུད་ཨ་སྟག་ལྷ་མོའི་ཁྲོ་འཛུམ་བཞིན།།
རེ་དཀར་ལ་ནག་པོའི་རྗེས་དྲན་འདི།།
བུ་བྲན་མིང་བ་ཡིས་ཤར་མར་བྲིས།།